Priesthood en Aaron: Mwekidida oh Doadoahngki Manaman en Koht

Ahnsou kis samwalahro ni ei pato South Africa I iang Thabiso, sounsawas keieu nan pwihn en priest kan nan ward en Kagiso kohla ni ihmw ieu. Thabiso oh ah pisopo, me kin kakaun oh kolokol kih kan ong pwihno, kin wie kapakapki towehkan me solahr kalapw pwarodo, raparapahki kaweidpen ihs me re pahn pwarek oh ia duwen ahr kak sewese irail. Pepehm ehu lel ira me ren kohla ni imwen Tebello, oh ira lukeie I en iang ira.

Ni ansou me se dauliala kidi kommwado, se douluhllongala nan ihmwo rehn Tebello, me wia mwahnakapw meleilei men me solahr pwarala sarawi pwehki eh kin kalapw kediropwla Rahn Sarawi kan. Eh ekis saloh ahpw E pil pereniki aht kak pwarala oh pil luke ah peneinei en iang ih. Pisopo ahpw kasalehda ah limpoak ong peneineio oh duwen eh inengieng sewese irail pwe ren kak katengtengpene nan tehnpas sarawi oh wiahla peneinei soutuk. Arail mohngiong kan mwekidida, oh kiht koaros kak kehn me Ngehn Sarawi kaweid koasoai oh madamadau koaros.

Ahpw iei ahn Thabiso eh koasoai kan me uhdahn mie lipwe nan mwemweitpene wo. Likamwete priest pwulopwulmeno koasoakoasoaiki mahsen en tohnleng kan---mahsen en limpoak me kiht koaros wehwehki, ahpw me ni mehlel sair kompoakapaho. “Ih kin uhdahn pereniki ansou koaros koasoaiong uhk ni imwen sarawio,” eh nda. “Ke kin kalapw ndahiongie lokaia mwahu kan. Oh ke ese me atail pwihn en soccer-o mwerpeseng pwehki ahmw solahr iang. Kowe me uhdahn maieng.”

“Menlau mahk,” Tebello sapengki. “I pahn pwurowei rehmwail.”

“Men uhdahn pahn kaselel douluhl,” Thabiso nda. “Ke tamatamante mwomwen ata kin kaunopada en papah ni duwen misineri kan? Kita kak pwurehng tepida?”

“Ei,” Tebello sapengki. “I men pwurowei.”

Mwein peren keieu laud me I kehn ni ei wia emen sounsawas nan presidensi lap en Pwihn en Mwahnakapw Akan iei ei kin kilang irail akan me kolokol Priesthood en Aaron nan sampah ahr kin wie doadoahngki manaman en Priesthood en Aaron. Ahpw ekei pak I kin kilang, ni ei kin pahtoukihla, duwen mwahnakapw tohto ahr sohte wehwehki uwen mwahu me re kak wiahki manaman me re kolokol.

Priesthood iei manaman oh mweimwei sang rehn Pein Koht pwehn sewese Sapwellime serihkan. Oh ihte ma koaruhsiehn mwahnakapw akan, koaros me kolokol Priesthood en Aaron, kak wehwehki mwahu me ah priesthood kolokol kih kan en papah en tohnleng kan. Ma re kakete wehwehki me re kolokol pwukoa sarawi en sewese kompoakapahrail kan en diar ahl me weidlahng Sounkomour. Ma re kakete ese me Sahm Nanleng pahn ketkihong irail manaman en kawehwe mehlel kan en rongamwahu kopwurupwurdohu ni dehde oh marain pwe aramas teikan en kak kehn mahsen mehlel kan en Krais me sohte me kak kahmahmkihla.

Kompoakapahi mwahnakapw akan en Mwomwohdiso wet, mweidohngie I en kihieng kumwail peidek ehu me I kasik kumwail pahn tamataman erein amwail mour. Mehnia manaman me kumwail kak alehdi pohn sampah me laudsang priesthood en Koht? Mehnia manaman me pahn kakete laudsang koahiek en sewese Samatail Nanleng ni wekidala mour en aramas, sewese irail pohn ahl me weidlahng peren soutuk oh ren pil kak kamwakeldahsang dihp oh wiewia sapwung kan?

Duwehte manaman teikan, priesthood anahne en kin doadoahk pwehn kak kapwaiada sohte lipilipil me mwahu. Kumwail malipilipehr en “mwekidida oh marainwei ni duwen karasaras” (tehk D&C 115:5), kaidehn en ekihla amwail marain nan rot. Irailkante me soupeikasal me pahn iang wadawadohng me pilipilda kan. Ni amwail pahn doadoahngki manaman en amwail priesthood sarawi, amwail soupeikasal oh koapwoaroapwoar pahn laudla. Mwahnakapw akan, kumwail ese me kumwail mih nan amwail mwahu koaros ni ansou me kumwail kin wie papah Koht. Kumwail ese me kumwail kin keieu peren ni ansou me kumwail kin ngoangki ni pwerisek en wia doadoahk mwahu. Kalaudehla manaman en priesthood rehmwail ni amwail pahn kin mwakelekel oh kin warohng.

I men utung poahngok me Elder Jeffrey R. Holland ketkihieng kumwail sang nan mwoahl wet sounpwong weneu samwalahro. “I wie raparapahki,” eh mahsanih, “ohl me pwulopwul oh me mah me nsenohki itar mahwin wet me wihwiawi nanpwungen me mwahu oh me suwed pwe ren kohdo iangala oh kihda ngilarail. Kitail mih nan mahwin.” E doula, “…I peki ngihl me ahpwete kehlail oh loaloapwoat, kaidehn ngihl ehu me uhwong ihte me suwed … , ahpw ngihl ehu me uhki me mwahu, ngihl ehu me uhki rongamwahuo, ngihl ehu me uhki Koht” (“We Are All Enlisted,” Liahona oh Ensign, Nohpempe 2011, 44, 47).

Ei, kumwail me kolokol Priesthood en Aaron, kitail mih nan mahwin. Oh nan mahwin wet, wiepe me keieu mwahu en doarehla me suwed iei en kin uhki me pwung. Kumwail sohte kak rongorong lokaia suwed ahpw mwomwehda me kumwail sohte rong. Kumwail sohte kak kilang, pein kumwail de rehn ekei tohrohr, kilel kan me samin ahpw mwomwehda me kumwail sohte kilang. Kumwail sohte kak doahke mehkot me samin ahpw mwomwehda me E sohte wiahda mehkot laud. Kumwail sohte kak sousoumwekid ansou me Sehdan raparapahki en kauwehla mehkoaros me unsek oh mwakelekel. Ahpw kesihnenda oh uhki dahme kumwail ese me mehlel! Ni omw pahn rong de kilang mehkot me kin uhwong koasoandi kan en Kauno, tamataman ihs kowe—emen sounpei nan karis kan en Koht, me rosonkidahr Sapwellime priesthood sarawi. Sohte dipwisoun mahwin me mwahusang pwehn pelianiki imwintihtio, pahpa en likamw, me mwahusang mehlel me pahn kohsang nan ewemwen ni omw pahn doadoahngki manaman en priesthood. Palilaud en iengomw kan pahn waunkinuhk pwehki omw soupeikasal oh mehlel. Ekei sohte pahn. Ahpw sohte katepe. Ke pahn alehdi wahu oh likilik sang rehn Sahm Nanleng pwehki omw doadoahngki Sapwellime manaman pwehn kapwaiada Sapwellime doadoahk.

I luke presidensi koaros en pwihn kan en Priesthood en Aaron en pwurehng kauwada pilaik en saledek oh en kihpene oh kaunda noumwail sounpei kan. Doadoahngki amwail manaman en priesthood sang ni luke me kapil kumwail en kohdo rehn Krais ni koluhla oh pepdaisla. Kumwail ahniki pwukoa oh manaman sang Sahm Nanleng en kapwaiada met.

Sounpar riau samwalahro, ni ei patohla Santiago, Chile, I kepingahla mehlel Daniel Olate, mwahnakapw men me kin kalapw ieiang misineri kan. I peki en ntingdohngie, oh sang ni ah mweimwei I pahn wadekohng kumwail kisehn nah email-o: “I apwtehn lel sounpar 16, oh Rahn Sarawi nekiero I patohwan kasarawihong nan ohpis en priest. Rahnohte I pepdaisihala emen kompoakapahi; ede Carolina. I padahkihong ih duwen rongamwahuo, oh eh kin ieiang sarawi oh E pil alehdier kisakis en Keirdahn Emenemen, ahpw ah pahpa nohno sohte mweidohng ih en pepdaisla lao re eseiehla oh koapwoaroapwoarkiniehla. E mwahuki I en pepdaisihla ih, eri se anahne awihki sounpwong ehu lel Rahn Sarawi, ansou me I lella sounpar 16. I nsenamwahuki mehlel ahi kak en sewese aramas mwahu menet en kak pepdaisla, oh I inenen pereniki pwe ngehi me pepdaisihala ih.”

Daniel wia emente kisehn mwahnakapw tohto nan sampah me wie momourki manaman me Koht ketkihong irail ni likilik. Pil emen iei Luis Fernando, sang Honduras, me kasawihada me kompoakapah men wie alialu pohn ahl keper oh ih eri ehukihong ih ah kadehde, oh ni mehlel doarehla ah mour (tehk “A Change of Heart,” lds.org/youth/video). Olavo, sang Brazil, pil wia emen karasaras mwahu. Emen sounkalohk mehlel nan imweo (tehk D&C 84:111), Olavo kangoangehki ah nohnohu en pwurodohng towehda mehlel Mwomwohdiso (tehk “Reunited by Faith,” lds.org/youth/video). Kumwail kak diar ekei soai pwukat oh tohto me duwehte nan en Mwomwohdiso websiteyouth.lds.org ong me pwulopwul kan. Kumwail en ese, Internet, mehn kapehse, oh dipwisou teikan en mwehi wet wia dipwisou kan me Koht ketkihieng kumwail pwehn seweseikumwail ni amwail kapwaiada amwail pwukoa kan en priesthood oh pwehn kalaudehla lipwen me mehlel oh me mwahu.

Kempoakepahi mwahnakapw oko, ni amwail pahn doadoahngki amwail Priesthood en Aaron ni wiepe me I koasoaiahier, kumwail pahn wie kaukaunop pein kumwail ong pwukoa kan en ehu rahn. Ahpw dahme kumwail wiewia laudsang met. Duwehte Sohn Sounpapidais, emen me kol Priesthood en Aaron me wia mehn kahlemengih kaselel, kumwail pil wie kaukaunop ahl en Kauno oh kakainene Sapwellime ahl akan. Ni amwail kin kalohngki ni eimah rongamwahu en koluhla oh pepdais, duwehte me Sohn wia, kumwail pil wie kaukaunop aramas mwohn ketidohn Kauno (tehk Madiu 3:3; D&C 65:1–3; 84:26–28). Kumwail kin kalapw rong duwen mwahu lap me kumwail kak wia. Eri, ansou wet iei ansou en mwekid oh wia uwen amwail kak, en doadoahngki amwail koahiek koaros me Koht ketkihong kumwail pwehn kapaiada mehteikan, wairaildo sang nan rotorot ong nan marain, oh kaunopada ahl en Kauno.

Mwomwohdiso kihongkumwailehr pwuken Pwukoa ong Koht me wia elen sawas pwe kumwail en esehla oh kapwaiada amwail pwukoa kan. Kin kalapw onopki. Kelepwikihdi pohn pwukiomw kan, dohsang dipwisoun technology kan en mwehi wet, oh rapahki kaweid en Kauno. Oh eri mwekidida oh doadoahngki manaman en Koht. I inoukihong kumwail me kumwail pahn alehdi pasapeng kan sang rehn Sahm Nanleng me pid duwen apwalih pein amwail mour oh duwen sewese aramas teikan.

I kapwurehieng mahsen kan en President Thomas S. Monson: “Dehr katikala uwen lipw kamwahu mwuledek en ahmw kadehde. … Kumwail ahniki koahiek en kilang dahme ekei tohrohr sohte kin tehk mwahu. Ni amwail ahniki pwoaren mas pwehn kilang, saleng pwehn rong, oh mohngiong pwehn pehm, kumwail kak kapahwei pehmwail oh doarehla mehteikan. (“Be Thou an Example,” Liahona oh Ensign, Mei 2005, 115).

I kadehde ong kumwail me manaman en priesthood mehlel. I alehdi ahi kadehde sang ni ahi pein doadoahngki priesthood. I kilangehr manaman kan me kin wiawi sang rehn irail akan me kolokol manaman en Priesthood en Aaron. I pil alehdier pein ahi kadehde sang ni mwekidki priesthood. I kilangehr manaman ngeder me pweida sang irail akan me ahniki manaman en Priesthood en Aaron. I kadehdehier manaman en kalohk en tohnleng kan ni ansou me irail me kolokol Priesthood en Aaron ni loaloapwoat kin kihda mahsen me direki Ngehno oh koapwoaroapwoar, oh sairehr mohngiong en irail me anahne marain oh limpoak. Ni mwaren Sises Krais, atail Kaun, atail sounkaweid, oh atail Sounkomour, ahmen.