Nofo i le Itu a le Alii!

Sa saunoa mai Peresitene Thomas S. Monson i se tasi taimi: “Sei ou tuuina atu se taiala faigofie e mafai ona e fuaina ai filifiliga lua te fetaiai. E faigofie ona e manatuaina: ‘E le mafai ona e sa’o i le faia o se mea sese; e le mafai ona e sese i le faia o se mea sa’o’” (“O Le Auala i le Faaatoatoaina,” Liahona, Iulai 2002, 112). O le taiala a Peresitene Monson e faigofie ma tuusao. E tutusa lava le faagaoioiga e pei o le Liahona lea na tuuina atu ia Liae. Afai tatou te faatinoina le faatuatua ma maelega i le usitaia o poloaiga a le Alii, o le a faigofie ona tatou mauaina le taitaiga sao e mulimuli ai aemaise pe a tatou feagai ma filifiliga o aso uma.

Ua apoapoai mai le Aposetolo o Paulo ia i tatou e uiga i le taua o le lulu i la le Agaga ma le nofouta ia aua nei lulu i la le tino. Sa ia faapea mai:

“Aua nei faaseseina outou; e le ulagia le Atua: aua o le mea e luluina e le tagata, o le mea lava lea e seleseleina mai ai e ia.

“O se lulu i la lona tino, e selesele mai ai e ia i la le tino le mea e pala; a o se lulu i la le Agaga, e selesele mai ai e ia i la le Agaga le ola faavavau.

“Aua nei tatou faapalapala i le amio lelei: aua o ona po e tatau ai tatou te selesele mai ai, pe afai tatou te le faavaivai” (Kalatia 6:7–9).

O le lulu i la le Agaga o lona uiga o o tatou manatu, upu, ma amioga ua tatau ona siitia atu ai i tatou i le tulaga paia a o tatou matua faalelagi. Ae peitai, ua faatusa e tusitusiga paia le la le tino o se tulaga faaletino po o tuinanau o le tagata faalenatura, lea e faatagaina ai tagata ina ia faatosina atu e ala i le lagona malosi, manaoga, naunauga, ma tuinanau o le tino nai lo le saili mo se uunaiga mai le Agaga Paia. Afai tatou te le faaeteete, e ono uunaia i tatou e na faatosinaga tuufaatasi ma uunaiga o le amioleaga i le lalolagi ina ia tatou taliaina uiga le mama ma lepopoi e ono avea ma vaega o o tatou tulaga faaletagata. Ina ia mafai la ona aloese mai na aafiaga leaga, na faatonuina ai e le Alii le Perofeta o Iosefa Samita e faaauau pea ona lulu i la le Agaga: “O le mea lea, aua le faavaivai i le faia o mea lelei, ona o lo o oulua faataatiaina le faavae o se galuega tele. Ma o mea iti e tutupu mai ai mea tetele” (MF&F 64:33).

Ina ia faateleina lo tatou agaga, e manaomia ina “ia te’a ma i [tatou] upu faafiufiu uma lava, ma le lotoa, ma le ita, ma le leo tele, ma le upu leaga, atoa ma le loto leaga uma lava” (Efeso 4:31) ma ia tatou “popoto i aso o la [tatou] vaavaaiga [ma] tafi ese mai ia te i [tatou lava] mea le mama uma” (Mamona 9:28).

A tatou suesue i tusitusiga paia, tatou te aoao ai i folafolaga na faia e le Alii ia i tatou ma ua faalagolago lea i lo tatou usiusitai ma uunaia ai le ola amiotonu. O na folafolaga ua tatau ona fafagaina ai o tatou agaga, aumaia ai ia i tatou se faamoemoega e ala i le faamalosiauina o i tatou ina ia aua nei o tatou fiu e oo lava i le feagai ai ma o tatou luitau o aso uma o le ola ai i se lalolagi ua amata ona mou ese atu ona tulaga faatauaina o le sa’o ma le lelei, ma o lea ua musuia ai tagata ina ia atili lulu i la le tino. Ae o faapefea ona tatou mautinoa o loo fesoasoani a tatou filifiliga ia i tatou e lulu i la le Agaga ae le o la le tino?

I le toe ta’u maia o fautuaga a lona tama matua, sa saunoa ai Peresitene Siaosi Alapati Samita faapea: “Ua manino se laina tuaoi i le va o le itu a le Alii ma le itu a le tiapolo. Afai o le a e tumau i le itu a le Alii o le a e i lalo o lana uunaiga ma o le a leai sou manao e faia mea sese; ae afai e te laasia le itu a le tiapolo tusa lava pe tasi le inisi, ua e i ai i le mana o le tiapolo ma afai e manuia ana taumafaiga, o le a le mafai ona e mafaufau pe fetuunai faalelei aua o le a e le maua le Agaga o le Alii” (Aoaoga a Peresitene o le Ekalesia: Siaosi Alapati Samita [2011], 191).

Ma o lea la, e tatau ona tatou fesili ifo faapea i aso uma, “Pe o au amioga ea ua tuuina ai au i le itu a le Alii po o le itu a le tiapolo?”

Na lapataia e le perofeta o Mamona lona nuu e uiga i le taua o le mauaina o le tomai e iloa ai le lelei mai le leaga:

“O le mea lea, o mea uma ua lelei e mai le Atua; ma o le mea ua leaga e mai le tiapolo; ona o le tiapolo o se fili i le Atua, ma ua faasagatau pea ia te ia, ma ua valaau ma faatosina tagata i le agasala, ma ia latou faia pea le mea leaga.

“Ae faauta, o le mea ua mai le Atua, e valaau ma faatosina mai ia faia mea lelei e le aunoa” (Moronae 7:12–13).

E tatau ona fesoasoani le Malamalama o Keriso faatasi ai ma le mafutaga a le Agaga Paia tatou te fuafua ai pe o tulaga o tatou ola ai ua tuuina ai i tatou i le itu a le Alii pe leai. Afai e lelei a tatou amio, ua musuia e le Atua, aua o mea lelei uma lava e sau mai le Atua. Ae peitai, afai e leaga a tatou amio, ua faatosinaina i tatou e le tiapolo aua na te uunaia tagata e faia le mea leaga.

Ua ootia lava lo’u loto i tagata Aferika ona o lo latou naunautai ma le maelega ina ia tumau i le itu a le Alii. E oo lava i tulaga faigata o le olaga, o i latou ua talia le valaauga e o mai ia Keriso ua avea ma se malamalama i le lalolagi. O ni nai vaiaso ua tuanai ao ou asiasi i se tasi o uarota i Aferika i Saute, sa ou maua ai se avanoa matou te malaga faatasi ai ma ni ositaulaga talavou se toalua, o le la epikopo, ma le la peresitene o le siteki i se asiasiga i alii talavou o le la korama ua le toe toaaga mai. Sa matua faagaeetia lava au e ala i le lototele ma le agamalu na faaalia e na ositaulaga e toalua ina ua la valaaulia ia alii talavou ua le toe toaaga mai ina ia toe foi mai i le lotu. Ao latou talatalanoa ma na alii talavou ua le toe auai mai, sa ou matauina le atagia mai i o laua foliga o le malamalama o le Faaola, ma sa faatumulia i lena lava taimi i latou uma sa siomiaina i laua i le malamalama. Sa la faatinoina lo la tiute ina ia “fesoasoani i e vaivai, sii i luga lima ua tautau i lalo; ma faamalosi tulivae ua vaivai” (MF&F 81:5). O uiga faaalia o na ositaulaga e toalua na tuuina ai i laua i le itu a le Alii, ma sa la auauna atu o ni meafaigaluega i Ona aao ao la valaauliaina isi ia faia foi faapea.

I le Mataupu Faavae ma Feagaiga 20:37, o loo aoao mai ai i tatou e le Alii i le uiga o le lulu i la le Agaga ma le tulaga tonu lava e tuuina ai i tatou i le itu a le Alii, e pei ona ta’ua i lalo: faamaualalo i tatou lava i luma o le Atua, o mai ma le loto momomo ma le agaga salamo, molimau atu i luma o le Ekalesia ua tatou salamo faamaoni i a tatou agasala uma, ave i o tatou luga le suafa o Iesu Keriso, ia i ai se naunautaiga e auauna atu ia te Ia e oo i le iuga, faaali e ala i a tatou galuega ua uma ona tatou mauaina le Agaga o Keriso, ma ua taliaina i tatou i totonu o Lana Ekalesia e ala i le papatisoga. O lo tatou naunautaiga e faataunuu nei feagaiga ua saunia ai i tatou e nonofo i le afioaga o le Atua o ni tagata faaeaina. O le manatuaina o nei feagaiga e ao ona taiala ai a tatou amio e faatatau i o tatou aiga, i a tatou fegalegaleaiga faamasani ma isi tagata, aemaise lava o lo tatou sootaga ma le Faaola.

Na faatulaga e Iesu Keriso se mamanu atoatoa o le amio lea e mafai ona fausia ai a tatou amio ina ia mafai ona faataunuuina nei feagaiga paia. Sa aveesea mai e le Faaola mai Lona soifuaga soo se faatosinaga na ono faalavelave i Lona taulai atu i Lana misiona paia, aemaise lava ina ua faaosoosoina o Ia e le fili po o i latou foi o e na mulimuli ia te Ia ao Ia galue ai i lenei lalolagi. E ui e le’i agasala o Ia, sa Ia maua le loto momomo ma le agaga salamo, tumu i le alofa mo lo tatou Tama Faalelagi ma mo tagata uma. Sa Ia faamaualaloina o Ia lava i luma o lo tatou Tama o i le Lagi, faagalo Lona lava finagalo ina ia faataunuu le mea na finagalo i ai le Tama ia te Ia i mea uma lava seia oo i le iuga. Na oo lava i le taimi o le matua tiga faaletino ma le faaleagaga, na tauaveina le mamafatu o agasala a tagata uma i Ona tauau ma na afu toto mai pu ninii o Lona tino, ma sa Ia fetalai atu i le Tama, “Aua le faia lo’u loto, a o lou finagalo” (Mareko 14:36).

O la’u tatalo, uso e ma tuafafine, ao tatou mafaufau ai e uiga i a tatou feagaiga, ia tatou tausia i tatou lava ma le malosi e faasaga atu “i u fanafana mu a le fili” (1 Nifae 15:24), ma mulimuli i le faataitaiga a le Faaola ina ia mafai ona tatou lulu i la le Agaga ma tatou nonofo ai i le itu a le Alii. Sei o tatou manatua le taiala a Peresitene Monson: “E le mafai ona e sa’o i le faia o le mea sese; e le mafai foi ona e sese i le faia o le mea sa’o.” Ou te faia ai lenei tautalaga i le suafa o Iesu Keriso, amene.