Ma fa Chi Bitir e Ra Gagyed Nag Raed

Rok President Boyd K. Packer

President ko fare Ulung ko fare Ragag nge L’agruwi Apostle


Pi pumo’on nge pi ppin nge thingar ri nanged fan e bin somm’on e calling roraed—ni ri dabin pag raed riy—ni ngorow nge bitir rorow.

Bukun e duw kafram, ko ba nep nib garbeb u lane train station u Sapan, mug rung’ag lungaen bee’ nibe si tutuguy e winda ko karo rog. Bay boechi pagal nibe sak’iy nike ulum nibe chuw ko maad nib mak’alit nge maad nikan m’ag nga langan nike thow. Rib mak’alit loelgen. Be koel ba kobre’ nge ba spun ni rib mak’alit, ba pow ko bitir ni dariy e tabinaew rok nibe wenig nag e salpiy. Napan ni gube gay rogon ni ngug pi’ e salpiy ngak, me yaen fare train.

Ri dabgu pagtilin e chi pagal nem nibe sak’iy u fithik e garbeb nike belig, nibe koel e kobre’ rok ni dariy ban’en riy. Ma ku dabgu pagtilin rogon nike kireb rogog napan ni yaen fare train mug digey u rom nibe sak’iy u dakean e platform.

Boech e duw u Cusco, ba donguch u lan yu Andes u Peru, mug tew i Elder A. Theodore Tuttle e mo’olung ko sacrament u lan ba senggil, nib n’uw mab ga’ nib mab nga lane kanawo’. Ba nep, ma rib garbeb napan nibe non Elder Tuttle, ma boechi pagal, sana ba nel’ e duw rok, ni sak’iy nga langan e maab. Kemus nibe chuw ko ba kenggin nib mus nga bugun.

Ban gilay’ romow ma bay bochi tebel nibay e plet nge flowa u langgin ni fan e sacrament. Chi bitir ney ni dariy e tabinaew rok nike belig e sap ko fare flowa me siyibyib u downgin e rungrung i yib ngay. Ke chuchgur ko fare tebel napan ni saap ba ppin me guy. Me chechgeg loelgen, me tuluf nga fithik e lumar. Gag rog ma dabug.

Ta’aboch me sul biyay fachi pagal. Me siyibyib u downgin fare rungrung, me sap ko fare flowa nge gag. Napan ni chuchgur ko gin ni ra sap fare ppin me guy, mug ki’iyag pa’ag ngak, me mil i yib ngog. Mug koel u dakean eg.

Me aram, boed e pow ko ban’en, mug tay nga dakean e chiya rok Elder Tuttle. Napan ni m’ay fare meybil ma fare pagal e mil nga fithik e lumar.

Napan ni gu sul nga tabinaew, mu goeg ngak President Spencer W. Kimball mornga’agen e n’en nike buch rog. Ma kari but’ ngak me ga’ar ngog, “Gabe koel e nam u dakean em.” Me yoeg ngog ni bukun yay, “Binir nike buch rom e pow ni rib falel’ ko rogon ni ga manang.”

Napan ni gu guy e pi nam u Latin America ni chuchgur i gama ra’ay yay, ma gube sap nag e ra pagal nem u fithik e gidii’. Chiney e gumanang ko mang e be yup fan President Kimball.

Ku ku mad’eg reb e pagal nike ulum u dakean e kanawo’ u Salt Lake City. Reb e nep ko winter ni rib gel e garbeb. Gamad be chuw ko ba abich ko Christmas ko ba hotel. U lane kanawo’ e yib nel’ fa meruk e pagal nibe mada’ lungun raed ngalang. Yaed gubin ni susun ni ngar pired u tabinaew ni ngan chuw u fithik e garbeb.

Reb e pagal e dariy e kenggin rok. I og nib machrag ni nge chuw u fithik e garbeb. Me thumur nga barba’ e kanawo’, nga sana ba apartment, nib achig, nge ba bet ni dani gaman e gulgul riy ni nge gowal nag.

Balayal’, napan ni gu waen nga tan e gulgul, mug pi’ e meybil ni fan e picha’an ni dariy e bet rok nib gowal ni rayog ni nge yan ngay.

Guma murwel u Osaka, u Sapan, napan ni tal e World War II . Ke wagay e donguch, ma kanawo’ e ke sug ko simen, dow, nge loewaen e donmach. Mus ni oren e gak’iy nike m’ay, ma boch’uw e kuba nib suwon nike wagay kenggin ma bay e athamgil riy ni nge sumneg boech yowan.

Boechi bulyol nibe chuw ko ba kimono, nib alit mab color nibe kunuy yowan e sycamore nga fithik boech nike kunuy. Fachi bitir e boed ni dar tiyan’ ko wagay nib liyeg napan nibe kunuy yowan e gak’iy ko tirok. Ke pir’eg e n’en nib fal’ ya’an ko gin ni ba riy. Sana ngga’arir e bang nib fal’ ya’an ko gin ni bay riy. Rogon ni ragu leam nag me be gel nag e mich rog. U lane fare bitir e bay e athap.

Ke fil Mormon ni “bitir nib achichig ma bafos rok’ Kristus”1 ma dani tu’uf ninge kalngan’.

U lane reb e duw kafram, ma l’agruw e tamachib e yow be murwel u fithik e burey u baen lel’uch ko yu Mariken. Reb e rran, u dakean boechi burey, miyow guy e gidii’ ni yaed be mukun nga bang ni palog nga pe’n’ing. Fare gal tamachib e dani yo’or e gidii’ ni yag ni ngar machib gow ngak, ere miyow yaen ko gin ni yibay riy.

Ke lumach boechi pagal, ere ngan tay e magawon. Galabthir rok e kan pining e padrey ni nge “yoeg boech e thin” ni fan ko pagal ni faak row. Fare gal tamachib ar sak’iy gow u tomur niyow be saap ko fare papa’ nge nina’ ni yow be yoer man tabab nag e meybil. Fa’anra ra galabthir ney e yow ba leam nag ni nge non e ra pumo’on ney ni nge faleg laniyaen row, ma ra kireb ko tafiney rorow.

Me wulthin ngorow ni daworun tawfe nag fachi pagal. Kan tay ni dan rrin ya demtrug rogon, ma chiney e dabkiyog. Me yoeg ngorow nib tagan rogon ni faak row ni pagal e ra yaen nga infiyarno. Ma kireb rorow. Ma ngan tay e kireb nga dakean row ni bachane gafgow rok.

Napan ni m’ay fare meybil ma kan tharey fare yam’, me yaen fare gal elder ko fare gal labthir ni yow be yoer. “Gomow e tapigpig rok Somoel,” e kar yoegnew ngak fare nina’, “ma ku bow ni bay e mulwol ni fan ngomew.” Napan nibe motoyil fare gal labthir ni yow be yoer, me bi’eg fare gal elder ko pi yi’iy mar yognew e mich rorow ko fapi kiy nikan fulweg ni fan ko fare wo’en e bayul ko yafas nge yam’.

Bay boech e runguy rog ngak e ra padrey nem. Be rrin’ gelngin ni rayog rok ni u fithik e tamilang nge llowaen’ ni bay rok. Machane bay e n’en ni susun ni nge pi’. Binem e ga’ngin yang ko fare gospel.

Pi elder e yaed ma yib ni yaed e ta gapas, tafanow, pi tapigpig rok somoel, nikan pi’ mot’won raed ni ngar machib niged fare gospel rok Yesus Kristus.

Pi bitir ney ni ku weliy mornga’agen raed e yaed be yup’ fan gubin pifaak e Chitamangdad nu Tharmiy. “Bitir e ba tow’ath nma pi’ Somol: nge … Ba felfelan’ e re mo’on ni bay e mit i gan e gat’ing nem rok.”2

Yafas nikan sumneg e ba murwel nib falel’ ni fan ko gidii’ nib mabgol. Ba momaw’ ko gidii’ ni nge mangil ma nge mang e galabthir nib mangil. Dariy e pumo’on fa ppin ni rayog ni nge fakay e bitir ni go’ir. Ra bitir nem e ba tu’uf ni nge yag l’agruw e galabthir ngak—papa’ nge nina’. Dariy ban’en fa reb e kanawo’ ni rayog ni nge yoen’ loen e biney.

Kafram ma ba ppin nibe yoer e yoeg ngog ni napan nibay u college me rrin’ ba oloboch ni yow e fagar rok ni pumo’on. Fare pumo’on e yoeg ni ngan li’ fare bitir. Ta’aboch riy miyow mu’ ko college mar mabgol gow me yag boech e bitir ngorow. Me yoeg ngog rogon e gafgow rok e chiney ni nge sap ko tabinaew rok, pifaak nib falfalen’, me guy ko tafiney rok bang, ni dariy ban’en riy e chiney, gin ni bay e ra bitir nem riy ni dariy rok.

Fa’anra nang fan e ra gal mabgol ney mar murwel gow ko fare Bayul, ra yow ra nang ni pi n’em nike buch nge pi amith nib chagil ngorow e rayog ni ngan thangthang. Dariy ba amith ni ra paer nib manemus. Dani moem, machane yafas e gathi nge moem fa nge mangil rogon. Kalngan’uy nge athap nima feek e n’ag fan e gubin ngiyal’ ma ba mangil’

Reb e mabgol e non ngog nibe yoer ni kafin nir bow ko togta nikan noeg ngorow ni dabyog ni ngar fakyew e bitir. Kari kirbaen row ngay ko fare news. Ma kar gin’ gow ngay napan ni goeg ngorow ni yow ba tawa’ath. Miyow leam nag ko mongfan ni ku goeg e binem. Mu goeg ngorow ni gin ni yow bay riy e ba mangil ko boech e mabgol ni be yag ni ngar manged e galabthir machane dar fal’eg ned e tin nib mil fan ngoraed.

Mu ga’ar ngorow, “Mangil ya gimew ba’adag ni ngam fakyew e bitir, ma ra adag nir e ra tomal nag ko tin u lane yafas rom ya bachane ra pi’ e mo’owaer nge kirbaen’. Machane, mangil ya gimew ba’adag ni ngam fakyew e bitir ma dabyog ni ngam fakyew reb, ko picha’an ni rayog ma dabun ni nge faka’ e bitir.”

Kubay boech e mabgol ni dawor mabgol gaed ma dariy e bitir roraed. Boech, rogon e magawon ni daryog roraed, e ngar chugliyed e bitir ni i go’ nina’ fa papa’. Tiney e boech e ban’en nib temporary. Ya’an nib manechubog ko pin’en—gathi gubin ngiyal’ ma ma buch ko gidii’—tin mangil ni ngan mu’ nag.

“Ma fa’anra pagan’ rodad ngak Kristus e kemus ni fan ko biney e tamilang, me ere susun e gadad e pi’in ngari kireban’uy ngodad u roy u fayleng.”3

Tomuren gubin e gosgos u lane Galasia e ngan guy e pumo’on nge ppin rok nge pi bitir rorow ni yaed ba falfalen’ u tabinaew, ma fapi kenggin e yalen nge pi motochiyel ko fare gospel e be ayuweg raed, ma kar chiyliy raed ko fapi m’ag ko fare priesthood nib manemus. Figirngiy nge ppin roraed e thingari nangfan ned ni bin somm’on e call roraed—ni dabin chuweg raed riy—e fan ngorow nge pifaak row.

Reb e pin’en nikan pir’eg nib falel’ ko galabthir e gadad ma fil bukun mornga’agen e n’en nib ga’fan ko pifaak dad ko n’en ni gadad be rrin’ ko galabthir rodad. Gadad ra nang ni fare riyul’ nike yoeg Isaiah ni “ma fa chi bitir e ra gagyed nag raed.”4

U Jerusalem, “Me pining Jesus bochi tir, nge sak’iynag nga p’eowcherad,

“Me ga’ar, Mu ted fanmediyan ko re bugithin ni ba’aray, fa’anra dab mpiggad ngam boded e bitir, ma ri dabiyag ni ngam uned ngalan gil’ilungun e tharmiy.

“En nra yan i par ni ir e th’abi tolang ko gagiyeg nu tharmiy e en nra sobut’nag ir nge bod e chi tir ney.”5

“Me ga’ar Yesus, Mpaged e pi bitir, nir ngarbad nog, dab mu taleged yad: ya gagiyeg nu tharmiy e fan ngak e pi’in bod e pi bitir ney.

“Me tay pa’ nga dakenrad nge yibilayrad nge mu’ me yan.”6

Kad bi’eged u lan fare Babyor ku Mormon mornga’agen e wub rok Yesus Kristus nga lane Fayleng nib Bi’ech. Ke gol nag e gidii’ me yibliy raed me yoeg ngoraed ni bitir nib achig e ngan feek iyan Ngak.

Ke yoloey Mormon ni, “Ere ra feked e pi bitir roraed ngar tayed nga but’ u charen nib liyeg, me sak’iy Yesus u thilraed; ma fare ulung i gidii’ e ra kan gaed nga tomur nge mada’ ko ngiyal’ ni ke gubin e bitir ma kan fekraed iyaen ngak’.”7

Me aram me yoeg ko gidii’ ni ngar ragbug gaed nga but. Fapi bitir ni yaed ba liyeg, me ragbug fare Tathapeg nga but me meybil ngak e Chitamangdad nu Tharmiy. Tomuren fare meybil me yoer fare Tathapeg, “me fek e pi bitir rored, ni tata’areb, nge yibliy raed, me meybil ngak e en Chitamangiy ni fan ngoraed.

“Ma nap’an ni rin’ e biney, me yoer biyay.”8

Gube nang fan e pi thamtham nibe dag fare Tathapeg ngak fapi bitir. Bo’or ban’en ni ngan fil ko pi wo’ Rok ni ngan gay ni ngan meybil, man yibliy, man sensey ni fan ngak “e picha’anem ni bitir.”9

Gag e bin ragag u lane tabinaew rog ni gamad ragag nge ta’areb u gubin. Rogon ni gumanang, ma nina’ nge papa’ rog e dariy bagyow nike serv u lane Galasia ko ba calling nirib tolang.

Galabthir romad e kar rrin’ew e murwel rorow nib ga’fan ni—yow e nina’ nge papa’. Papa’ romad e ma wawliy e tabinaew romad u fithik e mangil, ma gathi fithik e domomow nge murus. Wo’ nib gel ko papa’ romad e be m’ug ko rogon nibe non e nina’ romad ngak. Fare gospel e ban’en nib ga’fan u lane yafas romad u lane tabinaew nikan noeg e Packer ngay nge mada’ ko bin migid e yangar nge bin migid e yangar nge migid, iyan nga m’on.

Gube athapeg ni ngan sap ngog ni gub mangil ni boed e papa’ rog. Um’on ni ngug rung’ag e re thin nem ni “mangil” ko Chitamag nu Tharmiy, gube athapeg ni ngug runga’ag ko papa’ rog nib gidii’.

Bo’or yay ni gube balyang ko mongfan ni ngan piningeg ni ngug mang e Apostle me migid ma President ko fare Ulung ko Ragag nge L’agruw ni ku gub ko ba tabinaew ni papa’ e gathi riba pasig. Gathi kemus ni i go’ gag e memba ko Ragag nge L’agruw nib fal’ ko binem e n’en ni kan weliy.

Tomuren ma rayog ni ngguy mug nangfan ni amrogon ni bachane ra magawon nem ma kan pingingeg. Ma rayog ni ngug nangfan ko mongfan ni gubin ban’en ni gadad ma rrin’ u lane Galasia, ma ba tu’uf ni ngad pi’yed e kanawo’, ya gadad e toygang’, ko galabthir nge bitir ni ngar pired nib mangil rogon. Pi toygang’ ko preisthood e ngarin sag’al ngay ni ngan fal’egin u lane tabinaew-ko Galasia nib mangil rogon.

Bukun ban’en ni mornga’agen fare gospel ku Yesus Kristus ni bay ni dabyog ni nge foeleg ko rogon ni yima tha’eg fan murwel ko chart. Gadad ba fafarwol ko pi na’un nge pi salpiy nge n’en ni yima rrin’ nge rogon. Ran’ rrin’, mab moem ni ngan pagtilin fare kan thothup ko fare gospel rok Yesus Kristus.

Baga’ nima yib bee ngog me ga’ar, “President Packer, mangil fa’anra … ?”

Baga’ ni guma taleg raed mug ga’ar danga’, ya bachane guma leam nag ni n’en nima leak e ra mang e n’en ni ngan rrin’ nib bi’ech fa ba program ni ra magawon nge salpiy nib magawon ko tabinaew.

Ngiyal’ ni fan ko tabinaew e ngiyal’ nib thothup ma thingarni ayuweg man tay fan. Gamad ma yoeg ko pi memba ni ngar daged e tu’ufeg ko tabinaew roraed.

Napan ni gu mabgol gow ko somm’on, ma ppin rog nge gag e gomow dugliy ni gomow ra tu’ufeg e pi bitir ni ke yag ngomow u fithik e tin nib mil fan ngomow ni ngan un ko napan ni kan gargaleg raed nge napan ni yaed be pil’al. Ra bangiyal’ ma ra yag reb e tabinaew ngoraed.

L’agruw yay u lane mabgol romow, ngiyal’ napan ni ngan gargaleg nag reb i l’agruw i pagal ni faak mow, me ga’ar fare togta ngomow, “Dagur leam nag ni gimew ra feek e biney.”

Mu gomow mithmith ni gomow ra pi’ e yafas romow fa’anra cha’riy e bitir romow e birok. Binem nika noeg, make yib ngomow ni ta’aborogon e ra tu’ufeg ni ma thamiy e Chitamangiy nu Tharmiy ngodad. Ba tafiney ni rib falel’.

Chiney napan nikug labthir gow, Sister Packer nge gag e kug nang fan new ma kuguyew ni tabinaew e rayog ni nge manemus. Napan ni gadad ra fol ko pi motochiyel magadad paer u fithik fare gospel nib fal’ rogon, ma yibe ayuweg dad ma be fal’ wa’athan daed. Ko bitir romow nge pifaak faak mow nge pifaak fak raed, ma meybil romow e nge ga’ e tabinaew romow ko ra tu’ufeg nem ngak e picha’an nib achig nib mangil.

Pi papa’ nge nina’, yan migid ni gara choechweg ba bitir u pa’am, ma rayog ni ngam guy ya’an e tin mith ban’en nge fan e yafas. Gara nang fan nib mangil rogon ko mongfan rogon fare Galasia nge mongfan ni tabinaew e bin ni kan yarmeg ko taym nge manechubog. Gube micheg ni fare gospel ku Yesus Kritus e ba riyul’, fare tunom ko wo’en e bayul, ni kan noeg fare tunom ko falfalen’ ngay, tunom ni fan ko tabinaew. Gube meybil ni pi tabinaew ko fare Galasia e ke fal’ wa’athan raed, galabthir nge bitir, biney e murwel e ra yaen nga m’on rogon nike tunom nag Chitamangiy. Gube micheg e biney nga dakean fithngan Yesus Kristus, amen.