Ac sie Tuhlihk Srihsrihk Fah Kohlohltahl

Yac somlah ah ke sie fong ohu ke sie acn in trein fin acn Sacpacnis, nga lohng tongtong se ke winto ke acn in mutul se luhk ke trein ah. Tuhlihk mukul se tulac mihsrihsr nukum mahn wes se wi mahn ipin nuknuk se kapreni inwacl fahfwack se lal ah. Kuhretretuh insifacl. El kuhlwack pisin tin ras se ac spun se, akucl luhn mwet wacngihn sucu la luhngse nguhsr se. Ke nga kampare in ikucslah sruhnguhl sac in sang mani nuh sel ah, trein soko ah mukwilac.

Nga fah tiac muhlkuhnlah kihtin tuhlihk mukul masrinsracl sac ma muhkwelac tu ke ohu ah, kuhlwack pihsin tin se. Nga tiac pac kuh in muhlkuhnlah luhpan welac nga puhla ke trein soko ah kahkahsrihk mukwilac ah ac fihlilyac muhkwena tu ke falfucl sac ah.

Kuhtuh yac tohkoh fin acn Cusco, siti se fin ohl Andes Peru, Nga ac Elder A . Theodore Tuttle oruh toeni ke kuhfa luhn Leum ke sie rum loes ac oasrihksrihk ma ikack nuh inkacnek ah. Fong se, ac ke Elder Tuttle el sramsram ah, kihtin tuhlihk mukul, sahp matwac yac ohnkohsr, yorack ke sruhnguhl ah. El nukum muhkwena mahn fohrohk se ma sun intel.

Ke lwacyacn lacsac siskacsr ah oasr plet in fuhlao se nuh ke kuhfa luhn Leum fin kihtin tepuh. Tuhlihk wacngihn sucu la forfor inkacnek uh masrinsracl se inge liyacack fuhlao sac ac kahkah srihsrihk kihluck nuh kac. El apkuhran nuh ke tepuh soko ah ke muhtwacn se ke yen in forfor ah liyaclwack ah. Ke sruhnga luhn ninac sac el usruk insifacl, el luhsack tuhlihk sac nuh ke lohsr ah. Nga korouryak ke insiyuck.

Tohkohyang tuhlihk mukul sac fohlohk. El tahtma pesinkac ah, siyac fuhlao sac nuh sihk. Ke el apkuhran nuh ke acn se ma muhtwacn sac kuh in sulpac liyaclwack ah, nga ahsroelah pouk, na el yucme nuh yuruk. Nga sruokilyac fin niyuck.

Na, oacna sie ma akucli, nga fihlilyac fin siah soko lal Elder Tuttle ah. Tukun pruhe in kaliyac ah kihtin tuhlihk mukul masrinsracl sac yuclacna nuh ke lohsr ah.

Ke nga fohlohk nuh lohm ah ah, Nga fahk nuh sel Prestuhn Spencer  W. Kimball ke ohiyac se nga puhla ah. El mokleyuckyak na pwacye ac fahk nuh sihk, “Kom sruok muhtuhnfacl fin niyom.” El fahkma nuh sihk pacl puhs, “Puhlakihn sacn yohk na pwacye kalmeyac liki na etweyac sum.”

Ke nga muhtwactalah nuh ke muhtuhnfacl Latin America apkuhran in pacl 100, nga ngwetngwet suk kihtin tuhlihk mukul sac ke nga liye mwet ah. Inge nga etuh kalmacn fahk lal Prestuhn Kimball ah.

Nga ohsun pac nuh sin sie pac tuhihk mukul rarrar ke inkacnek Salt Lake City. Sie pac fong ohu ke pacl in ohu. Kuht fohlohk ke mongo in ekuh se ke hotel se. Ten inkacnek ah oasr tuhlihk mukul tuhkahsruh ohnkohsr kuh alkosr. Elos kwewa enenuh in muhta lun lohm selos ah liki ohu ac.

Sie tuhlihk ac wacngihn kot la. El srosro som in lusrohnglah mihsrihsr uh. El tihllac nuh ke soko koan inkacnek siskac ah, nga etuh na pwacye lah nuh ke kihtin mahn lohm ac mwe oan se ma wacngihn suhnuhn mwe nuk in ahkfucsrfucsryacl.

Ke fong ah ke nga afihnyucwi ac, nga oruh pruhe soko nuh selos suc wacngihn mwe oan fucsrfucsr la in som orekmakihn.

Nga muhta Osaka, Sacpacnis, ke Mweun  Ahkluo ah tari ac. Siti sac muhkahlkahluh, ac inkacnek ah kutkuti ke pulak, mukutkut, ac patpatuh luhn pam . Finne inkaiyacn sahk ah pihsrwelihk, puh kuhtuh ma srackna tu ac kihpatlah lah ac srohpoh ah ac in puhlaik in sruhnwack kuhtuh lah srihsrihk an wi sra kac.

Kihtin tuhlihk muhtwacn nukum mahn nuknuk, nuknuk in Sacpacnis (kimono) kahfofo ke tilyacn sra ke sahk sycamore in oruh sie un ros. Kihtin tuhlihk ac tiac elyah ke muhsahllah ma raunweluhlwack ah ke el worwor inmahsrlon kutkut ac in tahfwelah sra sasuc nuh ke ma el orwacni lal ah. El konwacack sie ma kahto luhlah ke facluh lal. Sahp nga enenuh in fahk lah el pa ma kahto se ke facluh se lal uh. Ke kuhtuh ohiyac, in nuhnkuh kacl ahkyohkye luhlahlfongi luhk uh. Luhmahlah luhn tuhlihk sac pa finsrak.

Mormon el luti lah “tuhlihk srihrihk uh moul ke Kraist”¹ac tiac enenuh in auliyak.

Ke puhlan yac siofok met ah, misineri luo orekma fin ohl soko lwacyacn epang United States. Sie lwen ah, fin ohl soko ah, elos liyacack mwet fahsrweni nuh ke sie acn mwesahs e ten. Suhkac puhs mwet misineri ac kuh in luti, oruh elos tifoki nuh ten ke acn mwesahs sac.

Kihtin tuhlihk mukul se walomlah, ac e oruh misac se. Pahpah ninac kiyacl ah sap ngihsre mwet luti se in “sramsram” ke tuhlihk mukul se nahtuhltahl ah. Misineri ac tulac ke mwet luti sac liye pahpah ninac ahsor sac ac muhtwacwacack ke luti lal. Fin pahpah ninac sac ke eis ahkkweye sin mukul se nuknukyang inge, elos ac suhpwacrlac.

El muhlatweltahl upac ke elos tiac sang kihtin tuhlihk mukul sac in pacptaislac ah. Elso tiac oruh ke srihpen oasr elyah, ac inge pahtlac. El fahk suwohswohsacng nuh selos lah kihtin tuhlihk mukul nahtuhlos ah som nuh ke e lal setuhn ah. Koluk laltahl. Elos pa ac eis mwacta ke kweok wacngihn sahflahiyac se lal uh.

Tukun luti sac tari ac kuhlyuck sac afyucfi ac, elder ah som nuh yurin pahpah ninac ahsor sac. “Kuht mwet kuhwacnsap luhn Leum,” elos fahk nuh sin ninac sac, “ac kuht tuhkuh us pweng se nuh suwos.” Ke pahpah ninac mwemwelihl sac lihpsre ah, elder luo ah riti ke fwackyuck ac oruh fahkwack luhlahlfongi lalos ke fohlohkyak luhn ki nuh ke molwelah luhn kwewana mwet misac ac mwet moul uh.

Nga pahko muhta mwet luti sac. El oruh kuhiyacl ke kain kahlwem ac etuh ma oasr sel. Tuhsruhk oasr ma yohk ma el kuh in sang in kahsruh. Oasr fohnlah luhn wosasuc uh.

Elder ah tuhkuh in ekihn mwet in ahkkweye, in ekihn mwet luti, in ekihn mwet kuhlwacnsap luhn Leum, in ekihn mwet luti oasr kuh la ke wosasuc luhn Jisus Kraist.

Tuhlihk nga sruhmuhn inge ahol tuhlihk nuh kwewa nuhtin Pahpah Lucng. “Tuhlihk uh mwe usru yurin Leum God me: ac … insewowo mwet se ma puhs suhkan pihsr nahtuhl.”²

Oreklac luhn moul uh kunohkohn na yohk se sin siacnyacn pahyuck se. Pa ma upac ke moul facluh uh in ahknwacsnwacsye ac oruh pahpah ninac oaru. Tiac mukul kuh muhtwacn kuh in sifacna fosrngahkihn tuhlihk uh. Oreklac tuhlihk uh in oasr mwet luo la—kwewana pahpah se ac ninac se. Wacngihn atac kuh ohiyac kuh in ahol ma se inge.

Pacl loeloes somlah ah muhtwacn se ahsor in fahk nuh sihk lah ke el oruh sie tuhlihk lutlut ke college ah el orwaclah tahfonglac na yohk se sin kawuck mukul se lal ah. El kuhnahoslah pihtuctuc se lal ah. Pacl na sa elos srolah ac pahyuckyak ac oasr tuhlihk ekahsr sahyac nahtuhlos. El fahk nuh sihk luhpan kweoklac lal inge ke el liye sucu lal uh, tuhlihk kahto nahtuhl, ac liye lun mwe nuhnak lal acn se, pihsaclah inge, ke acn se ma tuhlihk sac wacngihnlac ah.

Siacnyacn se inge fin kahlwem ac orekmakihn Iwaclah sac, elos fah etuh lah puhlakihn ingacn ac ngal ma kuhpahsryang nuh selos uh kuh in iyucklac. Wacngihn ngal fah oan ne tok. Tiac fihsracsr, tuhsruhk moul uh e tiac fihsracsr kuh fal. Auliyak ac finsrak sahflah ma nuhnak muhnahs uh use uh fah fal nuh ke kuhiyac uh pacl nuh kwewa.

Sie pac siacnyacn fuhsr ahsor in fahk nuh sihk muh elos tuhfahna tuhkuh yurin taktuh se ma fahkwacng nuh selos muh elos ac tiac kuh in orek tuhlihk. Muhsahllah insiyaclos ke pweng sac. Elos lut kac ke nga fahk nuh selos muh wo nuh selos ah. Elos motko lah efuh kuh nga fahk kain se. Nga fahk nuh selos lah ohiyaclos wo liki na ohiyacn kuhtuh siacnyacn sahyac suc ma kuh in oruh pahpah ninac tuhsruhk ma sruhnga ac kuhtasrihk in kahingkihn kunohkohn sac.

Nga fahkwacng nuh selos, “Wo lah kowos ke nahtuh tuhlihk, ac kena sacn fah itucngyac wo luhngse lowos an ke moul lowos facluh ac lucng uh ke srihpen e fah sang akwucki ke ip luhn nguhn ac puhla an. Yohkiyac na, e fah wo nuh suwos ke srihpen kowos ke nahtuh tuhlihk ac koflah, ke kapsra nuh selos suc kuh tuhsruhk tiac ke in oasr tuhlihk nahtuh.”

Oasr na mwet sahyac soenna pahyack ac oruh wacngihn tuhlihk nahtuhlos. Kuhtuh, ke srihpen ohiyac elos koflah oruh kac, pa tuhfahllah tuhlihk uh in oruh ninac kuh pahpah se ma muhkwena. Ma inge tiac ma na nuh ke kihtin pacl. Ke oruh ma pahtpaht ke ma uh—tiac ke moul fahluh muhkwena—kena ac luhngse suwohswohs uh fah ahkfalyeyucklac.

“Finsrak lasr in Kraist fin ma na nuh ke moul se inge muhkwena, kuht ac kweok yohk liki mwet nuh kwewa.”³

Sahflah yohk se ke mukwikwi nuh kwewa ke Alu uh pa in liye sie pahpah ac muhtwacn kiyacl ac tuhlihk nahtuhlos in engan in lohm selos, loangweyucklac ke ip yohk ac masap luhn wosasuc, siliyucki wo nuh ke olwelah ke pristut ne tok se. Mukul ac muhtwacn pahyuck uh enenuh in kahlwem kac lah kunohkohn se emet lalos—ma elos ac fah tiac itucklac liki—pa in nuh sin sie sin sie na nuh sin tuhlihk nahtuhlos an.

Sie sin ma sukokyak wowo ke ohiyacn pahpah ninac uh pa muh kuht etwaclah yohk ke ma wo nuh sin tuhlihk nahtuhsr uh liki na kuht orwaclah sin pahpah ninac kiyacsr uh. Kuht akihlenwack ma pwacye ke palye lal Isaiah ma “ac sie tuhlihk srihsrihk fah kohlohltahl.”⁴

Fin acn Jerusalem, “Jisus el pahngonma tuhlihk srihsrihk se nuh yohrohl, ac sap elan tu ye muhtahlos,

“Ac el fahk, Pwacyena Nga fahk nuh suwos, kowos fin tiac eklac in oacna tuhlihk srihsrihk, kowos ac koflah ilyak nuh in tohkohsrahi luhn inkuhsrao.

“Elos suc fulwact oemeet in tohkohsrahi luhn inkuhsrao uh pa el suc ahkpuhsisaclyacl in oacna tuhlihk se inge.”⁵

“Na Jisus el fahk nuh selos, “Lelah tuhlihk in tuhkuh nuh yuruk ac nimet ikohlohlosi, tuh tohkohsrahi luhn inkuhsrao ma lalos suc oacna tuhlihk srihsrihk uh.

“Na el filiyac pahol nuh faclos, ac som liki acn sac.”⁶

Kuht riti ke Puk luhn Mormon ke muhtwacta luhn Jisus Kraist nuh ke Facluh Sasuc se. El ahkkweyelah ac ahkinsewowoye mwet uh ac sapkihn tuh tuhlihk srihsrihk nahtuhlos in utuckuh nuh Yohrohl.

Mormon el suhmuhslah, “Elos use tuhlihk srihsrihk nahtuhlos ac fihliltahluh nuh infohkoh yohrohl, ac Jisus el tulac ye muhtahlos ac mwet uh orwaclah inkacnek uh ne ke elos nuh kwewa utuckuh nuh yohrohl.”⁷

Na el sapkihn mwet uh in sikuckmuhtuhnte. Ke tuhlihk uh raunwelwack uh, Mwet Lahngo el sikuckmuhtuhnte ac pruhe nuh sin Pahpah tuhmasr Inkuhsrao. Tukun pruhe soko ah Mwet Lahngo el tuhngyak, na el eis tuhlihk srihsrihk nahtuhlos ah kais sie ahkinsewowoyacloslac, ac pruhe nuh sin Pahpah kaclos.

Na ke el orwaclah ma inge el sifil tuhngyak.⁸

Nga kuh in kahlwem ke puhla se ahkkahlwemyeyuck sel Mwet Lahngo nuh sin tuhlihk uh. Yohk ma in lutiyuck in ukwe mwe srihkasrak Lal in suk in pruhe nuh kac, insewowo, ac luti tuhlihk srihsrihk uh.”⁹

Nga ahk10 ke sucu se ma oasr tuhlihk 11 kac. Ke etuh luhk uh, tiac ninac kuh pahpah tuhmuhk uh kuhlwacnsap ke kunohkohn yohk luhn Alu uh.

Pahpah ninac kiyacsr uh oaru in kuhlwacnsap ke kunohkohn yohk srihpac emet lalos—in ekihn pahpah ninac. Pahpah tuhmwacsr ah kol lohm sesr ah ke suwohswohs, soenna ke kahsrkuhsrak kuh sahngweng. Ac mwe srihkasrak wowo luhn pahpah tuhmwacsr ah ahkkweyeyuck ke kahs in kahsruh wowo luhn ninac kiyacsr ah. Wosasuc uh pa ohiyac wowo se ke moul lasr kais sie ke sucu luhn Packer ac nuh ke fihl se tok ah ac fihl se tukun fihl se tok ah, oacna ke kuht liye ah.

Nga finsrak in nuhnuhnkweyuck nga in oacna mukul wo se in oacna pahpah se. Met liki ngwac lohng kahs ingacn “orekma wo” sin Pahpah tuhmuhk Inkuhsrao uh, nga finsrak in lohng met sin pahpah tuhmuhk facluh.

Pacl puhs nga suk lah efuh kuh nga pahngonyuck in oruh sie Mwet Sap na ekihn Prestuhn ke U luhn Mwet Sap Singucul Luo sahyacn tuhkuh nuh lohm uh ma pahpah uh kuh in suhkwac alu. Tiac nga muhkwena ke Singucul Luo pa fal nuh ke atac sacn.

Sahflahiyac ah nga kuh in liye ac kahlwem kac lah e kuh in ma ke ohiyac ma nga tuh pahng kac. Ac nga kuh in kahlwem kac lah efuh ke ma nuh kwewa kuht oruh ke Alu, uh kuht enenuh in sang inkacnek, in ekihn mwet kol, luhn pahpah ninac ac tuhlihk uh in oasr pacl in tuhkweni in ekihn sucu uh. Mwet kol luhn pristut uh enenuh in taranwacng in oruh sucu luhn Alu uh in kuhlwacng.

Puhs ma ke moulkihn wosasuc luhn Jisus Kraist uh ma tiac kuh in srihkasrakuh sin ma oekyuck kuh tahkihnyucklac ke ma sihmlac ke pihsen wi uh. Kuht ahkkahfofofoye kuht ke lohm ac mani ac mukiwkwi ac ohiyac in oruh ma uh. Ke orek ohinge uh, ac fihsracsr in tiac liye nguhn se ke wosasuc luhn Jisus Kraist uh.

Fusus na mwet tuhkuh nuh yuruk ac fahk, “Prestuhn Packer, yac e tiac wo fin  … ?”

Nga kwacna tilokuhnuhltahluh ac fahk moh, ke srihpen nga motko lah ma sikyak tohkoh uh fah oruh mukwikwi sasuc kuh prokracm ma e weacng toasr luhn pacl uh ac ip luhn mani nuh sin sucu.

Pacl luhn sucu uh muhtahl ac enenuh in liyeyuckyang ac ahkfuhlwactyeyuck. Kuht ngihsre mempucr nuh kwewa in ahkkahlwemye luhngse nuh sin sucu lalos an.

Ke kuht tuhfahna pahyuckyak ah, nga ac muhtwacn kiyuck ah sulaclah lah kuht ac insese nuh sin tuhlihk ma e isuslah nuh sesr uh ke kunohkohn se ma wi ke isuslah ac kapwack lalos uh. Ke pacl na sa, elos orwaclah sucu lalos sifacna.

Pacl luo ke pahyuck lasr uh, ke pacl in isus luhn luo sin tuhlihk mukul srihsrihk nahtuhsr ah, taktuh sac fahk, “nga tiac luhlahlfongi muh kowos ac eis tuhlihk se inge.”

Pacl luo ah kwewa ma se inge oruh top se lasr ma muh kuht ac sang kuhiyacn moul lasr uh kwewa fin kihtin tuhlihk mukul nahtuhsr uh kuh in sang kuhiyacl. Ke oruh sac, oan na sesr lah luhngse se pacna inge apkuhran nuh ke ma Pahpah Lucng el puhla sesr kais sie. Fuhkah luhpan wolacna in nuhnak uh.

Inge ke pe kuhsra luhn moul lasr uh, Nga ac Tahmtahel Packer kahlwem kac ac lohoh kac lah sucu lasr uh kuh in oasr ne tok. Ke kuht ahkos masap uh ac moulkihn wo wosasuc uh, kuht fah loangweyucklac ac ahkinsewowoyeyuck. Wi tuhlihk nahtuhsr ac nuhtin nahtuhsr ac nuhtin nuhtin nahtuhsr, pruhe lasr uh pa muh kais sie sucu kapwack lasr uh fah eis kain alu sacna nuh sin tuhlihk srihsrihk sacohk ingacn.

Pahpah ac ninac, pacl se tok ma kowos oakaki ahwowo sasuc in pouwos an, kowos kuh in oruh aruhrruhma loac ke ma usrnguck ac srihpac luhn moul uh. Kowos fah etuh wo lah efuh Alu uh ohinge ac efuh sucu uh pa u fihsracsr se ke pacl uh ac ne tok ma pahtpaht. Nga fahkwack ahkpwacye lah wosasuc luhn Jisus Kraist pwacye, lah plwacn luhn molwelah, suc ma pahngpahng plwacn luhn engan, pa plwacn se nuh sin sucu uh. Nga pruhe nuh sin Leum lah sucu ke Alu uh fah ahkinsewowoyeyuck, pahpah ninac ac tuhlihk uh, lah orekma se e ipip nuh met oacna ke luhngse luhn Pahpah. Nga fahkwack ahkpwacye se inge ke inen Jisus Kraist, amen.