Tutulai ma Susulu Atu

O se avanoa le laumaua mo au le faasoa atu ia te outou i lenei afiafi. O Ianuari uma lava ou te sagisagi fiafia atu ai i le faasilasila mai o le autu fou o le Motuale. Peitai, ou te faaaluina lava se taimi e iloilo ai pe ua ou tomai atoatoa i lesona o le autu o le tausaga ua te’a.

Mo sina minute, se’i o tatou toe iloiloina autu talu ai nei: “Ia tuu le amiomama e teuteuina ai ou mafaufauga e le aunoa,”¹ “Ia outou tutumau ma lē masi’i ese ma tumu e lē aunoa i galuega lelei,”² “Ia fai oe ma faaa’oa’o i e ua faatuatua,”³ “Ia faamalosi ma lototele,”⁴ ma le mataupu faavae e sefulutolu o le faatuatua: “Matou te talitonu i le faamaoni, amiotonu, nofomama, agalelei, amiomama, ma le faia o mea lelei i tagata uma.”⁵

O le suesue ma taulai atu i nei mau mo se tausaga atoa, ua avea o se vaega o o tatou loto, o o tatou agaga, ma a tatou molimau. Matou te faamoemoe o le a outou mulimuli pea i a latou taitaiga a o tatou liliu atu e tulimatai le autu o le Motuale i le 2012, o loo maua i le Mataupu Faavae ma Feagaiga.

O le faaulutala mo le vaega e 115 o loo faamatala mai ai: o le tausaga e 1838, ma o le nofoaga o Sisifo Mamao, Misuri. Sa “faailoa atu ia [Iosefa Samita” le finagalo o le Atua e faatatau i le atinaega o lena nofoaga ma le Maota o le Atua.” Sa i ai le faamoemoe i le Perofeta ma sa faamalosiauina. I le fuaiupu e 5, lea tatou te maua ai le autu o lenei tausaga, o loo ta’u atu ai e le Alii ia te ia, “E moni Ou te fai atu ia te outou uma: Tutulai ia ma susulu atu, ina ia avea lo outou malamalama ma tagavai mo atunuu uma.”

O le a sou manatu ina ua e faalogo i le upu tulai? Ia te au lava ia, ou te mafaufau ia te outou—o tupulaga talavou tautupu o le Ekalesia. Ou te vaai faalemafaufau i lo outou alafa’i mai ma le maelega mai o outou moega i taeao taitasi mo le seminare i le vaveao. Ou te vaai atu i lo outou tutulai a’e ma le faamaoni mai o outou tulivae pe a uma a outou tatalo i aso taitasi. Ou te mafaufau i lo outou tutulai a’e ma le lototetele e faasoa a outou molimau ma puipuia o outou tulaga faatonuina. Ua musuia lava au i la outou tautinoga i le talalelei ma a outou faataitaiga lelei. E toatele outou ua taliaina lenei valaaulia e tutulai ae ma susulu atu, ma ua faamalosiauina isi i lo outou malamalama e faia foi faapena.

O se tasi o ala silisili e mafai ona tatou tutulai a’e ai ma susulu atu, o le usiusitai lea ma le mautinoa i poloaiga a le Atua. Tatou te aoaoina nei poloaiga mai tusitusiga paia, mai perofeta i ona po nei, faapea foi i totonu o itulau o le tamaitusi o le Mo Le Malosi o le Autalavou. E tatau ona tofu outou ma se kopi. I la’u lava kopi, ua ou li’oina ia upu mo ma le oe, e pei ona aoaoina ai au e se uo faamaoni. O lea taga faigofie ua faamanatu mai ai ia te au o nei tulaga faatonuina, ua le na o ni taiala lautele—ua patino lava mo au. Ou te faamoemoe o le a e faaaluina se taimi e li’o ai na upu i lau lava tusi, faitau mai le tasi faavaa i le isi, ma ia lagonaina le Agaga o molimau atu o na tulaga faatonuina e mo oe foi.

Atonu e i ai nisi o outou e tofotofoina e aua nei amanaiaina pe faapasi ia tulaga faatonuina o i le Mo Le Malosi o le Autalavou. Atonu latou te vaai atu i le tusi ma faapea mai, “Vaai Tina, e le o talanoa mai le tusi e uiga i [tuu i ai le faafitauli o i ai nei].” Pe atonu foi latou te ta’uamiotonuina i latou lava faapea, “E le leaga lava le mea lea ou te faia. E mautinoa lava ou te le leaga e pei o [tuu i ai se igoa o se uo po o se paaga].”

Sa aoao mai e Peresitene Harold B. Lee, “O le poloaiga e aupito sili ona taua a le Atua, o lena lea e sili ona faigata ona e tausia i le taimi nei.”⁶ Na faamatala mai e le Tupu o Peniamina, “E le mafai ona ou ta’u atu ia te outou mea uma e mafai ona outou faia ai le agasala; ona ua tele ala ma auala eseese, ua matua tele lava e le mafai ona ou faitauina.”⁷ Afai o e tauivi i le tausiga o nei tulaga faatonuina ma poloaiga, ou te fautuaina oe e vaai mo se fesoasoani i totonu o le talalelei. Faitau au tusitusiga paia. Faaalu sou taimi i le uepisaite aloaia a le Ekalesia, LDS.org, e sue ai tali o au fesili. Talanoa i ou matua, taitai o le Ekalesia, ma i latou o ē susulu feilafi a o latou ola ai i le talalelei. Tatalo. Liligi atu lou loto i lou Tama Faalelagi, o lē e alofa ia te oe. Faaaoga le meaalofa o le salamo i aso taitasi. Auauna atu i isi. Ma le mea e sili ona taua, faalogo ma usitai i uunaiga a le Agaga Paia.

Ua fautuaina i tatou uma e Peresitene Thomas S. Monson i upu nei: “A’u uo talavou e, ia outou malolosi. … Ua outou iloa le mea sa’o ma le mea e sese, ma e leai se taufaaufiufi, po o le a lava le faatosina, e mafai ona suia lena mea. … Afai e uunaia oe e au uo e faia soo se mea ua e iloa e sese, ia aveaoema tagata e tu atu mo le mea tonu, tusa lava pe e te tu na o oe.”⁸

E le finagalo le Tama Faalelagi tatou te vaavaai atu i le lalolagi ma mulimuli ana faiga ua matua suia lava. E finagalo o Ia e vaavaai atu ia te Ia ma mulimuli ai i Lana taitaiga e le suia lava. E finagalo o Ia ia tatou ola i le talalelei ma taitai atu isi i ai, e ala i le faatuina o tagavai maualuluga.

Ua aumaia e tusitusiga paia le tele o faataitaiga sili e faapupula ai lenei manatu. I le tusi a Faamasino i le Feagaiga Tuai, ua tatou aoao ai e uiga ia Samasoni. Sa fanau mai Samasoni ma se tulaga gafatia tele. Sa folafola atu i lona tina, “O ia e afua mai ona faaola ia Isaraelu ai lima o Filisitia.”⁹ Peitai, a o ola a’e Samasoni, sa tele ina vaavaai atu o ia i faaosoosoga a le lalolagi nai lo le taitaiga a le Atua. Sa ia faia filifiliga ona sa “lelei ia i [lona] manatu”¹⁰ nai lo le faia o na filifiliga ona e sa’o. O loo faatele ona faaaoga e tusitusiga paia le faaupuga “Ona alu ifo lea o ia i lalo”¹¹ a o faamatalaina ai malaga a Samasoni, o taga, ma filifiliga. Nai lo le tulai ma susulu atu e faatino lona gafatia tele, sa faatoilaloina Samasoni e le lalolagi, ua le maua lona mana na tuuina i ai e le Atua, ma sa vave ona maliu i se maliu matautia.

I se isi itu, o loo aumaia e tusitusiga paia le faataitaiga ia Tanielu. Na fanau mai foi Tanielu ma se tulaga gafatia tele. I le tusi a Tanielu, mataupu e 6, ua tatou faitau ai, “Ua sili lenei Tanielu i alii silisili ma alii sili, ina ua tele lona atamai.”¹² Ina ua oo mai luitau faalelalolagi ia Tanielu, e lei vaavaai ifo o ia i le lalolagi—na tulai o ia ma vaavaai atu i le lagi. Nai lo lona mulimuli i poloaiga faalelalolagi a le tupu faapea e le tatau i se tasi ona tatalo atu i se tasi tau lava o le tupu mo aso e 30, na “alu [Tanielu] i lona fale; ua avanoa faamalama o lona potu e faasaga i Ierusalema, ua ta’i faatolu foi i aso ona tootuli o ia i ona tulivae, ma tatalo, ma faafetai i luma o lona Atua, faapei ona masani ai o ia.”¹³

E le’i fefe Tanielu e tulai ma susulu atu e mulimuli i poloaiga a le Atua. E ui ina sa ia faaaluina se po e le taugalemu i le lua o leona ona o lona tu atu mo le mea tonu, ae sa puipuia o ia ma faamanuiaina ona o lona usiusitai. Ina ua aveesea mai e le Tupu o Tariu ia Tanielu mai le lua o leona i le taeao na sosoo ai, sa ia faia se poloaiga ia matatau tagata uma i le Atua o Tanielu ma mulimuli i faataitaiga faamaoni a Tanielu. E moni, na faaalia e Tanielu le uiga o le avea ma se tagavai mo malo, ma ia lē tuuina lava i lalo a tatou tagavai pe a feagai ma faaosoosoga faalelalolagi.

Ua faamanuiaina lava au i le faalogo atu i le tele o faataitaiga faanei ona po a le autalavou, e faapei foi o outou, o e ua le fefefe e tutulai ma susulu atu ma avea ai lo latou malamalama ma tagavai i a latou taaga a tupulaga. O Ioana se tasi o tagata e toatolu o le Ekalesia i lana a’oga maualuga, ma na o ia le tamaitai talavou i lana uarota. Sa tautino atu o ia ia te ia lava ma le Alii, o le a ia le faaaogaina lava se gagana leaga. Ina ua soa i la’ua ma se alii talavou e le’i faia foi lea lava tautinoga, i se galuega faatino a le aoga, na te lei tuua i lalo ona tulaga faatonuina. Sa talosaga atu o ia i lea alii ina ia faaaloalo ma faamamaluina ona tulaga faatauaina. Na alu se taimi, ma ni faamanatu faifai malie se tele ma ni faamanatu e le’i faia malie, ae sa amatalia e lana uo ni mausa fou ma sa faaaogaina se gagana mama. E toatele tagata na matauina le eseesega, e aofia ai lona tamā, o lē sa faafetai atu ia Ioana ona o le avea ai ma se uunaiga lelei i le olaga o lona atalii.¹⁴

I se tofiga talu ai nei i Filipaina, sa ou feiloai ai ia Karen, o le sa faasoa maia lona aafiaga o se Lora a’o a’oga mo lona faailoga o le tagata malaga i le pulega o faletalimalo ma fale’aiga. Sa manaomia e se faiaoga ia aoao e tamaiti a’oga uma le faiga ma le tofoina o meainu eseese o le a faatau i a latou faleaiga. O nisi o meainu o ava malosi, ma sa iloa e Karen e le faatagaina e poloaiga a le Alii ona ia tofoina. E ui i le matuia o ni taunuuga, sa maua e Karen le lototoa e tulai ai ma susulu atu, ma e le’i inuina e ia meainu.

Sa faamatala e Karen: “Sa sau lo’u faiaoga ma fesili mai pe aisea ua ou le inu ai. Fai mai a ia, ‘Misi Karen, e faapefea ona e iloaina le ituaiga o meainu ma pasi lenei suega taua pe afai e te le tofoina meainu?” Sa ou fai atu i ai o a’u o se tagata o Le Ekalesia a Iesu Keriso o le Au Paia o Aso e Gata Ai, ma o le avea ma sui auai, matou te le inu i mea e faatama’ia ai i matou. Po o le a lava le mea ua tatau ona fai mo au, tusa lava pe le pasi ai so’u togi, o le a ou malamalama, ae o le a ou le toilalo lava e ola i o’u tulaga faatonuina patino.”

Na mavae vaiaso ma sa leai se isi tala e uiga i lena aso. I le faaiuga o le semesa, sa iloa e Karen o lona togi faaiu o le a atagia mai ai lona musu e tofo ia meainu. Sa musu o ia e tilotilo i lona togi, ae ina ua vaai o ia i ai, sa ia iloa ai sa ia mauaina le togi aupito maualuga i le vasega.

Sa fai mai o ia: “Sa ou aoao mai e ala i lenei mea na tupu … o le a faamanuiaina moni lava i tatou e le Atua pe a tatou mulimuli ia te Ia. Ua ou iloaina foi, tusa lava pe le pasi lo’u togi, ou te le salamo lava i le mea sa ou faia. Ou te iloa o le a le misia lava a’u i le silafaga a le Alii, pe a ou filifili e fai le mea ua ou iloa o le mea tonu.”¹⁵

Tamaitai talavou pele, na tofu fanau mai outou ma se tulaga gafatia tele. O outou o afafine faapelepele o le Tama Faalelagi. Na te silafia outou ma e alofa o Ia ia te outou. Ua Ia valaaulia outou e “tutulai ma susulu atu,” ma ua Ia folafola mai a outou faia, o le a Ia lagolagoina ma faamanuiaina outou. Ou te tatalo ia tofu maua e outou le lototele e talia ai Lana valaaulia ma maua ai Ana folafolaga, i le suafa o Iesu Keriso, amene.