Ni Da Mai Sogota Na Koniferedi Oqo

Sa vakasinaiti na yaloqu ni da mai sogota na koniferedi lagilagi oqo. Eda sa vakalougatataki vakalevu sara ena noda vakarorogo ki na nodra ivakasala kei na nodra ivakadinadina o ira era sa vosa oti vei keda. Au vakabauta ni na duavata kei au ni da sa vakila na Yalo ni Turaga ni tarai na yaloda ka vaqaqacotaki na noda ivakadinadina.

Eda sa marautaka na ivakatagi kei na sere totoka, ka sa vakataucokotaka ka vakavutuniyautaka na veisoqoni yadua ni koniferedi. Au vakaraitaka na noqu vakavinavinaka vei ira kece era sa wasea vata kei keda na nodra taledi ena vuku ni ka oqo.

Na yaloqu e vakavinavinaka vakalevu sara vei ira yadua era sa vosa vei keda vakakina vei ira era cabora na masu ena veisoqoni yadua.

Era sega ni wili rawa o ira era cakacaka tu e taudaku se ena veivanua ka ra sega soti ni laurai vakalevu ena veikoniferedi yadua. Ena sega ni rawa ni da vakayacora na veisoqoni oqo kevaka e sega na nodra veivuke. Sa vagolei talega vakakina na noqu vakavinavinaka vei ira kece sara.

Au kila ni na duavata kei au ena kena vakaraitaki na noda vakavinavinaka cecekia vei ira na turaga kei na marama era sa mai vagalalataki ena koniferedi oqo. Eda na nanumi ira. E vakaiyanaqa na nodra cau ki na cakacaka ni Turaga ka na vakilai tu ena veitabatamata mai muri.

Eda sa tokoni ira talega, ena laveliga, o ira na tacida kei na ganeda era sa kacivi ki na veitutu vovou ena koniferedi oqo. Eda kidavaki ira ka da vinakata me ra kila ni da sa vakanamata tu ena veiqaravi vata kei ira ena nona inaki na iVakavuvuli. Era sa kacivi ena veivakauqeti mai lagi.

Sa rabailevu cake sara na vanua e kovuta na kaburaki ni koniferedi oqo, e kosova na veivanua kei na wasawasa vei ira na tamata ena veivanua kecega. E dina ni keimami yawa sara mai na vuqa vei kemuni, keimami vakila na yalomuni kei na nomuni yalodina, ka keimami sa loloma ka vakavinavinaka yani vei kemuni ena veivanua kecega o ni tu kina.

Eda sa mai vakalougatataki kina vakalevu, kemuni na taciqu kei na ganequ, me tu vei keda na kosipeli vakalesuimai i Jisu Karisito ena noda bula kei na yaloda. E solia na isau ni veitaro cecere ni bula. E solia na ibalebale kei na inaki kei na inunui ki na noda bula.

Eda bula ena veigauna leqaleqa eso. Au vakadeitaka vei kemuni ni kauwaitaka tiko o Tamada Vakalomalagi na veidredre eda sota kaya tiko. E lomani keda yadua ka gadreva me vakalougatataki keda ka vukei keda. Me da sa qai vosa Vua ena masu, me vaka e vakasalataka ena Nona kaya, “Mo dau masu tikoga, raica au na sovaraka vei iko na noqu Yalo Tabu, mo kalougata vakalevu kina—io, ko na kalougata vakalevu cake ka vakalailai ga ke ko sa rawata na iyau kecega vakavuravura.”¹

Kemuni na taciqu kei na ganequ lomani, me vakasinaiti na nomuni veivale ena loloma kei na veivakaliuci kei na Yalo ni Turaga. Ni lomana na nomuni matavuvale. Kevaka e tiko na duidui ni vakasama se na veisaqasaqa ena kemuni maliwa, au vakauqeti kemuni mo ni walia ena gauna sara ga oqo. E kaya na iVakabula:

“Dou kakua ni veiletitaka. …

“E dina, e dina au sa kaya vei kemudou, ko koya sa tiko vua na yalo ni veileti, sa sega ni noqu, ia sa nona ga na tevoro, ni sai koya na vu ni veileti, ni sa dau vakauqeti ira na tamata me ra veileti ka veicudruvi vakai ira.

“[Ia] raica sa sega ni noqu ivakavuvuli oqo … ; ia oqo na noqu ivakavuvuli, me muduki sara na veileti vakaoqo.”²

Me vaka niu nomuni dauveiqaravi yalomalumalumu, au vakavoqataka na nona itukutuku na Tui o Penijamini ena nona vosa tiko vei ira na nona tamata, ena nona kaya:

“Au sa sega ni vakarota mo … ni nanuma niu sa uasivi cake vei ira na tamata kecega.

“Raica sa tu na noqu malumalumu vakayago kei na malumalumu vakayalo, me vakataki kemuni ga; ia ko ni sa digitaki au … me vaka na lewa ni Turaga … au sa maroroi ka taqomaki tu mai ena nona kaukauwa levu, meu qaravi kemuni ena noqu igu taucoko, kei na kaukauwa kecega sa solia vei au na Turaga.”³

Kemuni na taciqu kei na ganequ lomani, au gadreva mai na yaloqu taucoko meu cakava na loma ni Kalou ka qaravi Koya ka qaravi kemuni.

Ia ni da biuta yani na koniferedi oqo, au sa vakatikora na veivakalougatataki mai lomalagi me sobuti kemuni yadua. Mo ni lesu tale ena bula vinaka ki vale o kemuni na tu tani mai kina. Mo ni vakananuma vakatitobu na dina o ni sa mai rogoca, ia me ra vukei kemuni mo ni yaco me vinaka cake sara mai na kemuni ituvaki ena itekivu ni koniferedi ena rua na siga sa oti.

Me yacova ni da qai sota tale ena ono na vula mai qo, au sa kerea na veivakalougatataki ni Turaga me tiko vata kei kemuni, io, me tiko kei keda kece, kau vakayacora vakakina ena Yacana savasava—io ko Jisu Karisito, na noda Turaga ka noda iVakabula—emeni.