Ilo Ad Kiil Kweilo̧k In

Būruwō ej obrak ilo ad itok n̄an jem̧ļo̧k in kweilo̧k in eaiboojoj. Em̧ōj kobrak kōj kōn jeram̧m̧an ilo ad kar ron̄jake kapilōk eo im naan in kam̧ool ko an ro me raar kōnono n̄an kōj. Ij ļōmņak kom̧ naaj errā ippa bwe jaar en̄jake Jetōb eo an Irooj ilo an būruwōd kar en̄jake im naan in kam̧ool ko raar kajoorļo̧k.

Bar juon alen jaar lem̧ōņōņō kōn al ko raiboojoj, ko raar kōkōm̧anm̧anļo̧k im jipan̄ kajjojo m̧wein̄an ko an kweilo̧k in. Ij kwaļok aō kam̧m̧oolol n̄an aolep ro raar kwaļo̧k ippād tōļan ko aer ilo wāween in.

Ij kwaļo̧k kam̧m̧oolol kon jān tum̧wilaļ in būruwō n̄an kajjojo ro raar kōnono n̄an kōj barāinwōt ro raar kōm̧m̧ani jar ko ilo kajjojo m̧wein̄an ko.

Elōn̄ kajjojo ro me rej jerbal ilo jab lo er ak ilo jerbal ko rejjab bun̄bun̄ ilo kajjojo kweilo̧k. Eban kar pidodo n̄an kōm n̄an kōm̧m̧ani m̧wein̄an kein ilo an ejjeļo̧k jipan̄ jān er. Aō kam̧m̧oolol ej ilo̧k n̄an aoleper barāinwōt.

Ijeļā kom̧ij koba ippa ilo kwaļo̧k kam̧m̧olol em̧ool n̄an em̧m̧aan ro im sister ro me kar kōtļo̧k er ilo kar kweilo̧k in. Jenaaj būrom̧ōj kōn er. Jipan̄ ko aer n̄an jerbal eo an Irooj ellōn̄ im naaj en̄jake ilo aolepen epepen ko rej itok wōt.

Jaar barāinwōt rejtak, kōn kotak pā ko, em̧m̧aan ro im sister ro me kar kūr er n̄an jerbal ko rekāāl ilo kweiļo̧k in. Jej karuwainenenik er im kōņaan bwe ren jeļā bwe jej reim̧aanļo̧k n̄an jerbal ippāer ilo jerbal eo an M̧aajta eo. Em̧ōj kūr er kōn im̧we jān ijo eutiej.

Jaar kadiwōjļo̧k kweilo̧k in n̄an eria ko rellōn̄ ļo̧k jān kar m̧okta, tōpar ļo̧k aolep laļ ko im maļo̧ ko n̄an armej ro aolep jikin. Men̄e eļap am ettoļo̧k wōt jān kom̧, kōmij en̄jake am epaake kom̧ im en̄jake kijejeto eo ami, im kōmij lewaj am iakwe im kam̧m̧oolol n̄an kom̧ jekdo̧o̧ņ eo kom̧ij pād ie.

Eļap ad lukkuun in jeram̧m̧an, ro jeiū im jatū, n̄an wōr jepļaaktok eo an ko̧jpeļ eo an Jisōs Kraist ilo mour ko ad im būruwōd. Ej letok uwaak ko n̄an kajjitōk ko reļļap an mour. Ej letok meļeļe eo im un eo im kōjatdidkik eo n̄an mour ko ad.

Jej mour ilo iien ko rejorrāān. Ij kam̧ool n̄an kom̧ bwe Jemedwōj Ilan̄ ej ļōmņak kōn apan̄ ko jej jelm̧ai. Ej iakwe kōj kajjojo im ikdelel n̄an kōjeram̧m̧an kōj im jipan̄ kōj. Kōm̧m̧an bwe jān maron̄ kūr E ilo jar, āinwōt An kapilōk kōj ke Eaar ba Enaaj lutok tok Jetōb eo An iood, im jenaaj bōk kōjeram̧an ko reļļap—eļapļo̧k jen jon̄ak eo n̄e jaar bōk jen laļ in.¹

Ro jeiū im jatū, kōm̧m̧an bwe kapijuknen ko ami ren obrak kōn iakwe im jeļā ņae im kōn Jetōb eo an Irooj. Iakwe baam̧le ko ami. Eļan̄n̄e ewōr jab errā ko ak iakwelel ko ibwilijimi, Ij libjerjere kom̧ n̄an ņa jemļaer. Rilo̧mo̧o̧r eaar ba:

“En ejjeļo̧k iakwāālel ko ilubwilijimi.  …

“Bwe em̧ool, em̧ool Ij ba n̄an kom̧, eo ewōr jetōb in jum̧ae ilo e ejjab jān Eō, ak ej jān devil eo, eo ej jemān jum̧ae, im ej pukwōj buruōn armej n̄an aitwerōk kōn illu, ippān doon.

“[Ak] lo, en̄in ej jab Aō unleplep in katak … ; ak en̄in ej unleplep in katak eo Aō, bwe men rot kein rej aikuj jako.”²

Ilo ami rikarejera ettā, Ij bar ālij naan ko an Kiin̄ Benjamin ilo ennaan eo an n̄an armej ro an, ke eaar ba:

“Iaar jab jiron̄ kom̧ n̄an … ļōmņak bwe n̄a make ij ļapļo̧k jān juon armej kanniōk.

“A n̄a ij āinwōt kom̧, ij dein wōt aolep m̧ōjņo ko otemjeļo̧k an ānbwin im ļōmņak; mekarta n̄a kar kālōte … jān pein Irooj … im kar oņaake im kōjparok eō jān kajoor eo emake An, n̄an jerbal n̄an kom̧ kōn aolepān aō maron̄, ļōmņak im kajoor eo Irooj eaar letok n̄an eō.”³

Ro jeiū im jatū jitōnbōro, Ij ikirelel kōn aolepen būruwōr n̄an kōm̧anm̧an ankilaan Anij im jerbal n̄an E im n̄an kom̧.

Kiiō ilo ad likūt kweilo̧k in, Ij jar kōn kōjeram̧man ko an lan̄ ioomi kajjojo. Kōm̧man bwe kom̧ ro rettoļo̧k jān kapijuknen ko ami maron̄ rool tok ilo inem̧m̧an. Kōm̧m̧an bwe kom̧in kejōkļo̧kjeņ kōn m̧ool ko kom̧ kar ron̄, im kōm̧m̧an bwe ren jipan̄ kom̧ erom em̧ool em̧m̧anļo̧k jān ke kweilo̧k in eaar ijjino ruo raan remootļo̧k.

M̧ae iien jān bar lo doon ilo jiljino allōn̄, Ij kajjitōk kōjeram̧m̧an ko an Irooj n̄an pād ioomi im, ilo m̧ool, iood aolepādwōj, im Ij kōm̧m̧ane menin ilo Etan ekwojarjar—em̧ool Jisōs Kraist, ad Irooj im Rilo̧mo̧o̧r—amen.