A o Tatou Tapunia Lenei Konafesi

Ua matua ootia o’u lagona a o tatou oo mai i le faaiuga o lenei konafesi mamalu. Sa matua faamanuiaina lava i tatou a o faalogologo atu i fautuaga ma molimau a i latou sa saunoa. Ou te manatu o le a outou ioe faatasi ma au, sa tatou lagonaina le Agaga o le Alii a o pa’i mai i o tatou loto, ma ua faamalolosia ai a tatou molimau!

Ua tatou toe olioli foi i musika matagofie, lea sa faalauteleina ai ma faatamaoaigaina ai sauniga taitasi o le konafesi. E momoli atu la’u faafetai tele ia i latou uma sa faasoa maia a latou taleni i lea itu.

E momoli atu la’u faafetai mai le taele o lo’u loto ia i latou uma sa saunoa mai, faapea foi i latou sa fofogaina tatalo i sauniga taitasi.

E le mafaitaulia i latou o e o loo galulue ae le o faalauaiteleina, po o ni tofiga e le o faalauiloaina i konafesi taitasi. Semanu e le mafai e i tatou ona faia nei sauniga e aunoa ma la latou lagolago. Ou te faafetai atu foi ia i latou uma na.

Ou te iloa tou te auai faatasi ma au i le tuuina atu o le lotofaafetai tele i na uso ma tuafafine, o e sa faamalolo mai i lenei konafesi. O le a tatou misia i latou. O lo latou sao i le galuega a le Alii e maoae tele, ma o le a lagonaina e augatupulaga fāi mai.

Sa tatou lagolagoina foi, e ala i le siiina o aao, ia uso ma tuafafine ua valaauina i tofiga fou i lenei konafesi. Matou te faafeiloai atu ia te i latou, ma ou te manao ia latou silafia ua matou sagisagi atu foi e galulue faatasi ma i latou i le galuega a le Matai. Sa valaauina i latou e ala i musumusuga mai luga.

Ua tele atu vaega ua faasalalau atu i ai lenei konafesi nai lo se isi taimi, ua oo atu ai i konetineta ma vasa ma tagata i soo se mea. E ui lava ina matou mamao mai ia te outou i le tino, ae ua matou lagonaina o outou agaga ma lo outou tuuto, ma e momoli atu o matou alofaaga ma le agaga talisapaia ia te outou po o fea lava o outou i ai.

E maeu lava le faamanuiaina o i tatou, o’u uso e ma tuafafine, i lo tatou maua o le talalelei a Iesu Keriso i o tatou olaga. E maua ai tali i fesili aupito tetele o le olaga. E maua ai le uiga ma le faamoemoe o o tatou olaga.

Ua tatou ola i taimi faigata. Ou te faamautinoa atu ia te outou, o loo silafia e lo tatou Tama Faalelagi luitau o loo tatou feagai. E alofa o Ia ia i tatou taitoatasi ma e finagalo ia faamanuiaina i tatou ma fesoasoani mai. Ia tatou valaau atu ia te Ia i le tatalo, e pei ona Ia apoapoai mai ina ua Ia fetalai, “Tatalo e le aunoa, ma o le a ou sasaa at lo’u Agaga i ou luga, ma o le a tele lava ou faamanuiaga—ioe, e sili atu lava nai lo ‘oa o le lalolagi.”¹

Ou uso e ma tuafafine pele, ia faatumuina o outou maota ma laoa i le alofa ma le faaaloalo ma le Agaga o le Alii. Alolofa i o outou aiga. Afai e i ai se mea e feeseesea’i ai pe fefinauai ai outou, ou te fautuaina outou ia faaleleia nei loa. Na fetalai mai le Faaola:

“Ia leai ni feeseeseaiga ia te outou. …

“Aua e moni, e moni, ou te fai atu ia te outou, o le e i ai le agaga o le finauga ua le mai ia te au o ia, ae ua mai le tiapolo ia, o le tamā o le finauga, ma ua faaoso e ia loto o tagata ia fefinauai ma le ita, o le tasi i le isi.

“[Peitai] faauta, e le o la’u mataupu lea … ; ae o la’u mataupu lenei ia aveesea mea faapena.”²

I le avea ai ma a outou auauna faatauvaa, ou te toe ta’u atu upu a le Tupu o Peniamina i lana lauga i lona nuu, ina ua ia saunoa:

“Ou te lei poloai atu ia te outou … ia outou manatu ai ua sili atu a’u lava ia i lo se tagata soifua.

“Ae ua pei lava a’u o outou, e oo i ai vaivaiga eseese uma o le tino ma le mafaufau; peitai ua filifilia a’u … e le aao o le Alii … ma sa faasaoina e lona mana lē mafaatusalia, e auauna atu ia te outou ma le manatu atoa, mafaufau, ma le malosi atoa ua tuu mai e le Alii ia te au.”³

Ou uso e ma tuafafine pele, ou te manao ma lo’u loto atoa e faia le finagalo o le Atua ma auauna atu ia te Ia ma auauna atu foi ia te outou.

O lenei, a o tatou tuua lenei konafesi, ou te talosagaina faamanuiaga a le lagi i o outou luga taitoatasi. Talosia ia toe foi saogalemu atu outou o loo malaga ese mai i aiga. Ia outou manatunatu loloto i upumoni sa outou faafofoga i ai, ma talosia ia fesoasoani ia te outou ia avea ai ma tagata ua sili atu nai lo le mea sa i ai a ‘o lei amataina le konafesi i le lua aso talu ai.

Seia tatou toe feiloai i le isi ono masina, ou te talosagaina faamanuiaga a le Alii i o outou luga, ioe, i luga o i tatou uma, ma ou te faia ai i Lona suafa paia—o Iesu Keriso, lo tatou Alii ma le Faaola, amene.