Ni Da Baci Soqoni Vata Tale

Kemuni na taciqu kei na ganequ lomani, ni da baci soqoni vata tale ena dua na koniferedi raraba ni Lotu, au kidavaki kemuni ka vakaraitaka na noqu lomani kemuni. Eda dau sota ni oti e ono na vula me da veivaqaqacotaki, me da veivakayaloqaqataki, me da solia na vakacegu, me da tara cake na vakabauta. Eda mai tiko oqo me da vuli. Eso beka vei kemuni era vaqara tu na isau ni taro kei na bolebole o ni sotava tiko. Eso era rarawa se yali vei ira eso na ka talei. E rawa vei kemuni yadua mo ni vakararamataki ka laveti ka vakacegui ni vakilai na Yalo ni Turaga.

Kevaka e gadrevi na veisau ena nomu bula, mo kunea na veivakauqeti kei na yaloqaqa mo vakayacora vakakina ni o vakarorogo tiko ki na veimalanivosa vakauqeti ena cavuti. Me da yalataka vou tale me da bula ena ivakarau me da luvena tagane ka luvena yalewa kilikili kina na Tamada Vakalomalagi. Me da vorata na ca ena veivanua kecega e kunei kina.

Sa dua na veivakalougatataki ni da lako mai ki vuravura ena dua na gauna vaqo—e dua na gauna vakasakiti ena itukutuku balavu ni vuravura. E sega ni rawa ni da tiko vata kece ena ruku ni dua ga na delavuvu, ia sa rawa vei keda ena gauna oqo me da vakaitavi ena veigacagaca ni koniferedi oqo ena vakasakiti ni retioyaloyalo, retio, biaulivaliva ni setilaiti, kei na Initaneti—ena iyaya dau veikauyaki sara mada ga. Eda soqo vata mai ka duabau ga, eda vosataka na veivosa e vuqa, eda tu ena veivanua e vuqa, ia e dua ga na noda vakabauta ka dua ga na ivunau ka dua ga na noda inaki.

Mai na kena itekivu lailai ena 182 na yabaki sa oti, sa vakilai tu e vuravura taucoko na keda iserau. Na inaki cecere oqo eda vakaitavi kina ena tete tikoga yani, ena veisautaka ka vakalougatataka na bula ni toso tiko. E sega ni dua na inaki, sega ni dua na kaukauwa e vuravura e rawa ni tarova na cakacaka ni Kalou. Se cava ga ena yaco mai, ena toso ga ki liu na inaki cecere oqo. O ni nanuma beka na nona malanivosa vakaparofita o Josefa Simici: “E sega ni dua na liga ivalavala ca me tarova na cakacaka mai na kena toso ki liu; na veivakacacani ena rairai levu beka, era na cokovata beka na dauvakacaca, era na tuvaivalu beka na veimataivalu, ka veivakacacani na itukutuku vakailasu, ia na dina ni Kalou ena lako yani ena doudou, vakaturaga, ka tu vakaikoya, me yacova ni sa curubasikata yani na veiyasana yadudua, sikova na veivanua, curuma yani na veimatanitu, ka rogovaki ena veidaliga yadudua me yacova ni sa vakacavari na veinaki ni Kalou, ka na qai kaya ko Jiova sa Cecere ni sa qaravi oti na cakacaka.”¹

Kemuni na taciqu kei na ganequ e levu na ka dredre ka veibolei e tu e vuravura nikua, ia e levu talega na ka vinaka ka veilaveti. Me vaka eda tukuna ena ikatinikatolu ni noda yavu ni vakabauta, “A ka kecega e vinaka, na ka e totoka, se rogorogo vinaka, se daudokai se vakaturaga, keimami sa gadreva na veika oqori.” Me da vakayacora tikoga vakakina.

Au vakavinavinakataka na nomuni vakabauta kei na yalodina ena kosipeli. Au vakavinavinakataka na nomuni dau loloma ka veikauwaitaki tiko vakaikemuni. Au vakavinavinakataka na veiqaravi o ni cakava tu ena nomuni veitabanalevu kei na tabana vakakina ena nomuni iteki kei na tikina. Sai koya na veiqaravi vakaoqori e dau rawata kina na Turaga e vuqa na Nona inaki ena vuravura oqo.

Au vakaraitaka na noqu vakavinavinaka vei kemuni ena nomuni dau yalovinaka vei au ena veivanua kecega au dau lako kina. Au vakavinavinakataka na nomuni veiqaqa ni masu ena vukuqu. Au sa dau vakila na masu oqori kau sa vakavinavinaka kina vakalevu.

Ia, kemuni na taciqu kei na ganequ, eda sa lako mai me da mai dusimaki ka vakauqeti. E vuqa na itukutuku ena wasei ena loma ni rua na siga oqo. Au rawa ni vakadeitaka vei kemuni ni o ira na turaga kei na marama era na vosa vei kemuni era sa kerea na veivuke kei na veidusimaki vakalomalagi ena nodra vakarautaka na nodra itukutuku. Era sa vakauqeti ena vuku ni veika era na wasea vei keda.

Sa kauwaitaki keda yadua tiko kei na noda dui gagadre na Tamada Vakalomalagi. Me da vakasinaiti ena Yalona ni da vakaivotavota ena veigacagaca kece ni koniferedi oqo. Oqo na noqu masu ena yalodina ena yaca tabu ni noda Turaga ka iVakabula, ko Jisu Karisito, emeni.