Ke Kuht Sifil Fahsrweni Nuh Sie

Tamuhlwel ac tahmtahel wolacna wiyuck, ke kuht sifil fahsrweni nuh sie ke sie toeni luhlahp luhn Alu uh, nga pain kowos ac ahkkahlwemye luhngse luhk nuh suwos. Kuht ohsun ke kais sie mahlwem ohnkohsr in ahkkweye sie sin sie, in tahfwelah ahkkweye, in sang ahkkuh, in ahkfokokoye luhlahlfongi lasr uh. Kuht oasr inge in lutlut. Kuhtuh suwos kuh in suk top nuh ke kihsen siyuck ac ma upac kowos puhlakihn ke moul lowos an uh. Kuhtuh lain ke niwucrwucr kuh wacngihnlac luhn mwet. Kais sie mwet ma lohng kuh in ahkwoyeyuck ac eis kahs in kahsruh ac ahkkweye ke Nguhn luhn Leum puhlakihnyuck uh.

Enenuh in oasr eklac ma enenuh in oreklac ke moul lowos an, lwelah kowos in sokwack srihpac ac puhlaik in oruh oacna ke kowos lohng kahs mokleyuck ma ac fah sruhmuhnyuck uh. Lwelah kais sie sesr in ahksasucye nuhnak lasr in moulkihn kuht in muh tuhlihk mukul ac muhtwacn nwacsnwacs nuhtin Pahpah tuhmasr Inkuhsrao. Lwelah kuht in kalweni in lain ma koluk acn nuh kwewa ma sukokyak we uh.

Ahkinsewowoyeyuck kuht na pwacye in tuhkuh nuh facluh ke kain pacl se inge—sie pacl wolacna ke ma mahtuh loeloes luhn facluh. Kuht nohfohn tiac kuh in tuhkweni ke lohm sefanna, tuhsruhk ingena oasr pacl wowo se lasr in wi muhtwacwacyacn toeni se inge ke usrnguck luhn tifi, retio, cable, satellite transmission, ac Internet—finne ke cellphone uh. Kuht fahsrweni tuhkuh oacna ma se, sramsram ke kahs puhkantwen, muhta ke acn pucspucs, tuhsruhk nohfohnna ke luhlahlfongi sefanna ac mwe luti sefanna ac srihpac sefanna.

Ke sie kihtin muhtwacwacack ke yac siofok alngucul-luo somlah ah, oasr lasr uh ingena puhlakihnyuck fin facluh nohfohn. Srihpac yohk se inge ma kuht wi uh fah kalweni in kapwack, ekuhllah ac ahkinsewowoye moul uh oacna ke ac oruh uh. Wacngihn srihpac, wacngihn mwe pahtok ke facluh nohfohn kuh in tulokihnyac orekma luhn God. Sahyacn na ma ac tuhkuh uh, srihpac yohk se inge ac fah fahsr nuh met. Esamwack kahs in pahluh lal Mwet Pahluh Joseph Smith ah: “Wacngihn paho pihsac kuh in tulokihnyac orekma uh in fahsr nuh met; ahkkoluk uh kuh in upaclah, u in mwet koluk ac tuhkweni, armi uh ac oreklac, mwet ahkkoluk ac ahkkolukye, tuhsruhk ma pwacye luhn God fah fahsr nuh met fokoko, fuhlwact, ac sifacna, nuh ke e sun muhtuhn facl nuh kwewa, muhtwacta nuh ke acn nuh kwewa, fahsrwelihk nuh ke acn luhlahp nuh kwewa, ac kahskahs nuh ke insroac nuh kwewa, ne kena srihpac luhn God ahksahfyeyucklac, ac Jehovah Kuhlwacna el fah fahk lah orekma uh tari.”¹

Puhkantwen ma ma upac ac srihfeyuck ke facluh mihsenge, tamuhlwel ac tahmtahel wiyuck, tuhsruhk oasr pac ma puhkantwen ma wo ac ahkkweyeyuck. Oacna ke kuht fahkwack ke ip yohk ke luhlahlfongi ahksingucul tolu lasr uh, “Fin oasr kuhtwena ma wo, kahto, kuh pweng wo kac kuh ma fal in kaksakihnyuck, ma inge kuht suk.” Lwelah kuht in kalweni in oruh oacna.

Nga kuloh nuh suwos ke luhlahlfongi ac oaru lowos nuh ke wosasuc uh. Nga kuloh nuh suwos ke luhngse ac karihngihnyuck kowos ahkkahlwemye nuh sie sin sie uh. Nga kuloh nuh suwos ke kuhlwacnsap kowos sang nuh ke ward ac pracns lowos an ac stek ac tistrik lowos an. Kain kuhlwacnsap ma lwelah Leum elan ahkfahsryelah inkaiyacn srihpac Lal fin facluh inge uh.

Nga ahkkahlwemye kuloh luhk nuh suwos ke kuhlwacng lowos nuh sihk ke acn nuh kwewa nga som nuh we. Nga kuloh nuh suwos ke pruhe lowos keik uh. Nga puhla pruhe ingacn ac tarilacna pwacye kac.

Ingena, tamuhlwel ac tahmtahel wiyuck, kuht tuhkuh in kolyuck ac mokleyuck. Pweng pucspucs fah akacsruhiyuck ke lwen luo fahsruh uh. Nga kuh in ahkpwacye nuh suwos lah mukul ac muhtwacn ingacn suc ac fah sramsram nuh suwos uh suk kahsruh ac kolyuck luhn inkuhsrao ke elos ahkolah pweng lalos uh. Elos mokleyuck ke ma elos fah akacsruhi nuh sesr uh.

Pahpah tuhmasr Inkuhsrao el nuhnkuh yohk ke kais sie sesr ac enenuh lasr uh. Lwelah kuht in sesseslah ke Nguhn Lal ke kuht ipeis muhtwacwacackiyacn toeni se inge uh. Pa inge pruhe pwacye luhk ke ine muhtahl luhn Leum Mwet Lahngo lasr, Jisus Kraist, amen.