2010–2019
Ni Atail Pwurehng Pokonpene
April 2012


Ni Atail Pwurehng Pokonpene

Samatail Nanleng kin nsenohki emenemen kitail oh atail anahn akan. I koapwoaroapwoarki me kitail koaros pahn audaudki Sapwellime Ngehn ni atail iang mwekid en tiepene wet.

Riei ohl oh lih kempoake kan, ni atail pwurehng pokonpene nan kapokon lap en Mwomwohdiso, I kasamwoh kumwail oh kasalehda ahi limpoak ong kumwail. Kitail kin tuhpene mwurin sounpwong weneu koaros pwehn kakehlailih emenemen, koangoange, en kihda kaloalamwahu, oh kakairada pwoson. Kitail kohdokasukuhl. Ekei kumwail mwein raparapahki pasapengpen peidek kan oh kahpwal kan me kumwail ahniki nan amwail mour. Ekei wie nannantihieng me kapahtou kan de me salongasang kumwail. Emenemen kak kamarainda oh nsenamwahuda oh kaloalamwahuda ni amwail pahn kehn Ngehn en Kauno.

Ma pahn mie wekidekla kan me anahne wiawi nan amwail mour, kumwail en diarada ineng oh soupeikasal en kapwaiada ni amwail rong mahsen kamarain kan me pahn kohda. Kitail en emenemen koasoanehdi sapahl en mour pwehn wia sapwellimen Samatail Nanleng pwutak oh serepein kan me warohng. Kitail en doulahte uhwong me suwed sohte lipilipil wasa me e dierek ie.

Meid pai kitail pwehki atail kohdo pohn sampah nan ansou duwe wet—ansou kaselel ehu nan poadoapoad en sampah. Kitail koaros sohte kak itar nan ehute ihmw, ahpw kitail kak iang mwekid en tiepene wet sang ni kapwuriamwei en television, radio, cable, satellite, oh Internet—oh pil nan dipwisou kan me kak wisikseli rasehng delepwohn. Kitail ehupene wia ehute, koaskoasoaiki soangen lokaia tohto, mihmi nan sahpw tohto, ahpw atail pwoson ehute oh padahk ehute oh kahrepe ehute.

Tepisang mehkot tikitik sounpar 182 samwalahro, lipwatail miehier nan sampah pwohn. Doadoahk kesempwal wet me kitail towe pahn doulahte, wie wekwekid oh kapkapaiada mour en aramas ni eh doudoula. Sohte kahrepe ieu, de mehkot kehlail nan sampah kak kapweiek doadoahk en Koht. Mendahte dahme pahn kohdo, doadoahk lap wet pahn doula. Kumwail taman kokohp en Soukohp Joseph Smith: Sohte peh suwed me kak kauhdi doadoahko en dehr pweida; kahpwal kan kak kohdo, aramas suwed kak pokonpene, sounpei kan kak pokonpene, lokaia likamw kan kak kauwehla, ahpw mehlel en Koht pahn wenlahte ni kehlail, waun, oh uhtohrohr, e lao lella nan sahpw koaros, lella wasa koaros, douseli nan wehi koaros, oh pakair nan saleng koaros, lao koasoandi kan en Koht pahn pweida, oh Siohwa Lapalap pahn mahsanih me doadoahko imwiseklahr.”1

Mie me tohto me apwal oh kasongosong nan sampah rahn wet, riei ohl akan oh lih akan, ahpw pil mie me tohto me mwahu oh kin kakehlailih aramas. Ni duwen atail kin pakairki nan atail iren pwoson ke-eisek siluh, “Ma mie mehkot me mwahu kaselel, de ronge me mwahu de konehng kapingpe en mie, se kin rapahki mepwukat koaros.” Kitail en doulahte wia met.

I kalahngankihong kumwail amwail pwoson oh loaloapwoat ong rongamwahuo. I kalahngankihong kumwail amwail limpoak oh nsenoh me kumwail kin kasale ong emenemen. I kalahnganki amwail kin papah nan amwail ward oh prans kan oh nan amwail stake oh district kan. Soangen papah wet me elehieng Kauno en kapwaiada tohto Sapwellime koasoandi kan pohn sampah.

I kapingkalahngankihong kumwail amwail kin kadek ong ie sohte lipilipil wasa me I kin kohla. I kapingki amwail kin kapakapkinie. I kin kehn kapakap pwuko oh I kalahnganki mehlel.

Met, riei ohl akan oh lih akan, kitail kohdohr pwehn kasukuhl oh kamarainda. Tohto padahk pahn kohda nan rahn riau me pahn wad. I kak inoukihong kumwail me ohl oh lih me pahn kapahrekohng kumwail rapahkihier sawas oh kaweid en nanleng ni arail kaunopada arail padahk kan. Irail kamarainkidahr dahme re pahn ehukihong kitail.

Samatail Nanleng kin nsenohki emenemen kitail oh atail anahn akan. I koapwoaroapwoarki me kitail koaros pahn audaudki Sapwellime Ngehn ni atail iang mwekid en tiepene wet. Met iei ahi kapakap mehlel ni lengileng sarawi en atail Kaun oh Sounkomour, Sises Krais, ahmen.

Iren sawas akan

  1. Teachings of Presidents of the Church: Joseph Smith (2007), 444.