Te haamana‘oraa e o vai mau ra tatou: Te oro‘a, te hiero e te faatusiaraa na roto i te taviniraa

Ua faahiti te Faaora i Ta’na mau pĭpĭ no ni‘a i te hoê tamaiti tei faaru‘e i to’na metua tane ona, tei haere i te fenua roa e ua haamau‘a i ta’na tao‘a. Ia tupu râ te hoê o‘e, ua rave te tamaiti i te hoê ohipa ha’iha’i roa no te faaamuraa i te mau puaa. No to’na po‘ia rahi ua hinaaro oia i te amu i te mau pipi tei faataahia na te mau animala.

Atea roa i to’na utuafare, atea’tu i te vahi ta’na i hinaaro i te ti‘a’tu, e i roto i to’na huru vêvê, ua tupu te tahi ohipa faufaa rahi i roto i te oraraa o teie tamaiti apî. Ia au i te mau parau a te Faaora, « e îho faahou maira to’na iho huru mau ».¹ Ua haamana‘o e o vai oia, ua ite i te mea i herehia e ana, e ua haamata ihora i te hiaai i te mau haamaitairaa e vai hua nei i roto i te fare o to’na ra metua tane.

I roto i to tatou mau oraraa, i roto i te mau tau pouri, tamataraa, oto aore râ hara anei, e nehenehe ta tatou e ite i te Varua Maitai i te faahaamana‘oraa ia tatou e e mau tamaroa e e mau tamahine mau tatou na te hoê Metua i te Ao ra o te haape‘ape‘a nei e o te here nei ia tatou, e e hinaaro puai atoa tatou i te mau haamaitaiaa mo‘a o Ta’na ana‘e e nehenehe e horo‘a. E ti‘a ia tatou, i teie mau taime, ia haamana‘o e o vai mau ra tatou e ia ho‘i atu i roto i te maramarama o te here a to tatou ra Faaora.

Na te taato‘araa o te mau tamarii a te Metua i te Ao ra teie mau haamaitairaa. Te hinaaroraa i teie mau haamaitairaa, e tae noa’tu i te hoê oraraa oaoa e te poupou, o te hoê ïa tufaa faufaa rahi no te opuaraa a te Metua i te Ao ra no tatou tata‘itahi. Ua haapii te peropheta Alama, « Oia ïa, aita’tu i tia ia outou, maori râ o te hinaaro i te faaroo ».²

A tupu ai to tatou mau hinaaro varua i te rahi, e riro ïa tatou i te nava’i i te pae varua. Nahea ra ïa tatou i te tauturu ia vetahi ê, ia tatou iho e i to tatou mau utuafare ia faarahi i to tatou hinaaro i te pee i te Faaora e i te ora i Ta’na evanelia ? Nahea ïa tatou i te haapuai i to tatou mau hinaaro i te tatarahapa, ia ti‘amâ, e ia mau papû e tae noa’tu i te hopea? Nahea ïa tatou i te tauturu i ta tatou feia apî e ta tatou feia apî paari ia ohipa teie mau hinaaro i roto ia ratou e tae noa’tu e ua faafariuhia ratou e e riro mai ratou ei « taata mo‘a mau na roto i te taraehara a te Mesia » ?³

E faafariuhia tatou e e riro mai tatou ei feia nava’i i te pae varua ia ora ana‘e tatou i ta tatou mau fafauraa na roto i te pure— na roto i te amuraa ma te ti‘amâ i te oro‘a, ia ti‘amâ ana‘e tatou no te farii i te hoê parau faati‘a no te hiero, e ia faatusia ana‘e tatou i te taviniraa ia vetahi ê.

Ia rave tatou i te oro‘a ma te ti‘amâ, e haamana‘o ïa tatou e te faaapî ra tatou i te fafauraa ta tatou i rave i te bapetizoraa. Ia riro te oro‘a ei ohipa o te tamâ i te varua i te mau hebedoma atoa, e ti‘a ïa ia tatou ia faaineine ia tatou iho hou a haere atu ai i te pureraa oro‘a. E rave tatou i te reira ma te vaiiho atu i muri ta tatou mau ohipa e faaoaoaraa no te mau mahana atoa e te mau mana‘o e te mau pe‘ape‘a no te ao nei. Ia na reira tatou, e faarii ïa tatou i te Varua Maitai i roto i to tatou aau.

I reira tatou e ineine ai i te feruri hohonu no ni‘a i te Taraehara. Hau atu i te mana‘o noaraa i te mauiui e te pohe o te Faaora, e tauturu ïa to tatou feruriraa ia ite e na roto i te tusia a te Faaora, e noaa ïa ia tatou te ti‘aturiraa, te rave‘a, e te puai ia rave i te mau tauiraa papû mau i roto i to tatou mau oraraa.

A himene ai tatou i te himene oro‘a, a faaroo ai i te mau pure no te oro‘a, e a amu ai i te mau tapa‘o no To’na tino e To’na toto, te imi ra ïa tatou na roto i te pure ia faaorehia mai ta tatou mau hara e to tatou mau paruparu. E feruri tatou i te mau fafauraa ta tatou i rave e i tape‘a i roto i te hebedoma i ma’iri e e rave tatou i te mau faaotiraa ia pee i te Faaora i te hebedoma i mua nei.

Te mau metua e te feia faatere, e nehenehe ta outou e tauturu i te feia apî ia ite i te mau haamaitairaa faito ore no te oro‘a na roto i te horo‘araa’tu ia ratou te mau rave‘a taa ê ia haapii, ia tuatapapa, e ia ite i te faufaa rahi o te Taraehara i roto i to ratou mau oraraa. Ia ma’imi ratou i te mau papa‘iraa mo‘a no ratou iho e ia haapii te tahi i te tahi na roto mai i te mau mea ta ratou iho i ite.

E hopoi‘a taa ê ta te mau metua tane, te feia faatere no te autahu‘araa, e te mau peresideniraa no te pŭpŭ autahu‘araa no te tauturu i te feia apî tei mau i te Autahu‘araa a Aarona ia faaineine maite i te rave i ta ratou mau ohipa mo‘a no te oro‘a. E ravehia teie faaineineraa i roto i te taatoaraa o te hebedoma na roto i te oraraa i te mau ture no te evanelia. Ia faaineine ana‘e, ia haamaitai ana‘e, e ia opere ana‘e te feia apî tane i te oro‘a ma te parau-ti‘a e te tura, te pee mau ra ïa ratou i te hoho‘a o te Faaora i te Oro‘a Hopea⁴ e e riro mau ratou mai Ia’na ra te huru.

Te faaite papû nei au e e horoa mai te oro‘a ia tatou te hoê rave‘a ia haamana‘o e o vai ra tatou e ia ite i te « hoê faahuru-ê-raa-rahi o te aau⁵—ia haamana‘o e o vai ra tatou e te mea ta tatou e hinaaro mau nei. Ia faaapî ana‘e tatou i te fafauraa ia haapa‘o i te mau faaueraa, e noaa ïa ia tatou te hoaraa o te Varua Maitai no te arata‘i ti‘atu ia tatou i mua i te aro o to tatou Metua i te Ao ra ra. E ere i te mea maere i faauehia’i tatou ia « amui pinepine ia rave i te pane e te [pape] »⁶ no te maitai o to tatou mau varua.⁷

Taa ê noa’tu i te oro‘a, e rahi to tatou hinaaro ia ho‘i i te Metua i te Ao ra ia ti‘amâ ana‘e tatou i te farii i te hoê parau faati‘a no te hiero. E riro mai tatou ei mea ti‘amâ na roto i te haapa‘o-noa-raa i te mau faaueraa ma te tamau e te itoito. E haamata teie haapa‘oraa i to tatou tamariirii raa e e tupu te reira i te rahi na roto i te mau ohipa i roto i te mau matahiti faaineineraa o te Autahu‘araa a Aarona e o te Fei Apî Tamahine. I reira, e haamau ai te mau tahu‘a e te mau Tarona i te mau fâ e e faaineine taa ê ai ia ratou iho ia farii i to ratou iho oro‘a hiero e ia taatihia i roto i te hiero.

Eaha te mau faito titauhia i te feia tei mau i te parau faati‘a no te hiero? Te faahaamana‘o mai nei te taata papa‘i salamo ia tatou:

« Na vai e paiuma i te mou‘a o Iehova ? O Vai te tia i to’na ra vahi mo‘a ?

« Te taata rima mâ ra e te aau maitai ».⁸

E horo‘a mai te ti‘amâraa no te mau i te hoê parau faati‘a no te hiero ia tatou e puai ia tape‘a i ta tatou mau fafauraa hiero. Nahea e noaa’i ia tatou taua puai ra ? E tutava ïa tatou ia noaa te hoê iteraa papû no ni‘a i te Metua i te Ao ra, ia Iesu Mesia, te Varua Maitai, te tupuraa mau o te Taraehara, e te parau no ni‘a i te Peropheta Iosepha Semita e te Faaho‘iraahia mai te Evanelia. E turu tatou i to tatou feia faatere, e hamani maitai i to tatou mau utuafare, e ti‘a mai ei ite no te Ekalesia mau a te Fatu, e haere i ta tatou mau pureraa, e faatura i ta tatou mau fafauraa, e rave i ta tatou mau hopoi‘a metua, e e ora tatou i te hoê oraraa viivii ore. E parau paha outou e au ra mea ohie i te riro ei Feia Mo‘a haapa‘o maitai ! Ua ti‘a outou. Te faito no te mau taata tei mau i te parau faati‘a no te hiero e ere ïa i te mea teitei roa no tatou ia titau. O te ora noaraa ïa ma te itoito i te evanelia e te peeraa i te mau peropheta.

I reira, ei mau taata tei farii i to ratou oro‘a hiero e tei mau i te parau faati‘a, e haamau ïa tatou i te mau hoho‘a no te oraraa mai to te Mesia. Tei roto i te reira, te haapa‘oraa, te faatusiaraa no te haapa‘o i te mau faaueraa, te hereraa te tahi i te tahi, te vai mâraa i roto i te feruriraa e te ohipa, e te horo‘araa ia tatou iho no te paturaa i te basileia o te Atua. Na roto i te Taraehara a te Faaora e na roto i te peeraa i teie mau hoho‘a tumu no te haapaoraa, e farii ïa tatou i te « mana no nia maira »⁹ no te faaruru i te mau tamataraa no te oraraa. E hinaaro tatou i teie mana hanahana i teie mahana hau atu i te tahi atu taime. Teie mana o te mana ïa ta tatou e farii na roto ana‘e i te mau oro‘a no te hiero. Te faaite papû atu nei au e e hoona te mau tusia ta tatou e rave no te farii i te mau oro‘a hiero i te mau tutavaraa atoa ta tatou e nehenehe e rave.

Ia tupu ana‘e to tatou hinaaro i te haapii e i te ora i te evanelia, e imi ihoa ïa tatou i te tavini i te tahi e te tahi. Ua parau te Faaora ia Petero, « Ia faafariuhia mai oe ra, a faaitoito i to mau taeae ».¹⁰ Ua faahiahia vau e te vai nei i roto i to tatou feia apî i teie mahana te hinaaro hohonu ia tavini e ia haamaitai ia vetahi ê—ia faatupu i te hoê huru-ê -raa i roto i teie ao. Te hiaai atoa nei ratou i te oaoa no roto mai i ta ratou taviniraa.

Area râ, e mea fifi na te feia apî ia taa e nahea te mau ohipa ta ratou e rave i teie nei e faaineine ai aore râ e faaere ai ia ratou i te mau taime no te taviniraa e vai nei i mua. E « ohipa titauhia »¹¹ ia tatou paatoa ia tauturu i ta tatou feia apî ia faainene no te taviniraa i te roaraa o to ratou oraraa na roto i te tautururaa ia ratou ia riro ei feia o te haapa‘o ia ratou iho. Taa ê noa’tu i te haapaoraa ia ratou i te pae varua ta tatou i tuatapapa na, te vai nei te haapa‘oraa ia’na iho i te pae tino, oia hoi te noaaraa te hoê haapiiraa tuarua aore râ te haapiipiiraa toro‘a, te haapiiraa i te rave i te ohipa, te oraraa ia au i ta tatou faufaa. Na roto i te aperaa i te tarahu e te faaherehereraa i te moni i teie nei, ua ineine ïa tatou no te tavini-rave-tamauraa i te Ekalesia i te tau i mua nei. Te tumu no te faarava’iraa ia’na iho i te pae tino e te pae varua o te ti‘araa ïa i te hoê vahi e nehenehe ai tatou e tauturu i te feia i roto i te ati.

E mea apî aore râ e mea paari anei tatou, na te mea ta tatou e rave nei i teie taime e faataa i te taviniraa ta tatou e nehenehe e horo‘a e e oaoa ananahi. Mai ta te taata papa‘i rohipehe i faahaamana‘o ia tatou, « I te mau parau oto atoa a te arero aore râ a te papa‘iraa, teie ïa te mau parau oto roa‘e: ‘Ahani e !’ »¹² Eiaha tatou e ora i to tatou mau oraraa ma te tatarahapa i te mea ta tatou i rave aore râ i ore i rave!

E te mau taea‘e e te mau tuahine here e, ua ho‘i te taure‘are‘a tei faahitihia e te Faaora i te fare, te taure‘are‘a ta tatou e faahiti nei te tamaiti tei haere i te fenua roa. Aita to’na metua tane i haamo‘e ia’na ; ua tia’i to’na metua tane ia’na. E « tei te atea ê â [te tamaiti], ite maira tana metua ia’na, aroha maira, e horo maira, e… hô‘ihô‘i maira ia’na ».¹³ Ei faanahahanaraa i te ho‘iraa mai o ta’na tamaiti, ua ani oia i te hoê ahu, te hoê tape‘a rima e te hoê faanahahanaraa e te hoê puaatoro poria,¹⁴ e mau faahaamana‘oraa e aore e haamaitairaa e tape‘ahia mai te mea e haapa‘o itoito tatou i te mau faaueraa ia nehenehe ia tatou ia ho‘i atu i to tatou Metua i te Ao ra.

Ma To’na here e te here o Ta’na Tamaiti i roto i to’u aau, te titau nei au ia tatou tata‘itahi ia pee i to tatou mau hinaaro varua e ia haamana‘o e o vai mau ra tatou. A paraparau atu ia tatou iho i roto i te hi‘o e a ui, « I hea vau i te ti‘araa mai te au i ta’u mau fafauraa? » Tei ni‘a ïa tatou i te e‘a ti‘a ia nehenehe ana‘e ia tatou ia parau e, « Te amu nei au i te oro‘a i te mau hebedoma atoa ma te ti‘amâ, e mea ti‘amâ vau i te mauraa i te hoê parau faati‘a no te hiero, te haere nei au i te hiero, e te faatusia nei au no te tavini e no te haamaitai ia vetahi ê ».

Te faaite nei au i to’u iteraa papû e i aroha mau te Atua ia tatou tata‘itahi « e ua tae roa i te horoa mai i ta’na Tamaiti fanau tahi »¹⁵ no te aufau i ta tatou mau hara. Ua ite Oia ia tatou e te tia’i nei oia ia tatou, noa’tu e ua atea ê roa tatou Ia’na. A faaohipa ai tatou i to tatou mau hinaaro e a ite ai tatou e o vai mau tatou, e « ati-noa-hia ïa tatou e te rima o to’na ra aroha »¹⁶ e e fariihia mai tatou. Te faaite papû nei au i te reira na roto i te i‘oa mo‘a o to tatou Faaora, o Iesu Mesia, amene.