Liua i Lana Talalelei e ala i Lana Ekalesia

Ou te fiafia i le talalelei a Iesu Keriso ma Le Ekalesia a Iesu Keriso o le Au Paia o Aso e Gata Ai. O nisi taimi tatou te felafoa’ia ai le faaaogaina o le upu talalelei ma le Ekalesia ae e le tutusa upu ia e lua. Peitai, e matagofie tele lo la fesootaiga, ma tatou te manaomia uma mea ia e lua.

O le talalelei o le fuafuaga mamalu a le Atua lea, i le avea ai o i tatou ma Ana fanau, ua tuu mai ai le avanoa e maua ai mea uma ua i ai i le Tama (tagai i le MF&F 84:38). Ua ta’ua lea o le ola e faavavau ma ua faamatalaina “o le meaalofa silisili lea o meaalofa uma a le Atua” (MF&F 14:7). O se vaega taua o le fuafuaga, o lo tatou olaga faalelalolagi lea—o se taimi e atiae ai le faatuatua (tagai i le Moronae 7:26), ia salamo ai (tagai i le Mosaea 3:12), ma ia toe faalelei ai i tatou lava ma le Atua (tagai i le Iakopo 4:11).

Aua o o tatou vaivaiga faaletino ma “faafeagai o mea uma” (2 Nifae 2:11) o le a matua faigata ai lava lenei olaga ma e talu ai e le mafai ona tatou faamamaina a tatou lava agasala, o lea sa manaomia ai se Faaola. Ina ua tuuina mai e Elohima, le Atua Faavavau ma le Tama o o tatou agaga uma Lana fuafuaga o le faaolataga, sa i ai se tasi mai ia i tatou sa faapea atu, “O Au lenei, auina atu au” (Aperaamo 3:27). O Lona suafa o Ieova.

Na soifua mai i se Tama Faalelagi, i la le agaga ma la le tino, sa ia te Ia le mana silisili e faatoilalo ai le lalolagi. Na soifua mai i se tina faalelalolagi, sa mafai ai ona oo o Ia i tiga ma puapuaga o le olaga faaletino. O le Ieova sili sa igoa foi ia Iesu ma faapena ona tuu atu i ai le suafa o Keriso, o lona uiga o le Mesia po o Lē ua Faauuina. O le faatumutumuga o mea uma na Ia faia o le togiola, lea na “afio ifo [ai Iesu le Keriso] i lalo o mea uma” (MF&F 88:6), lea na mafai ai ona Ia totogia se tau mo le togiolaina o i tatou taitoatasi.

Sa faatuina e Iesu Keriso le Ekalesia i le taimi o Lana galuega faalelalolagi, “ua atiina ae i luga o le faavae o le au aposetolo ma le au perofeta” (Efeso 2:20). I le taimi lenei, “le tisipenisione o le atoaga o taimi” (MF&F 128:18), sa toefuatai mai ai e le Alii le mea na ta’u patino atu i le Perofeta o Iosefa Samita, “o le a Ou faatuina se aulotu e ala i lou lima” (MF&F 31:7). Sa avea Iesu Keriso ma e avea pea ma ao o Lana Ekalesia, lea o loo avea ma Ona sui i le lalolagi ia perofeta o loo umiaina le pule faaaposetolo.

O se Ekalesia maoae lenei. O lona faatulagaga, mataalia, ma le lelei atoatoa ua faaaloalogia e tagata uma o e o saili ma le faamaoni ia malamalama i ai. Ua i ai i le Ekalesia ni polokalama mo tamaiti, autalavou, alii, ma tamaitai. E i ai ni ona faletapuai matagofie e silia ma le 18,000 le aofai. O malumalu ofoofogia—ua 136 nei le aofai—ua salalau i le lalolagi, faatasi ai ma le isi 30 o loo faagasolo le fausiaina pe ua uma ona faasilasila mai. O se malosiaga faafaifeautalai faamisiona ua silia ma le 56,000, e i ai ē talavou ma ē le talavou tele, o loo auauna atu i le 150 atunuu. O la tatou galuega o fesoasoaniga agaalofa a le Ekalesia i le lalolagi atoa, o se faataitaiga ofoofogia o le agalelei o o tatou tagata. O la tatou polokalama o le uelefea e tausia ai o tatou tagata ma uunaia ai le ola faalagolago o le tagata lava ia i se tulaga e le faaluaina ai i soo se mea. I lenei Ekalesia o loo i ai ni taitai e le malolo ma le le manatu faapito ma se nuu o le Au Paia o e e naunau e auauna atu le tasi i le isi i se auala maoae. E le o i ai se isi mea e pei o lenei Ekalesia i le lalolagi atoa.

Ina ua ou fanau mai, sa nonofo lo matou aiga i se tamai fale i le lotoa o se tasi o falelotu maoae ma le logologoa o le Ekalesia, le Honolulu Tabernacle. Ou te faatoese atu nei i au uo pele i le Au Epikopo Pulefaamalumalu, o e sa vaavaaia fale ma fanua o le Ekalesia, ae a o o’u laitiiti, sa ou a’e ai i luga ma lalo ma fealuai ai i vaega uma o lena fale, mai le pito i lalo o le vaito’a e oo atu i le pito i luga o totonu o le tumutumu matagofie ua faamolīina. Sa matou tāupe solo (e pei o Tarzan) i lala uumi sa tautau i lalo mai laau tetele sa i ai i le lotoa.

Sa avea le Ekalesia ma mea uma ia i matou. Sa matou o i le tele o sauniga, e sili nai lo sauniga ua tatou maua i aso nei. Sa matou o i le Peraimeri i aoauli o Aso Tofi. O sauniga a le Aualofa sa faia i taeao o Aso Lua. O Motuale a le autalavou o po o Aso Lulu. O Aso Toonai e mo gaoioiga a le uarota. O Aso Sa, e o ai alii ma alii talavou i le sauniga perisitua i le taeao. O le aoauli matou te o ai i le Aoga Sa. Ona oo lea i le afiafi, matou te toe foi atu mo le sauniga faamanatuga. I le o atu ma o mai atoa ai ma sauniga, sa foliga mai na matua uma ai o matou taimi i gaoioiga a le Ekalesia i le Aso Sa atoa ma le tele o isi aso o le vaiaso.

I le tele o lo’u fiafia i le Ekalesia, i le taimi o na aso o le tamaitiiti, lea e mo le taimi muamua, sa ou maua ai se lagona o loo i ai se isi mea e sili atu. Ina ua lima ou tausaga, sa fai se konafesi tele i le tapeneko. Sa matou savavali atu i le ala mai le mea sa matou nonofo ai ma pasia ai se tamai alalaupapa e oo atu ai i le falelotu tele ma saofai ai i le atunofoa lona 10 i le falesa tele. O lē sa pulefaamalumalu ma lauga i le sauniga o Tavita O. MaKei, le Peresitene o le Ekalesia. Ou te le manatuaina se mea na ia saunoa ai, ae ou te manatua ma le manino le mea sa ou vaaia ma lagonaina. Sa laei e Peresitene MaKei se suti lanu enaena, ma lona lauulu sinasina tau migimigi, sa foliga mamalu. I tu masani o le motu, sa ia ‘ulaina ai le faasolo mafiafia o fugalaau lanumumu. A o ia saunoa mai, sa ou lagonaina se mea na fai si malosi ma patino tele. Sa mulimuli ane ou malamalama na ou lagonaina le uunaiga a le Agaga Paia. Sa matou usuina le viiga faaiu.

Faatasi ma na upu sa usuina e le toetoe 2,000 tagata ae sa foliga mai o se fesili na tuu mai mo na o au lava, sa ou manao ai ou te tu atu ma fai atu, “o a’u!”

O nisi e manatu o gaoioiga i le Ekalesia o le sini silisili lea. O loo taoto ai i totonu se tulaga lamatia. E mafai ona toaga i le Ekalesia ae le toaga i le talalelei. Sei ou faamamafa atua: o gaoioiga i le Ekalesia o se sini moomia maualuga lea; peitai, e le o lava. O le toaga i le Ekalesia o se faailoga lea faaletino o lo tatou mana’o faaleagaga. Afai tatou te auai i a tatou sauniga, faia ma faataunuu ia tiutetauave o le Ekalesia, ma auauna atu i isi, o lea toaga e matauina e tagata lautele.

I se eseesega, o mea o le talalelei e masani lava ona itiiti se mea e vaaia ma sili atu ona faigata ona fuatia, ae o mea na e sili atu ona taua e faavavau. Mo se faataitaiga, o le a se tele o le faatuatua o i ai moni ia i tatou? O le a so tatou salamo o i ai? O le a se taua tele o sauniga i o tatou olaga? O faape’i so tatou taulai atu i a tatou feagaiga?

Ou te toe fai atu: tatou te manaomia le talalelei ma le Ekalesia. O le mea moni, o le faamoemoega o le Ekalesia o le fesoasoani lea ia i tatou ia ola i le talalelei. E tele lava ina tatou manatunatu: E mafai faapefea ona toaga atoatoa se tagata i le Ekalesia a o talavou ae le toaga pe a oo ina matua? E mafai faapefea e se tagata matua na auai soo mai ma auauna atu ona le toe sau? E mafai faapefea e se tagata sa le fiafia i se taitai po o se isi tagata ona faatagaina lena mea e faamuta ai lona auai i le Ekalesia? Atonu o le mafuaaga e lei lava le liuaina o i latou i le talalelei—o mea ia o le faavavau.

Ou te fautua atu ni ala taua se tolu e avea ai le talalelei ma o tatou faavae:

1. Ia faaloloto lo tatou malamalama i le Aiga Atua. O se malamalama tumau ma le alofa mo tagata e toatolu o le Aiga Atua e matuai taua lava. Ia tatalo ma le mafaufau i le Tama, i le suafa o le Alo, ma saili atu i le taitaiga mai le Agaga Paia. O tatalo ma suesuega faifai pea ma le mafaufau loloto ma le lotomaualalo, faaauau pea ona fausia se faatuatua le malulue ia Iesu Keriso. “Aua pe faapefea ona iloa e se tagata le matai … o se tagata ese ia te ia, ma ua mamao mai mafaufauga ma faamoemoega o lona loto?” (Mosaea 5:13).

2. Taulai atu i sauniga ma feagaiga. Afai o i ai soo se sauniga taua e lei faatinoina i lou olaga, ia saunia ma le loto i ai ia maua na sauniga taitasi. Tatou te manaomia foi ona faamautu le faautauta e ola ai ma le faamaoni i a tatou feagaiga, i le faaaogaina atoatoa lea o le meaalofa o le faamanatuga i vaiaso taitasi. O le toatele o i tatou e le o suia i taimi uma e lona mana faamama ona o le leai o se migao mo lenei sauniga paia.

3. Ia tuufaatasi le talalelei ma le Ekalesia. A o tatou gauai atu i le talalelei, o le a avea atili ai le Ekalesia ma faamanuiaga sili i o tatou olaga. A tatou o mai i sauniga taitasi ua saunia e “saili i le aoaoina, e ala lava lea i le suesue ma le faatuatua foi” (MF&F 88:118), o le a avea le Agaga Paia ma o tatou faiaoga. Afai tatou te o mai ina ia faafiafiaina i tatou, e tele lava ina tatou le fiafia. Sa i ai se taimi na fesiligia ai Peresitene Spencer W. Kimball, “O le a sau mea e fai pe a e i ai i se sauniga faamanatuga e pe?” O lana tali: “Ou te le iloa. Ou te lei alu lava i se faamanatuga faapena” (na sii mai e Gene R. Cook, i le Gerry Avant, “Learning Gospel Is Lifetime Pursuit,” Church News, 24 Mat., 1990, 10).

I o tatou olaga e tatau ona tatou mananao i mea na tutupu ina ua mavae le afio ifo o le Alii i tagata o le Lalolagi Fou ma faatu ai Lana Ekalesia. E faitauina le mau faapenei: “Ma sa oo ina faapea ona latou o atu i totonu o le nuu atoa o Nifae, ma talai atu le talalelei a Keriso i tagata uma i luga o le laueleele; ma sa faaliliuina i latou i le Alii, ma faatasia i le ekalesia a Keriso, ma sa faapea ona faamanuiaina o tagata o lena tupulaga” (3 Nifae 28:23).

Ua finagalo le Alii i tagata o Lana Ekalesia ina ia liua atoatoa i Lana talalelei. Ua na o le pau lava lenei o le ala e maua ai le saogalemu faaleagaga i le taimi nei ma le fiafia e faavavau. I le suafa o Iesu Keriso, amene.