Faafariuhia i Ta’na evanelia na roto i Ta’na Ekalesia

Ua here au i te evanelia a Iesu Mesia e Te Ekalesia a Iesu Mesia i te Feia Mo‘a i te mau Mahana Hopea Nei. Te tahi mau taime, e tauiui tatou i te parau evanelia i te parau Ekalesia, tera râ e ere te hoê â mea. Noa’tu râ te reira, e mea tu‘ati nehenehe raua, e e mea titauhia na mea toopiti no tatou.

Te evanelia, o te opuaraa hanahana ïa a te Atua i reira tatou, ei mau tamarii Na’na, e horo‘ahia ai te rave‘a no te farii i te mau mea atoa a te Metua (a hi‘o PH&PF 84:38). Te parauhia nei te reira te ora mure ore e te faahiti-atoa-hia nei te reira ei « horoa hau a‘e te reira i te mau horoa atoa a te Atua » (PH&PF 14:7). Te hoê tuhaa faufaa roa o teie opuaraa oia ho‘i ïa to tatou oraraa i ni‘a i te fenua nei, te hoê taime no te faatupu i te faaroo (a hi‘o Moroni 7:26), no te tatarahapa (a hi‘o Mosia 3:12), e no te faaau ia tatou i te Atua (a hi‘o), Iakoba 4:11).

No te iteraa e, e haafifi rahi mai to tatou mau paruparu tahuti i to tatou nei oraraa, no te mea e « vai na pae e piti i te mau mea atoa ra » (2 Nephi 2:11), e no te mea atoa aita ta tatou e nehenehe e tamâ i ta tatou iho mau hara, ua faaineinehia te hoê Faaora. I to Elohima, te Atua mure ore e te Metua o to tatou mau varua, faaiteraa i Ta’na opuaraa no te faaoraraa, ua parau atu te hoê i rotopû ia tatou e, « Teie au, a tono ia’u » (Aberaham 3:27). To’na i‘oa o Iehova.

No To’na fanauraahia e te Metua i te Ao ra, i te pae varua e i te pae tino, tei Ia’na ra te mana hope no te upooti‘a i te ao nei. No To’na fanauraahia e te metua vahine tahuti, tei raro atoa Oia i te mauiui e te mamae o te tahuti nei. Ua topa-atoa-hia te i‘oa o Iehova o Iesu e i muri iho ua horo‘ahia te i‘oa mana o te Mesia, te auraa ra, Tei Faatahinuhia. Te ohipa hope Ta’na i rave, o te Taraehara ïa, i reira Iesu te Mesia « i pou mai i raro a‘e i te mau mea atoa ra » (PH&PF 88:6), na roto i te reira ua ti‘a Ia’na i te aufau hope no tatou tata‘itahi.

Ua faati‘ahia te Ekalesia e Iesu Mesia i te roaraa o To’na taviniraa i ni‘a i te fenua nei, e ua « patuhia i nia iho i te niu a te mau aposetolo e te mau peropheta ra » (Ephesia 2:20). Na roto i te reira, « te tau tuuraa no te îraa o te mau tau atoa » (PH&PF 128:18), te Fatu i te faaho‘i-faahou-raa mai o tei riro na, ma te parau taa ê i te peropheta Iosepha Semita e, « E e faatia ïa vau i te hoe ekalesia na roto i to oe na rima ra » (PH&PF 31:7). Ua ti‘a e te ti‘a nei Iesu Mesia i te upoo o Ta’na Ekalesia, monohia i ni‘a i te fenua nei e te mau peropheta e mau ra i te mana aposetolo.

E Ekalesia nehenehe mau. Ta’na faanahoraa, te aravihi, e te maitai papû ua faaturahia e te feia atoa e imi mau nei ia taa maitai atu i te reira. E faanahoraa ta te Ekalesia na te mau tamarii, na te feia apî, na te tane e na te tuahine. Te vai nei ta’na hau i te 18.000 mau fare pureraa. Te mau hiero nehenehe mau—ia amuihia i teie nei e 13—e ti‘a ra na te ao atoa nei, e e 30 atu o te patuhia ra e aore râ o tei faaarahia na. Hoê nuu o te mau misionare rave tamau, hau i te 56.000, te feia apî e te feia paari a‘e, o te tavini nei i roto i na 150 fenua. E faaiteraa hanahana te ohipa tauturu i te ao nei a te Ekalesia i te huru horo‘a maitai o ta tatou mau melo. Te atuatu nei ta tatou faanahoraa totauturu i ta tatou mau melo e te faaitoito nei te reira i te faaravairaa ia’na iho i te faito taa ê mau i tei itehia i te tahi atu mau vahi. I roto i teie Ekalesia, te vai nei ta tatou feia faatere matau ore e te imi ore i to ratou apî, e na reira atoa te amuiraa o te Feia Mo‘a e hinaaro ra i te tavini i te tahi e te tahi i te huru faahiahia mau. Aita atu e mea na te ao atoa nei mai teie Ekalesia.

I to’u fanauraahia, te ora ra to matou utuafare i roto i te hoê fare na‘ina‘i i te vahi o te hoê o te mau fare pureraa tahito e te tuiroo a te Ekalesia, te Fare Menemene no Honolulu. Te tatarahapa nei au i mua i to’u na hoa no te Episekoporaa faatere rahi, o ratou e tiaau nei i te mau paturaa a te Ekalesia, no te mea i to’u vai-tamarii-raa, ua ta‘uma noa vau na te mau vahi atoa i tera aua fenua ra, mai te haapunaraa pape anaana e ni‘a roa i te fare no te oe rahi e te teatea. Ua tarere atoa matou (mai ia Tarzan ra) na ni‘a i te mau tumu ôrâ e tupu ra i tera vahi.

Ua riro te Ekalesia ei taatoaraa no matou. Ua haere matou i te mau pureraa e rave rahi, hau atu i to teie mau mahana. Ua haere matou i te Paraimere i te mahana maa i te avatea. Tei te mahana piti i te po‘ipo‘i te pureraa na te Sotaiete Tauturu. Te faaoaoaraa na te feia apî, tei te mahana toru ïa i te ahiahi. I te mahana maa ta matou mau faaoaoaraa paroisa. I te mahana sabati, e haere te mau tane e te feia apî tamaroa i te pureraa autahu‘araa i te po‘ipo‘i. I te avatea, e haere matou i te Haapiiraa Sabati. E i te ahiahi, e ho‘i matou no te pureraa oro‘a. No tera noa mau haereraa e tera mau apooraa, e au e, ua pau roa to matou taime i roto i te mau ohiparaa a te Ekalesia, te mahana atoa i te sabati e te tahi rii mau mahana i te hepetoma.

No to’u here rahi i te Ekalesia i tera mau tau no to’u vai-tamarii-raa, no te taime matamua, ua tae mai i to’u aau i te tahi mea hau atu. I te paeraa o to’u matahiti, ua tupu te hoê amuiraa rahi i te fare menemene. Ua pou matou na te aroa e haere atu ai na ni‘a i te hoê e‘a turu na‘ina‘i e tae atu ai i taua fare pureraa rahi ra e i reira parahi atura matou i te 10raa o te apaparaa parahiraa i roto i te fare pureraa. Te taata i peresideni e i a‘o mai i tera mahana ra, o David O. McKay, peresideni o te Ekalesia. Aita vau e haamana‘o ra i ta’na i parau mai, te haamana‘o papû râ ra vau i te mea ta’u i ite e te mea i tae mai i to’u aau. Ua ahu mai te peresideni i te hoê pereue mauouo e mea nehenehe maitai to’na rouru, e hi‘oraa maitai roa to’na. Mai tei matauhia i te mau motu, ua faaheihia oia i te hei tiare uteute e toru meumeuraa. A paraparau ai oia, ua tae mai i to’u aau i te hoê mea huru puai e te taa ê no’u iho. I muri roa mai ua taa ia’u e ua farii au i te faaurûraa o te Varua Maitai. Ua himene matou te himene hopea.

I to te amuiraa, piri atu i te 2.000 taata, himeneraa i teie mau parau, e au râ o te hoê uiraa tei uihia ia’u ana‘e, e ua hinaaro roa vau i te ti‘a no te parau e, « O vau ! »

Te mana‘o ra te tahi e, te ohiparaa i roto i te Ekalesia o te fâ matamua ïa. A ara ! e ati to reira. E nehenehe ia vai itoito roa i roto i te Ekalesia ma te vai paruparu i roto i te evanelia. Te haapapû nei au : ua riro te ohiparaa i roto i te Ekalesia ei fâ hinaaro-mau-hia, tera râ, aita e nava‘i. E tapa‘o faaiteraa no rapae te ohiparaa i roto i te Ekalesia no to tatou hiaai pae varua. Mai te peu e haere tatou i te pureraa, e farii e e rave i te hoê piiraa i roto i te Ekalesia, e e tavini ia vetahi ê, e mea ïa te reira e hi‘ohia nei e te taata.

I te tahi râ pae, te mau mea o te evanelia e mea ite-ore-hia i te mata e e mea fifi roa ia faito, tera râ, e mea faufaa rahi e te mure ore ho‘i. Ei hi‘oraa, eaha te faito mau no to tatou faaroo ? Eaha to tatou faito tatarahapa ? Eaha te auraa mau no te mau oro‘a i roto i to tatou oraraa ? Eaha to tatou faito mana‘ona‘oraa i ta tatou mau fafauraa ?

Te parau faahou nei au e : e hiaai tatou i te evanelia e i te Ekalesia. Oia mau, te fâ o te Ekalesia oia ho‘i te tautururaa ia tatou ia ora i te evanelia. E maere noa tatou : Nahea râ i te tahi taata e nehenehe ai e vai itoito noa i roto i te Ekalesia i to’na apîraa e i muri mai e faaru‘e a paari ai oia ? Nahea e nehenehe ai i te hoê taata paari e tamau noa i te haere mai i te pureraa e ia tavini e ia faaea ta‘ue mai te reira ? Nahea e nehenehe ai i te hoê taata tei inoino i te hoê taata faatere e aore râ i te tahi melo e faaea i te ohipa i roto i te Ekalesia ? Peneia‘e te tumu, o te nava‘i ore no to ratou faafariuraa i te evanelia—te mau mea mure ore.

Te tuu nei au e toru mana‘o faufaa roa no te faariro i te evanelia ei niu no tatou :

1. A faahohonu i to tatou maramarama no ni‘a i te Atuaraa. E mea titauhia te hoê iteraa hohonu e te hoê here papû i na toru melo no te Atuaraa. A pure ma te aau tae i te Metua, i te i‘oa o te Tamaiti, e a imi i te arata‘iraa a te Varua Maitai. Na reira outou i te tuatapapa tuutuu-ore-raa e i te feruri hohonuraa ma te haehaa, no te patu tamau mai i to outou faaroo aueue ore ia Iesu Mesia. « Nahea e ite ai te hoê taata i te Fatu… e tei vai taata ê ra ia’na, e te atea ê te mau mana‘o e te mau opuaraa e to’na ra aau ? » (Mosia 5:13).

2. A faatumu i ni‘a i te mau oro‘a e te mau fafauraa. Mai te peu te vai ra te tahi mau oro‘a e ti‘a ia ravehia i roto i to outou oraraa, a faaineine ma te hinaaro mau no te farii i te reira. I muri mai, e ti‘a ia tatou ia faataa i te tahi ture oraraa no te haapa‘o i ta tatou mau fafauraa, ma te faaohipa hope i te horo‘a o te pureraa oro‘a i te mau hepetoma atoa. E rave rahi o tatou aita e taui-tamau-hia nei e teie mana tamâ no to tatou oreraa e faaite i te tura no teie oro‘a mo‘a.

3. A apiti te evanelia i te Ekalesia. Ia faatumu ana‘e tatou i ni‘a i te evanelia, e riro mai te Ekalesia ei haamaitairaa rahi, eita e iti mai, i roto i to tatou oraraa. Ia haere ineine tatou i te mau pureraa atoa no te « imi hoi i te ite, oia ïa na roto hoi i te haapii e na roto atoa i te faaroo » (PH&PF 88:118), e riro mai te Varua Maitai ei orometua no tatou. Ia haere mai râ tatou no te faaarearea, e inoino noa ïa tatou. I te hoê mahana, ua ani te peresideni Spencer W. Kimball, « Eaha ta outou e rave mai te mea e mea fiu no outou te hoê pureraa oro‘a ? » Ta’na iho pahonoraa : « aita vau i ite. Aitâ vau i parahi a‘e nei i roto i te hoê pureraa mai te reira » (faahitiraa na Gene R. Cook, no roto mai i Gerry Avant, “Learning Gospel Is Lifetime Pursuit,” Church News, 24 no mati 1990, 10).

I roto i to tatou oraraa, e mea ti‘a ia tatou ia hiaai i te mea i tupu na i muri mai i to te Fatu haereraa i te nunaa i te Ao Apî e ua faati‘a ihora i Ta’na Ekalesia. Te na ô nei te papa‘iraa mo‘a, « Haere atura ratou [oia ho‘i Ta’na mau pĭpĭ] i te ati Nephi atoa ra ma te poro haere i te evanelia a te Mesia i te mau taata i nia i te fenua e hope roa‘e ; e ua faafariuhia mai ratou i te Fatu, e ua amuihia i te ekalesia a te Mesia, e ua na reira te taata i taua ui ra te haamaitaihia i ta Iesu parau ra » (3 Nephi 28:23).

Ua hinaaro te Fatu i te mau melo no Ta’na Ekalesia ia faafaariu-hope-hia i Ta’na evanelia. Teie ana‘e te rave‘a papû no te farii i te paruru i te pae varua e te oaoa a muri atu. I te i‘oa o Iesu Mesia, amene.