Vakabauta, Yaloqaqa, Vakacegu: Dua na iTukutuku Vei Ira na iTubutubu Dua

Na noqu itukutuku e baleti ira na itubutubu dua ena Lotu, ka iwiliwili levu vei ira ka ra tina sega ni vakawati—Oi kemuni na marama yaloqaqa, mai na veiituvaki duidui ni bula, o ni sa mai veisusu tiko vei ira nomuni gone ka cicivaka tiko vakataki kemuni na nomuni vuvale. O ni yada voli beka se o ni sa sere. O ni sotava tiko beka na bolebole ni bula vakaitubutubu dua ena dua beka na gole cala ena taudaku ni vakamau, ia ko ni sa tiko oqo ena loma ni kosipeli, ena nomuni sa veisautaka na nomuni bula. Ni kalougata ni o ni dau levea tiko na veitokani e dau vakacacana na ivalavala dodonu kei na bula vakatisaipeli. Sa rui levu na kena revurevu ca ena yaco mai vei keda.

E dina ni so beka na gauna o ni dau taroga kina, a cava e yaco kina vei au? ia mai na dredre ni bula, eda na tubu kina ki na bula vakalou ka ni dau tarai cake na noda ivakarau ni bula mai na veika dredre duadua, eda dau sotava, ni toso tiko na noda bula ena gauna vata e rokova tiko kina na Kalou na galala ni tamata. Me vaka e tukuna o Elder Neal A. Maxwell, eda na sega ni rawa ni vakasotara vata kece se rawata na kena isoqoni baleta ni “sega ni tiko vei keda na naba kece sara.”¹

Se cava ga na ituvaki ni bula se na vuna era yaco kina, o ni sa rui vakasakiti. Ena veisiga yadua o ni sotava tiko na dredre ni bula, ena nomuni cakava tiko na cakacaka e dodonu me rau cakava e le rua ia o ni sa cakava duadua voli. O ni tama ka tina talega. O ni cicivaka tiko na nomuni matavuvale, vakatawa na nomuni matavuvale, ena so na gauna ni dau taqei dredre me rawa na veika ni bula, ka veivakurabuitaki na nomuni dau kunea na sala mo ni veiqaravi kina ena Lotu ena veiitavi bibi eso. O ni susugi ira cake na luvemuni. O ni dau tagi ka masu vata kei ira ka masulaki ira. O ni vinakata na veika vinaka duadua ena vukudra ia o ni dau leqataka e veibogi de sega tiko ni se rauta na nomuni vinaka duadua.

Au sega ni vinakata meu tukuni au vakasivia, o au na vua ni dua na vuvale vakaoqori. Ena vuqa na veiyabaki ni bula vagone kei na itabagone a susugi keitou cake duadua ga na tinai keitou ena ituvaki ni bula dravudravua. Sa dau lewai vakamatau sara na ilavo. A vosota o koya na galili e loma, ka dau gadreva vakalevu ena so na gauna me tokoni ka vakaitokani. Ia ena loma ni veika kece oqori, e dua na ka dokai baleta na tinaqu, e dua na ivurevure vakaitamera ni gugumatua kei na ivakarau ni bula tudei vaka-Sikote.

E vakavinavinakataki vakalevu, ni a qai vakalougatataki vakalevu cake na nona veiyabaki e muri mai na kena itekivu. A qai vakawatitaka e dua e qai curuvou mai, e dua na dawai; erau a vauci vata ena Valetabu mai Lodoni e Igiladi ka rau a qai veiqaravi kina vakalekaleka vakaliganicakacaka tabu. Erau a qai tiko vata me voleka ni dua na ikava ni senijiuri—ena marau, vakacegu, ka sautu me yacova ni rau qai takali yani mai na bula oqo.

E vuqa vei kemuni na marama vinaka ena Lotu e vuravura raraba era sotava tu na ituvaki vata oqori ko ni vakaraitaka na ivakarau ni igu vata oqori ena veiyabaki veitaravi.

Oqo e sega ni ka o ni vakanuinui kina se nakita, o ni masulaka se namaka, ena nomuni tekivu mai ena veiyabaki sa oti. Na nomuni ilakolako ena bula era sotavi kina na sukusukura, na gole tani, na vakatikitiki, kei na veigoleyaki, vakavuqa ni vua ni bula ena dua na vuravura lutu ka nakiti me vanua meda mai vakadinadinataki keda ka vakatovolei kina.

Ia, o ni segata tiko mo ni susugi ira cake na luvemuni ena buladodonu kei na dina, ena nomuni kila tiko ni dina ga ni o ni na sega ni veisautaka rawa na veika sa sivi yani, ia e rawa ni o ni taracake na veisiga ni mataka. Ena loma ni ilakolako o ni na rawata na veivakalougatataki me kena isau, kevaka sara mada ga era sega ni se matata tu vakasigalevu.

Ena nona veivuke na Kalou,mo ni kakua ni rerevaka na veisiga ni mataka. Era na tubu cake na luvemuni ka vakatokai kemuni mo ni sa kalougata, ka ni na dau vakacaucautaki ena veika yadua era rawata.

Ni yalovinaka ka kakua sara ni nanuma ni o ni ikarua ni ivakatagedegede ni lewe ni Lotu, ka lailai sobu na nomuni dodonu ki na veivakalougatataki ni Turaga mai vei ira tale eso. Ena matanitu ni Kalou e sega ni dua na ikarua ni kalasi ni lewenivanua.

Keimami nuitaka ena nomuni dau lakova na soqoni eso ka raica na veimatavuvale taucoko ka mamarau se ni o ni rogoca e dua ni tukuna na veika talei me baleta na matavuvale, o ni na marautaka ni o ni lewena e dua na lotu ka vakanamata ki na matavuvale ka vakavuvulitaka na kena itavi bibi ena nona ituvatuva ni marau na Tamada Vakalomalagi ena vukudra na Luvena; ena loma ni veika rerevaki kei na vakawaleni ni bula savasava e vuravura, sa tu vei keda na ivunau, na dodonu, na cakacakatabu vakalotu kei na veiyalayalati ka tu kina na inuinui vinaka duadua ni vuravura, ka oka kina na nodra bula marau na luvemuni ena veisiga ni mataka kei na matavuvale era na tauyavutaka.

Ena soqoni raraba ni iSoqosoqo ni Veivukei ni Sepiteba 2006, a tukuna kina o Peresitedi Gordon B. Hinckley na ka a wasea e dua na tina sa veisere oti ka tinadratou e vitu na gone ka tiko na nodratou yabaki ni bula ena gauna o ya mai na 7 ki na 16. A takosova na gaunisala me solia e dua na ka vei koya erau tiko veivolekati. E kaya o koya:

“Niu vuki meu lesu ki vale, au raica ni sa rarama levu tu na noqu vale. Au rawa ni rogoca na voqa ni domodratou na luvequ ena noqu curu mai katuba ena vica na miniti sa oti. Eratou kaya tiko mai: ‘Na, na cava na ivakayakavi?’ ‘E rawa ni o kauti au ki na valenivola?’ ‘Au vinakata eso na pepa kabi ena bogi nikua.’ Ena oca kei na yaluma, au raica yani na vale o ya ka raica ni waqa tu na cina ena kena veirumu yadua. Au vakasamataki ira na gone era waraki au tu mai kina meu sotava na nodra gagadre. Au vakila na bi ni noqu icolacola kau sa sega ni rawa ni colata.

“Au nanuma noqu rai yani ena mata tagitagi ki lomalagi, kau kaya, ‘Isa Tamaqu au sa na sega ni rawata ena bogi nikua. Au sa rui oca vakalevu. Au sega ni rawa ni sotava. Au sega ni rawa ni lako i vale ka laki qaravi iratou duadua na gone o ya. E rawa beka niu lako yani vei Kemuni ka laki tiko vata kei Kemuni me dua ga na bogi? …’

“Au sega ni rogoca dina na vosa e saumi mai kina, ia au rogoca ena noqu vakasama. Na kena isau e vakaoqo: ‘Sega, noqu ka lailai, e sega ni rawa ni o lako mai vei au oqo. … Ia e rawa niu lako yani vei iko.’”²

Vinaka vakalevu kemuni na marama, ena veika kece o ni sa cakava tiko mo ni susuga cake kina na nomuni matavuvale ka maroroya tiko e dua na vuvale dau veilomani ka tu kina na vinaka, sautu kei na veimadigi.

E dina ni o ni dau galili vakavuqa, na dina ni o ni sega vakadua ni tu duadua ga. Ni o ni toso ki liu ena vosota kei na vakabauta, ena toso vata kei kemuni o koya na Dauveivakarautaki; ena solia mai ko lomalagi na nona veivakalougatataki e gadrevi.

Ena veisau na nomuni ivakarau ni rai kei na nomuni raica na bula, ena nomuni sega ni biuti kemuni sobu, ka rai cake.

E vuqa vei kemuni o ni sa raica rawa na dina cecere, e dau vakayacora na veisau ena nomuni bula, ena nomuni laveti ira cake na tani, sa mamada cake kina na nomuni icolacola. E dina beka ni na sega ni veisau na ituvaki ni bula, sa veisau na ivakarau ni nomuni rai. Sa rawa ni o ni sotava na nomuni veivakatovolei ena yalo ni veiciqomi, ena yalovosota, kei na vakavinavinaka titobu cake ena veika e tu vei kemuni, ka sega ni tagica tikoga na veika e sega vei kemuni.

O ni sa raica rawa ni gauna eda segata kina meda dodoka yani na ligada ni veivakacegui vei ira era rarawa tu, eda na kunea na vakacegu levu; ena “vuabale na mequ bilo” (Same 23:5).

Mai na bula dodonu, ena rawa kina vei kemuni kei ira na luvemuni ena dua na siga mo ni marautaka na veivakalougatataki ni o ni tiki ni dua na matavuvale taucoko ka tawamudu.

Kemuni na lewenilotu kei na veiliutaki, e tu beka eso tale na ka e rawa ni da cakava meda tokoni ira kina na veimatavuvale itubutubu dua ka sega ni veivakalewai se vakacacani ira? E rawa beka ni o ni dauveivakauqeti vei ira na itabagone ena veimatavuvale oqori, vakauasivi na kena vakarautaki vei ira na cauravou na ivakaraitaki ni veika era dau cakava na turaga vinaka kei na ivakarau ni nodra bula? Ni yali kina na tama, o ni sa vakaraitaka tiko beka na ivalavala e ganita me vakatotomuri?

Ia e dina sara, era tu talega eso na matavuvale ka kena itubutubu duadua ga na tama. Kemuni na taciqu, keimami masulaki kemuni talega ka vakacaucautaki kemuni. Sa baleti kemuni talega na itukutuku oqo.

Kemuni na itubutubu dua, au vakadinadinataka ena nomuni solia na nomuni vinaka duadua ena veika dredre duadua ni bula vakatamata oqo, ena matadredredre vei kemuni ko lomalagi. E dina sara ni o ni sega ni tu duadua ga. Laiva me vakararamataka na nomuni bula ena gauna oqo na kaukauwa veisereki ni loloma i Jisu Karisito ka vakasinaiti kemuni ena inuinui ni yalayala tawamudu. Yaloqaqa. Vakabauta ka vakanuinui. Raica na gauna oqo ena yaloqaqa ka vakanamata ki na veisiga ni mataka ena yalodei. Ena yaca i Jisu Karisito, emeni.