2010–2019
Baam̧le ko raar delo̧n̄e Bujen ko
Eprōļ 2012


Baam̧le ko raar delo̧n̄e Bujen ko

Ejjeļo̧k men me ej itok ak naaj itok n̄an baam̧le eo am ilo an aorōk āinwōt kōjeram̧m̧an ko an liāp.

Ij m̧ōņōņō in pād ippāmi ilo kweilo̧k in n̄an aolep ro rej kabwijer priesthood eo an Anij ioon laļ in im ro kar karuwaineneik tok er. Jej m̧ōņōņō kōn pād eo an Būreejtōn Thomas  S. Monson. Āinwōt Būreejtōn eo an Kabun̄ in, ej juon em̧m̧aan eo me emour im ej eddoin kii ko n̄an liāpe baam̧le ko im aolep kain̄i ko an priesthood me rekkar n̄an bōk mour indeeo, im menin letok eo eļaptata an Anij.

Ewōr juon baba ej ron̄jake jotenin eo me eaar janiknik. Kōnke eaar kōņaan kallim̧ur kōn liāp kōn aolepen buruwōn. E im kōrā eo ippān rej iakwe ajri ro nejier reddik. Āinwōt ro jet jinen im jemen emaron̄ loe m̧ōņōņō eo an lan̄ n̄e ej riit ejja jekjek in me ej waļo̧k ibwiljid ilo mour in enaaj waļo̧k ibwiljid ilo mour eo tok juon, ijeļo̧kin jenaaj barāinwōt bōk aiboojoj indeeo, aiboojoj eo me ejjab pād ippād kiiō.1

Baba eo ej ron̄jake ippād jotenin ejeļā iaļ eo n̄an aiboojoj eo. Ejjab pidodo. Ebōk tōmak ilo Jisōs Kraist, lukkuun ukweļo̧k, im juon oktak ilo buruwōn me eaar itok kōn juon bisop eo ejouj n̄an jipan̄ e en̄jake iakwe in jeorļo̧k bōd an Irooj.

Oktak ko rem̧m̧an rej wōnm̧aanļo̧k ilo an etal n̄an tampeļ eo ekwojarjar n̄an bōk juon menin letok kwojarjar eo me Irooj eaar kōmeļeļeik n̄an ro me Eaar kōmaron̄ er ilo tampeļ eo jinoin tata ilo tōrean in. Kar lo Kirtland, Ohio. Irooj eaar ba:

Irooj eaar leļo̧k n̄an er kien n̄an etal n̄an Ohio. Ijen Enaaj leļo̧k n̄an er kien eo An im renaaj bōk menin letok kwojarjar kōn kajoor jān ijo eutiej.

Raar etal jān ijo, kōnke Ewōr juon An jerbal eļap n̄an an Armej ro Rekwojarjar kōm̧m̧ane, n̄an lo̧mo̧o̧ren Israel. Enaaj tōl er ijo Ekōņaan bwe ren etal ie ļo̧k, im ejjeļo̧k kajoor naaj kōbōjrak E.2

N̄an eo m̧ōtta me ej kab jino niknik im n̄an aolep rikabwijer ro an priesthood. Juon jerbal eļap n̄an kadedeļo̧k ej n̄an tōl ilo lo̧mo̧o̧ren m̧ōttan eo an Israel eo me jej aolep ak naaj maron̄ bōk eddoin, eo im ej baam̧le eo am. E jeļā bwe n̄an lo̧mo̧o̧ren baam̧le eo am aikuji liāp jen kajoor eo an Priesthood eo an Melkisedek ilo juon tampeļ ekwojarjar an Anij.

Eo m̧ōtta eaar kajjitōk bwe In kōm̧mane liāp eo. E im kōrā eo ippān raar kōņaan kadedeļo̧k ilo iien eo emōkaj. Kōn boub im an epaaktok kweilo̧k eo eļap, Iaar kōtļo̧k n̄an an ripālele rein im bisop eo aer jerbal ippān rijeje eo aō n̄an karōk iien eo em̧m̧antata.

Ļōmņak kōn bwilōn̄ eo aō im m̧ōņōņō eo ke baba eo ej jiron̄ eō ke liāp eo ej karōk n̄an Eprōl 3. Kar raan eo ilo 1836 ke Elijah, rikanaan eo, kar jilkinļo̧k n̄an Kirtland Tampeļ n̄an leļo̧k kajoor in liāp n̄an Joseph Smith im n̄an Oliver Cowdery. Kii kein rej pād ilo Kabun̄ in rainin im naaj wōnm̧aanļo̧k n̄an jem̧ļo̧kin iien.3

Ejja mālim eo ekwojarjar kar leļo̧k jen Irooj n̄an Piter āinwōt Eaar kallim̧ur: Im Inaaj lewōj n̄an eok kii ko kii in aelōn̄ in lan̄, im jabdewōt men eo kwō naaj liāpe ioon laļ, naaj liāpe i lan̄; im jabdewōt men eo kwō naaj kōtļo̧k ioon laļ, naaj kōtļo̧ke i lan̄.4

Jepļaaktok eo an Elijah eaar kōjeram̧m̧an aolep ro raar kabwijer priesthood eo. Elder Harold  B. Lee eaar kalikar e ļo̧k ilo an kar kōnono ilo kweilo̧k eo eļap: “Ij kabwijer priesthood eo; kom̧ em̧m̧aan ran ilo kweilo̧k in eļap komij kabwijer priesthood eo; jaar bōk Priesthood eo an Melkisedek—eo kar letok jen Elijah im jen rikanaan ro jet im jen Piter, Jemes im Jon. Men̄e ewōr ad mālim n̄an kōpeptaij, men̄e ewōr ad mālim n̄an likit pā ko ioon n̄an menin letok eo an Jetōb Kwojarjar im n̄an kapit ro jet im kōm̧m̧ani aolep men kein, ilo an ejjeļo̧k kajoor in liāp jejamin kōm̧m̧an jabdewōt men, bwe enaaj ejjeļo̧k kajoor n̄an kain̄i kein jej kōm̧m̧ani.”

Būreejtōn Smith eaar wōnm̧aanļo̧k wōt:

Kain̄i ko reutiejļo̧k, kōjeram̧m̧an ko reļļapļo̧k me raorōk n̄an mour ippān Anij ilo aelōn̄ in kiin̄ eo an Anij, … maron̄ kar būki wōt ilo jikin ko ejjeļo̧k pere. … Ejjeļo̧k an juon armej maron̄ n̄an kōm̧m̧ani kain̄i kein ijeļo̧kin n̄e ej bōk mālim eo n̄an kōm̧m̧ani jān armej eo ej kabwijer kii ko. …

Ejjeļo̧k armej ilo aolepen laļ in eo ewōr an maron̄ n̄an wōnm̧aanļo̧k im kōm̧m̧ani jabdewōt kain̄i ko an ko̧jpeļ in ijeļo̧kin n̄e Būreejtōn eo an Kabun̄ in, eo ej kabwijer kii ko, ej kōmālimi menin. Eaar letok mālim n̄an rikabwijer ro an priesthood; eaar likūt kajoor eo an liāp ilo priesthood eo ad kōnke ej kabwijer kii kein.5

Ejja kallim̧ur in eaar bar itok jān Būreejtōn Boyd  K. Packer ilo an kar jeje kōn kajoor eo an liāp. Jeļā naan kein raar m̧ool ej juon kainōm̧m̧an n̄an eō, āinwōt enaaj n̄an baam̧le eo Inaaj liāp ilo Eprōl 3: “Piter eaar kabwijer kii ko. Piter ekar kabwijer kajoor in liāp n̄an, liāpe ion laļ ak n̄an kōtļo̧k ion laļ im innām emaron̄ aindein barāinwōtilo lan̄. Kii kein rej an Būreejtōn eo an Kabun̄ in—n̄an rikanaan, rikanij, im rūlolo ettōnak ko. Kajoor in liāp in ekwojarjar epād io Kabun̄ in kiiō. Ejjeļo̧k menin keidi eļapļo̧k an ekwojarjar jen ro me rejeļā kōn aorōkin mālim in. Ejjeļok men kar kōjparoke im eļapļo̧k. Eaar wōt jet em̧m̧aan ro raar kabwijer kajoor in liāp in ioon laļ in ilo jabdewōt iien ko kar leļo̧k—ilo kajjojo tampeļ ewōr em̧m̧aan ro jeid im jatid ro kar leļo̧k n̄an er kajoor in liāp eo. Ejjeļok juon emaron̄ bōke menin ijjeļo̧kin wōt jān rikanaan, rūlolo im rikanij, im Būreejtōn an Kabun̄ eo an Jisōs Kraist im Armej ro Rekwojarjar ilo Raan-ko Āliktata.”6

Ke Elijah eaar itok. Ejjab kajoor eo wōt kar leļo̧k n̄an priesthood eo ak barāinwōt bōro ko raar oktak: Jitōbin, kajoor, im kūr an Elijah ej, bwe komin bōk kajoor n̄an dāpij kii eo an m̧adenļo̧k, kain̄i ko, naan ko, kajoor ko im menin letok kwojarjar an tarlep in Priesthood eo an Melkisedek eo im aelōn̄ in kiin̄ eo an Anij ioon laļ in; im n̄an bōk, bōke, im kōm̧m̧ane aolep kain̄i ko rej ieokļo̧k aelōn̄ in kiin̄ eo an Anij, aaet n̄an maron̄ naaj bōktok bōro ko reoktak an ro jemeer n̄an ro nejier, im buruwōn ro nejier n̄an ro jemeer, im barāinwōt ro ilo lan̄.7

En̄jake eo an buruwōn eaar oktak kadede n̄an eo m̧ōtta im n̄an baam̧le eo an. Emaron̄ kar itok n̄an eok ilo kweilo̧k in. Komaron̄ kar antoone ilo kōļmānļokjeņ eo am, āinwōt Iaar, jujelm̧ae jemōm̧ ak jinōm̧. Turin mej eo kwoj antoone emaron̄ kar juon sister ak juon būratōr. Emaron̄ kar juon nejim̧ leddik ak ļaddik.

Armej eo kwoj antoone ļo̧k ilo laļ eo an jetōb ak laļ ko rettoļo̧k jān eok. Ijoke lan̄lōn̄ eaar itok jān juon en̄jake me ej ekeijeļo̧k ippāer raar menin kallim̧ur kōnke kwoj ak komaron̄ in liāpe n̄an er jen kain̄i ko an priesthood eo me Anij enaaj kauteij e.

Rikabwijer ro an Priesthood ro an Melkisedek ro rej baba ilo kar liāp an baam̧le ko kar katakin er ta eo reaikuj in kōm̧m̧ane. Ejjeļo̧k men me ej itok ak naaj itok n̄an baam̧le eo am ilo an aorōk āinwōt kōjeram̧m̧an ko an liāp. Ejjeļo̧k juon men eaorōk ļo̧k jān kautiej m̧are eo im bujen ko an baam̧le kwar kōm̧m̧ani ak naaj kōm̧m̧an ilo tampeļ ko an Anij.

Wāween eo n̄an kōm̧m̧ane ealikar. Jetōb in Kallim̧ur eo Ekwojarjar, kōn pokake im karmejete eo ad, eaikuj liāpe bujen in tampeļ ko ad n̄an remaron̄ in kar būki ilo laļ eo ej itok. Būreejtōn Harold  B. Lee eaar kōmeļeļeik ta meļeļein n̄an liāp jān Jetōb in Kallim̧ur eo Ekwojarjar, kout jān Elder Melvin  J. Ballard: “Jemaron̄ mo̧ne armej ak jejjab maron̄ mo̧ne Jetōb Kwojarjar, im kōjeram̧m̧an ko ad naaj jamin indeeo ijjelokin kōjeram̧m̧an ko rej liāp jān Jetōb in Kallim̧ur eo Ekwojarjar. Jetōb Kwojarjar e eo ej riiti ļōmņak ko im bōro ko an armej im leļo̧k mālim in liāp n̄an kōjeram̧m̧an ko leļo̧k ioer. Innām liāpe eo ej liāp kake, ej karbōb, im dedeļo̧k ilo jejjet.”8

Ke Sister Eyring im N̄a kar liāp ilo Logan Tampeļ, Iaar jab meļeļe lukkuun aorōk eo an kallim̧ur eo. Ij kajieon̄ in meļeļe aolep meļeļe in, ak kōrā eo ippa im N̄a kar jino kālet ilo 50 iiō kein in am m̧are n̄an karuwainene tok Jetōb Kwojarjar jon̄an wōt eo kōm̧ maron̄ e n̄an mour ko am im baam̧le eo am.

Āinwōt juon baba eo edik, kar liāp ilo tampeļ eo im kōn oktak in buruō n̄an kōrā eo ippa im juon baam̧le eo edik, Ij kab ioon Būreejtōn Joseph Fielding Smith. Ilo ruum in kounjeļ eo an Būreejtōnji eo Kein Kajuon, ijo kar kūr ļo̧k Eō n̄an e, eaar itok lukkuun juon kam̧ool n̄an eō āinwōt Būreejtōn Harold  B. Lee eaar kajjitōk ippa, bōk jikin Būreejtōn Smith, “Kwoj tōmak armej in enaaj Rikanaan an Anij?”

Būreejtōn Smith ej kab delo̧n̄ tok n̄an ruum eo im kar jab keroro. Iaar lukkuun m̧ōņōņō bwe Imaron̄ kar uwaak: “Ijeļā enaaj,” im Iaar jeļā āinwōt lukkuun aō jeļā bwe al eaar romaak ilo an kabwijer kajoor in liāp eo an priesthood n̄an aolep laļ.

En̄jake eo me in naan ko rekajoor an Būreejtōn Joseph Fielding Smith n̄an eō im kōrā eo ippa, ilo juon m̧wein̄an in kweilo̧k ilo Eprōl 6, 1972, Būreejtōn Joseph Fielding Smith eaar letok naan in kapilōk in: Ej an kilaan Irooj n̄an kōkajoorļo̧k im kepooj iunit eo an baam̧le. Kōm̧ij akweļap ippān baba ro n̄an bōk jikin jim̧we ko aer āinwōt jeban m̧weo. Kōm̧ij kajjitōk ippān m̧am̧a ro im jipan̄ ļōmaro pālele im āinwōt waanjon̄ak n̄an ro nejier.”9

In kwaļo̧k emen men ko komaron̄ in kōm̧m̧ani āinwōt juon baba eo ej kabwijer priesthood n̄an lōn̄aj im tōl bar baam̧le eo am n̄an ippān Jemedwōj Ilan̄ im Rilo̧mo̧o̧r.

M̧oktata, bōk im dāpij juon kam̧ool eo epen kōn kii ko an priesthood eo me repād ippād im kabwijeri jen Būreejtōn eo an Kabun̄ in. Jar kake kajjojo raan. Uwaak eo enaaj itok kōn juon ļōmņak in kile n̄an tōl baam̧le eo am, ilo en̄jake ko am kōn kōjatdikdik, im kōn eļap m̧ōņōņō ilo jerbal eo am. Kwonaaj lukkuun in m̧ōņōņō im kile, juon kōjeram̧m̧an eļap n̄an kōrā eo im baam̧le eo am.

Eo kein karuo emenin aikuj ej n̄an iakwe kōrā eo ippam̧. Enaaj bōk tiljek im ettā n̄an likut itok limo ko an ilōn̄tata kōn eok make ilo apan̄ ko an mour. Ewōr am eddo n̄an kake im n̄an kōkajjiriri baam̧le eo ippān lio̧ n̄an jerbal n̄an ro jet. Kejparok ro jet ilo am jerbal n̄an baam̧le eo am. Emaron̄ bōk iien n̄an amān aolep maron̄ im kajoor eo ewōr ippam̧. Ruttļo̧k im nan̄inmej maron̄ in ļapļo̧k ilo aikuj ko an kōrā eo ippam̧. Eļan̄n̄e konaaj kālet kiiō n̄an likut m̧ōņōņō eo an ilōn̄ in ko am make, Ij kallim̧uri eok bwe iakwe eo am n̄an e enaaj ļapļo̧k.

Jilu, bōk jipan̄ jān aolepen baam̧le eo n̄an iakwe doon. Būreejtōn Ezra Taft Benson eaar katakin:

“Ļōmņak kōn indeeo, lo̧mo̧o̧r ej an juon baam̧le eddo.  …

Ilōn̄ in aolep men, ajri ro reaikuj in jeļā im en̄jake aer iakwe, kōņaan, im kam̧oolol. Rej aikuj in kile emakijkij in. Ilo m̧ool, en̄in ej juon jerbal eo an ro jinen im jemen me reaikuj in kōm̧m̧ane, im ilo emakijkij in m̧am̧a eo emaron̄ kōm̧m̧ane em̧m̧an tata.10

Bar juon men eaorōk n̄an en̄jake iakwe ej iakwe eo jān ajri ro jet ilo baam̧le eo. Kejparok eo an būratōr ro im sister ro n̄an kajjojo ro jet naaj itok wōt kōn kijejeto eo jen ro jinen im jemen im jipan̄ eo an Anij. Kwojeļā bwe ej m̧ool jān en̄jake eo ilo baam̧le ko am make. Im ej kapen kajjojo iien ilo am riit kōn idaapitōk ko an baam̧le rej ekkatak jen jim̧we eo an Liai im kōrā eo ippān, Sara, ilo Bok in Mormon.

Tōprak ko raar būki eaar letok juon tōl n̄an kōj. Eaar lukkuun em̧m̧an aer katakin ko̧jpeļ eo im lukkuun kajieon̄ bwe ajri ro im barāinwōt jet bwij im bwijier en pidodo buruwer n̄an Anij im n̄an ro jet. N̄an waanjon̄ak, Nipai im ro jet raar je im tōpar ro uwaan baam̧le ko me kar aer rikōjdāt. Jetōb eo ilo tōre ko eaar kapidodo buruwōn taujin ro im bōk jikin kōjdāt kōn iakwe.

Juon wāween n̄an am n̄an kapeik tōprak ko an Jemed Liai ej jen wāween ad tōl baam̧le eo ilo jar im iien ippān doon an baam̧le, āinwōt nokon in jota an baam̧le. Leļo̧k eddo ko n̄an ajri ro n̄an jar n̄e remaron̄ in jar kōn ro jet ilo doulul eo me kōjeram̧m̧an ko aikuji. Mōkaj in kile ijjino ko im kile m̧akūtkūt ko an jerbal in jipan̄, eļaptata jeim jati. N̄e rej jar kōn doon im jerbal n̄an doon, bōro ko renaaj pidodo im oktak n̄an doon im n̄an ro jiner im jemer.

Eddo eo kein kemen n̄an tōl baam̧le eo am ilo wāween eo an Irooj ej itok n̄e kipeļ ej menin aikuj. Jemaron̄ ioon eddo eo ad n̄an kajim̧we ilo wāween eo an Irooj im n̄an tōl er m̧aanļo̧k n̄an mour indeeo.

Kwonaaj kememej naan ko, ak kwoj maron̄ lo kajoor eo aer ilo juon mour eo an juon rikabwijer Priesthood eo an Melkisedek eo ilo an kepooj baam̧le eo an n̄an mour ilo ejja jemjerā eo renaaj bōke ilo aelōn̄ in celestial.

Ejjeļo̧k kajoor ak im̧we emaron̄ ak eaikuj kōm̧m̧an jen wānōk eo an priesthood eo, jen wōt tōmak, lejokmen, jouj, im ettā bōro, im jen iakwe em̧ool.

Jouj, im jeļāļo̧kjeņ erreo, eo enaaj kōļapļo̧k ad kōn ejjeļo̧k etao im ejjeļo̧k bōd.

Jej aikuj bar etale iien ko kōn wājebdik n̄e Jetōb Kwojarjar ej emakūt, innām kwaļo̧k juon iakwe eo eļap n̄an armej ro jej bōd ņae, bwe jejjab juon rikōjdāt.

Im bwe ro jej bōd ņae ren jeļā bwe ad tōmak ekajoor jen to̧ ko an mej.”11

Im tok ālik kallim̧ur eo ej itok kōn juon wōņāān eo eļap n̄an kōj āinwōt baba ro ilo Zaion: Jetōb Kwojarjar eo enaaj m̧ōttad, im ad jebe naaj oktak n̄an jebe in kwojarjar im m̧ool. Ad kajoor enaaj juon kajoor indeeo, im ilo an ejjeļo̧k kabweer e kajoor eo ad naaj jieb tok n̄an kōj n̄an indeeo im indeeo.”12

En̄in ej jon̄ak eo eutiej n̄an kōj, ak n̄e jenaaj kōn tōmak n̄an dāpij illu ko ad im dāpij utiej bōro ko ad, Jetōb Kwojarjar ej letok maron̄ eo An, im kallim̧ur ko rekwojarjar im bujen ko renaaj lukkuun itok.

Kwonaaj tōprak kōn am tōmak bwe Irooj eaar jilkintok kii ko an priesthood eo epād ippād—kōn juon liāp eo epen kōn iakwe n̄an kōrā eo ippam̧, kōn jipan̄ an Irooj ilo ukōt buruwōn ro nejim̧ n̄an ro jet im n̄an iakwe eo an ro jiner im jemer, im kōn iakwe eo ej tōl ļo̧k eok n̄an jim̧we im kwaļo̧k ilo juon wāween me ej karuwaineneik Jetōb.

Ijeļā bwe Jisōs ej ri Kraist eo im ej ad Rilo̧mo̧o̧r. Ij kam̧ool bwe Būeejtōn Thomas S. Monson, eo me jenaaj kiiō ron̄ ainikien, ej kabwijer im kōjerbal aolep kii ko an priesthood ioon laļ in rainin. Ij iakwe im rejetak e. Ij iakwe im jar kōn kom̧. Ilo etan Jisōs Kraist, amen.

Kakememej ko

  1. Lale Doctrine and Covenants 130:2.

  2. LaleDoctrine and Covenants 38:32–33.

  3. Lale Joseph Fielding Smith, Sealing Power and Salvation, Brigham Young University Speeches of the Year (Jan. 12, 1971), .

  4. Matu 16:19.

  5. Joseph Fielding Smith, kout jen Harold B. Lee, ilo Conference Report, Okt. 1944, 75.

  6. Boyd K. Packer, “Tampeļ eo Ekwojarjar,” Liaona and Ensign, Oct. 2010, 29.

  7. Teaching of Presidents of the Church: Joseph Smith (2007), 11..

  8. Melvin J. Ballard, kout jen Harold  B. Lee, ilo Conference Report, Okt. 1970, 111.

  9. Joseph Fielding Smith, “Counsel to the Saints and to the World,” Ensign,, July 1972, 27.

  10. Ezra Taft Benson, “Salvation—a Family Affair,” Tambuli, Nov. 1992, 3, 4; Ensign, July 1992, 2, 4; Liahona, Nov. 1992, 3, 4; Ensign, July 1992, 2, 4.

  11. LaleDoctrine and Covenants 121:41–44.

  12. LaleDoctrine and Covenants 121:46.