Telungalek er Cheungel a Telbiil

Ng dmeu a renguk el teloi er kemiu er tia el miting er tirkel rokui dongemedaol er tir el oba priesthood er a Dios el ngara beluulechad. Kede ngeltengat el ngara cheungel omerreder er a President Thomas S. Monson. Meng deruchellel el Merredel er a Ikelesia, e ngii a di chimo el chad loba kiis el merenged a telungalek me a ike el rokui el ruoll er a priesthood el kirel a diak a ulebengelel klengar, el kot el ngarbab er a rokui el sengkel a Dios.

Ngarngii a chedam lorrenges er chelechal kesus el ngii a luueta el mei e le rengul rokir a kmal soal mo nguu tia el sengk. Ngii me a bechil a kmal betik a rengrir er a re teru el mekekerei el ngelekir el ta el sechal me a ta el redil. Me te uai a rokui el oungalek e ng mesa sel deureng sel longuiu aikakid el tekoi: “Sel osisiu el teletael er a deleuill el ngarngii er chelecha el klengar, a bo dobang er sel merael mei el klengar, e ng di ng obengkel a diak a ulebengelel klebkall, el ngii el klebkall a diak dodengelii er chelechang.”¹

Ngika el chedam el lobengked lorrenges er chelecha el kesus a medengelii se el rael el mor tia el deborngii. Ng diak el beot. Ngii a medengelii tiang. Ng mle ultuil er a klaumerang er a Jesus Kristo, dmolech el ouchel reng, me a omeldechel a rengul lobengkel a bekokeuii el bisop el ngilseuir el muut el mo omelchesiu er a klausubes er a Rubak.

Klebokel el ngeldengodech el teletael a dilubech er a lolemolem el mlo er a templo e le ngai a klengeltengat el ngii a Rubak a mla smaod el mor tirkel Ngii a milsterir a klisiich er sel mle kot el templo er chelechal taem. Ng mla er a Kirkland, Ohio. Ea Rubak a dilu el kmo:

A Rubak a dilu er tir me le bora Ohio. Seikid e Ngii a mo mesterir a llechul e tir a mo ngmai a klengeltengat er bab.

“Ng mle kirir el mong, le Ngii a mla er ngii a klou el ureor el kirir a Resanto el mo meruul, el mo olsobel er a Israel. Ngii a mo omekrael er tir er sel Ngii a soal a le borngii, e diak a ngii dil klisiich el mo torebengii.”²

Meng mo er ngikal luueta el sechelik me tirkel rokui el oba priesthood, e a klou el ureor el medechel a olsobel er a tebedechel a Israel el ngii a ngercheled, el telungalek er kid. A sechelik me a bechil a mle medengei el kmo tia ousbech el mo merenged lokiu a klisiich er a Priesthood er a Melchizedek er a chelsel a chedaol templo er a Dios.

Ngullengit me bo kungedmokl er tia el omerenged. Ngii me a bechil a mle sorir a le mereched el mekedmokl. E ng di chelsel a meriked el taem er a klou el ongdibel lolkedang, e ak milchiteterir tirka el obekel me a bisop er tir me loureor lobengkel a secretary er ngak el kirel sel mo ungil taem.

Ng mlo mechas a renguk e dmeu a renguk er ngika el chedam er a louchais er ngak er a chelsel a ikelesia el kmo ng mla moterekokl el April 3. Tia se el sils er a 1836 el Elijah, el mla mo ngar el profet, a mlodurokl el mora Templo er a Kirkland el mo omsa Joseph Smith me a Oliver Cowdery sel klisiich el merenged. A ikaikid el kiis a ngara chelsel a Ikelesia er chelechal sils e melemolem el mora diak a ulebengelel.³

Ng osisiu el chedaol el ngerachel el Rubak a ngiluu el msa Petrus e Ngii a mle yaksok: “Ak meskau a kiis er a rengedel a babeluades: me a ikel mrenged er a beluulechad a merenged er a babeluades: e a ikel mkedoked er a beluulechad a mekedoked er a babeluades.”⁴

A oltel a Elijah a mlo klengeltengat el mora robang a priesthood. A Elder Harold B. Lee a milketeklii tia er a longedecheduch er a klou el ongdibel el dilu a tekingel a Joseph Fielding Smith. Bo mungil orrenges: “A kurrekodel er a priesthood; me kemiu el rodam el ngar tiang a urrekodel er a priesthood; kid a mla nguu a Priesthood er a Melchizedek—el ngii a lulebang a Elijah me a rebebil er a reprofet me a Petrus, Jakobus me a Johanes. Meng uaisei el doba ngerachel el melecholb, e uaisei el doba ngerachel er a omor er a chim el kirel a sengk er a Chedaol Reng e mengedaol er a rebebil el meruul aika el rokui, e ng di a lak sel klisiich el merenged e ng diak a ngera el derelii, e le ng mo diak a klisichel sel ngii a duruul er ngii.”

A President Smith a millemolem:

“Sel lorael el mor bab chedaol ruoll, e a meklou el klengeltengat el ngii a meklou a belkul er a rengedel a Dios, el ngii a di sebechel mengai er a chelsel a bebil er a basio, a diak a lemeltel a chad el mo mengedmokl a ikang a lak el nguu a ngerachel er a chad el oba kiis. 

“…Ng diak a ngii dil chad el ngar tia el beluulechad el oba llemalt e merael meruul chedaol ruoll er tia el ebangkelio a lak el kengei er ngii a Merredel er a Ikelesia, el ngii olab a kiis, e kongei. Ngii a mla meskid a ngerachel e ngii a mla nguu a klisiich el merenged el meskid ele ngii olab a kiis.”⁵

Tia el osisiu el teletael a mla er a President Boyd K. Packer er a loluches el kirel a klisiich el merenged. Se el kudengei el kmo a ika el tekoi a klemerang e ng ongelaod el mei er ngak, me a dirrek el sel telugnalek el bo kurenged er tir er a April 3: “A Petrus a ulab a kiis. A Petrus a uleba klisiich, … el merenged a ngara beluulechad malechub eng melubet a ngara beluulechad eng mo uaisei er a babelaudes. A ika el kiis a lolab a Merredel er a Ikelesia—me a profet, chad er a ues, me a ocholt. Tia el cheledaol el klisiich el merenged a ngara chelsel a Ikelesia er chelechang. Ng diak a lmuut el dolatk el kmo ng chedaol el uaia tirke el medengelii a klou el ultutelel tia el ngerachel. Ng diak a ngodech el desal omecheliu er ngii. Te di kesai el chad a [oba] tia el klisiich el merenged el ngara beluulechad er chelechal taem—er a chelsel a bek el templo e te ngarngii a rodam el mla nguu tia el klisiich el merenged. Ng diak a chad el sebechel nguu a lak lenguu er a profet, chad er a ues, me a ocholt el Merredel er a Ikelesia er a Jesus Kirsto er a Uriul-klebesei el Santo.”⁶

A dmiel Elijah a dimlak di loba klisiisch er a priesthood ng dirrek el reng a ulebult: “A reng, klisiich, me a okedong er a Elijah a belkul a kmo, ng mor ngii a klisichiu el oba kisel ocholt, chedaol ruoll, ulaoch, klisiich me a klengeltengat er a cherrengelel a Priesthood er a Melchizedek me a rengedel a Dios el ngara beluulechad; e mo ngmai, olab, e meruul a ike el rokui el chedaol ruoll el kirel a rengedel a Dios, el mo mult a rengrir a rechedam el mora rengelekir, me a rengrir a rengelekir el mora redemir, luldimukl er tirke el ngara babeluades.”⁷

Tial el reng el omult a mla mei er ngika el sechelik me a telungalek er ngii. Ng locha mla mei er kau er a chelsel tia el miting. Ke locha mla mo omtab er ngii er a uldesuem, el uai ngak, a medal a demam me a delam. Ng dirrek el sebechel medal a ochedam malechub e ng ochellem. Ng locha dirrek el medal a ngelekem el redil malechub e ng sechal.

Tirka locha ngara beluu er a redeleb malechub e te kiei er cheroid er kau. E ng di a deureng a mei sel modengei el kmo a deleuill er kau me tir a kldmokl el medechel e le kau me tir a ulak lokiu a chedaol ruoll er a priesthood el Dios a kongei er ngii.

A rechedam el oba Priesthood er a Melchizedek el mla merenged el telungalek a mla mosisechakl a kirir el meruul. Ng diak a ngii dil ngerang el mla duubech malechub e ng mo duubech er a telungalek er kau el ngii a klou a belkul el uai a klengeltengat er a merenged el telungalek. Ng diak a ngii dil ngerang el muut el klou a belkul er se el omengull er kau el kirel a telbiil er a chebechielem me a telungalek el kau a mla remuul malechub e ke mo meruul er a chelsel a templo er a Dios.

Ng bleketakl a teletelel tiang. A Chedaol Reng er a Telbiil, lokiu a blekongesenges me a mo chuarm, a kirel remenged a telbiieled meng sebeched el mo nguu er sel mei el beluulechad. A President Harold B. Lee a silodii el kmo ng mekera demerenged lokiu a Chedaol Reng er a Telbiil, el dilii a tekingel a Elder Melvin J. Ballard: “Ng sebeched el mulekngii a chad e ng di diak el sebeched el mulekngii Chedaol Reng, le klengeltengat er kid a diak le bora ulebongel alskeum e ng diak el renged lokiu a Chedaol Reng er a telbiil. A Chedaol Reng a ngii a menguiu a uldesuir me a rengrir a rechad e loiia kengei er ngii er a klengeltengat el mla medung el mor tir. Seikid e ngii a merenged, oba kengei, e mui el oureor.”⁸

A Sister Eyring me a ngak er a ki bom kaubuch er a Logan Utah Templo, e ng dimlak mui el medengelii a klou el belkul tia el telbiil. Ak dirk melasem el mo mui el medengelii a belkul, e ng di a bechik me a ngak a di mle uchelel a ika el kmeed el okeim el rak er a chebechiielam e a ki siotai er a Chedaol Reng el mei er a klengar me a telungalek er kemam.

Me ak ngeasek el chedam, el mla merenged er a chelsel a templo el renguk a ultuil er a bechik me a dirk ulemuchel el telungalek er kemam, e ng mle ketengek el mo kebetech ngak me a President Joseph Fielding Smith. Chelsel se el delmerab er a First Presidency, el blel siotai er ngak el mong, e ak ngiluu a mesisiich el sioning el mei er ngak er a President Harold B. Lee er a loker ngak, e lolutk er a President Smith, el dilengchokl er bita er ngii el dul kmo, “Ke oumerang el kmo ngika el chad a profet er a Dios?”

A President Smith a dirk siliseb er a delmerab e dirkak longedecheduch. Ng kmal dmeu a renguk el mle sebechek el mesisiich longer el mle ultuil er a kulmelchesiu er ngii er a renguk, “Ak medengei el kmo ngii.” e mle mui el medengelii el di uai a klemedengei er ngak el kmo a sils a dmiich e ngii a uleba klisiich er a priesthood el merenged a rokui er a beluulechad.

Tia el teletael a milsa bechik me a ngak a klou el klisiich er se er a, temel a klou el ongdibel er a April 6, 1972, el President Joseph Fielding Smith a dillii tiakid el tekoi: “Ng moktek er a Rubak el mo melisiich e mengeluolou a telungalek. Aki olengit er a rechedam me bo lengai a meral deruchelir el bdelul a telungalek. Aki olengit er a rechedil el mo melisiich e olngeseu er a rebecherir e mo okesiu el moer a rengelekir.”⁹

Msall e kdu eua el tekoi el sebechemiu el chedam loba priesthood el meruul el mo sobecheklii e mekrolii a telungalek er kemiu el muut el mora Chedam er a Babelaudes me a Osobel.

A kot, e mnguu e mobang sel mesisiich el sioning el kmo a kiis er a priesthood a dobang e urrekodel er ngii a Merredel er a Ikelesia. Moluluuch el kirel tia er a bek el sils. A nger a bo mnguu lobengkel a mesisiich el blak el reng el mo omekrael er a telungalek er kau, er a omeletkem, lobengkel a klou el deureng er a omesiou. Ng mo ungil a rengum e bleketatkl osengem el kirel a ngar medad, el klou el klengeltengat er a klengar kau me a telungalek er kau.

A ongerung el tekoi a mo betik a rengum er a bechim. Tia ultuil er a klaumerang me a klengariou el reng el ngmai a ike el lousbech el mo ruchei er a rokui el olibesongel er a klengar. Ngerchelem el osiik e omekeroul er a telungalek el obengkel e mesiou er a rebebil. Tia bebil er a taem eng mai a rokui el klisichem. A cheleuodel me a secher a sebechel choisois a ike el ngii ousbech. Alsekum me ke melilt el nguu a deureng er ngii el mo ngaruchei, e ak yaksok er kau el kmo a beltkil a rengum el mor ngii a mo chachisois.

Ongedei, molengit er a rokir el telungalek me bol kaubeltik el reng. A President Ezra Taft Benson a ulsisechakl:

“A domes er ngii er a diak a ulebengelel teletael, e a mo suobel a ngerchelel a telungalek. 

“E sel kot el ngaruchei, a rengalek a kirir el mo omelchesiu el kmo ng betik a rengud, soad tir, e dmeu a rengud er tir. Ng kirir el blechoel medengelii tiang. A mera er ngii, tia a ngerachel el kirir a rechedam me a rechedil kudmeklii, e a rechedil a kmal meduch er ngii.”¹⁰

E ng di ta er a klou a belkul a se el rengud el medengelii a beltkil a rengrir a rebebil er a rengalek er a telungalek. A blechoel ungil ulekerreu er a rodam me a rodos el mo er a tang ma tang a mei lokiu a blak el reng er a rechedam me a rechedil me a ngeso er a Dios. Ko medengei el kmo tia klemerang el lomes a ike el mla duubech er a telungalek er kemiu. E lmuut el mo mesisiich sel monguiu el kirel a mondai er a telungalek el blo el chelebangel a Lehi me a bechil, er a Sarah, er a chelsel a Babier er a Mormon.

A klungiaol el mlo er tir a meskid a ulekrael. Te kmal mlo ungil losischeklii ebangkelio er a Jesus Kristo me a rengalek el luldimukl er a tela el telcheroll a mle medemdemek a rengrir el bedul a Dios me a tang me a tang. El uaia, Nephi me a rebebil el milluches e ulengeseu er a rechedal a telungalek el luldimukl er tirkel mle cherreuir. A Reng a mla er ngii a taem e ng melemdemek a rengrir a retelael chad e mtechei a klauketui loba beltik el reng.

A ta er a teletael el mongaisisiu er a Chedam el Lehi a okiu se el teletael el kau omekrael er a nglunguuch er a telungalek, el uaia ongdibel er a telungalek. Besterir a techall a rengalek el meluluuch a le sebecherir el iliuekl e loluluuch el kirel a tang me a tang lolengit a klengeltengat. Bo beiusech el mes a klautok me a bechechelingaol el blekeradel, el mo er a tang me a tang. Sel sekum e te meluluuch el kirel e mesiou er a tang me a tang, e a rengrir a mo medemdemek e obult el dedul a tang me a tang me a rechad er a blirir.

A ongeua el techall el omekrael er a telungalek er kau er se el rolel a Rubak a se el le borngii a usbechellel omellach. Ng sebeched el kudmokl a ngercheled lokiu a teletael er a Rubak e mo omekrael er a rengeleked el bedul a diak a ulebengelel klengar.

Ko mo dobedebek a tekoi, e ng di locha dirkak mesa klisichel er a chelsel a klengar er a oba Priesthood er a Melchizedek el mengedmokl er a telungalek er ngii el mo kiei er a osisiu el teletael el tir a mo ngarngii er a chelsel a rengedel a celestial. Kom dobedebek aika el tekoi. Ng bleketakl:

“Ng diak a klisiich me a ngii dil ngerang el mo omecheliu er a priesthood…

“Ungil omeruul, me a llomes, el ngii a mo smisichii a reng el diak a telingaol me a blulak.

“Kede mellach el ngara llemalt lultuil er a Chedaol Reng, e mereko ochotii a beltik el reng el mora chad, me lak bo lomdasu el kmo ke cherreuel.

“Me tirkel dollach er tir a mo medengei el kmo a klaumerang er kid a lmuut el mesisiich er a lechetel a kodall.”¹¹

E a uriul e a mesisiich el yaksok a mei er kid a rechedam er a Zion: “A Chedaol Reng a mo keldemed, e a deruchellem a mo deruchall er a llemalt me a klemerang; e a derdered a mo diak a ulebengelel dereder, el diak bo de morimel e le omerreder a mo merael el mei er kid el mo cherechar.”¹²

Tia kmal ngarbab el llach el mei er kid, e ng di alsekum kid a ultuil er a klaumerang el osarch a rengud e mengeroid a keldidai el reng, e a Chedaol Reng a meskid a kengei er Ngii, e a chedaol yaksok me a telbiil a mo klemerang.

Kom ngoriakl lokiu a klaumerang el Rubak a mla oluut a kiis er a priesthood el ngii—a dirk dolab lobengkel a kmes el beltikelreng el mora bechim, me a ngeso er a Rubak el mo mult a rengrir a rengelekiu el mora tang ma tang me a rechad er a blirir lultuil er a beltikelreng el ngii a mo omekrael er kau el mo meruul a teletael el siotai er a Reng.

Ak medengei el kmo a Jesus a Kristo e Osobeled. A kuuchais el kmo a President Thomas S. Monson a olab e urrekodel a ike el rokui el kiis er a priesthood el ngara beluulechad er chelechal sils. Ng betik a renguk e oldubech er ngii. Ng betik a renguk e meluluuch el kiriu. El ngara chedaol ngklel a Jesus Kristo, amen.