Daulih main navigation
April 2012 | Peneinei Kan me Wiadahr Inou Sarawi

Peneinei Kan me Wiadahr Inou Sarawi

April 2012 General Conference

Sohte mehkot me kohdohngehr de me pahn kohdohng nan omw peneinei me kesempwal duwehte kapai kan en katengteng.

I kapingki atail pokonpenehr nan mihting wet me koaros me kolokol priesthood en Koht pohn sampah patohwan lukodohngehr. Kitail paieki atail mih pahn epwel en President Thomas S. Monson. Ni duwen President en Mwomwohdiso, ih kelehpw ohl momour me pwukoahki kih kan me kin katengehdi peneinei kan oh tiahk sarawi kan koaros en priesthood me anahnepe pwehn alehdi mour soutuk, kisakis me keieu lap rehn kisakis koaros en Koht.

Mie emen pahpa rongorong pwohnget me sohte kin kalapw sarawi rahn teio me pwurodohsang nan irair wo pwehki E men alehdi kamehlelpen kisakis wet ni mohngiongi unsek. Ih oh ah pwoud poakohng neira seri tikitik riemeno, pwutak emen oh serepein men. Duwehte pahpa nohno teikan E kak medewe duwen peren en lahng ni ansou me E kin wadek lepin mahsen pwukat: Ehupene nanpwungatail me mie nan mour wet pahn pil iang kitail nan mour kohkohdo, ahpw ihte E pahn patehng kilohri soutuk, kilohri me kitail sohte ahniki ansou wet.1

Pahpa menet me iang kitail rongorong pwohnget ese ahl me kolahng wasa kaselelo. E sohte mengei. E esehier met. E kin anahne pwoson Sises Krais, koluhla me loal, oh wekideklahn mohngiong me pweida pwehki pisop kadek men me sewese ih en pehm sapwellimen Kauno mahk limpoak.

Wekidekla kaselel kan doulahte ni ansou me E patohla nan tehnpas sarawi pwehn alehdi endaumen me Kauno ketin kawehwehiong irail akan me E ketin kasarawihala nan keieu en tehnpas sarawi nan irair en ansou wet. Iei nan Kirtland, Ohio.

Kauno ketkihieng irail kosonned en kohla Ohio. Wasao E pahn ketkihieng irail sapwellime kosonned oh irail pahn kapaikida manaman sang powe.

Irail pahn tepisang wasao, pwehki E sapwellimaniki doadoahk laud ehu me souleng kan en wia, en doarehla Israel. E pahn ketin kaweid irail ong wasa me E kupwurki irail en kohlaie, oh sohte manaman kak kauhdi Ih.2

Ong kompoakepahio me aptwehn pwurodo oh priesthood koaros, ehu doadoahk lap kohkohdo me iei en kaunda doadoahk en kamourala pali en Israel me kitail kin de pahn pwukoahki, me iei atail peneinei kan. Kompoakepahio oh eh pwoud wehwehki me en doarehla omw peneinei iei en katengeteng sang ni manaman en Priesthood en Melkisedek nan tehnpas sarawi en Koht.

Kompoakapahio peki ma I kak apwalihong tiahk sarawi en katengtengo. Ih oh ah pwoudo mwahuki en wiawi ni ansou karuwaru. Ahpw pwehki ansou kedirepw wet en tiepene lap eh kohkohdo, I mweidehng pwopwoudo oh neira pisopo en patehng nei sekterio pwehn kilangada rahn me keieu mwahu.

Na medewe mahs uwen ahi pwuriamwei oh peren ni ansou me pahpao ndahiengie nan imwen sarawio me kasarawi en katengtengo pahn wiawi ni Epreil 3. Ihte rahno nan 1836 me Elaisa, soukohp me Koht ketkihdahla nanleng, poaronla ni Tehnpas Sarawi en Kirtland pwehn ketkihda manaman en katengtengo ong Joseph Smith oh Oliver Cowdery. Kih pwukat mih nan Mwomwohdiso rahnwet oh pahn lella ni imwin ansou.3

Iei ihte manaman sarawi wet me Kauno ketikihiong Piter, ni duwen me E ketin inoukihda: “I pahn kihong uhk kih kan en Wehin Koht: mehkoaros me ke pahn keinapwihdi nin sampah pil pahn keinapwihdi nanleng; oh mehkoaros me ke pahn mweidada nin sampah, e pahn mweimweida nanleng.”4

Sapahldohn Elaisa kapaiada koaros me kolokol priesthood. Elder Harold B. Lee mahsanih ni sansal nan ehu tiepene lap, ni eh kapwurehieng mahsen sang President Joseph Fielding Smith. Rong mwahu: “I kolokol priesthood; kumwail ohl akan wasaht kolokol priesthood; kitail alehdier Priesthood en Melkisedek---me Elaisa kin kolokol oh soukohp teikan oh Piter, Seims oh Sohn. Ahpw mendahte atail ahniki manaman en pepdais, mendahte atail pil ahniki manaman en kihda kisakis en Ngehn Sarawi sang ni kepwilipwildien pehkan oh en kasarawi mehteikan oh wia mepwukat koaros, ma sohte manaman en katengteng sohte mehkot kitail kak wia, pwe E pahn sohte menen tiahk sarawi pwuko me kitail wia.”

President Smith doula:

“Tiahk sarawi ileile kan, kapai laud kan me kesempwal ong kesepwildahng nan wehin Koht, oh me kak en alahldi nan ekeite wasa, sohte ohl emen ahniki pwuhng ieu en wia tiahk sarawi pwukat lao E pahn alehdi manaman sang aramas me kolokol kih kan. …

“… Sohte emen ohl pohn sampah wet me ahniki pwuhng en kohla oh apwalih sohte lipilipil tiahk sarawi kan en rongamwahuo ihte ma President en Mwomwohdiso, me kolokol kih kan, pahn mweidada. E ketkihieng kitail mweimwei, E ketkihieng manaman en katengteng nan atail priesthood, pwehki ih me kolokol kih pwukat.”5

Ihte duwen met me President Boyd K. Packer pil kihda kamehlelpe ni ansou me E nting duwen manaman en katengteng. Ahi wehwehki me lepin mahsen pwukat mehlel wia ire kansenamwahu ong ie, duwehte ahr pahn pil kansenamwahu ong peneinei me I pahn katengehdi ni Epreil 3: “Piter me pahn koledi kih kan. Piter me pahn koledi manaman, … en katengehdi pohn sampah de en keinapwihdi pohn sampah oh pahn ihte duwe met nan lahng kan. Kih pwukat mih rehn President en Mwomwohdiso—rehn soukohp, ohl sarawi, oh soun kihla kaudiahl. Manaman sarawi en katengteng wet mih nan Mwomwohdiso met. Sohte mehkot kin wia audepen madamadau me sarawihsang, rehn irail akan me ese kesempwalpen manaman wet. Sohte mehkot keneineisang met. Me malaulau ohl akan me [kol] manaman wet en katengteng pohn sampah ni ansou ieu—nan ehuehu tehnpas sarawi iei ohl akan me alehdier manaman en katengteng. Sohte me kak alehdi likin eh pahn sang soukohp, ohl sarawi, oh soun kihla kaudiahl oh President en Mwomwohdiso en Sises Krais en Souleng en Imwin Rahn Akan.”6

Ni sapahldohn Elaisa, kaidehn ihte manaman me kohieng priesthood, ahpw mohngiong kan pil wekidekla: “Ngehno, manamano, oh malipilipdohn Elaisa iei, me kumwail ahniki manaman en kolokol kih en kaudiahl, tiahk sarawi kan, kokohp kan, manaman oh endaumen kan en unsekpen Priesthood en Melkisedek oh wehin Koht pohn sampah; oh en alehdi oh kapwaiada koaros tiahk sarawi kan me wia kisehn wehin Koht, lella wekideklahn mohngiong en pahpa kan ong serihkan, oh mohngiong en serihkan ong pahpa kan, lella pil irail akan me mih nanleng.”7

Pepehm wo en wekideklahn mohngiong kohdohier ong kompoakepahio oh ah peneinei. E mwein kohdohng kumwail nan mihting wet. Kumwail mwein medewehdahr, duwei ie, mesen amwail pahpa de nohno. De mwein riamwail lih de ohl. De mwein noumwail serepein de pwutak.

Aramas me kumwail medewehdohr kak mih nan sapwen ngehn de nan sahpw doh. Ahpw peren kin kohdo sang ni pepehm me amwail patehng irail pahn mehlel, pwehki kumwail alehdier de kak en alehdi katengteng ong irail sang ni tiahk sarawi kan en priesthood me Koht pahn ketin wauneki.

Me kolokol Priesthood en Melkisedek me wia pahpa nan peneinei me katengtengehr padahngkihier duwen dahme re konehng wia. Sohte mehkot me kohdohngehr de me pahn kohdohng nan omw peneinei me kesempwal duwehte kapai kan en katengteng. Sohte mehkot kesempwalsang wauneki inou kan en pwopwoud oh peneinei me komw wiahdahr de pahn wiahda nan tehnpas sarawi kan en Koht.

Ahl en wia met me sansal. Ngehn Sarawi en Inou, sang ni atail peik oh tohnmetei, me pahn katengehdi atail inou en tehnpas sarawi kan pwehn kamanaman nan mour me pahn kohdo. President Harold B. Lee kihda kawehwehpen en katengteng sang ni Ngehn Sarawi en Inou, sang ni eh kasalehda mahsen en Elder Melvin J. Ballard: “Kitail mwein kak pitihdi aramas ahpw kitail sohte kak pitihdi Ngehn Sarawi, oh atail kapai kan sohte pahn poatoapoat ma re sohte pil katengteng rehn Ngehn Sarawi en Inouo. Ngehn Sarawi wia emen me kin wadek madamadau oh mohngiong en aramas oh kin ketkihda kupwure pwehn kamanahla kapai kan pohrail. Ih ansouo me E kin manaman, pweida, oh manaman ni unsek.”8

Ansou me ngehi oh Sister Eyring katengteng nan Logan Utah Temple, I sohte wehwehki unsekpen inou sarawio. I nannantihte en wehwehkihla koaros, ahpw ahi pwoud oh ngehi koasoanehdi ni tepidahn aht pwopwoud me pahn lellehr sounpar 50 en lukehdo Ngehn Sarawi uwen me se pahn kak nan aht mour oh nan aht peneinei.

Ni ahi wia pahpa pwulopwul men, katengteng nan tehnpas sarawio oh ni mohngiongiet eh wekideklahng ahi pwoud oh kisin peneinei pwulopwul, iei tepin ahi tuhwong President Joseph Fielding Smith. Nan perehn konsel en Presidensi Keieu, wasa I lukodohngie, I alehdi kadehde mehlel ansou me President Harold B. Lee idek rehi, ni ah idilahng President Smith, me mwomwohd limwah, “Komw kamehlele me ohl menet kak wia soukohp en Koht?”

President Smith apwtehn pidolong nan pereo ansouo oh saikinte kihda lepin lokaia ieu. I kaping kalahnganki me I kak en sapeng pwehki dah me kohdohng nan mohngiongiet: “Ei I kamehlele,” oh I ese met duwehte ei ese me ketipino wie lingaling me E kolokol manaman en priesthood en katengteng ong sampah pwon.

Irair wo elehieng sapwellime mahsen kan ahr laud mene rehn ngehi oh ei pwoud ansou me, nan ehu mihting en tiepene lap en Epreil 6, 1972, President Joseph Fielding Smith ketkihda kaweid me sansal pah: “E wia kupwuren Kauno en kakehlailih oh kolpene peneinei. Se peki ni ngidingid pahpa kan en alehda deuwrail ni duwen moangen peneinei. Se peki nohno kan en apwalih oh utung arail pwoud kan oh en wia karasaras ong neirail serihkan.”9

Soahng pahieu me I men kaweidkin kumwail en wia ni duwen pahpa nan priesthood pwehn pwokada oh kaweid amwail peneinei pwehn pwurala rehn Sahm Nanleng oh Sounkomouro.

Keieu, alehdi oh kolokol kadehde mehlel me kih kan en priesthood mih rehtail oh me President en Mwomwohdiso wie kolokol. Kapakapki met rahn koaros. Pasapengo pahn kohdo iangahki laudlahn omw pahn ngoangki en kaunda omw peneinei, nan omw pepehm kan en koapwoaroapwoar, oh sang ni laudlahn peren nan omw doadoahk en papah. Komw pahn ahniki kupwur peren oh koapwoaroapwoar, kapai laud ehu ong omwi pwoud oh peneinei.

Keriau en ire kesempwal iei en poakohng omw pwoud. E pahn mie anahnepen pwoson oh aktikitik pwehn kihda ah nsenamwahu pohnangin nsenomw kan nan kahpwal kan en mour. Komw ahniki pwukoa en iang ih apwaliala anahn akan oh kihda epwelpen peneinei ni ansouohte pil wie papah mehteikan. Wia koaros met kak kihsang ahngumw oh ahmw kehlail me komw ahniki. Soumwahu de mahla kak en kalaudehla anahn en omw pwoud. Ma komw pahn pilada nan irair pwukat en kihda ah peren mwohn pein omw peren, I inoukihiong kumwail me ahmw limpoak ong ahmw pwoud pahn laudila.

Kesiluh, pekihda towe kan koaros nan peneinei en poakpene. President Ezra Taft Benson padahngki:

“Ni me pid mour soutuk, komour wia pwukoa en peneinei. …

“Mwohn mehkoaros, serihkan anahne ese oh pehm me re keneinei oh kesempwal. Re anahne alehdi kamehlelpen met ansou koaros. Met wia pwukoa me pahpa nohno konehng apwaliala, oh pali laud en ansou nohno me keieu mai en wia met.”10

Ahpw pil ehu pali kesempwal me pepehm en limpoak wet kak kohsangie iei sang rehn seri teikan nan peneineio. Epwel mwahu me doudoulahte rehn pirien kan pahn kohdo ihte sang sawas en pahpa nohno oh sawas en Koht. Kumwail pahn ese me met mehlel sang irair kan en pein amwail peneinei kan. Oh E pahn kamehlel ni ehuehu ansou me kumwail pahn wadek duwen kahpwal en peneinei me Lehi oh ah pwoud Sariah, me mour pwung, ahniki nan rekohd en Pwuken Mormon.

Ara pweida kan wia kaweid ong kitail. Uwen mwahu oh poadidi en ara padahngki rongamwahu en Sises Krais elehieng neirahkan oh ekei kadaudokara kan ahr ahniki mohngiong mwuterek ong Koht oh ong emenemen. Karasepe, Nephi oh mehteikan ntinglahng oh kapahla pehrail ong towe kan en arail peneinei me wia arail imwintihti. Ngehno ekei pak kin kamwuterekihla mohngiong en kid kan oh weliankihdi kailok limpoak.

Ehu wiepen en alasang pweidahn Pahpa Lehi iei sang ni wiepen omw kin kaunda kapakap en peneinei oh ansoun patpenehn peneinei, me rasehng soutik en peneinei. Kihieng serihkan ansou mwahu en kapakap, ni ansou me re kak kapakap, ren kapakapki emenemen me kohpene wiahda pwonopwon wie kapakapki irail me anahne kapai kan. Kasawihada mwadang tepidahn nsensuwed oh pohnese arail mwekid tohnmetei kan en papah, ahpw ni mehlel me re kin wiahiong emenemen. Ni ansou me re kin kapakapki emenemen oh papah emenemen, mohngiong kan pahn mwuterekla oh sohpeilahng emenemen oh arail pahpa nohno.

Kapahieu en ansou mwahu en kaunda omwi peneinei ni wiepen Kauno kin kohdo ni ansou me anahnepen kaweid mie. Kitail kak apwalih atail pwukoa en kapwungala me sapwung ni wiepen Kauno oh en uhd kaweid neitail serihkan ong mour soutuk.

Kumwail pahn tamataman lepin mahsen pwukat, ahpw mwein kumwail saikinte kilang manamanpe ong me kolokol Priesthood en Melkisedek me kaukaunop ah peneinei met en ahniki soangen ehupene me re pahn ahniki nan wehin celestial. Kumwail taman lepin mahsen pwukat. Kitail kin wie rongorongete:

Sohte manaman de kaweid kak de konehng en mih rehn priesthood—ihte sang ni pekipek, kanengamah, kadek, oh aktikitik, oh sang ni limpoak mehlel.

Kadek oh wehwe unsek, me pahn kalaudehla ngeni sang ni sohte mwohmw likamw oh ni sohte likamw.

Kitail konehng kapwung ni uk me sapwung ni ansou me Ngehn Sarawi kin kamwakid kitail, oh eri uhd kasalehda laudlahn limpoak ong aramas me kitail kapwungehro, pwe E de leme me kitail wia ah imwintihti.

Oh pwehki irail me kitail kin kapwungala pahn ese me atail loaloapwoat kehlailsang selin mehla.11

Oh mwuhr inou wet pahn mie katepe laud ong kitail ni duwen pahpa kan nan Saion: Ngehn Sarawi pahn ketin ieiang kitail ansou koaros, oh kitail pahn kakaun ni mour pwung oh mehlel. Atail manaman pahn wia manaman soutuk, oh ni sohte idihd atail manaman pahn kohdohng kitail kohkohlahte erein.12

Met wia koasoandi ileile ong kitail, ahpw ni ansou me kitail kin kaunda ni pwoson atail lingeringer oh kihdi atail pohnmwahso, Ngehn Sarawi kin ketikihda Sapwellime kupwuramwahu, oh inou sarawi kan kin dehde.

Kumwail pahn pweida pwehki amwail pwoson me Kauno ketin kapwurehdo kih kan en priesthood, me mihmihte rehtail rahn wet—me iangahki katengteng mehlel en limpoak rehn omw pwoud, iangahki sawas en Kauno ong weliakapwala mohngiong en noumwa serihkan ong emenemen oh ong arail pahpa nohno, oh ni limpoak eh pahn kawkaweid komwi en kapwung oh peneu ni wiepe me kin lukehdo Ngehno.

I ese me Sises iei Krais oh iei atail Sounkomour. I kadehdehki me President Thomas S. Monson kolokol oh wie doadoahngki kih kan koaros en priesthood pohn sampah rahn wet. I poakong oh utung ih. I poakong oh kin kapakapkin kumwail. Ni lengileng sarawi en Sises Krais, ahmen.

Show ReferencesHide References

    Iren Sawas Akan

    1. Tehk Doctrine and Covenants 130:2.

    2. Tehk Doctrine and Covenants 38:32–33.

    3. Tehk Joseph Fielding Smith, Sealing Power and Salvation, Brigham Young University Speeches of the Year (Senweri 12, 1971), speeches.byu.edu.

    4. Madiu 16:19.

    5. Joseph Fielding Smith, quoted by Harold B. Lee, nan Conference Report, Oaktohpe 1944, 75.

    6. Boyd K. Packer, “The Holy Temple,” Liahona oh Ensign, Oaktohpe 2010, 34.

    7. Teaching of Presidents of the Church: Joseph Smith (2007), 11.

    8. Melvin J. Ballard, quoted by Harold B. Lee, nan Conference Report, Oaktohpe 1970, 111.

    9. Joseph Fielding Smith, “Counsel to the Saints and to the World,” Ensign, Sulai 1972, 27.

    10. Ezra Taft Benson, “Salvation—a Family Affair,” Tambuli, Nohpempe 1992, 3, 4; Ensign, Sulai 1992, 2, 4.

    11. Tehk Doctrine and Covenants 121:41–44.

    12. Tehk Doctrine and Covenants 121:46.