O Aiga ua Osi Feagaiga

Ou te talisapaia le potopoto faatasi ma outou i lenei sauniga lea ua valaaulia uma ai ē umia le perisitua a le Atua i le lalolagi. Ua faamanuiaina i tatou i le pulefaamalumalu ai o Peresitene Thomas S. Monson. I le avea ai ma Peresitene o le Ekalesia, o ia le tamalii e toatasi ua nafa ma ki lea e faamau ai aiga ma na sauniga uma faaleperisitua talafeagai e maua ai le ola e faavavau, le meaalofa sili o meaalofa uma a le Atua.

O loo i ai se tama o loo faafofoga mai i le po nei ua toe toaga o ia i le lotu ona ua manao o ia i le faamautinoaga a lena meaalofa [o le faamauga] ma lona loto atoa. E alolofa i la’ua ma lona toalua i le la fanau laiti e toalua, o le tama ma le teine. E pei foi lava o isi matua, e mafai ona ia mafaufauina le fiafia faalelagi pe a ia faitauina upu nei: “Ma o lea lava mafutaga ua i ai ia te i tatou iinei o le a i ai ia te i tatou iina, ae o le a na ona faatasia ma le mamalu e faavavau, o se mamalu e le o ia i tatou i le taimi nei.”¹

O lena tama o loo faafofoga faatasi ma i tatou i le po nei ua iloa le ala e tau atu i lena taunuuga mamalu. E le faigofie. Ua uma ona ia silafia lena mea. Sa manaomia ai le faatuatua ia Iesu Keriso, salamo moni, ma se suiga i lona loto lea na o mai faatasi ma se epikopo lelei na fesoasoani ia te ia ia lagonaina le faamagaloga agaalofa a le Alii.

Sa faaauau ai pea suiga matagofie ina ua ia malaga i le malumalu paia mo se faaeega paia lea na faamatala atu e le Alii ia i latou o e na faamanaina i totonu o le uluai malumalu i lenei tisipenisione. O iina i Katelani, Ohaio. Na fetalai mai le Alii e faatatau i lena mea:

“O le mea lea, o le pogai lenei na Ou tuu atu ai ia te outou se poloaiga ia outou o atu i Ohaio ma o iina o le a Ou tuu atu ai ia te outou la’u tulafono; ma o iina o le a faaeeina ai outou i le mana mai luga;

“Ma mai iina, … ona ua ia te A’u se galuega tele ua teuina, ona o le a laveaia Isaraelu, ma o le a Ou taitaia i latou i soo se mea Ou te loto i ai, ma e leai se mana e taofia lo’u lima.”²

Mo la’u uo e lei leva ona toe toaga mai ma mo le au perisitua atoa, o se galuega sili o loo i luma atu o le taitaia lea o le laveaiina o le vaega o Isaraelu lea e nafa pe o le a nafa ma i tatou, [o lona uiga] o o tatou aiga. Sa silafia e la’u uo ma lona faletua o le laveaiina o le aiga e manaomia ai le faamauina i le mana o le Perisitua Mekisateko i totonu o se malumalu paia o le Atua.

Sa ia talosagaina pe mafai ona ou faia le faamauga. Sa mananao i la’ua ma lona toalua ina ia faia i le vave e mafai ai. Ae i le vaitaimi pisi o le tulalata mai o le konafesi aoao, sa ou tuu atu ai i le ulugalii ma lo la epikopo e galulue ma la’u failautusi e saili se aso e sili ona talafeagai.

Mafaufau i lo’u te’i ma le fiafia ina ua tau mai e le tama ia te au i le lotu o le faamauga ua seti mo le aso 3 o Aperila. O le aso lena i le 1836 na auina mai ai ia Elia, le perofeta ua liua, i le Malumalu i Katelani e tuu atu le mana faamau ia Iosefa Samita ma Oliva Kaotui. Ua i ai na ki i le Ekalesia i aso nei ma o le a faaauau pea ona i ai e oo i le iuga o taimi.³

O le pule lava lea e tasi na tuu atu e le Alii ia Peteru e pei ona Ia folafola atu: “Ou te avatu foi ia te oe ki o le malo o le lagi; o se mea e te fusifusia i le lalolagi, e fusifusia foi lea i le lagi; o se mea foi e te tālā i le lalolagi, e tatalaina foi lea i le lagi.”⁴

O le toe foi mai o Elia ua faamanuiaina uma ai i latou o ē e umia le perisitua. Sa faamanino mai e Elder Harold B. Lee lena mea a o ia lauga atu i le konafesi aoao na sii mai ai le saunoaga a Peresitene Iosefa Filitia Smaita. Faalogo lelei: “O loo ou umia le perisitua; ua umia e outou o i ai iinei le perisitua; ua tatou mauaina le Perisitua Mekisateko—lea na umia e Elia ma isi perofeta faapea ai ma Peteru, Iakopo ma Ioane. Ae e ui ua tatou maua le pule e papatiso ai, e ui ua tatou maua le pule e faaee ai lima mo le meaalofa o le Agaga Paia ma faauu ai isi ma faia ai isi mea uma nei, ae a aunoa ma le mana faamau e leai lava se mea e mafai ona tatou faia, aua o le a leai se aoga o na sauniga sa tatou faia.”

Sa faaauau le saunoaga a Peresitene Samita:

“O sauniga maualuluga, o faamanuiaga silisili ia e taua i le faaeaga i le malo o le Atua, ma ua na o ni nofoaga patino e mafai ona maua ai, e leai se tagata ua i ai se aia tatau e faatino ai sei vagana ua ia mauaina le pule e fai ai mai le tagata o loo umiaina ia ki. …

“… E leai ma se tagata i lenei lalolagi atoa ua i ai le aia tatau e alu atu ai ma faatautaia soo se sauniga o lenei talalelei vagana ua faatagaina o ia e le Peresitene o le Ekalesia, lē o loo umiaina ia ki. Ua ia tuuina mai ia i tatou le pule, ua ia tuuina le mana faamau i la tatou perisitua ona o loo ia umiaina na ki.”⁵

O lena lava faamautinoaga e tasi na sau foi mai ia Peresitene Boyd K. Packer ina ua ia tusiaina e uiga i le mana faamau. O le iloaina e moni nei upu o se faamafanafanaga lea ia te au, e pei o le a oo ai foi le aiga o le a ou faamauina i le aso 3 o Aperila: “Sa tatau ona umia e Peteru ia ki. Sa tatau ia Peteru ona umiaina le mana faamau, … e fusifusia ai pe faamau ai i le lalolagi po o le tatala i le lalolagi ma faapena foi ona tatalaina ai i le lagi. O na ki e umia e le Peresitene o le Ekalesia—e le perofeta, tagatavaai, ma talifaaaliga. O lena mana faamau paia o loo i ai i le Ekalesia i le taimi nei. E leai se mea e tusa ma le paia sili o mafaufauga o i latou e iloaina le taua tele o lenei pule. E leai se mea e sili atu ona malupuipuia. E toalaiti lava ni alii e umiaina lenei mana faamau i luga o le fogaeleele i soo se taimi lava—i malumalu taitasi o loo i ai ni uso ua uma ona tuu atu i ai le mana faamau. E leai se tasi e mafai ona mauaina vagana mai le perofeta, tagatavaai, ma talifaaaliga ma o le Peresitene o Le Ekalesia a Iesu Keriso o le Au Paia o Aso e Gata Ai.”⁶

I le oo mai ai la o Elia, sa le gata na tuu mai ai le mana i le perisitua ae faapena foi le liliu ai o loto: “O le agaga, mana, ma le valaauga o Elia lea ua outou maua ai le mana e umia ai le ki o faaaliga, sauniga, afioga, mana ma faaeega paia o le atoaga o le Perisitua Mekisateko ma o le malo o le Atua i le lalolagi; ma ia maua ai, ausia, ma faatino ai sauniga uma e faatatau i le malo o le Atua, e oo lava i le liliuina o loto o tama i fanau, ma loto o fanau i tama, e oo lava ia i latou o loo i le lagi.”⁷

O lena lagona o le liliu o lona loto ua oo mai i la’u uo ma lona aiga. Atonu foi e oo atu ia te oe i lenei sauniga. Atonu e te mafaufauina i lou mafaufau, e pei ona ou faia, foliga o lou tama po o lou tina. Pe atonu foi o se tuafafine po o se uso. Pe atonu foi o se afafine po o se atalii.

Atonu o loo latou i ai i le lalolagi o agaga po o ni konetineta e mamao mai ia te oe. Ae o le olioli e oo mai i se lagona o sootaga ma i latou ua mautinoa ona ua faamau i ai oe pe mafai foi ona faamau i ai oe ia i latou e ala i sauniga o le perisitua ia o le a faamamaluina e le Atua.

O tama o e o umiaina le Perisitua Mekisateko i aiga ua faamauina ua uma ona aoaoina i mea e tatau ona latou fai. E leai se isi mea e taua atu e oo mai pe o le a oo mai i lou aiga nai lo faamanuiaga o le faamauga. E leai se isi mea e taua atu nai lo le faamamaluina o le faaipoipoga ma feagaiga faaleaiga ua uma ona e osia pe o le a e osia i malumalu o le Atua.

Ua manino lava le ala e fai ai lena mea. O le Agaga Paia o le Folafolaga, e ala i lo tatou usiusitai ma le ositaulaga, e ao ona [Ia] faamauina a tatou feagaiga faalemalumalu ina ia mafai ai ona aloaia i le lalolagi a sau. Sa faamalamalama mai e Peresitene Harold B. Lee le uiga o le faamauina e le Agaga Paia o le Folafolaga, i le siiina mai o le saunoaga a Elder Melvin J. Ballard: “Atonu tatou te faaseseina tagata ae e le mafai ona tatou faaseseina le Agaga Paia, ma o a tatou faamanuiaga o le a le faavavau sei vagana ua faamauina e le Agaga Paia o le folafolaga. O le Agaga Paia o ia lea na te faitauina manatu ma loto o tagata ma tuu mai lana faamaoniga o le faamauga i faamanuiaga na fofogaina i o latou luga. Ona fusia ai lea, tauaogaina ma atoatoa le faamauga.”⁸

Ina ua faamauina i ma’ua ma Sister Eyring i le Malumalu o Logan Iuta, ou te lei malamalama atoatoa i le taua o lena folafolaga. O loo ou taumafai pea ia malamalama i lona uiga atoa, ae sa ma filifili ma lo’u toalua i le amataga o le ma faaipoipoga ua toeitiiti atoa le 50 tausaga ina ia valaaulia le Agaga Paia i le tele ma te mafaia ai i o ma olaga ma i lo ma aiga.

A o avea ai ma se tamā talavou, faamau i le malumalu ma faatasi ai ma lo’u loto na liliu atu i lo’u toalua ma se aiga talavou, sa ma feiloai ai ma Peresitene Iosefa Filitia Samita mo le taimi muamua lava. I le potu fono a le Au Peresitene Sili, lea sa valaaulia mai ai au, na oo mai ai se molimau maumaututu tonu ia te au a o fesili mai Peresitene Harold B. Lee ia te au, ma faasino ia Peresitene Samita, lea sa nofo i ona talaane, “E te talitonu e mafai ona avea lenei tamalii ma perofeta a le Atua?”

Sa faatoa ulufale atu lava Peresitene Samita i le potu ma e lei saunoa i se upu. Ou te faafetai e faavavau sa mafai ona ou tali atu ona o le mea sa oo mai i lo’u loto, “Ou te iloa [o le a avea o ia ma perofeta,]” ma sa ou iloaina ma le mautinoa sa susulu le la ona sa ia umiaina le mana faamau o le perisitua mo le lalolagi atoa.

O lena aafiaga na maua ai e ana upu le mana tele mo au ma lou toalua, i se sauniga o le konafesi i le aso 6 o Aperila, 1972, ina ua tuuina mai e Peresitene Iosefa Filitia Samita le fautuaga lenei: “O le finagalo o le Alii ia faamalosia ma faasaoina le iunite o le aiga. Matou te aioi atu i tamā ina ia tutu i o latou tulaga tonu i le avea ai ma ulu o le aiga. Matou te talosaga atu i tina ina ia lagolago ma fesoasoani i a latou tane ma ia avea ma ni faataitaiga i a latou fanau.”⁹

Sei ou fautua atu ni mea se fa e mafai ona e faia o se tamā faaleperisitua e siitia ma toe taitai atu ai lou aiga i le fale ia toe faatasi ma le Tama Faalelagi ma le Faaola.

Muamua, ia maua ma faatumauina se molimau mautinoa o loo i ai ia i tatou ia ki o le perisitua ma o loo umiaina e le Peresitene o le Ekalesia. Tatalo mo lena mea i aso uma. O le a oo mai le tali faatasi ma se faateleina o le naunautaiga e taitai lou aiga, i ou lagona o le faamoemoe, ma faatasi ai ma le fiafia tele i au auaunaga. O le a tele atu lou fiafia ma le faamoemoe, pe a avea ma se faamanuiaga sili mo lou toalua ma le aiga.

O le mea e manaomia lona lua, o le alofa lea i lau ava. E manaomia le faatuatua ma le lotomaualalo e tuu ai mea e fiafia ai o ia i luga atu o mea e te fiafia ai oe lava ia i faigata o le olaga. Ua ia te oe le tiutetauave e tausi ma faafailele le aiga faatasi ma ia a o e auauna atu i isi. O le faia o lena mea, o nisi taimi e mafai ona alu uma ai lou malosi. O le matua ma ma’i atonu e faateleina ai manaoga o lau ava. Afai e te filifili i lena taimi e faamuamua lona fiafia nai lo oe, ou te folafola atu ia te oe o le a faateleina lou alofa mo ia.

Lona tolu, talosagaina le aiga atoa ina ia alofa le tasi i le isi. Sa aoao mai ia Peresitene Ezra Taft Benson:

“I le mafaufau ai i le faavavau, o le faaolataga o se mataupu faaleaiga. …

“E sili atu i lo mea uma, e manaomia ona iloa ma lagonaina e le fanau o loo alofaina i latou, moomia, ma talisapaia. E manaomia ona faamautinoa atu ia i latou lena mea. E mautinoa lava, o le matafaioi lea a matua e tatau ona fai, ma o le tele lava o taimi e sili atu le faataunuuina e le tina.”¹⁰

Ae o se isi punavai taua mo lena lagona o le alofaina o le alofa lea mai isi o le fanau i le aiga. O le popole faifai pea o uso ma tuafafine mo le tasi ma le isi o le a pau le taimi e oo mai ai o taumafaiga faatauanau a matua ma le fesoasoani a le Atua. E te iloa e moni lena mea mai aafiaga i o outou lava aiga. Ma e faamautuina lava i taimi taitasi e te faitau ai i faafitauli faaleaiga na fetaiai ma Liae amiotonu ma lona toalua o, Sarai, i faamaumauga o le Tusi a Mamona.

O faamanuiaga sa la ausia ua maua ai se taiala mo i tatou. Sa matua lelei lo la aoaoina atu o le talalelei a Iesu Keriso ma le faatauanau lea na faamalūlūina ai loto o le fanau ma nisi o suli o augatupulaga i le Atua ma i le tasi ma le isi. Mo se faataitaiga, na tusia e Nifae ma isi na [latou] aapa atu i tagata o le aiga sa avea ma o latou fili. E faamalūlūina e le Agaga mai lea taimi i lea taimi ia loto o le faitau afe o tagata ma suitulaga ai e le alofa le ita.

O le tasi ala mo oe e toe maua ai le manuia o Tamā Liae o le auala tou te taitai ai tatalo faaleaiga ma taimi faaleaiga, e pei o afiafi faaleaiga. Tuu atu i fanau ni avanoa e tatalo ai pe a mafai ona latou tatalo, mo le tasi ma le isi i le li’o o loo manaomia ai faamanuiaga. Ia vave ona iloatino le amataga o feeseeseaiga ma iloa ia faatinoga o auaunaga le manatu faapito, aemaise lava i le tasi ma le isi. Pe a latou tatalo mo le tasi ma le isi ma feauaunaa’i, o le a faamalūlūina ia loto ma liliu atu i le tasi ma le isi ma o latou matua.

O le avanoa lona fa e taitai ai lou aiga i le ala a le Alii e oo mai pe a manaomia le a’oaiga. E mafai ona tatou faafetaia’ia a tatou matafaioi e faasa’o i le ala a le Alii ma taitai a tatou fanau e agai atu i le ola e faavavau.

O le a e manatuaina ia upu, ae atonu e te lei vaaia lo latou mana i le olaga o sē umia le Perisitua Mekisateko o loo sauniaina lona aiga mo le ola ai i le mafutaga lava e tasi o le a latou maua i le malo selesitila. Tou te manatuaina ia upu. E masani ai lava:

“E leai se mana po o se aafiaga e mafai pe tatau ona faatumauina ona o le perisitua, na o i le faatauanau, i le tali-tiga, i le agamaualalo ma le agamalu, ma le alofa faamaoni;

“Ia agalelei, ma le malamalama manino, lea o le a faalautele tele ai le agaga e aunoa ma le pepelo, ma aunoa ma le faa’ole’ole—

“E aoai atu i taimi e tatau ai ma le maatiati, pe a uunai ai e le Agaga Paia; ma ona faaali atu ai lea pe a mavae, o se alofa faateleina ia te ia o lē na e aoaiina, ne’i manatu o ia ia te oe o sona fili;

“Ina ia iloa ai e ia e sili atu le malosi o lou faamaoni i lo fusi o le oti.”¹¹

Ma mulimuli ane e oo mai le folafolaga o le taui sili mo i tatou o ni tama i Siona: “O le a avea le Agaga Paia ma au soa e le aunoa, ma o lou tootoo o le a avea ma se tootoo le feliuliua’i o le amiotonu ma le upumoni; ma o lau puleaga o le a avea ma se puleaga tumau-faavavau, ma e aunoa ma se ala faamalosia, o le a tafe mai ia te oe e faavavau ma faavavau lava.”¹²

O se tulaga faatonuina maualuga lena mo i tatou, ae a tatou puleaina lo tatou ita i le faatuatua ma taofi lo tatou faamaualuga, e tuu mai e le Agaga Paia Lana faamaoniga, ma o le a mautinoa lava ia folafolaga paia ma feagaiga.

O le a faamanuiaina oe e ala i lou faatuatua aua na toe auina mai e le Alii ia ki o le perisitua ia ua i ai pea ia i tatou—faatasi ai ma se sootaga mautinoa o le alofa i lou toalua, faatasi ma le fesoasoani a le Alii i le liliuina o loto o lau fanau i le tasi ma le isi ma i o latou matua, ma faatasi ai ma le alofa e taialaina ai oe e faasa’o ma apoapoai i se ala lea e valaaulia ai le Agaga.

Ou te iloa o Iesu o le Keriso ma o lo tatou Faaola. Ou te molimau atu o Peresitene Thomas S. Monson o loo umia ma faagaoioia ki uma o le perisitua i le lalolagi i aso nei. Ou te alofa ia te ia ma lagolagoina o ia. Ou te alofa ma tatalo mo outou. I le suafa paia o Iesu Keriso, amene.