Pi Tabinaew ni bay u tane M’ag

Gub falfalen’ ni kug un ngomed ko mukun nga lane biney mo’olung ni oren e picha’an nibay priesthood rok Got roraed u dakean e fayleng ni kan pining raed e bay u roy. Gadad ba tawa’ath ni President Thomas S. Monson e be gagyeg nag dad. Ir ni ba President ko Galasia, ma kemus ni ir e pumo’on nib fas ni ba mil fan fapi kiy nima chiyliy e pi tabinaew nge gubin fapi gam’ing ko pi priesthood nib ga’fan ni ngeyog e yafas nib manechubog, ba tawa’ath u fithik gubin e tawa’ath nib tha’abi falel’.

Bay ba papa’ nibe motoyil ko ra balayal’ ney ni imoey nib mo’owaer ya ba’adag u fithik gumircha’en ni fara m’ag ko ra tawa’ath nem e ngeyog ngak. Ir nge ppin rok e ba tu’uf e bitir rorow rorow nib pagal nge bulyal. Boed boech e galabthir ma rayog ni nge tafiney nag e falfalen’ nib falel’ napan ni ra bi’eg e pi thin ney: “Tin ni bay rodaed e bin di’ir u lane biney e yafas e bay rodaed ko bin migid e yafas, fa’anra ngki yag e rir ngodad nib manechubog, ni fare rir ni gathi gadaed ma falfalen’ ngay e chiney.¹

Ra papa’ nem e be un ngodad ko motoyil ko ra balayal’ ney e manang fare kanawo’ ko ra n’em ni nge buch nib falel’. Dani moem. Ma manang. Mu’un e mich ngak Yesus Kristus, kalngan’uy nib riyul’, nge gumircha’en nike thil ni yib u fithik e gol rok e bisof nibe ayuweg ni nge thamiy e tu’ufeg rok Somoel u fithik e n’ag fan.

Ko pi thil nib falel’ nibe ulul napan ni yaen nga temple nib thothup ni fan ko endowment ni ke weliy Somoel ngak e picha’an nike pi’ gelngin u lan e bin somm’on e temple u lane e biney e dispensation. Bay u lan yu Kirtland, Ohio. Ke ga’ar Somoel ni mornga’agen e binem:

Ke yoeg Somoel e motochiyel ngoraed ni ngar ranoed nga Ohio. Urom me pi’ ngoraed e motochiyel Rok ma yaed ra endow ko gelngiy nibay u tharmiy.

“And from thence, … for I have a great work laid up in store, for Israel shall be saved, and I will Ngar raned ngaram, ya bay e murwel ni fan e pi girdi’en Got ni ngar rrin’ed, ni ngan ayuweg yu Israel. Ra gagyeg nag raed ko gin ni ba’ adag ni ngar ranoed ngay, ma dariy gelngin ban’en ni rayog ni nge taleg.”²

Ko fagar rog ni kafni pasig biyay nge gubin e priesthood, bay e murwel nga m’on ni ngan rrin’ ni ngan gagyeg bang u Israel ni ngan ayuweg ya ba mil fan ngodad fa ra mil fan ngodad, tabinaew rodaed. Fagar rog nge ppin rok e manang nib mu’un e chiyliy u dakean gelngin fare Melchizedek Priesthood u lane temple ku Got nib thothup.

Fagar rog e yoeg ni gag e ngug rrin’ fare chiyliy. Ir nge ppin rok e yow ba adag ni ngan rrin’ nib papey. Machane ngiyal’ ni rib busy ko general conference nibe yib, mug pag ngak fare gal mabgol nge bisof rorow ni ngar murwel gaed e secretary rog ni ngan guy e bin mangil e rran.

Mug gin’ ngay ma gub falfalen’ napan ni yoeg fare papa’ ngog ni lan fare galasia ma fare chiyliy e kan tay ko April 3. Iraram e rran ko 1836 napan ni Elijah, fare profet nni dani yim’ me yaen nga tharmiy, ni kan pi’ ke yaen nga Kirtland Temple ni nge pi’ fare gelngin e chiyliy ngak Joseph Smith nge Oliver Cowdery. Pi kiy nem e bay u lane Galasia e daba’ ma ra ulul ko tomuren e taym.³

Ba mot’woy ni kab ta’abrogon nib thothup ni ke pi’ Somoel ngak Peter napan ni ga’ar: “Ma ba gu pi’ ngom fapi kiy ni kiy ko gagiyeg nu tharmiy: n’en ni ga ra taleg ndab nrin’ u but’ e yira tay u tharmiy ni aram rogon; ma n’en ni ga ra pag rin’ u but’ e yira tay u tharmiy ni aram rogon.”⁴

Elijah nike sul e ke fal’eg wa’athan gubin e picha’an ni bay fare priesthood rok. Elder Harold B. Lee e ke tamilang nag napan ni non u lane general conference, nibe yoeg President Joseph Fielding Smith. Motoyil nib fal’ rogon: “Gube koel fare priesthood; gimed e pumo’on ni walag u roy e gimed be koel fare priesthood; keyog fare Melchizedek Priesthood ngodad—ni Elijah e be koel nge kuboch e pi profet nge Peter, James, nge John. Gadad ni bay mot’won dad ni ngad tawfe niged e gidii’, ma bay mot’won dad ni ngad ted p’a dad nga dakean loelgen bee’ ni fan ko tawa’ath ko fare Kan ni Thothup man yibliy boech e gidii’ man rrin’ gubin e pin’ey, ra dariy fare gelngin fare chiyliy ma dabyog ni ngad rrin’ed ban’en, ya dariy mot’won dad ko pi gam’ing nem ni bay rodad e chiney.”

Me ulul President Smith:

“Ra be tolang e pi gam’ing, ma be falel’ e pi tawa’ath ni ba ga’ fan ko exaltation u lan gil’ilngun Got, ma kemus ni rayog ni ngeyog u bang nib mutrug, dariy bee’ ni rayog ni nge rrin’ e pi gam’ing nem nge taw ko ngiyal’ ni ke yag mot’won ni nge rrin’ ba pumo’on ni be koel fapi kiy. …

“… Dariy bee’ u dakean e biney e fayleng ni bay mot’won ni nge yaen nga m’on me rrin’ reb e pi gam’ing ko ra gospel nem nge taw ko ngiyal’ ni fare President ko fare Galasia, nibe koel fare kiy, e ra pi’ mot’won. Kar pi’yed mat’won dad; nike tay fare gelngin e chiyliy nga lane priesthood rodaed ya bachane ir e be koel e pi kiy nem ”⁵

Binem e m’ag nib ta’aborogon ni yib rok President Boyd K. Packer napan ni yoloey mornga’agen fare gelngin e chiyliy. Pi thin ney ni ngan nang e ba riyul’ e ba gapas ngog, boed ni ra buch ko tabinaew ni ragu chiyliy ko April 3: “Peter e nge koel fapi kiy. Peter e nge koel fare gelngin e chiyliy, … ni ngan rrin’ fa ni pag u fayleng e aram rogon u tharmiy. Pi kiy nem e bay ko fare President ko fare Galasia—ko fare profet, tathogthog, nge tayi’iy. Biney e gelngin e chiyliy e bay u Galasia e chiney. Dariy ban’en nib ni nga yaliy nib thohtup ni yib rok e picha’an ni manang e n’en ni ga’fan ko biney e mot’woy. Dariy ban’en ni boed ni yima ayuweg nib fal’ rogon. Bay in e pumo’on nima kel e biney e gelngiy ko chiyliy u dakean e fayleng ni yima pi’ ni demtrug ngiyal’—ra reb e temple ma bay e pi walag ni pumo’on ni kan pi’ e gelngin e chiyliy nem ngoraed. Dariy bee’ ni rayog ni ngeyog ngak ma kemus ko profet, tathogthog, nge tayi’iy, a ba President ko Fare Galasia ku Yesus Kristus ni Fan ko Gidii’en Got ko Tin Tomur e Rran.”⁶

Napan ni ra yib Elijah ma gathi kemus ni gelngin ni kan pi’ ko fare prisethood machane pi gumirch’ey ni keyog ni nge sap: “Fare kan thothup, gelngiy, nge pong rok Elijah e, gur ni ngeyog fare mat’wom ni ngam koel fare kiy ko fare yi’iy, profet, gelngiy nge pi endowment ko ga’ngin fare Melchizedek Priesthood nge gil’ilngun Got u dakean e fayleng; ni ngeyag, man fek, man rrin’ gubin e pi gam’ing nifen gil’ilngun Got, ni ra cheleg gumircha’ey e pi chitamangiy ngak e bitir, nge gumircha’en e bitir ngak e chitamangiy, mus ko picha’an ni bay u tharmiy ma aram rogon.”⁷

Binem e thomthom ko gumircha’en nibe chel e ke buch ko fagar rog nge tabinaew rok. Rayog nike yib ngomed u lane re mo’olung ney. Rayog ni kam tafney nag u lanin’um, rogon gag, ya’an e papa’ nge nina’ rom. Owchen e cha’ ni kam tafney nag e rayog ni walagem nib ppin fa pumo’on. Rayog ni fakam nib ppin fa pumo’on.

Cha’an nikam tafney nag e rayog ni bay u tafen e ya’el fa ma paer nib palog rom. Machane falfalen’ nima yib ko ra tha’ nem ngoraed e riyul’ ya gur ma rayog ni ngam un ngoraed u dakean fare gam’ing ko pi priesthood ni ra tay fan Got.

Picha’an nima koel fare Melchizedek Priesthood ni ba papa’ u lane tabinaew nikan chiyliy e kan fil ngoraed e n’en ni ngar rrin’ed. Dariy ban’en nke yib fa ra yib nga lane tabinaew rom nib ga’fan ko pi tawa’ath ko chiyliy. Dariy ban’en nib ga’fan ni ngan tay fan e pi m’ag ko mabgol nge tabinaew ni kam ngongliy fa kam fal’egin u lane pi temple ku Got.

Kanawo’ ni ngan rrin’ e ba tamilang. Kan ni Thothup ni Yoeg ni ra Pi’, ngiyal ni gadad be fol nge miligach, e ngarin chiyliy e pi m’ag rodad u lane temple ngeyog ni ngan nang u lane ra fayleng ni bay yib. Ke weliy President Harold B. Lee e n’en nibe yup’ fan ni ngan chiyliy u dakean fare Kan ni Thothup ni ke Yoeg ni ra Pi’, ni yoeg e n’en ni yoeg Elder Melvin J. Ballard: “Rayog ni ngad baen niged e gidii’ machane dabyog ni ngad baen niged fare Kan ni Thothup, ma pi tawa’ath rodaed e dabi manechubog nge taw ko ngiyal’ ni pi tawa’ath nem e kan chiyliy ko fare Kan ni Thothup ni Yoeg ni ra Pi’. Fare Kan ni Thothup e bin nima bi’eg e tafiney nge gumircha’en e gidii’, me pi’ e n’en nike pi mot’won ningan chiyliy ko pi tawa’ath ni ngan pi’ ngoraed. Ma arame fare chiyliy e peth, ma bay, ma ribay urom.”⁸

Napan ni kan chiyliy Sister Eyring nge gag u lane Temple u Logan Utah, ma danug nangfan nib fal’ rogon e rofen nem gelngin nib baga’ fan e ra m’ag nem. Gube gay rogon ni ngug nang fan urngin nibe yup fan, machane ppin rog nge gag e gu dugliyew ni ngug tabab nigew e mabgol romow nike chugur ni gaman wugem e duw ni ngan pining fare Kan ni Thothup gelngin ni rayog romow nge lane yafas romow nge lane tabinaew romow.

Gag ni gub papa’ nib fal’ yangreg, nikan chiyliyeg u lane temple ni bay gumircha’eg nib sar ngak e ppin rog nge tabinaew rog, mug mad’eg President Joseph Fielding Smith ko somm’on rog. U lane senggil ko council ko Bin Somm’on e Presidency, ko gin ni kan piningeg ngay, me yib ba mich ngog nib riyul’ napan ni ga’ar President Harold B. Lee ngog, nibe yoen’ loen President Smith, nibe paer u to’obaen, “Mich u wun’um ni ra pumo’on ney e profet rok Got?”

Kafin ni yib President Smith nga lan fare senggil ma dar yoeg ban’en. Ma karug falfalen’ ni yag ni ngug fulweg ngog ya bachane n’en nike yib nga lane gumircha’eg, “Gumanang ni ir.” ma gumanang ni ryul’ ni rogon ni gumanang ni be mat e yal’ ni be koel fare priesthod ko gelngin e chiyliy ni fan ko gubin gidii’ u fayleng.

Binem nike buch e non ngog u fithik gelngin ni fan ngog nge ppin rog napan, u lane mo’olung ko conference ko April 6, 1972, me yoeg President Joseph Fielding Smith ni: “N’en ni ba adag Somoel ni nge gel nag me tay e tabinaew nib mangil rogon. Gamad be wenig ko chitamangiy ni ngar ted e tin nib mil fan ngoraed ni yaed e loelgen fare tabinaew. Gamad ma yoeg ko pi chitinngiy ni ngar ted mar ayuweged e pumo’on roraed me mang e kanawo’ ko pi bitir rorow.”⁹

Soen ngug weliy aningeg ban’en ngomed ni rayog ni ngam rri’ned ni gab papa’ nibay e priesthood rok mag gagyeg nag e tabinaew rom biyay ni ngan paer rok e Chitamangiy nu Tharmiy nge fare Tathapeg.

Somm’on, yag mag cha’ariy e tin nib riyul’ nib mich ni fapi kiy ko fare priesthood e bay romad ma President ko fare Galasia e be koel. Meybil ni fan e binem ni gubin e rran. Fulweg riy e ra yib ni ra gel ni ngam gagyeg nag e tabinaew rom, u fithik e athap, nge fithik e falfalen’ u lane murwel rom. Gara falfalen’ nib gel, tawa’ath nib falel’ ni fan e ppin rom nge tabinaew rom.

Bin migid e n’en ni ngam rrin’ e ngam adag e ppin rom. Ra un e mich nge sobutaen’ ni ngam tay e tin ni ba adag nga dakean e tirom u lane yafas nib magagawon. Bay e murwel rom ni ngam pi’ e tin nib tu’uf mag duruw’iy e tabinaew romew napan ni kagbe ayuweg boech e gidii’. Binem e rayog ni boech ngiyal’ me feek oren e gelngiy ni bay rom. Yangrey nge m’ar e ra tu’uf e ayuw ko ppin rom. Fa’anra gara dugliy ni ngam tay nga dakean e falfalen’ rom, ma gube yoeg ngomed e chiney ni adag rom ngak e ra gel.

“U lane tin manechubog, ma tamilangeg rogon min thap e tin nib mil fan ko tabinaew. …

N’en nib ga’fan ko gubin ban’en, ba tu’uf ko pi bitir ni ngar nanged mar thamiyed ni yaed ba tu’uf, ma yiba adag raed, ma yibe falfalen’ ngoraed. Ba tu’uf ni ngan noeg ngoraed ni bukun yay. Machane, biney e n’en nib mil fan ko galabthir ni thingari rrin’, ma baga’ ni fare nina’ e rayog ni nge rrin’ nib mangil rogon.”¹⁰

Machane reb e n’en nib ga’fan ni fan ko ra thomthom nem ni ngan tu’ufeg e tu’ufeg ko boech e bitir u lan fare tabinaew. Pi walag ni pagal nge ppin e ngar ayuwegned raed e ra yib kemus u fithik e n’en nib ga’fan ko pi galabthir nge ayuw rok Got. Gamanang ni ba riyul’ ko n’e ni ke buch rom u lane tabinaew rom. Ma fa’anra ke buch ko oren ngiyal; ni gara bi’eg mornga’agen e magawon ko tabinaew nib mangil ku Lehi nge ppin rok, i Seriah, u lan fare Babyor ku Mormon.

N’en nikar rrin’ed e kar pi’yed e kanawo’ ni fan ngodad. Kar filed fare gospel ku Yesus Kristus nib fal’ rogon nib moem ni bitir nge boech e gidii’ roraed e bay gumircha’en raed ni ke munguy ngak Got nge ngoraed. Boed ni, Nephi nge boech e gidii’ ni kar yoloeyed mar ki’yaeged giyaed ko boech e tabinaew ni ki imoy ni dabun raed dakean raed. Fare Kan Thothup e yungiyal’ ma ma munguy nag gumircha’en biyu’ e gidii’ me thilyeg e kireb ko tu’ufeg.

Reb e kanawo’ ni fan ngom e ngam rrin’ biyay e pin’en nib mangil rok e Chitamangiy ni Lehi ko rogon ni gama meybil u tabinaew nge ngiyal’ ko tabinaew, ni boed e gak ko tabinaw ni balayal’. Mu pi’ e kanawo’ ko pi bitir ni nge meybil napan ni rayog ni ngar meybil gaed, ni fan boech e gidii’ u lane tabinaew ni ba tu’uf e tawa’ath ngoraed. Moeg nib papey ko somm’on ni yima togopluw man poey e pangiy nib kireb, baga’ ni ngoraed. Napan ni yaed ra meybil ni fan ngoraed mar ayuweged giyad, ma pi gumircha’ey e ra munguy me chel ngoraed nge galabthir roraed.

Bin aningeg e kanawo’ ni ngam gagyeg nag e tabinaew rom ko kanawo’ rok somoel e ra yib napan ni ba tu’uf e ayuw. Rayog ni ngad mad’eged e n’en nib mil fan ngodaed ko kanawo’ rok Somoel man gagyeg nag pifak dad ko yafas nib manechubog.

Gara tafneyem ko fapi thin, machane sana daworum guy gelngiy ko facha’ nibe koel e Melchizedek Priesthood nibe fal’eg rogon e tabinaew rok ni fan ko paer u fithik e gidii’ u lane celestial kingdom. Kaga gamanang fapi thin. Ba familiar:

Dariy gelngiy fa mot’woy ni rayog fa fare priesthood ni nge ngongliy—ma kemus ni dakean e gafgow, fithik e athamgil, fithik e gol nge gum’aen’, nge fithik e tu’ufeg nib riyul’.

Gol, nge gonop nib falel’ ni ra ga’ nag e tafney ni dariy e morwaer riy ma dariy e kireb riy.

Thingar di lem gaed nib mangil rogon napan nibe mithmith nigem fare Kan ni Thothup, man dag fare tu’ufeg nike gel ngak bee’, ya ngeyog ni dabin sap ngodad nib tagan.

Ere picha’an ni gadad be tu’ufeg e yaed ra nang ni mich rodad e ba gel ko yam’.”¹¹

Ma ta’aboch ma fare m’ag e ma yib nib mangil rogon ni fan ngodad ni gadad e papa’ u Zion: fare Kan ni Thothup e ra mang e fagar rodaed, ma sog rodaed e ra mang e sog ko mangil nge riyul’. Ma gelngin dad e ra mang gelngiy nib manemus, ma dabin fors nag dad ma gelngin dad e ra paer rodad nib manemus.”¹²

Binem e ban’en nib tolang ngodad, machane napan ni bay e mich rodad ni ngad gapas nag dad ma gadad waer nag e geliwan rodaed, ma fare Kan ni Thothup e ra pi’ mot’woy, nge pi m’ag nib thothup e ra riyul’.

Gara mangil u dakean e mich rom ni ke pi’ Somoel fapi kiy ko fare priesthood, ni kubay rodaed—ni ribay e adag rom ngak e ppin rom nib riyul’, nge ayuw rok Somoel ni nge sapeg gumirchaen pafakmed ngorad nge gallabthir rorad, nge tu’ufeg ni nge gayeg nigem ni ngam mangil nag me fekem ko kanawo’ ni ra pining fare Kan Thothup.

Gumanang ni Yesus e ir Kristus ma Tathapeg rodaed. Gube micheg ni President Thomas S. e ir e ma koel ma ma murwel ko gubin fapi kiy ko priesthood u fayleng e bin daba’ e rran. Ba tu’uf rog ma gube ay u loen. Gime ba tu’uf rog ma gube meybil ni famed. U dakean fithngan Yesus Kristus nib thothup, amen.