Na Raivotu mo Cakacakataka

Me vakataki ira kece ga na itubutubu vinaka, rau a gadreva vakakina na noqu itubutubu me ratou rawa-ka mai muri o iratou na luvedrau. E sega ni lewenilotu o tamaqu, kei na vuku ga ni veika sega ni namaki e yaco tu ena gauna o ya, rau sa vakadeitaka kina na noqu itubutubu me keitou sa biuta vakaveiganeni na neitou vanua na yanuyanu o Amerika vaka-Samoa, ena Ceva ni Pasivika, ka me keitou gole yani ki Amerika me keitou laki vuli kina.

Na lewa oqo me rau sa tawasei mai vei keitou a ka dredre toka vei rau na noqu itubutubu, vakabibi o tinaqu. Rau sa kila tu ni na yaco kina eso na bolebole sega ni kilai ni keitou sa laki biu tu ena dua na vanua vou. Ia, ena vakabauta kei na gugumatua, rau sa vakayacora ga na nodrau ituvatuva oqo.

E na vuku ga ni a susugi cake vaka-Yalododonu Edaidai, sa kila vakavinaka tu o tinaqu na ivakavuvuli ni masu kei na lolo, ka rau sa vakila na noqu itubutubu ni rau sa gadreva sara na veivakalougatataki mai lomalagi mera vukei kina na luvedrau. Ena yalo oqori rau sa vagalalataka kina e dua na siga ena veimacawa me rau masu ka lolo kina baleti keitou. Na nodrau raivotu o ya me ratou vakarautaki na luvedrau me ratou rawa-ka mai muri. Rau sa cakacakataka na nodrau raivotu oqo, ka rau sa cakacakataka na nodrau vakabauta ena nodrau vakasaqara na veivakalougatataki ni Turaga. Ena lolo kei na masumasu, rau sa ciqoma kina na kena veivakadeitaki, veikauwaitaki, kei na veivakacegui ni na vinaka na ka kecega.

Ena rawa vakacava vei keda, ena loma ni veibolebole ni noda bula, meda rawata na raivotu e gadrevi me vakayacori na veika sa dodonu me na kauti keda vakavoleka sara vua na iVakabula? Ni da tukuna na raivotu, e vakavulica vakaoqo na ivola ni Vosa Vakaibalebale na dina oqo: “Ni sa sega na ivakavuvuli, era sa rusa na tamata” (Vosa Vakaibalebale 29:18). Kevaka meda sa qai kune vinaka ka sega ni rusa, e dodonu meda raivotutaki keda vakaikeda me vaka sa raici keda kina na iVakabula.

E titobu cake na nona rai na iVakabula baleti iratou na gonedau yalomalumalumu ka a kacivi iratou me ratou muri Koya mai na nodra raici taumada vakairatou e liu; A raica o Koya na raivotu ni veika e ratou rawa ni yacova. E kila ni ratou tamata vinaka ka gugumatua, ka sa kacivi iratou kina. Taumada eratou tamata lecaika, ia ni ratou sa muri Koya, eratou sa qai raica na Nona ivakaraitaki, vakila na Nona veivakavulici, ka yaco me Nona tisaipeli. A yaco kina ena dua na gauna mera sa biuti Koya eso na Nona tisaipeli baleta ni sa dredre mera kila na veika sa cavuti vei ira. Ni sa kila ni ra na lako tani talega eso, a taro kina o Jisu vei iratou na Tinikarua, “Dou sa via lako tani talega koi kemudou?” (Joni 6:67). Na vosa nei Pita e vakaraitaka ni sa veisau o koya ka sa raica rawa na raivotu se o cei na iVakabula. “Keitou na lako vei cei? Sa tu ga vei kemuni na vosa ni bula tawamudu” (Joni 6:68), a kaya.

Mai na raivotu o ya a rawa kina vei iratou na tisaipeli yalodina oqo me ratou cakava rawa na veika dredre ena ilakolako ni kaburaki ni kosipeli ka tauyavutaka na Lotu ni sa lesu na iVakabula. A yaco vakakina, me so a solia na nodra bula ena vuku ni nodra ivakadinadina.

Eso tale na ivakaraitaki ena ivolanikalou baleti ira eso era sa yaco mera kila vakavinaka na veika ni kosipeli ka gole yani ka laki cakacakataka na raivotu o ya. A yaco me kila vakavinaka kina o parofita Alama ena gauna a rogoci Apinatai kina ni a vunau vakayaloqaqa tiko ka soli ivakadinadinataka tiko vei Tui Noa. A laki cakacakataka sara o Alama na ivakavuvuli nei Apinatai ka veilakoyaki me vakavulica na veika sa vulica rawa, ka papitaisotaki ira e vuqa era a vakabauta na nona vosa (raica na Mosaia 17:1–4; 18:1–16). Ena nona a vakacacani ira tiko kina na Yalododonu taumada, a saumaki mai o Paula na iApositolo ena sala ki Tamasiko ka lako sara me laki cakacakataka ena veivakavulici kei na nona vakadinadinataka na Karisito (raica na Cakacaka 9:1–6, 20–22, 29).

Ena noda gauna oqo era vuqa sara na cauravou, goneyalewa, kei ira na veiwatini qase era sa ciqoma na nona veisureti na parofita ni Kalou mera laki kaulotu. Ena vakabauta kei na yaloqaqa era biuta na nodra itikotiko kei na veika kecega era vakamareqeta tu kei na vuku ga ni nodra vakabauta ena vuku ni veika cecere e vinaka era na rawa ni ra cakava ni ra sa daukaulotu. Ni ra cakacakataka yani na nodra raivotu mera kaulotu, era na vakalougatataka kina e vuqa na bula, ka yaco, me veisau kina na nodra bula. Ena iotioti ni koniferedi raraba, a vakavinavinakataki keda kina o Peresitedi Monson ena vuku ni veiqaravi vakaikeda eda a vakayacora ka vakavotuya vei keda na noda ilesilesi meda sa liga ni Kalou ena nodra vakalougatataki na Luvena ena vuravura oqo (raica na “Me Yacova Nida Qai Sota Tale,” Liaona, Nove. 2011, 108). Na kena vakayacori rawa na ilesilesi oqo e veivakacegui ki na yalo ni ra cakacakataka yani na lewe ni Lotu na nona raivotu.

Ni bera ni biubiu na iVakabula, ka sa kila vakavinaka tu ni da na gadreva na veivuke, a kaya kina, “Au na sega ni laivi kemudou mo dou luveniyali” (Joni 14:18). A vakavulica vei ira na Nona tisaipeli, “Ia na Dauveivakacegui na Yalo Tabu, ko koya ena tala mai ko Tamaqu e na yacaqu, ena vakavulici kemudou ena ka kecega, kau a vosataka vei kemudou” (Joni 14:26). Oqo na Yalo Tabu vata ga ka rawa vua me veivakaukauwataki ka vakauqeti keda meda vakayacora na veika e vakavulica vei keda na iVakabula kei ira na parofita ena gauna oqo.

Ni da cakacakataka yani na nodra ivakavuvuli na noda iliuliu, ena titobu vakalevu sara na noda kila na raivotu ni iVakabula me baleti keda. Ena gauna taucoko ni koniferedi oqo eda sa mai ciqoma kina na ivakasala veivakauqeti vakayalo mai vei ira na parofita kei na iapositolo. Vulica na nodra ivakavuvuli ka vakasamataka vakatitobu e yalomu ni ko vakasaqara tiko na Yalo ni Yalo Tabu me na vukei iko mo raica rawa na raivotu ni veivakavuvuli oqo ena nomuni bula. Ena raivotu oqori, cakacakataka na nomu vakabauta ena nomu cakacakataka yani na nodra ivakasala.

Vakasaqara ka vulica na ivolanikalou ena vakasama mo ciqoma na veivakararamataki kei na kila-ka e levu cake me baleta na nodra itukutuku vei kemuni. Vakasamataka vakatitobu e yalomu ka laiva me vakauqeti iko. Mo qai cakacakataka ena nomu veivakauqeti.

Ni da vuli vakamatavuvale, eda na cakacaka ni da lolovaka ka masulaka. E kaya o Alama ni lolo kei na masu e dua na sala ni kena ciqomi na veivakadeitaki ni a kaya, “Au a lolo ka masu ena vica na siga, me vakatakilai kina vei au na veika oqo” (Alama 5:46). O ikeda talega eda kila rawa na iwalewale meda taqeya rawa kina na bolebole ni noda bula ena noda lolo ka masu.

Eda dau sotava na veika dredre ena noda bula ka so na gauna e dau vakabuwawataka na noda raivotu kei na vakabauta meda vakayacora kina na noda cakacaka e gadrevi. Eda sa osooso sara ka da vakila ni da sa ulabaleti ira ka sega ni cakava rawa tale e dua na ka. Me vaka ga ni da duidui oi keda yadudua, sa noqu kerekere malumu me vakatabakidua ga na noda raivotu vua na iVakabula kei na Nona ivakavuvuli. Na cava a raica vei Pita, Jemesa, kei Joni kei ira na iApositolo tale eso ka a vakauqeti Koya me cakacakataka ka sureta me ratou muri Koya? Me vakataka Nona raivotutaki iratou, sa tu vua na iVakabula na raivotu e cecere sara ni ituvaki e rawa meda na laki yacova. Ena taura na vakabauta vata ga kei na yaloqaqa ka a tu vei iratou na isevu ni iApositolo me rawa ni da raica vakatabakidua tale na veika e bibi cake ena kauta mai na marau tawayalani kei na reki vakaitamera.

Ni da vulica na bula ni noda i Vakabula kei na Nona ivakavuvuli, eda raica ni sa dau maliwai ira na tamata me veivakavulici, veimasulaki, veilaveti cake, ka veivakabulai. Ni da vakatotomuri Koya ka vakayacora na veika eda raica e dau cakava o Koya, eda sa tekivu meda raica e dua na raivotu ni keda ituvaki eda na rawa ni yacova. Ko ni na vakalougatataki ena veivakararamataki ena veivuke ni Yalo Tabu meda caka vinaka vakalevu cake. Ena tekivu yaco mai na veisau, sa na tekivu mo kauta mai e dua na veisau vou ki na nomu bula ka na vakalougatataki iko vakakina na nomu matavuvale. Ena gauna ni Nona cakacaka vakalotu vei ira na Nifai, a taroga kina na i Vakabula, “Ia a cava na ivalavala sa kilikili kei kemudou?” A sauma, “Mo dou vakataki Au” (3 Nifai 27:27). Eda na gadreva na Nona veivuke meda vakataki Koya kina, ka sa vakatakila vei keda na sala: “Dou kerekere, ka na soli vei kemudou; dou tukituki, ka na dolavi vei kemudou; ni sa rawata yadua ko koya sa kerekere, ka na dolavi vua sa tukituki” (3 Nifai 27:29).

Au kila ni gauna eda raivotu kina me baleti keda me vaka sa raici keda mai na iVakabula ka da cakacakataka yani na raivotu o ya, ena vakalougatataki na noda bula ena veisala eso e sega ni namaki. Ena vuku ga ni nodrau raivotu na noqu itubutubu, a sega walega ni vakalougatataki na noqu bula ena veika ni vuli, ia au a sotava na ituvaki eso kau kunea ka ciqoma kina na kosipeli. E vakabibi cake, niu a vulica na ibalebale ni itubutubu era vinaka ka yalodina. Meu vakarawarawataka, sa veisau vakadua kina na noqu bula.

Me vaka ga na raivotu a muataki rau na noqu itubutubu me rau lolo ka masu baleta na nodratou bula na luvedrau kei na nodratou raivotu na iApositolo taumada ni a veimuataki me ratou muria na i Vakabula, sa vakarautaki tale tu ga na raivotu vakaoqo me veivakauqeti ka vukei keda meda cakacakataka yani. Kemuni na taciqu kei na ganequ, eda sa kawatamata dau raivotu ka tu vei keda na vakabauta kei na yaloqaqa meda cakacakataka. Raica mada na vanua eda a tekivu mai kina kei na veivakalougatataki eda sa ciqoma! Mo ni vakadinata ni sa rawa Vua me vakalougatataki kemuni ena raivotu ni nomuni bula kei na yaloqaqa mo ni cakacakataka.

Au sa vakadinadinataka vei kemuni na iVakabula kei na Nona gagadre meda lesu rawa Vua. Me vakayacori oqo, e dodonu me tu vei keda na vakabauta meda cakacakataka—meda muri Koya ka yaco me vakataki Koya. Ena veigauna eso ni noda ituvaki ni bula, sa dau dodoka mai na Ligana ka sureti keda:

“Vakataqara vei kemudou na noqu ivua, ka vuli vei au; niu sa yalomalua ka yalomalumalumu: dou na kunea kina na vakacegu ni yalomudou.

“Ni sa rawarawa na noqu ivua, ka mamada na noqu icolacola” (Maciu 11:29–30).

Me vaka ga a raica na iVakabula na gugumatua cecere a tiko vei iratou na Nona tisaipeli taumada, sa raica vakakina vei keda o Koya. Meda sa qai raici keda me vaka sa raici keda na i Vakabula. Sa noqu masu ni sa na tu vei keda na raivotu o ya kei na kena vakabauta kei na yaloqaqa meda cakacakataka yani, ena yaca i Jisu Karisito, emeni.