2010–2019
El Luhngse Kuht Nuh Pwacye
April 2012


El Luhngse Kuht Nuh Pwacye

Ke srihpen inkuhsrao orwaclah atac luhn sucu, kuht kahlwemwack yohk ke ohiyac Pahpah tuhmasr Inkuhsrao luhngse na pwacye kuht kais sie oacna sie ac yohkna.

Nga luhngse wi misineri ke pacl nuh kwewa. Elos sesseslah ke luhlahlfongi, finsrak, ac luhngse pwacye. Puhlakihn luhn misineri lalos oacna moul srihk fohn ke lusen mahlwem 18 nuh ke 24. Elos tuhkuh oacna ahwowo nguhn ke masrinsracl na pwacye in etuh, ac ahksahfyelah misin lalos oacna mwet mahtuh, atacn ahkolah in kuhtanglah kuhtwena ac nohfohn ma upac ma e sonolos uh. Nga oayacpac luhngse oaru luhn misineri mahtuh, suc sesseslah ke mong fihsracsr, lahlmwetmwet, ac luhlahlfongi efahl. Elos use mwe sang luhn kuh ac luhngse nuh ke lalon mwet fuhsr ma raunwelosyak uh. Elos tuhkweni arlac fokoko, motlweni nuh ke ma wo, suc ma oasr eklac yohk ke moul lalos ac nuh sin mwet nuh kwewa elos mokle ke kuhlwacnsap lalos uh.

Pacl fototo somlah ah nga lohng luo sin misineri fuhsr wolacna inge ke elos sruhmuhn puhlakihn ac kuhiyaclos ah. Ke pacl sac elos esamwack ac motko ke mwet ma elos ohsun nuh se ke lwen sac, kuhtuh selos lohng yohk liki kuhtuh sahyac. Ke elos nuhnkuh ohiyac sikyak ah, elos siyuck, “Kuht ac kuh in kahsruh kais sie mwet in oasr kena in etuh yohk likina met ah ke Pahpah Lucng fuhkah? Kuht ac kahsrwelos in puhla Nguhn Lal fuhkah? Kuht ac kuh in kahsrwelos in etuh lah kuht luhngse elos fuhkah?”

Nga motko lah nga kuh in liye mukul fuhsr luo inge tukun yac tolu kuh ahkosr tukun elos ahksahfyelah misin lalos. Nga liyaclos tari in nuhnak luhk ke elos konwacack muhtwacn kiyaclos ne tok ac kuhlwacnsap ke u luhn elders kuh luti u luhn mukul fuhsr. Ingena, sahyacn nuhnkuh ke mwet intoe lalos, elos siyuck kihsen siyuck soko ah na ke mwet ke u lalos kuh mukul fuhsr ma elos pahngonyuck in kahsruh. Nga liyacack ohiyacn puhlakihn lalos ke misineri uh kuh in orekmakihnyuck in oacna atac se nuh ke tuhfweyacn mwet sahyac ke moul luhlah lalos an. Ke un mwet luhlahlfongi luhn mwet tuhma lutlut inge fohlohk liki misin lalos ke muhtuhn facl na pucspucs facluh nohfohn uh, elos muhtwacwacack oruh mwet sang kahsruh suwohs nuh ke orekma luhn akiyac Alu uh.

Sahp mwet pahluh Lehi ke Puk luhn Mormon el motko ke kihsen siyuck ekahsr uh pacna oacna misineri inge ke el lohng top sin tuhlihk mukul nahtuhl nuh ke kolyuck ac aruhrruhma ituckyang nuh sel ah: Nephi el suhmuhslah lah Laman ac Lemuel, suc mahtuh emet, elos tohrkahskahs lain pahpah tuhmwaclos. Ac elos tohrkahskahs ke srihpen elos nihkihn orekma luhn God suc orwacloslac (liye 1 Nephi 2:12).

Sahp kuht kais sie puhla kohslah Lehi el puhlakihn sin tuhlihk mukul mahtuh luo nahtuhl uh. Ke kuht sun sie tuhlihk loessuhlah liki ma pwacye uh, sie mwet intoe suc soenna etwaclah ke wosasuc, kuh sie elder suc tiac oruh kuhtwena ma, kuht tuhngiyac oacna ke Lehi el oruh ah ac siyuck, ngwac kuh in kahsrwelos fuhkah in puhla ac porongo Nguhn elos in muh kuh in tiac wi ke ma luhn facluh? Ma suhmuhslah luo tuhkuh nuh ke nuhnak luhk ma kuh in kahsrwe kuht kuh konwacack inkacnek lasr liki ma lusrohngtwen inge ac puhla kuh ke luhngse luhn God.

Nephi el sang ki se nuh ke sruhnguhl in lutlutkihn ke puhlakihn lal sifacna: ke el fahk lah oasr kena yohk lal in etuh ma lukmac luhn God, na el wowoyak ke puhsra luhlahp nuh sin Leum; na El muhtwacta nuh yohrohl Nephi, ac El ahkfihsracsryelah insiyacl Nephi in luhlahlfongi kahs nuh kwewa sruhmuhnyuck sin pahpah tuhmwacl; na, el tiac lahfwekihn pahpah tuhmwacl oacna tuhlihk wiyacl ah (liye 1 1 Nephi 2:16).

Okasack kena se in etuh ac use kuh luhn nguhn yohrohsr in lohng puhsren inkuhsrao. Konwacack inkacnek soko in okasack ac tuhfahlah kena se inge pa fuhfahsryucsr ac kunohkohn lasr kais sie—misineri, pahpah ninac, mwet luti, mwet kol, ac mempucr an. Ke kuht puhla kena sacn in mokle insiyacsr uh, kuht ahkolah in eis ma wo ke lutlut ke ma suhmuhslah ahkluo ma nga luhngse fahk kac uh.

Ke Jun 1831, ke pahng uh tuhtahflah nuh sin mwet kol met ke Alu uh, fwackyuck nuh sel Joseph lah Setuhn el apkuhran nuh fin acn uh, ac el forfor ahkfohsye muhtuhn facl uh. In lain ohiyac lusrohngtwen se inge, Leum el fahk lah El ac use nuh sesr atac ke ma nuh kwewa, lah kuht ac tiac kiacpweyucklac (liye D&C 52:14).

Atac uh pa mwe srihkasrak uh, kolyuck, ohiyac kalweniyuck uh, kuh inkacnek mwet se ukwe in muhta fal nuh ke srihpen luhn God. Fin ukweyuck, kuht ac kalweni in puhsisacl, acsmak, ac kuh in etuh puhsren Nguhn Muhtahl likina puhsren ma lusrong kuht ac kol kuhtlac liki uh. Na Leum el luti kuh lah mwet suc elyahlac nuh ke kuh Lal enenuh in ahkfokokoyeyuck, ac kuh in orek fahko luhn kaksak ac lahlmwetmwet, oa fwackyuck ac ma pwacye ma El use nuh sesr (liye D&C 52:17).

Mwe insewowo luhn pruhe puhsisacl, sang ke inse pwacye, lwelah Nguhn Muhtahl in mokle insiyacsr ac kahsrwe kuht in esam ma kuht etuh met liki kuh isuslac nuh facluh se inge. Ke kuht kahlwem yohkna ke plwacn luhn Pahpah tuhmasr Inkuhsrao nuh sesr uh, kuht muhtwacwacack in akihlen kunohkohn lasr in kahsruh mwet sahyac lutlut ac kahlwem ke plwacn Lal. Apkuhran in fototo in kahsruh mwet sahyac esam pa ohiyac se kuht sifacna moulkihn wosasuc ac orekmakihn nuh ke moul lasr uh. Ke kuht moulkihn wosasuc ke atac se lutiyuck sin Leum Jisus Kraist uh, kuh lasr in kahsruh mwet sahyac in kapkapwack. Ohiyac puhlakihnyuck se ten an pa mwe srihkasrak se ke ohiyac ip yohk se inge kuh in oruh.

Misineri fuhsr luo tongtong ke sruhngucl se, finsrak in konwacack sie mwet ah in eis pweng lalos. Sruhnguhl sac ikacklah, ac mukul na luhlahp se pain elos ke puhsra sekuhlwacng: “Nga pahngon nga fahk nuh sumtacl in tiac sulpac tongtong ke sruhnguhl luhk uh. Nga fahk nuh sumtacl met lah komtacl fin fohlohk, e tiac oruh ohiyac wowo se. Ingena som liki yuc.” El sa na kaliyac sruhnguhl sac.

Ke elder ah fohlohk ah, misineri mahtuh, etuh kuhtuh sac fihliyac pahol nuh fin pihsacn misineri fuhsr sac in ahkwoyacl ac ahkkweyacl. Elos tiac etuh lah, mukul sac liyacltahl ke winto lal ah in liye lah elos kahlwem ke fahk lal ah. El tuhpan elan liyaclos in isracsr ac ahksruhksruhkye ma el oruh ke muhtwacta lalos ah. Tuhsruhktuh, ke el liye atacn kuhlwacng inmahsrlon misineri luo ah, insiyacl sa na fihsracsrlah. Na el ikacslah sruhnguhl sac ac siyuck sin misineri ac in fohlohk ac akacsruhi ke pweng lalos nuh sel.

Pa ke kuht ukwe luhngse luhn God ac moulkihn atac Lal ma Nguhn Lal kuh in puhlweyuck. Mwet Lahngo el luti, “Kowos fin luhngse sie sin sie, na mwet nuh kwewa ac fah etuh lah kowos mwet tuhmuhk lutlut.” (John 13:35). Ip yohk in oasr luhngse sie sin sie ac ahkyohkye kuh lasr in porongo nuh sin Kraist ke ohiyac kuht nuhnkuh, sramsram, ac mukwikwi pa yohk srihpac in oruh mwet tuhma lutlut luhn Kraist ac mwet luti ke wosasuc Lal.

Okasack kena se inge ahkoekuhtlac in suk ke atac uliyuck se. Suk ke atac uh kol kuht nuh ke mwe luti luhn Kraist oacna lutiyuck sin Mwet Lahngo ac mwet kol mwet pahluh Lal. Sie atac ke mwe luti se inge pa kutong ne ke sahflah. Nephi el suhmuhslah lah elos suc suk in kahsruh Sion ke lwen sac pa ahkinsewowoyeyucklac, tuh ac fah oasr mwe sang ac kuh luhn Nguhn Muhtahl; ac elos fin kutong ne ke sahflah elos fah sruhkyuckyak ke lwen sahflah, ac fah moliyucklac ke tohkohsrahi ma pahtpaht luhn Lamb (liye 1  Nephi 13:37).

Meac ohiyac ma wo emet ma kuht kuh in engankihn mwe sang ac kuh luhn Nguhn Muhtahl uh? Pa kuh se ma tuhkuh ke oaru in oruh mwet tuhma lutlut luhn Jisus Kraist. Pa luhngse lasr nuh Sel ac mwet wiyacsr. Mwet Lahngo pa fahk kalmeyacn atacn luhngse ke El luti kuht, “Inge nga usot nuh suwos sie masap sasuc, Kowos in luhngse sie sin sie; Oacna ke nga luhngse kowos, kowos in oacyacpac luhngse sie sin sie” (John 13:34).

Prestuhn Gordon B. Hinckley el ahkkweyacllah ip yohk se inge ke el fahk: “In luhngse Leum tiac kahs in kahsruh se muhkwena; tiac mwe finsrakihnyuck se muhkwena. Tiac masap se. …Luhngse luhn God pa okah ke ma nwacsnwacs nuh kwewa, ke ma wo nuh kwewa, ke kuh nuh kwewa luhn ohiyacn mwet se, ke ma yohk srihpac nuh kwewa in oruh ma pwacye” (“Kahs luhn Mwet Pahluh Moul,” Liahona, Tisacmpuh 1996, 8; “Pohloh fahk ke Sramsram Sasuc lal Prestuhn Gordon B. Hinckley,” Ensign, Eprel 1996, 73).

Plwacn Lal Pahpah orwaclah atac se luhn sucu in kahsrwe kuht lutlutkihn, orekmakihn, ac kahlwem ke kuh luhn luhngse. Ke lwen se sucu luhk uh akwucki ac, nga ac Ann muhtwacn wolacna kiyuck som nuh ke tempuhl ac ilyak nuh ke olwelah luhn macruht. Luhpan luhngse luhk nuh sel ke lwen sac, tuhsruhktuh nga tuhfahna muhtwacack in liye aruhrruhma luhn luhngse. Ke kais sie tuhlihk nahtuhsr ac tuhlihk nuhtin nahtuhsr ilyak nuh ke moul lasr uh, luhngse lasr uh yohkwelihk in luhngse kais sie selos oacna sie. Wacngihn sahflahiyac nuh ke luhpan kapwack ke luhngse.

Puhla luhn luhngse sin Pahpah tuhmasr Inkuhsrao oacna kuh in ulul luhn gravity ke inkuhsrao. Ke kuht eslah lusrohngtwen ma ul kuht nuh ke facluh uh ac orekmakihn sukohsohk in sulwaclah lasr in Sokol uh, kuht ikacslah insiyacsr nuh ke kuh luhn celestial ma ul kuht nuh Sel. Nephi el ahkuhtweyac usrwac kac ke e fal in eslah ikoacl (liye 2  Nephi 4:21). Kuh luhn luhngse se inge oruh Alma lacn onkihn on luhn molwelah ke luhngse (liye Alma 5:26; liye pac fuhs 9). Luhngse inge moklwacl Mormon ke ohiyac ma el luti kuht kac in pruhe ke kuhiyacn insiyacsr nohfohn tuh kuht in sesseslah ke luhngse Lal (liye Moroni 7:48).

Kwewana ma suhmuhslah in pacl inge ac ma suhmuhslah ke pacl met ah pa sesseslah ke mwe ahkacsmakihnye luhngse ma pahtpaht luhn Pahpah Lucng nuh sin tuhlihk Nahtuhl. Nga luhlahlfongi lah poun Pahpah tuhmasr Inkuhsrao tahfwelah pacl nuh kwewa, ahkolah in sruohkwacni kais sie sesr ac fahk nuh sin kais sie sesr ke puhsra mihslac, ac fokoko sacn, “Nga luhngse kom.”

Ke srihpen inkuhsrao se orwaclah atac luhn sucu uh, kuht kahlwemwack yohk ke ohiyac Pahpah tuhmasr Inkuhsrao el luhngse na pwacye kuht kais sie oacna sie ac yohkna. Nga fahkwack lah ma na pwacye se. God el etwekuht ac luhngse kuht. El use nuh sesr aruhrruhma ke acn muhtahl Lal ac pahngohn mwet pahluh ac mwet sap in luti ip yohk ac atac se ma fah fohlohkihn kuhtlac nuh Yohrohl. Ke kuht srihke in okasack kena in etuh kais sie sesr sifacna ac ke mwet sahyac ke kuht moulkihn atac ma kuht konwacack, kuht ac fototoi nuh Sel. Nga fahkwack lah Jisus pa Wen nuhtin God, Mwet Srihkasrak se lasr, Mwet in Molwelah pahkotwen se lasr, suc nga fahk ke inen Jisus Kraist, amen.