E Ketin Poakohng Kitail Mehlel

I mwahuki mihmi rehn misineri kan me kin kalohk rahn koaros. Irail ahniki laud pwoson, koapwoaroapwoar, oh limpoak mehlel. Arail irair en misineri duwehte kisin mour unsek me wiawi nan sounpwong 18 lel 24. Irail kin lella wasahn misin duwehtehte kisin seri ni pali ngehn me ahniki ineng laud en kasukuhl oh kin mwesel ni arail wiahla aramas laud, onop ong powehdi kasongosong sohte lipilipil oh mehkoaros me pwilidi mwohrail. I pil poakohng misineri mah loaloapoat kan, me ahniki kanengamah, eripit, oh meleilei koapwoaroapwoar laud. Irail wahdo kisakis en kakehlail oh limpoak ong misineri pwulopwul kan me kapil irail. Patpene misineri pwulopwul kan oh misineri mah kan wia kehlail pweida ehu, me lipwan ong arail mour oh ong irail akan me re kin sair nan arail doadoahk en papah.

Me keren I rong misineri kaselel pwulopwul riemen ni ara koaskoasoaia duwen irair kan me re ahniki oh soahng kan me re nannantihieng. Nan ansouon ketemen wo ira medewe aramas akan me ira tuhwong rahno, ekei kin sapeng mwahusang mehteikan. Ni ara medewe irair pwuko, ira idek. “Ia duwen ata kak sewese emenemen aramas kakairada ineng en ahpwete esehla duwen Sahm Nanleng? Ia duwen ata kak sewese irail pehm Sapwellime Ngehn? Ia duwen ata kak sewese irail en ese me kita poakohng irail?”

Nan ahi madamadau I lemehda me I kilang mwahnakapw riemenet sounpar siluh de pahieu mwurin ara kanekehlar ara misin. I medewe ara pwoudkihdahr ara werek poatoapoat kan oh wie papah nan pwihn en elder de padahkih ehu pwihn en mwahnakapw akan. Ahpw met, ira sohte medewe sounropirop kan, re uhd kihda peidek kan ahpw doke pwihn en elder kan de pwihn en mwahnakapw akan me re pwukoahki en apwalih. I kilang duwen ara irair en misineri eh kak wia mehn karasaras ong kakairada mehteikan erein ara mour. Ni pwihn lap wet en tohnpadahk mour pwung kan ahr kin pwurodo sang arail misin kan ong wehi tohto pohn sampah, irail tepier iang kihda sawas ong doadoahk en kauwada Mwomwohdiso.

Soukohp Lehi en Pwuken Mormon mwein pil medewe peidek kan te me misineri kan ahniki ni eh rong pasapeng en nah pwutak kan me pid kaweid oh kasansal me e alehdi. Nephi ntingihdi me Laman oh Lemuel, ni ara wia me keieu laud, kin lipahnede ara pahpao. Oh ira kin lipahned pwehki ira sehse duwen mwekid kan en Koht mekapikirailda (tehk1 Nephi 2:12).

Mwein emenemen kitail kehnehr pwunod me Lehi ahniki pwehki nah pwutak laud riemeno. Ni atail sohpai seri me tepier dohla, sounropirop me saikinte pilada, de emen me saik pilada en elder, mohngiongitail kan kin dirada duwe Lehi oh kitail kin idek, ia duwen ei kak sewese irail pehm oh rong Ngehno pwe irail en dehr kediropwkihla kapingiping en sampah? Iren pwuhk sarawi riau sansal nan moangeie me kak seweseikitail diar ahlo nanpwungen kapingiping kan oh kehn manaman en Sapwellimen Koht limpoak.

Nephi kihda kih ong wenihmw en kasukuhl sang irair me e pein lelohng: “Oh ngehi, Nephi, sang ni ei… ahneki anahn akan en esehla duwen me rir [kan]en Koht…, eri, I ahpw likiweriohng Kauno; oh e ketin pwarehng ie oh ketin kamaterekala nan ei mohngiong pwe I kin kamehlele padahk koaros me ei pahpa[o] kasaledahr; eri, I ahpw sohte kin duwehte riei kan me kin uhwohng ei pahpao” (1 Nephi 2:16).

Kamwakidada ineng en esehla duwen mehkot kin kihieng kitail koahiek en pali ngehn en rong ngilen nanleng. Diarada wiepen kapirada oh apwaliada ineng wo iei doadoahk oh pwukoa en emenemen kitail—misineri kan, pahpa nohno kan, sounpadahk kan, kaun kan, oh towe kan. Ni atail pehm inengo mwekidida nan mohngiongitail, kitail kin kaunopohng en paieki kasukuhlsang keriaun iren pwuhk sarawi me I men koasoaia.

Nan Suhn en 1831, ni ansou me pwukoa malipilip kohieng tepin kaun kan en Mwomwohdiso, Joseph Smith alehdi kaweid me Sehdan mihmiseli pohn sampah, oh e kin kohseli pitipitih wehi kan. Pwehn pelian irair kapingiping wet, Kauno ketin mahsanih me E pahn ketkihiong kitail mwohmw nan mehkoaros, pwe emen de pitihkitaildi (tehk D&C 52:14).

Mwohmw kan iei mehn karasaras, mehn kaweid, ire kan me kopwurpwurieng, de ahl akan me emen pahn idawehn pwehn inenohng koasoandi en Koht. Ma kitail pahn idawehn, re pahn elehieng atail pahn karakarahk, tehk wasa, oh en kak kasawiada ngihl en Ngehn Sarawi sang ngihl kan me kin kapingihkitailda oh kahreikitailsang. Kauno eri kin kaweidkinkitail me aramas akan me kin rerrer pahn Ah manaman pahn kakehlailda, oh wahn arail doadoahk pahn iei kaping oh eripit, sang ni kaudiahl kan oh mehlel kan me E ketkihiongkitailehr (tehkD&C 52:17).

Kapai kan en kapakap karakarahk, kohda ni mehlel, kin mweidehng Ngehn Sarawi en sair mohngiongitail oh seweseikitail taman dahme kitail ese mwohn atail ipwidihieng nan irair en mour wet. Ni atail wehwehkihla koasoandi en Samatail Nanleng ong kitail, kitail tepida pohnese atail pwukoa en sewese mehteikan esehla oh wehwehki Sapwellime koasoandi. Me karanih sewsewese mehteikan taman iei duwen atail kin pein mouriki rongamwahuo oh doadoahngki nan atail mour. Ni atail kin mehlel en kapwaiada rongamwahuo ni mwohmw me Kauno Sises Krais padahkihieng kitail, atail kak en sewese mehteikan kin kalaudla. Irair me pahn uhd sansal iei karasaras en duwen tepin padahk wet eh kak doadoahk.

Misineri pwulopwul riemen letelet ni wenihmw ieu, kaskasik me re pahn diar aramas en alehda ara kalohko. Wenihmwo ritida, oh lapalahn ohl emen kasamwoh ira ni ngihl me sohte nohn kadek. “I leme me I ndahieng kumwa en dehr pwurehng letelet ni ahi wenihmwe. I kehkehlingkihieng kumwa me ma kumwa pahn pwurodo, e sohte pahn mwahu. Na kohkohla.” E pitipit te ritingidi wenihmwo.

Ni elder ko ara alialuhla, me mah, koahiek rehrao kihieng peho pohn pwopwen misineri me pwulopwulo pwehn kansenamwahuih oh kangoange. Ira sehse me, ohlo kilikilang ira sang nan wenihmwtoko pwehn kilang ma ira wehwehki ah lokaiao. He kasik me ira pahn kouruhr oh mwamwahliki ah pasapeng lemeio ni ara song en pwarek. Ahpw, ni eh kilang mwekid en kadek nanpwungen misineri riemeno, mohngiongio ansouohte mwuterekila. E ritingada wenihmwo oh peki misineri ko en pwurodo oh ehukihieng ih ara kalohko.

Iei ni ansou me kitail kin kapwaiada Kupwure oh momouriki Sapwellimen Koht mwohmw kan me kitail pahn kehn Sapwellime Ngehn. Sounkomouro padahngki, “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene” (Sohn 13:35). Tepin padahk en ahniki limpoak ong emenemen oh kakairada atail koahiek en poahsoankihda Krais ni atail madamadau, lokaia, oh mwekid inenen kesempwal ong wiahla tohnpadahk en Krais oh tohnpadahk en Sapwellime rongamwahuo.

Kapirada ineng wet kaunop kitail en rapahki mwohmw kan me inoupe mie. Raparapahki mwohmw kan kin kaweid kitail ong padahk en Krais ni duwen me padahk sang Sounkomouro oh Sapwellime kaun soukohp akan. Ehu mwohmw en padahk iei en dadaurete lel imwi. Nephi ntingihdi me irail akan me rapahki en pwokpwokda ni rahno kin kapaida, pwe re pahn ahniki kisakis en Ngehn Sarawi; oh ma irail dadaurete lel imwi irail pahn pwokpwokda ni keimseklahn rahn, oh pahn komourla nan wei poatoapoat en Sihmpwulo (tehk 1 Nephi 13:37).

Ia wiepe keieu mwahu me kitail en kak paieki kisakis oh manaman en Ngehn Sarawi? Iei manaman ehu me kin kohdo sang ni wia tohnpadahk loaloapoat en Sises Krais. Iei atail limpoak ong Ih oh iengetail aramas akan. Iei Sounkomouro me koasoanehdi mwohmw en limpoak ni Eh padahkihieng kitail, “I pahn kihong kumwail kosonned kapw ehu: kumwail en poakpene nanpwungamwail. Duwen ei poakohng kumwail, iei duwen kumwail en poakpene” (Sohn 13:34).

President Gordon B. Hinckley kamehlel tepin padahk wet ni eh mahsanih: “En poakohng Kauno iei kaidehnte kaweid; iei kaidehnte en lamalam mwahu. E wia kosonned ehu. … Poakohng Koht iei poahsoan en mour mwahu koaros, en me mwahu koaros, en mwohmw mwahu koaros, en loaloapwoat koaros en wia me pwung” (“Words of the Living Prophet,” Liahona, Tihsempe 1996, 8; “Excerpts from Recent Addresses of President Gordon B. Hinckley,” Ensign, Epreil 1996, 73).

Sapwellimen Sahmo pilahno koasoanehdi mwohmw en peneinei pwehn seweseikitail esehla, doadoahngki, oh wehwehki manaman en limpoak. Ni rahn me pein ahi peneinei koasoandi, ei limpoak Ann oh ngehi kohla ni tehnpas sarawi oh pidolongohng nan inou en kapwopwoud. Ia uwen ahi medewe me I poakohng ih rahno, ahpw ansou I apwtehn pahn tepida kilang kasansal en limpoak. Ni emenemen nait serihkan oh neirail serihkan ahr pidolongohng nan aht mour, aht limpoak kalaudla en poakohng emenemen irail ni pahrek oh unsek. E mwomwen me sohte imwin kak en ahniki limpoak eh kak kalaudla.

Pepehm en limpoak sang Samatail Nanleng duwehte kehlail me kolokol sampah nan wehwe. Ni atail kin kihsang kediropw kan me kin apihkitaildohng sampah oh doadoahngki atail saledek en pilipil en rapahki Ih, kitail kin ritingada mohngiongitail kan ong kehlail me kin apihkitaillahng Ih. Nephi kawehwehda lipweo nin duwe met “e kadirelahr paliwere” mwomwen me e kauwelahr uduke (2 Nephi 4:21). Manamanohte en limpoak kahrehieng Alma en koulki koul en “limpoak en k[o]mour” (Alma 5:26; pil tehk ire tikitik 9). Uwen eh sair Mormon e kaweidkinkitail en “kapakap … ni kehl [koaros] en a[t]ail mohngiong” pwe kitail en direkihla Sapwellime limpoak (Moroni 7:48).

Iren pwuhk sarawi en kawao oh met iei mehn ketemen unsek en Sapwellimen Sahm Nanleng limpoak poatoapoat ong Sapwellime serihkan. I koapwoaroapwoarki me limen Sahm Nanleng kin kapahdohng kitail, ansou koaros onop en pwoale emenemen kitail oh ndahieng emenemen kitail ni ngihl meleilei kapehm wo, “I poakohng uhk.”

Pwehki mwohmw me koasoandi nanleng me pid peneinei, kitail ahpwete wehwehki duwen Samatail Nanleng Eh ketin poakohng mehlel emenemen kitail ni pahrek oh unsek. I kadehdeh me met mehlel. Koht ketin mwahngih oh poakohng kitail. E ketin kihieng kitail kasansal en Sapwellime wasa sarawi oh malipe soukohp akan oh wahnpoaron akan en padahk tepin padahk kan oh mwohmw kan me pahn kapwureikitaillahng Ih. Ni atail nantihieng en kamwakidada inengo en ese nan pein loalatail oh rehn mehteikan oh ni atail momouriki mwohmw kan me kitail diarada, kitail pahn men kerenlahng Ih. I kadehdeh me Sises iei Ieros en Koht, atail Karasaras, atail Soundoar kempoake, me I kihda ni mwaren Sises Krais, ahmen.