Riyul’ ni Gadad ba Tu’uf Rok

Rok Elder Paul E. Koelliker

Ko fare Medlip i Ragag


Bachan e tharmiy nike ngongliy e tabinaew, ma kad nangedfan nib fal’ rogon ni gadad ba tu’uf rok e Chitamangdad nu Tharmiy ni ta’aborogon rogon.

Rug ba’adag nugbay ko fapi tamachib. Yad ba sug ko mich, athpeg, nge gol. N’en nima buch u lane mission rorad ea woed e yafos ni gubin nike buch u lane e pi 18 fa 24 ere pul nem. Yad ma yan ko mission niwoed ea bitir nib thothup ni ri ba’ adag ni nge fil boech ban’en mar chuw gaed niwoed boech e labthir nib lichow, boed nib fal’ rograd ni ngar thapgad ko gubin e magawon nira yib ngorad. Ma kab t’uf fapi tamachib rog nib labthir, niyad basug ko gumaen’, gonop, nge gapas. Yad mafek iyib boech ea tawa’ath niyib dugil nge tu’ufeg ko boech e pi tamachib u charrad. Ma fa’an yadbay u ta’abang ma fapi tamachib ni fal’ yangren nge fapi senior couples e yaed ba gel, niybe chariy gelnginrad nifan e tin nib mangil, nira ayweg ea yafos rorad ea pi’in ra ayweg u napan nikar pigpig gad ngorad.

Dawri n’uw napan nikug motoyil ngak l’agruwi tamachib ney nib fal’ yangren niyow be yog ea tin nike buch rorow nge murwel rorow.Me ngiyal’’ nam niyow be weliy miyow be lamnag miyow lamnage pi’in nikar noen’ed e rofan nam, boech nib fal’ u laniyaen’ rad ngak boech. Napan ni kar guyew fapi magawon, miyow ga’ar, “Uw rogon ni ngug nangin new boech e gidii’ ni ngar adaged ni ngan nang boech mornga’agen e Chitamangdad nu Tharmiy? Uw rogon ni ngug aywegrad ni ngar thamiyed fare Kan Thothup Rok? Uw rogon ni gamow ra nangin rad ni ngar nanged niyad ba t’uf romow?”

Mugwan gu lamnag ya’row dalip fa anggeg e duw nga tomren nikar mu’gow ko mission rorow. Mug lemnag ya’row nikar mabgol gow niyow be pigpig niyow reb e elder ko ulung fayow be sensey nag reb e ulung ko pagal nib fal yangren. Chiney e, dagur lemnag e pi investigator rorow, ngiyal’’ ney ni gube leamnag e yow be fith e pi duwer nifan ko chonggin e quorum fa fapi pagal nib fal’ yangren nikan piningrow ni ngar aywegew. Kug guy rogon ni n’en nike buch ko mission rorow ea yowra fana ni nge aywegrow ni ngar chathawliyew boech e gidii’ u fithik e yafos rorow. Napan ni ra sul e pi salthaw nib mangil ko mission roraed ko bukun e nam u fayleng, yaed be mang e picha’an ni ma pi’ e ayuw ko murwel ni ngan toey fare Galsia.

Fare profet Lehi u lan fare Babyor ku Mormon e sana yan i leamnag ea pi duwer ney niwoed e gali tamachib ney u napan ni motoyil ko fulweg thin ko fagli pagal nifak ko fare wo’ nge sap nikan pi’ ngak: “Ma yug aray rogon ni Laman nge Lemuel, e yow ba ilal, ma kar nonnon gow nib togopluw ngak’ e chitamangrow. Ra nonnon gow ni bachan e darur nangew fan e muruwel rok’ Got ni ire sunmiyrow” (1 Nephi 2:12).

Sana gadad ma magafaen’ niwoed Lehi ni bachan fagli pagal nib ilal nifak. Napan ni gadad ra guy reb e bitir nibe mo’owaer, bee’ ni dabun e gospel, fa elder ni dani fal’ rogon e murwel rok, ma gadad ma kirbaen ngoraed rogon ni rrin’ Lehi ma gadad fith, urogon ni rayog ni ngug ayuweg raed ni ngar thamiyed mar motoyil gaed ko fare Kan Thothup ya ngeyog ni dabir uned ko tin tagan ban’en u fayleng? L’agruw e chep nib thothup e ma paer ko tafney rog ni rayog ni nge ayuweg dad ni ngad pir’egned e kanawo’ rodad ko pi lumel ney man thamiy gelngin e tu’ufeg ku Got.

Nephi e ke pi e kiy nifan fare mab ni ngan fil ban’en ko tin nike buch rok: “Ni gag, Nephi, … ma kug ba’adag ning gu nang urngin e pi riyul’ rok Got nib miith, ere, mug yoer ngak’ Somoel; me pii’ ngog, me munguy nag gum’ircha’eg ma aram me mich u wun’ug urngin e thin ni ke weliy e chitamag; ere dag togopluw ngak’ ni boed rogon walageg” (1 Nephi 2:16).

Ya fa’an ran pug fapi ar’ar’ ni ngan nang boech ban’en maran pi gelngindad ni thothup ni ngan rung’ag lungun yu tharmiy. Pir’eg e kanawo’ ni ra m’ug me ga’ nag e binem e milekag ni yibe adag e murwel rodaed—pi tamachib, gallabthir, pi sensey, pi tiyugang’, nge chonggin e Galasia ni ngan gay kanawo’en ni ngan pug man chathawliy e ra ar’ar’ nam. Ma napan ni gadad ra thamiy e ra ar’ar’ nam nibe sum u lan gumircha’en dad, ma fal’ rogdad ni nge falwa’athan dad i fil e bin megid e chep nib thothup ni gu ba adag ni nggog.

U lane pul ni June ko duw ni 1831, napan ni yibe pining boech ea gidii’ ni nge mang e piin tiyugang’ ko Galasia, kanoeg ngak Joseph Smith ni Satan ea bay u daken e faileng, nibe yan nibe baen nag fapi gidii’en e nam. Fa’anra ngad gel gaed ko biney, ma ke yoeg Somoel ni ra pi’ ngodad reb e wo’ u fithik gubin ban’en, ni gadad ea dabiyog ni ngan baen nagdad” (muguy ko D&C 52:14).

Patterns e boech ban’en niyma fanay nib pow ko rogon ni ngan rrin ban’en, ma wawliy, me boech ea thal ni ngan sul u daken, fa rebe wo’ nima laek bee ni nge paer nib puluw ko fan Got. Ma fa’an gadad re laek e pi kanawo’ ney, ma ra ta’ dad ni gadad ra paer ni gadad ba sobut’aen, ma gidad ba od ngan paer, mara yog rogdad ni ngan nang lungun fare Kan Thothup ko boech e laman nira athathkuydad mra fek dad nga palog. Me arame me machib nag Somoel ni gidii’ nima rus ko gelngin e ran gel nag raed, e ra pi’ e wa’amngin e liyoer nge gonop, ni rogon ko yi’iy nge tin riyul’ nike pi’ ngodad (muguy koD&C 52:17).

Fare tawa’ath ko meybil nib sobut’aen, niybe pi niyib yul’yul’, ea ma pag fare Kan Thothup ni nge piningaean gumirchaen’dad mara ayweg dad ni nge pugngan’dad ni gadad manang u m’on ni ngan gargelegdad. Napan ni gadad ra nangfan nib tomilang fare tunom rok Chitmangdad nu Tharmiy ni fan ngodad, ma gadad ra tabab i guy ea murwel rodad ni ngad ayweged boech e gidii’ ni ngar filed miyad nang fan e tunom rok. Mab chugur ko ayuw ni ngan pugngan’rad ea rogon ni ngad pired ma gadad fana fapi gospel u lane yafos rodad. Napan ni gadad ra murwel ko fapi gospel u lane yafos rodad niwoed rogon nike fil Somoel ni Yesus Kristus, mara gel gelngindad ni ngad ayweged boech e gidii’. Bin migid e nan nike buch ea reb e pow ko rogon nima murwel e bineye llowaen’.

Bay l’agruwi tamachib nib fal’ yangren ni kar tugtuguyew reb e mab, niyow be athpeg niyow ra pat ngak bee nira motoyil ko mulwol rorow. Ma mab fare maeb, ma bee nib pum’on ni gathi rib achib e bing ma gathi rib gol’ laman: “Gathi kug yog nogmew ni dakuriy bied ni ngam tugtuguyew e mab rog. Kug tay chilen ngomew ni fa’an gimew ra sul, ma gathi ban’en nira mangil. Ere ngam digeyew gag.” Mab tumgin nike ning fare mab.

Napan ni chal fagali tamachib ni nga ranow, ma cha rorow nib ilal, nike n’uw napan ko mission e tay pa nga daken pon’ facha nib bitir ngak ni nge falag laniyaen’ me pi boech e athamgil ngak. Ma dar nangew, ni fare pum’on ea be sap ngorow u lane winda ya nge guy ko kar nangew fan e thin rok fa dangay. Make leamnag nira guy row niyow be minmin mar dariyfan nigew ea thin rok u mornga’agen e tugtuguy e mab rok. Machane, napan ni guy rogon niyow ba gol ngorow, ma arame munguy gumirchaen. Me bing biyay fare mab rok me wening ngak fagli tamachib ni ngar bow ngar yogew boech e mulwol rorow ngak.

Arragon ni ngiyal’ ni gadad ra rrin’ rogon ni ba’adag Got man paer nu rogon e wo’ Rok e gadad ra thamiy ea Kan Thothup Rok. Fare Tathapeg ea fil ni, “Fa’anra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg” (John 13:35). Bineye e machib e ni nga un t’ufeged bigidad magdad falaged rogdad ni ngan pired nib liyegdad Kristus u fithik rogon e leam, numon, nge ngongol rodad e rib ga’fan fa’anra ngad manged boech gachalpen Kristus nge boech e sensey ko gospel Rok.

Fa’an gadad ra pug e biney e ar’ar’ mare fal’eg dad ni ngad sap niged fapi pattern nikan michmicheg. Ran gay fapi patterns mara wawliy dad ko fare machib ku Kristus ni fil fare Tathapeg nge pi profet ni tiyugang’ Rok. Reb fare pattern e bineye machib ni ngan athamgil ngayan i taw ko tomur: “Ma nge fel’ wa’athan e pi’in ni yaed be gay rogon ni ngar gaa’ niged e Zion rog ko re rran nem, ya rayog ngoraed fare tawa’ath nge fare gelingin e Kan ni Thothup; ma fa’anyaedra tay riy ni aram rogon nge yaen i mada’ ko tomur ma yira chibiyraed ngalang ko fare bin tomur e rran, ma yaedra thap nga gil’ilungun fare Saaf ni gubinfen” (1 Nephi 13:37).

Uw rogon kanawo’en ma rayog ni ngad falfalan’ gad ko fare tawa’ath nge gelngin fare Kan ni Thothup? I ir fare gelngin nira yib ko ngiyal’’ nigadad boech gachalpen Yesus Kristus nib yul’yul’. Ma bachane t’ufeg rodad ngak nge boech e gidii’’. U daken e t’ufeg Rok, e keyib fare tawa’ath ko Foskoyam’ ngodad. Ir fare Tathapeg ea keyog fare kanawo ko t’ufeg ko ngiyal’ ni fil ngodad ni, “Nggu pi’ reb e motochiyel nib be’ech ngomed, nge bigimed me t’uf bigimed rok; niwoed ni gimed ba t’uf rog, ere nga um t’ufeged bigimed” (John 13:34).

Ke yoeg President Gordon B. Hinckley e biney e kenggin e yilen napan ni ga’ar: “Nge tu’uf Somoel rodad e gathi kemus niba machib; gathi kemus ni ba mangil. Ba motochiyel. … Adag rok Got e lek’ngin gubin e tin falel’, ko gubin e tin mangil, ko gubin gelngin rogoy, ko gubin ban’en ni ngan rrin’ nib mangil” (“Words of the Living Prophet,” Liahona, Dec. 1996, 8; “Excerpts from Recent Addresses of President Gordon B. Hinckley,” Ensign, Apr. 1996, 73).

Tunom Rok e Chitamangiy ea ke duwgliy fare kanawo’ nifan fare ulung ko tabinaw ni nge aywegdad ni ngad filed ban’en, mi gadad muruwliy, magdad nangfan gelngin fare t’ufeg. Rofan nikan yarmiy e birog e tabinaw, me Ann rog ni rib mangil e guwarow nga temple ngug falagew e m’ag ko mabgol. Rug lamnag nirib t’uf rog e rofan nam, machane kemus nikug tabab i guy fare ya’an e tu’ufeg. Napan niyib pafakmow nge pafak pafakmow nga lane yafos romow, ma tu’ufeg romow e be gaa ni ngayog ni ngug tu’ufegew rad nib taborgon. Wad ni dariy ea mathmit ko gelngin ni ngan tu’ufeg.

Fare thamtham ko tu’ufeg ko Chitmangdad u Tharmiy ea wad ban’en niybe tel u tharmiy. U napan ni gadad ra chuweg fapi nen nima athathkuydad nima teldad ko faileng migidad fanay fare puf rogon rodad ni ngad laked, ma gidad be bing gumirchaen’dad ko fare gelingin e celestial nira fek dad Ngak. Nephi e yog rogon fana ba gel’ “nibe yaen ni nge mu’uruf dugreg riy” (2 Nephi 4:21). Biney gelngin e tu’ufeg ni ta’aborogon e ke n’angin Alma ni nge yon e “tang ko falfalaen nikan bayuliyraed” (Alma 5:26; kumguy ko verse 9). Me thamiy Mormon me amrogon me machib nag ngodad ni “mmeybil … u polo’ Ii gelingin gum’ircha’[med],” ni nge yog ni ngam sug gaed ko re adag ney (Moroni 7:48).

Arragon ko chep ko chiney nge kakarom nib sug ko pug ran ku tu’ufeg rok Chitmangdad nu Tharmiy ngak pifak. Fal u wun’ug nib paer e Chitmangdad nu Tharmiy nib fal’ pa’, ni fal’eg rogon ni nge bichiy pa ngodad gubin me yog ngodad ni gidad gubin ko ba lamaen nib sumunguy mab achig , “Gab tu’uf rog.”

Ma bachan e kanawo’ nikan sunmiy u tharmiy nifan e tabinaew, ere kayog ni ngad nanged fan boech rogon ni gidad ba t’uf rok e Chitmangdad nu Tharmiy nib taborgon nib polo’. Gube micheg nib riyul’. Manang dad Got ma gidad ba tu’uf rok. Ke pi ba sap ngodad ko ginem nib thothup Rok make pining boech e profet nge apostal ni ngar filed boech fapi kenggin e yilen nge pi pattern nira sulwegdad Ngak. Ma bin thi’ibi ga’ fan e, fare tunom Rok eke pi ngodad nib puf rogon ni ngad me’eleged fa’anra ngad laked ea kanawo’ rok ko ngiyal’’ ni ngad rrined rogon ni ba’adag. Gube micheg ni Yesus ea ri ir Fak Got, ni ir e pow rodad, Tabiyul nib t’uf rodad, ni gube yog nga daken fithingan Yesus Kristus, amen.