Olsem Wanem blong Kasem Revelesen mo Insperesen long Laef blong Yu.

Eniwan we i stanap long pulpit ia blong givim wan mesej i save filim paoa mo sapot blong ol memba raon long wol. Mi talem tangkyu se sem kaen sapot ia, i save kam tu long wan kompanion we yumi lavem, we i stap long narasaed blong vel. Tangkyu Janin.

Tabu Spirit i givimaot ol impoten infomesen we yumi nidim blong lidim yumi long laef long wol ia. Taem infomesen ia i stret, i klia mo i impoten, hem i stap tekem taetol blong revelesen. Taem hem i gat ol defdefren filing, oltaem yumi mas gaedem yumi, step afta step, blong kasem wan gol we i klin inaf, from we stamba tingting blong mesej ia, hem i insperesen.

Wan eksampol blong revelesen hem i daereksen ia we Presiden Spensa W. Kimbol i bin kasem afta long longfala prea we hem i bin gohed blong mekem i go long Lod blong givim prishud i go long evri man insaed long Jos we oli klin inaf, long wan taem we sam man nomo oli save kasem.

Wan narafala eksampol blong revelesen i wan gaed we i kam long Presiden Josef F. Smit: “Mi biliv se yumi muv mo stap wetem ol mesenja blong heven mo ol man blong heven. Yumi no seperet long olgeta. … yumi stap kolosap mo joen wetem ol famle mo ol bubu blong yumi, … we oli bin lego yumi blong go long spirit wol. Yumi no save fogetem olgeta; yumi no stop blong lavem olgeta; yumi oltaem holem ol filing we yumi gat abaot olgeta insaed long hat blong yumi mo holemtaet ol memori blong olgeta, mo tu, mo olsem ia nao yumi joen mo stap wan wetem olgeta tru long ol rop we oli no save brok. … Sapos hemia i tru long situesen blong yumi long laef blong wol ia nomata yumi no strong long sam samting, … hamas moa bae yumi sua mo … bilivim se olgeta we oli bin stap fetful mo oli bin ded finis … oli save luk gud yumi bitim hamas yumi save luk olgeta; se oli save yumi bitim we yumi save olgeta. … Yumi stap wetem olgeta, oli luk yumi, oli kea long gud laef blong yumi, oli lavem yumi naoia moa bitim bifo. From se naoia, oli stap luk ol denja we i stap traem yumi; … mekem se wari mo lav blong olgeta long yumi mo fasin blong wantem yumi gat gudfala laef i bigwan bitim wanem yumi filim blong yumiwan.¹

Ol rilesensip bae oli save kam strong tru long vel wetem ol pipol we oli ded finis we yumi save mo lavem olgeta. Hemia bae i hapen taem yumi wokhad blong gohed blong stap mekem wanem we hem i stret. Yumi save mekem rilesensip wetem hem we i ded finis mo yumi lavem hem i kam strong taem yumi luksave se seperesen ia i blong smol taem nomo mo ol kavenan we yumi mekem long tempol bae oli blong taem we i no save finis. Taem yumi stap obei oltaem, ol kavenan ia oli mekemsua se ol promes we oli no save finis we oli kam wetem, oli hapen tru.

Wan klia taem we mi bin kasem revelesen long laef blong mi i hapen taem mi kasem wan strong filing we i kam tru long Spirit blong askem woman ia, Janin Watkins blong sil wetem mi insaed long tempol.

Wan long ol bigfala lesen we evriwan i nid blong lanem, i blong askem: From wanem Lod i askem yumi blong prea long Hem mo askem samting? From long wei ia nao yumi stap kasem revelesen.

Taem mi fesem wan samting we i had tumas, olsem ia nao hao mi traem blong andastanem wanem blong mekem. Mi livim kakae. Mi prea blong faenem mo andastanem ol skripja we bae i save help. I olsem wan sekol nomo. Mi stat blong ridim wan ves blong skripja; mi tingting hevi long wanem ves ia i minim mo prea from insperesen. Afta, mi tingting hevi mo prea blong save sapos mi kasem evri samting we Lod i wantem mi blong mekem. Oltaem bae moa tingting i kam wetem moa save blong andastanem doktrin. Mi bin faenem se paten ia i wan gud wei blong lanem samting tru long ol skripja.

I gat sam gud prinsipol we yu save yusum blong kasem moa revelesen. Faswan, eni samting we i pulum tingting blong kros o filim nogud o mekem yu tok strong bae i ronemaot Tabu Spirit. Ol filing ia, yumi mas ronemaot, sapos no bae janis blong kasem revelesen bae i smol tumas.

Wan nara prinsipol i blong lukaot gud long fasin blong mekem fani. Laf we i laod tumas bae i ronemaot Spirit. Wan gud fasin blong mekem fani i save help blong kasem revelesen; bigfala laod laf i no mekem hemia. Blong save mekem fani i wan paep we yu save ronemaot ol had samting blong laef long hem.

Wan narafala enemi blong kasem revelesen i kam taem yumi talemaot samting long fasin we i go tumas o long wan laod voes. Toktok long wan fasin we i kwaet o i stret, bae i mekem se paoa blong revelesen i save kam.

Long nara han, komunikesen long saed blong spirit i save kam antap tru long gud helt eksasaes. Mekem eksasaes, gat inaf slip mo ol gud fasin blong kaekae bae i mekem se paoa blong kasem mo andastanem revelesen i kam antap. Bae yumi laef long wan longfala taem. Be, yumi save developem tugeta kwaliti ia, blong givim seves mo gud laef blong yumi, taem yumi lukaot gud blong mekem ol joes we i stret.

Hem i impoten blong ol aktiviti blong yumi evri dei oli no pulumaot tingting blong yumi blong stap lisin long Spirit.

Revelesen i save kam tru long wan drim, mo bae yu no save luksave jenis ia long taem yu stap slip mo taem yu wekap fulwan. Be sapos yu traehad blong kasem evri samting long drim ia kwiktaem, bae yu save tingbaot evri smol samting, be sapos no, bae i lus hariap. Insperesen we i kam tru long komunikesen long naet taem i save kam wetem tabu filing from ful eksperiens long wan drim. Lod i yusum ol man o woman we yumi gat bigfala respek blong tijim yumi ol trutok long wan drim from se yumi trastem olgeta mo bae yumi lisin long ol kaonsel blong olgeta. Hem i Lod we i stap tijim yumi tru long Tabu Spirit. Mo tu, long wan drim, Hem i save mekem i isi blong andastanem samting, mo tu, bae i save tajem hat blong yumi taem i kam klia se tijing ia kam long wan we yumi lavem mo respektem.

Taem hem i blong stamba tingting blong Lod, bae Hem i save mekem yumi tingbaot eni samting we i bin hapen long yumi. Hemia i no mas daonem strong tingting blong yumi blong rekodem ol tingting we oli kam tru long Spirit. Taem yumi stap lukaot gud blong raetemdaon ol insperesen ia i soem long God se ol komunikesen blong Hem wetem yumi oli tabu long yumi. Ol kaen rekod olsem we oli ol daereksen we i kam long Spirit, yumi mas sevem gud mo no soem long ol narawan.

Ol skripja oli givim konfemesen we i gat paoa long olsem wanem trutok, taem oli laef folem oltaem, i openem doa long insperesen blong save wanem blong mekem mo wea i gat nid, blong helpem wan i kam antap tru long tabu paoa ia. Ol skripja oli soem long yumi olsem wanem, paoa blong nara man blong winim ol hadtaem, fasin blong gat tu tingting mo ol bigfala jalenj, Lod i mekem i kam strong moa long ol taem blong nid. Taem yu stap tingting hevi long ol eksampol ia, bae i gat wan kwaet konfemesen tru long Tabu Spirit se ol eksperiens ia oli tru. Bae yu kam blong save se semmak help olsem i stap blong yu kasem.

Mi bin luk ol man mo woman we oli stap fesem jalenj, we oli save wanem blong mekem nomata sapos hem i bitim ol eksperiens we oli bin fesem, from se oli bin trastem Lod mo save se bae Hem i lidim olgeta i go long ol ansa we oli nidim kwiktaem.

Lod i bin talemaot se: “Bae yumi kasem tijing we i kam long heven. Yumi mas mekem yumi i kam tabu mo bambae yumi kasem paoa, blong yumi tij olsem we Hem i bin talem.² Toktok ia, yumi mekem yumi kam tabu, ating, yufala i no andastanem gud. Presiden Harol B. Li i bin eksplenem ol toktok ia wan taem wetem ol narafala toktok ia, “obei ol komanmen blong mi.” Taem yumi ridim long wei ia, kaonsel ia i klia moa.³

Wan man o woman i mas klin oltaem long tingting, bodi, mo ol plan we oli wantem i mas klin mekem se Lod i save givim insperesen long hem. Wan we i obei long ol komanmen blong Hem, bae Lod i trastem hem. Man o woman ia bae i kasem insperesen long wanem blong mekem, mo olsem we hem i nidim, bae i kasem paoa ia we i kam long heven blong save mekem.

Blong spirit i gro strong mo i stap, oli mas planem insaed long wan stret mo gud ples. Fasin blong gat hae tingting, stap flas mo stap selfis oli olsem graon wetem fulap ston we i neva givim frut long saed blong spirit.

Fasin blong tingting we i stap daon i wan rij graon we fasin blong spirit i stap gro long hem, mo i givim frut blong insperesen blong save wanem blong mekem. I givim wei blong kasem tabu paoa blong mekem wanem we i mas hapen. Wan we i mekem samting wetem tingting blong kasem pres o wetem tingting blong man i luksave hem, bae i no kwalifae blong Spirit i tijim hem. Wan we i stap flas mo i stap letem ol filing blong hem i mekem ol desisen, bae Spirit i no lidim hem wetem bigfala paoa.

Taem yumi stap olsem ol tul long bihaf blong ol narawan, bae yumi kasem moa insperesen bitim taem yumi tingting nomo long yumiwan. Taem yumi stap helpem ol narawan bae Lod i ademap daereksen blong gud blong yumiwan.

Papa blong yumi long Heven i no putum yumi long wol ia blong yumi no wok gud, be blong yumi wok gud mo kasem glori. Bae yu luk se i defren smol, be hemia nao from wanem, blong luksave ol ansa long prea, i had samtaem. Sam yumi no waes, mo yumi traem blong fesem laef mo dipen long ol eksperiens mo paoa blong yumiwan bakegen. Hem i waes moa blong yumi lukaotem rod tru long prea mo insperesen blong save wanem blong mekem. From we yumi stap obei i mekem se, taem yumi nidim, yumi save kwalifae blong kasem tabu paoa ia blong mekem wan samting we i kam tru long insperesen.

Olsem plante long yumi, Oliva Kowdri i no bin luksave pruf blong ol ansa blong ol prea blong hem, we i bin kam finis long Lod. Blong openem ae blong hem mo ae blong yumi, revelesen ia i kam tru long Josef Smit.

Lod i bin talem long Oliva se hem i kasem blesing from ol samting we hem i bin mekem finis; from we hem i bin askem long Lod, mo folem hamas hem i bin askem, nao hem i bin kasem instraksen we i kam long Spirit blong God. Sapos i no bin olsem, bambae Oliva i no save kam long ples we hem i stap long hem naoia.

Lod i bin talem long Oliva se hem i save we hem i bin askem Lod mo Lod bin mekem maen blong hem i andastanem samting mo Lod i talem olgeta samting ia long hem, blong hem i mas save se Spirit blong trutok i bin mekem hem i andastanem samting.⁴

Sapos yu filim se God i no bin ansarem ol prea blong yu, tingting hevi long ol skripja ia—afta, lukaotem gud ol pruf long laef blong yuwan taem we i soem se ating Hem i bin ansarem ol prea blong yu finis.

Tufala saen we i save talemaot se wan filing o wan tingting i kam long God, i we oli givim pis long hat mo wan kwaet gud filing. Taem yu folem ol prinsipol we mi bin toktok raon long olgeta, bae yu rere blong luksave revelesen long ol impoten taem long laef blong yu.

Moa yu folem gud tabu laet ia we i stap kam, moa glad blong yu i kam bigwan naoia mo blong taem we i no save finis— mo antap long hemia, progres mo paoa blong yu blong givim seves bae i kam bigwan moa. Mi no andastanem fulwan olsem wanem samting ia i stap hapen, be laet ia long laef blong yu, i no save karemaot fridom blong joes blong yu. Yu save mekem desisen we yu jusum blong mekem. Be tingbaot, joes blong mekem raet samting i mekem yu gat pis long maen mo i mekem se yu stap glad.

Sapos ol joes blong yu oli rong, i gat wan rod blong stretem tru long fasin blong sakem sin. Taem yu mekem folem evri kondisen blong fasin blong sakem sin, Atonmen blong Jisas Kraes, Sevya blong yumi, i karemaot yumi long fored blong jastis mo ol mistek we yumi bin mekem. Hem i simpol nomo, i naes mo i gud tumas. Taem yu gohed blong laef long fasin blong stap stret mo gud, bae yu kasem insperesen blong save wanem blong mekem. Samtaem blong faenemaot wanem aksen bae yu tekem, i hadwok, mo yu mas gat tras. Be yet, bae yu kasem insperesen blong save wanem blong mekem taem yu mitim ol kondisen blong kasem tabu laet ia long laef blong yu, we i, blong obei long ol komanmen blong Lod, trastem tabu plan ia blong glad blong Hem mo stap longwe long eni samting we i agensem plan ia.

Komunikesen wetem Papa blong yumi we i stap long Heven i no wan poen blong pleiplei wetem. Hem i wan spesel janis we i tabu. Hemia i stanap long ol tabu prinsipol we i no save finis, mo i no save jenis. Yumi kasem help we i kam long Papa blong yumi we i stap long Heven folem fet blong yumi, folem fasin blong yumi blong stap obei mo folem stret wei blong yusum fridom blong joes.

Bae Lod i givim insperesen long yu blong andastanem mo yusum ol prinsipol we i lidim yu long revelesen mo insperesen blong yuwan, long nem blong Jisas Kraes, amen.