Na Sala Mo Taura Kina na iVakatakila kei na Veivakauqeti ni Nomu Bula

O koya vakayadua e tucake ena itutu ni vunau oqo me vakadewataka e dua na itukutuku ena vakila na kaukauwa kei na veitokoni ni lewenilotu e vuravura raraba. Au vakavinavinakataka ni veitokoni vata vakaoqo e rawa me lako mai vua e dua na itokani lomani ena yasa ni ilati kadua. Vinaka vakalevu, Jeanene.

Na Yalo Tabu sa dau vakadrodroya vei keda na veitukutuku bibi eda gadreva meda dusimaki kina ena noda ilakolako ni bula vakatamata oqo. Ena gauna e matata ka savasava ka bibi kina, ena yaco me sa dua na ivakatakila. Ena gauna era veivakauqeti veitarataravi mai kina sa dau idusidusi vei keda vakaikalawa yadudua ki na dua na ivakaraitaki kilikili, me baleta na inaki ni itukutuku oqo, sa ikoya na veivakauqeti.

E dua na ivakaraitaki ni ivakatakila o ya na veidusimaki a ciqoma o Peresitedi Spencer W. Kimball ni oti toka na nona masumasu vakabalavu vua na Turaga me baleta na kena vakatikori na matabete vei ira taucoko na tagane era bula kilikili ena loma ni Lotu ni gauna o ya, a vakatikori walega vei ira eso.

E dua tale na ivakaraitaki ni ivakatakila o ya na veidusimaki oqo a soli vei Peresitedi Joseph F. Smith: “Au vakabauta ni da sa toso tiko ka veimaliwai vata tiko kei ira na italai vakalomalagi kei ira na kai lomalagi. Eda sega ni tawase tani mai vei ira. … Eda sa veivolekati sara vakaveiwekani kei ira na noda kawa, kei ira na noda qase e liu … era sa liu yani ki na vuravura ni yalo. Ena sega ni rawa meda na guilecavi ira; e sega ni oti rawa na noda lomani ira; eda dau nanumi ira tu ga e yaloda, ena noda vakasama, o koya gona eda sa sema ka duavata kina kei ira ena ivau eda na sega ni tagutuva rawa. … Kevaka sa vakaoqo na keda ituvaki ni bula vakatamata, ka voliti tu ena noda malumalumu vakatamata, … sa qai vakacava sara na kena vakadeitaki rawa … meda vakabauta kina o ira sa yalodina tu, era sa gole e daku ni ilati … era sa raici keda rawa vakavinaka cake mai na noda raici ira rawa tiko; ka ra sa kilai keda vakavinaka cake mai na noda kilai ira. … Eda bula tiko ena kedra maliwa, era raici keda tiko, era sa kauwaitaka tiko na noda bula raraba, ka ra lomani keda vakalevu cake ena gauna oqo. Era raica tu ena gauna oqo na veika rerevaki eda sa bolei tiko kina; … na nodra lomani keda kei na nodra gagadre baleta na noda bula me cecere cake mai na kena eda vakasamataki keda tiko kina.”¹

Ena rawa me vaqaqacotaki na veimaliwai ena daku ni ilati vata kei ira eda kila ka lomana. Oqori e vakayacori ena noda sasaga vagumatua ni kena vakayacori tikoga na veika dodonu. Sa rawa meda vaqaqacotaka na noda veimaliwai vata kei ira sa takali yani eda lomana ena noda kila deivaki tiko ni veitawasei oqo e sega ni ka tudei kei na veiyalayalati a vakayacori e valetabu sa tawamudu. Ni da talairawarawa tikoga kina, sa vakadeitaka kina na veiyalayalati oqo na kena kilai tawamudu ni iyalayala era sa kovuti tiko kina.

E dua na ivakatakila a matata vakavinaka sara ki na noqu bula ka yaco ena gauna au a vakauqeti vakaukauwa kina mai vua na Yalotabu meu kerei Jeanne Watkins me vauci vei au ena valetabu.

E dua vei ira na lesoni cecere meda na kila kece tiko o ya meda dau kerekere. Na cava na vuna e vinakata kina na Turaga meda dau masu Vua ka kerekere? Baleta oqori na sala e ciqomi kina na ivakatakila.

Ena gauna au dau sotava kina e dua na ka e dredre sara, oqo na sala au tovolea meu kila vakavinaka kina na cava meu cakava. Au lolo. Au masu meu raica ka kila vakavinaka na ivolanikalou me na veivuke sara vakalevu. Na cakacaka oqo e vakayacori tikoga. Au na tekivu ena noqu wilika e dua na itukutuku ena ivolanikalou; au vakasamataka vakatitobu ka masu meu kila keu sa kila rawa taucoko na veika e vinakata vei au na Turaga meu cakava. E vakavuqa e dau yaco mai na vakasama kei na kena kilai vakavinaka na ivakavuvuli o ya. Au sa raica rawa ni ituvatuva o ya sa sala vinaka duadua meda vuli kina mai na ivolanikalou.

Era tiko eso na ivakavuvuli taurivaki e dau laveti cake kina na ivakatakila. iMatai, na noda yalo totolo me vakataka na cudru se rarawa se veisaqasaqa ena vagolea tani na Yalo Tabu. Na yalo totolo vakaoqori me na tagutuvi laivi, de na sega ni yaco mai na noda madigi ni ciqomi ni ivakatakila.

E dua tale na ivakavuvuli o ya meda qarauna na veiwali. Na veidredrevaki ena domolevu, ka vakasausa ena rarawa kina na Yalo Tabu. Na veiwali ena inakinaki vinaka ena vukea na ivakatakila; ia na veidredrevaki vakasausa e sega ni vakakina. Na veiwali vinaka sa rawa me dua na sala ni kena takali tani kina na lomaocaoca ni bula oqo.

E dua tale na meca ni ivakatakila e yaco mai ena kena vakalevutaki na ka se domolevutaki ni veika e tukuni. Na vosa matau, e tau malua ena rawa ni kauta mai na ivakatakila.

E dua tale na ituvaki e vakauqeta na veivosaki vakayalo o ya na noda bula savasava vakayago. Na vakaukauwa yago, na veiganiti ni gauna ni moce, kei na ivakarau maqosa ni kana ni na solia vei keda na igu meda ciqoma ka kila vakavinaka na ivakatakila. Eda na bulataka na gauna taucoko ni bula yalataki. Ia, sa rawa meda laveta cake na vinaka ni veiqaravi o ya kei na ivakarau raraba ni noda bula ena noda vakayacora na digidigi matau, ka dodonu.

Sa ka bibi kina na noda itaviqaravi ni veisiga me kakua ni vagolei keda tani mai na noda rogoca na Yalotabu.

Na ivakatakila e rawa talega ni soli mai ena tadra, ena gauna, sa vaka me dau sega ni kilai ni sa mataliataki na moce ki na yadra. Kevaka mo na taura vakatotolo sara, na ka o raica, ko na taura rawa vakalevu na kena matailalai, ia ke sega ena takali yani. Na veivosaki veivakauqeti e yaco ena bogi e dau salavata mai kei na dua na vakasama tabu me baleta na veika taucoko e raici. Na Turaga e dau vakayagataki ira eso ka da sa dau dokai ira mera vakatakila vei keda na ka dina ena tadra baleta ni da sa vakararavi kina ka rawa ni da vakarogoca na nodra ivakasala. Sa Nona cakacaka na Turaga me veivakavulici ena Yalo Tabu. Ia, sa rawa talega Vua ena tadra me vakarawarawataka me kilai vakavinaka ka rawa me tara na yaloda ni vakavulici mai vua e dua eda lomana ka doka.

Ni sa baleta na inaki ni Turaga, sa rawa Vua me vakavotuya ki na noda vakasama na veika cava sa yaco vei keda. Oqori e sega ni dodonu me vakamalumutaka na noda gumatua tiko meda vola na vosa mai na Yalotabu. Na kena volai vakamatau na veivakauqeti oqo sa ivakaraitaki vua na Kalou ni Nona dauvosa mai sa ka tabu sara vei keda. Na kena volai ena vakaukauwataka talega na noda rawa ni vakalesuya mai na ivakatakila. Na kena volai na veidusimaki ni Yalotabu oqo e dodonu me taqomaki me ra kakua ni yali se vakacacani mai vei ira eso.

E dau tadu mai na ivolanikalou na veivakadeitaki matata sara ni veika dina, ni kevaka me na bulataki tikoga, ena tadolava na katuba ki na veivakauqeti me kilai na veika me vakayacori kei na vanua e gadrevi kina me rawa ni laveti cake kina na nona igu e dua na tamata ena kaukauwa vakalou. E vakaraitaki tu ena ivolanikalou ni a vaqaqacotaka na Turaga na nodra igu eso ka a valuta rawa na veika dredre, lomatarotaro, kei na bolebole vakaitamera ena gauna a gadrevi kina. Ni ko vakasamataka vakatitobu na ivakaraitaki oqo, ena yaco mai e dua na veivakadeitaki rogo malua mai vua na Yalo Tabu ni sa dina sara na veika era a sotava. Ko ni qai kila ni sa vakarautaki tale tu ga na veivuke vakaoqo kivei kemuni.

Au sa raici ira eso era vorata yani na bolebole eso ka ra kila na veika mera cakava ni sa ulabaleti ira kina na veika era sotava oqo baleta ga ni ra vakararavi tu vua na Turaga ka ra kila ni na dusimaki ira o Koya ki na kena iwali era sa gadrevi vakatotolo sara ga.

E vakaraitaka kina na Turaga: “Raica dou sa vakavulici mai cake. Dou vakasavasavataki kemudou; io ena soli vei kemudou na kaukauwa mo dou vunautaka kina na noqu vosa.”² Na vosa vakasavasavataki kemudou e vaka me lomatarotarotaki. A vakamacalataka taumada kina o Peresitedi Harold B. Lee ni sa rawa mo veisautaka na veivosa o ya ki na malanivosa “muria na noqu ivunau,” Wilika vaka o ya, ena vaka me matata cake kina na ivakasala.³

Sa dodonu kina vua e dua me savasava na nona vakasama kei na yagona me rawa kina ni vakauqeti koya na Turaga. Vua e dua e talairawarawa ki na Nona ivakaro sa nuitaki koya tiko na Turaga. Sa na yaco vua na tamata oqo na Nona veivakauqeti me kila na ka me cakava, ni gadrevi vakakina, kei na kaukauwa vakalou me na cakava sara kina.

Ena kena gadrevi me qaqaco cake na veika vakayalo ka vakayaco-ka ni sa gadrevi vakakina, ka sa dodonu me na teivaki ena kena itikotiko savasava. Na viavialevu, dokadoka, kei na boletaki koya era sa vaka na vanua veivatuvatu ka na sega ni vuataka na vua ni veika vakayalo.

Na yalomalumalumu sa qele bulabula ena tubu cake kina na veika vakayalo ka na tubu mai kina na vua ni veivakauqeti me kilai na veika me vakayacori. Sa tadu mai kina na kaukauwa vakalou me rawati kina na veika e dodonu me caka. Ni dua sa vakayarayarataki ena dua na gagadre me dokai kina se kilai ena sega ni rawa me vakavulici ena Yalotabu. Ni dua e nanumi koya ga, ka vakatara me vakatulewa vua na lomana se vakatara na veivakauqeti se veivakasaurarataki mai vua e dua me lewai koya ena sega ni vakauqeti se liutaki mai vua na Yalotabu.

Ena gauna eda sa iyaya ni cakacaka tiko kina ena vukudra eso, eda na vakauqeti vakarawarawa sara mai na noda dau nanumi keda ga vakaikeda. Ena noda vukei ira yani na tamata, sa na rawa vua na Turaga me semata na veidusimaki eso me yaga vei keda.

E sega ni biuti keda mai ki na vuravura oqo na Tamada Vakalomalagi meda mai vakadrukai ia me lagilagi na noda qaqa. Ena vaka me dau veicalati toka, ia o koya gona oqori, ena dau dredre toka ena so na gauna na noda kila ni sa saumi mai na masu. Eso na gauna eda dau sesewa meda tovolea meda sotava na bula oqo ena veika eda sa kila tu kei na noda rawa ka. Sa na vinaka cake vei keda meda vakasaqaqara ena masu kei na veivakauqeti vakalou meda kila na ka meda cakava. Na noda talairawarawa ena vakadeitaki kina ni sa gadrevi, eda na rawata na kaukauwa vakalou meda vakayacora rawa e dua na inaki vakauqeti vakayalo.

Me vakataka e vuqa vei keda, a sega ni raica rawa o Oliver Cowdery na ivakadinadina ni isau ni nona masu sa solia oti mai na Turaga. Me dolavi na matana, kei na matada, a soli na ivakatakila oqo vei Josefa Simici:

“Ko sa kalougata ena ka ko sa kitaka; raica ko sa daumasuti au, ka sa vakacegui iko kina na noqu Yalo Tabu. A ka oqo ko sa mai tiko kina eke.

“Ia ko sa kila niu sa dauvakatakila ki lomamu na ka ko sa gadreva; ia mo kila ni sa vakatakila vei iko ko koya na Yalo Tabu na vu ni ka dina.”⁴

Kevaka o ni nanuma ni sa sega ni sauma mai na Kalou na nomuni masu, ni vakasamataka mada vakatitobu na ivolanikalou oqo—ka qai vakasaqara vakavinaka na ivakadinadina ena nomuni bula ni sa rairai sauma oti mai o Koya na nomuni masu.

E rua na ivakatakilakila ni vakasama se veivakauqeti e lako mai vua na Kalou o ya ni na kauta mai na vakacegu ni yalomuni ka na tuvaki vakavinaka na nomuni vakasama. Ni ko ni vakamuria na ivakavuvuli au sa mai vakamacalataka, ko ni na tu vakarau mo ni kila na ivakatakila ena gauna dredre eso ni nomuni bula.

Na nomuni vakamuria vakavoleka tiko na veidusimaki vakalou, ena levu cake sara na nomuni bula marau eke kei na veigauna tawamudu—ka vakabibi, na kena vakalevutaki na nomuni toro cake kei na igu mo ni veiqaravi yani. Au sega mada ni kila na kena ivakarau e vakayacori kina, ia na veidusimaki ni nomuni bula ena sega ni kauta tani na nomuni galala ni digidigi. Sa rawa mo ni vakatulewa ga ki na digidigi mo ni na cakava. Ia mo ni nanuma tiko, na nomuni vakasamataka ni nomuni caka dodonu ena kauta mai na vakacegu ni vakasama kei na marau.

Ke cala beka na digidigi, sa rawa mera vakadodonutaki ena veivutuni. Ni ra sa sotavi na veika taucoko e lavaki kina, sa qai veivakarautaki kina na veisorovaki i Jisu Karisito, na noda i Vakabula me veisereki mai na dodonu ni lewa ena vuku ni cala a vakayacori. E rawarawa ka lagilagi ka totoka e sega ni vakatautauvatani rawa. Ni ko ni tomana tiko na bula dodonu, ko ni na dauvakauqeti tiko ga mo ni kila na veika mo ni cakava. Eso na gauna ni kilai na veika me vakayacori ena rawa me gadrevi kina na kena cakacakataki kei na nomuni veivakabauti. Ia ko ni na vakauqeti mo ni kila na veika mo ni na cakava mo ni rawata na veika e lavaki kina me baleta na veidusimaki vakalou ena nomuni bula, o ya, na talairawarawa ki na ivakaro ni Turaga, vakararavi ki na Nona ituvatuva vakalou ni bula marau, kei na drotani mai na veika e veisaqasaqa mai.

Na veivosaki kei na Tamada Vakalomalagi e sega ni ka me vakawaleni. Oqo e dua na madigi tabu. E yavutaki tu ena ivakavuvuli tawamudu, ka sega ni veisau rawa. Eda ciqoma na veivuke mai vua na Tamada Vakalomalagi me isau ga ni noda vakabauta, talairawarawa, kei na kena vakayagataki vakadodonu na galala ni digidigi.

Me na vakauqeti kemuni tikoga na Turaga mo ni kila vakavinaka ka vakayagataka na ivakavuvuli e veimuataki ki na ivakatakila vakatamata yadua kei na veivakauqeti, ena yaca i Jisu Karisito, emeni.