Stap Folem Ol Ki blong Miusik blong Fet

Taem ol Jeneral Atoriti blong Jos oli stap mit wetem ol memba raon long ful wol, mifala i luk stret olsem wanem ol Lata-Dei Sent oli wan fos blong mekem gud. Mifala i presem yufala from evri samting we yufala i stap mekem blong blesem laef blong evri pipol.

Olgeta long yumi wetem wok long pablik afea, oli save gud se plante bigfala lida mo junalis long Yunaeted Stet mo raon long wol, oli kam antap long pablik toktok blong olgeta abaot Jos mo ol memba blong Jos. Plante samting we oli bin hapen long semtaem, i mekem se oli tokbaot Jos plante.¹

Plante we oli stap raet abaot Jos, oli bin traehad blong andastanem pipol blong yumi mo doktrin blong yumi. Oli bin mekem long stret fasin mo oli no tekem saed, mo mifala i talem tangkyu from.

Mifala i luksave tu se plante man long wol, oli no stap folem ol tabu samting. Jif Rabae Lod Saks blong Inglan, i bin stap toktok long ol lida blong Katolik Jos long las Disemba long Pontifikol Gregori Yunivesiti, i bin talem se sam pat blong wol oli nomo gat bilif. Hem i talem se olgeta we oli agens, “oli strong blong nomo biliv long God mo nomo save harem wanem nao ol defren ki blong miusik blong fet.”²

Bigfala fas visen insaed long Buk blong Momon, i drim blong Profet Lihae, long saed blong tri blong laef.³ Visen ia i tokbaot gud ol jalenj blong fet we oli stap long dei blong yumi, mo bigfala spes we i stap bitwin olgeta we oli lavem, wosipim, mo filim se oli mas ansa long God, mo olgeta we oli no filim ol samting ia. Lihae i eksplenem sam fasin we i prapa spolem fet. Sam oli gat hae tingting, no mekem samting mo no gat hed. Oli intres nomo long wanem oli singaotem waes blong wol ia.⁴ Ol narafalawan, oli intres smol long God, be oli lus long wan wol blong tudak mo sin.⁵ Sam narawan oli bin testem lav blong God mo toktok blong Hem, be oli sem from ol narawan moa oli stap jikim olgeta mo oli stap foldaon long ol “rod we i no blong folem.”⁶

Laswan, i gat olgeta we oli stap folem ol ki blong miusik blong fet. Yufala i save huia yufala. Yufala i lavem Lod mo gospel blong Hem mo oltaem stap traem blong laef folem mo serem mesej blong Hem, speseli wetem famle blong yufala.⁷ Yufala i stap folem gud ol toktok blong Spirit, yufala i girap tru long paoa blong toktok blong God, yufala i stap folem relijin long hom blong yufala, mo yufala i stap strong oltaem blong laef folem eksampol blong Kraes olsem ol disaepol blong Hem.

Mifala i luksave se yufala i stap bisi. Oli no pem yufala from ol wok ia, be responsabiliti blong lukaotem Jos i stap long yufala, ol memba we i givim taem mo samting. Yumi save se i wan nomol samting blong ol memba blong bisoprik mo ol stek presidensi mo plante moa, blong oli givim ol longfala taem blong seves blong olgeta. Ol presidensi blong ol okseleri mo kworom oli stap olsem eksampol long sakrifaes blong olgeta we i no selfis. Seves mo sakrifaes ia i go kasem ful membasip, i go kasem olgeta we oli kipim rekod, olgeta fetful hom mo visiting tija, mo olgeta we oli tij long ol klas. Mifala i talem tangkyu long olgeta we oli gat strong paoa long tingting blong mekem wok olsem Skaotmasta, mo tu, olgeta we oli stap olsem ol lida blong neseri. Yufala evriwan i gat lav mo gladhat blong mifala long wanem yufala i save mekem mo huia yufala!

Mifala i luksave se i gat ol memba we oli no intres tumas mo oli no fetful tumas long sam tijing blong Sevya. Mifala i wantem blong ol memba ia, oli wekap fulwan long fet mo tekempat moa mo komitim olgeta moa. God i lavem evriwan long ol pikinini blong Hem. Hem i wantem evriwan long olgeta blong gobak long Hem. Hem i wantem evriwan blong stap folem ol ki blong tabu miusik blong fet. Atonmen blong Sevya i wan presen we i blong evriwan.

Hem i nid blong tijim, mo blong man i andastanem se yumi lavem mo respektem evriwan long ol pipol ia we Lihae i tokbaot.⁸ Tingbaot, i no stap long yumi blong jajem man. Jajmen i blong Lod.⁹ Presiden Tomas S. Monson i bin askem stret long yumi blong gat “strong paoa long tingting blong stop blong jajem ol nara man.”¹⁰Hem i askem evri fetful memba tu blong sevem olgeta we oli bin testem frut blong gospel mo afta, oli bin foldaon, mo tu, faenem olgeta we oli no faenem yet stret mo smol rod. Mifala i prea se bae oli holemtaet rel blong aean mo kasem lav blong God, we bae i fulumap “sol blong olgeta wetem wan bigfala glad.”¹¹

Nomata we visen blong Lihae i tekem evri pipol, bigfala stamba doktrin we i stap, i bigfala samting ia we, famle i no save finis. “Famle, God nao i odenem. Hem i yunit we i moa impoten long taem naoia mo long taem we i no save finis.”¹² Taem Lihae i bin kakae long frut blong tri blong laef (lav blong God), hem i bin wantem blong “famle blong hem i kakae tu.”¹³

Wanem yumi wantem tumas, i blong lukaotem ol pikinini blong yumi long trutok mo stret mo gud fasin. Wan prinsipol we bae i helpem yumi blong mekem hemia, i blong stop blong jajem tumas ol fasin we oli krangke, o oli no waes, be i no wan sin. Plante yia i pas, taem waef blong mi mo mi i gat ol pikinini long hom, Elda Dalin H. Oks i bin tijim se, i impoten blong luksave ol mistek blong ol yut we oli mas stretem, mo ol sin we i nidim panismen mo fasin blong sakem sin.¹⁴ Taem i no gat waes tingting, ol pikinini blong yumi oli nidim instraksen. Taem i gat sin, i nid blong gat fasin blong sakem sin.¹⁵ Mifala i faenem se hemia i bin help insaed long famle blong mifala.

Fasin blong stap folem relijin insaed long hom i blesem ol famle blong yumi. Eksampol i impoten tumas. Olsem wanem yumi stap, i toktok laod tumas, mekem se samtaem bae ol pikinini blong yumi oli no save harem wanem yumi stap talem. Taem mi bin gat faef yia, mama blong mi i bin kasem toktok se yangfala brata blong hem i ded long wan faet blong sip taem hem i stap long ami long Japan kolosap long en blong Wol Wo 2.¹⁶ Nius ia i mekem hem i harem nogud tumas. Hem i krae bigwan mo go long bedrum blong hem. Afta smol taem, mi pusum hed long rum blong luk se hem i oraet. Hem i stap nildaon long saed blong bed, i stap prea. Wan bigfala pis i kam long mi, from we mama i bin tijim mi blong prea mo lavem Sevya. Hemia i stret eksampol we oltaem hem i stap soem long mi. Ol mama mo papa we oli stap prea wetem ol pikinini, oli givim eksampol we i moa impoten bitim eni nara eksampol.

Mesej, ministri, mo Atonmen blong Jisas Kraes, Sevya blong yumi, oli lesenbuk blong famle. I no gat skripja i tokbaot gud fet blong yumi bitim 2  Nifae 25:26: “Mifala i tokbaot Kraes, mifala i glad long Kraes, mifala i prij long saed blong Kraes, mifala i profesae long saed blong Kraes, mo mifala i raetem folem ol profesi blong mifala blong mekem se ol pikinini blong mifala i save gat save long wanem ples oli save lukluk long hem blong kam klin aot long ol sin blong olgeta.”

Wan long ol stamba poen blong visen blong Lihae, i we ol fetful memba oli mas holemtaet gud rel blong aean ia blong mekem se oli stap long stret mo smol rod we i lidim man long tri blong laef. Hem i nid blong ol memba oli ridim, tingting hevi, mo stadi long ol skripja.¹⁷

Buk blong Momon i impoten blong kasem insperesen.¹⁸ I tru, bae i gat olgeta we oli no wantem save, o oli daonem tabu buk ia. Sam oli yusum blong tok fani. Bifo mi go long misin, wan profesa blong yunivesiti i yusum toktok blong Mak Twen se sapos yu karemaot toktok ia, “Mo i kam blong hapen se” aot long Buk blong Momon, Buk blong Momon “bae i kam nomo olsem wan pamflet.” ¹⁹

Sam manis afta, taem mi bin stap long misin long London, Inglan, wan tija we man i save gud hem long Yunivesiti blong London, wan man Ijip we i save gud long lanwis blong bifo, i bin ridim Buk blong Momon, i bin raet long Presiden Deved O. MaKei, mo i bin mitim ol misinari. Hem i bin talem long olgeta se hem i save stret se Buk blong Momon i wan translesen blong ol lanwis blong ol man Jiu mo lanwis blong ol man Ijip long ol taem we oli tokbaot long Buk blong Momon.²⁰ Wan eksampol we hem i yusum wetem sam moa, i toktok ia: “Mo i kam blong hapen se,” we hem i talem se, i stret translesen blong kaen toktok we oli bin yusum long lanwis blong bifo.²¹ Profesa ia, i bin talem se save blong hem folem wok blong hem i bin helpem hem, be yet, i impoten blong gat wan testemoni long saed blong spirit. Tru long stadi mo prea, hem i kasem wan witnes long saed blong spirit mo i bin kasem baptaes. So, yumi luk se wan i yusum blong tok jik, mo wan man we i skul i yusum mo luk se i wan pruf blong trutok blong Buk blong Momon, we Spirit i konfemem long hem.

Doktrin blong fridom blong jusum we i nid blong stap, i talem se wan testemoni blong gospel we i kambak i stanap long fet be i no jes long wan nara pruf o pruf blong saens. Blong lukluk nomo long wanem, we God i no talemaot yet, olsem: olsem wanem nao Jisas i bon long wan yang gel, o Laef bakegen long ded blong Sevya i bin save hapen, o olsem wanem nao Josef Smit i bin transletem ol skripja blong yumi, bae hemia i no save mekem yumi progres gud. Hemia oli ol poen blong fet. Long en, kaonsel blong Moronae blong yumi mas ridim mo tingting hevi, mo afta, askem God wetem wan tru hat, wetem tru tingting, blong konfemem ol trutok blong spirit tru long witnes blong Spirit, hemi ansa ia nao.²² Antap long hemia, taem yumi putum insaed long laef blong yumi, ol toktok blong skripja mo laef folem gospel, yumi gat blesing tru long Spirit mo yumi testem gud fasin blong Hem wetem ol filing blong glad, hapines, mo speseli, pis.²³

I klia se, laen we i seperetem olgeta we oli harem miusik blong fet mo olgeta we oli no harem o mekem sora i fas, i fasin blong stap aktiv blong stadi long skripja. Sam yia i pas, toktok blong wan profet i tajem mi; Spensa W. Kimbol i bin poenemaot gud, nid blong stap gohed blong ridim mo stadi long ol skripja. Hem i bin talem: “ Mi faenem se taem mi no stap mekem gud rilesen blong mi wetem Big Man, mo taem we mi luk se i no gat wan sora antap i stap lisin, mo i no gat wan voes antap i toktok, mi mi stap longwe we longwe. Sapos mi draonem mi insaed long ol skripja, spes ia i kam smol, mo Spirit i kambak.”²⁴

Mi hop se yumi stap ridim Buk blong Momon wetem ol pikinini blong yumi oltaem. Mi bin toktok raon long hemia wetem ol pikinini. Oli bin serem wetem mi, tu samting. Faswan, blong stap strong blong ridim skripja evri dei olsem wan famle i ki. Gel blong mi, wetem glad, i tokbaot hadwok blong tufala long eli moning, wetem ol yangfala pikinini blong stap ridim skripja oltaem. Hem mo hasban blong hem i wekap long eli moning mo muv i go long haf tudak i kasem aean blong step i go long ples we famle i kam tugeta blong ridim toktok blong God. Blong stap strong blong mekem oltaem i ansa, mo blong laf samtaem i help. Hem i tekem hadwok blong evri memba blong famle, evri dei, be praes blong hem i gud. Fasin blong stop smoltaem bae i lus, taem fasin blong mekem oltaem i kam antap.

Sekenwan i yangfala boe blong mitufala mo waef blong hem we oli stap ridim skripja wetem yang famle blong tufala. Tu long ol fo pikinini oli no bigwan inaf yet blong rid. Long hemia we i gat faef yia, oli gat faef fingga saen we hem i stap folem blong hem i tekpat long famle skripja riding. Fingga saen namba 1 i blong hem i ripitim ol toktok ia: “Mo i kam blong hapen se,” evri taem i kamaot long Buk blong Momon. Mi mas talem se mi laekem from se toktok ia i kamaot fulap taem. Nekiswan, blong intres blong ol yang famle, fingga saen 2 i ol toktok ia “Mo nao yumi luk se”; fingga saen 3, 4, mo 5, papa mo mama i jusum folem ol toktok we oli stap long japta we oli stap ridim.

Mifala i save se famle skripja stadi mo famle haos naet oli no stret evriwan oltaem. Nomata long ol jalenj we yufala i fesem, no slakem tingting blong yufala.

Plis andastanem se blong gat fet long Lod Jisas Kraes, mo blong stap kipim ol komanmen blong Hem, hem i, mo oltaem bae hem i tes blong yu pruvum yuwan taem yu stap long wol ia. Antap long evri nara samting, wanwan long yumi i mas luksave se taem sora blong wan i no save harem ol ki blong miusik blong fet, bae hem i no save harem save toktok blong Spirit. Olsem we profet Nifae i bin tijim: “Yufala i bin harem voes blong hem … ; mo hem i bin toktok long yufala long wan voes we i smol mo i kwaet, be yufala i nomo save harem wan samting long hat blong yufala, mekem se yufala i nomo save filim ol toktok blong hem.”²⁵

Doktrin blong yumi i klia; yumi mas lukluk long gud saed blong ol samting mo stap glad. Yumi tokbaot gud fet blong yumi, be i no ol fraet blong yumi. Yumi stap glad long stret toktok blong Lod se bae Hem i stanap long saed blong yumi mo lidim yumi mo soem rod.²⁶ Tabu Spirit bae i testifae long hat blong yumi se yumi gat wan Papa we i stap long Heven we i gat lav, we plan blong Hem blong pemaot yumi bae i kam blong hapen long evri saed from sakrifaes blong Jisas Kraes we i pemaot man.

Olsem Naomi W. Randol, woman we i bin raetem “Mi pikinini blong God” i talem: “Spirit blong Hem i lidim mi; lav blong hem i mekem mi sua se fraet bae i aot, taem fet i stap strong.”²⁷

From hemia, long eni taem we yumi stap long rod blong stap olsem disaepol, olsem hemia long visen blong Lihae, bae yumi mas mekem strong tingting blong wekemap insaed long yumi mo ol famle blong yumi, wan filing blong wantem akseptem bigbigfala presen blong Sevya, we i laef we i no save finis. Mi prea se bae yumi stap harem save ol ki blong miusik blong fet. Mi testifae se Jisas Kraes i Hae, mo Atonmen blong Hem i bin hapen, long nem blong Jisas Kraes, amen.