Ol Hil blong Klaem

Mi bin harem Presiden Spensa W. Kimbol, long wan sesen blong konfrens, i bin askem se bae God i givim hem ol hil blong hem i klaem long olgeta. Hem i talem se: “I gat ol bigfala jalenj long fored blong yumi, ol bigfala janis blong mitim. Mi welkamem tingting ia mo filim blong talem long Lod, wetem tingting i stap daon, ‘Givim hil ia long mi,’ givim ol jalenj ia long mi.”¹

Hat blong mi i kasem insperesen, mo mi bin save long sam jalenj mo agens we hem i bin fesem finis. Mi bin wantem blong kam moa olsem hem, wan strong wokman blong God. Mekem se, wan naet, mi bin prea blong kasem wan tes blong pruvum strong paoa long tingting blong mi. Mi save tingbaot klia. Long naet ia, mi bin nildaon long rum blong mi, wetem wan fet we i olsem se i fulumap hat blong mi, gogo bae i bosta.

Afta long wan o tu dei, prea blong mi i bin ansa. Tes we i moa had long laef blong mi, i bin mekem mi sapraes mo mekem mi gat tingting i stap daon. Hem i givim wan lesen wetem tu pat. Faswan, mi bin gat klia pruf se God i bin harem mo i bin ansarem prea blong fet blong mi. Be sekenwan, mi statem wan lesen, we i stap gohed yet, abaot from wanem mi bin filim bigfala tras long miwan long naet ia, se wan bigfala blesing i save kam long samting we i agensem mi, mo bae i givim moa samting.

Samting we i agensem mi we i bin kasem mi longtaem bifo finis, naoia, i olsem wan smol samting komperem wetem wanem i bin kam stat long taem ia—long mi mo olgeta we mi lavem. Plante long yufala i stap gotru long ol tes blong bodi, tingting mo filing, we i save mekem yu krae bigwan, semmak olsem wan bigfala mo fetful wokman blong God we mi bin save gud. Nes blong hem i harem hem i talem, taem hem i silip long bed: “Mi traem ful laef, blong mi blong stap gud. From wanem samting ia i hapen long mi?”

Yu save olsem wanem Lod i bin ansarem kwestin ia long Profet Josef Smit taem hem i bin stap long kalabus.

Lod i bin talem long Josef Smit se sapos bae oli sakem hem insaed long wan bigfala hol, o long han blong ol man blong kilimded man, mo oli jajem hem se hem i mas ded; sapos bae oli sakem hem long dip ples; sapos bae wan bigfala wef i stap girap blong kam agensem hem; sapos ol wael win oli kam enemi blong hem; sapos ol heven oli pulum tudak i kam wanples, mo evri samting oli joen blong blokem rod blong hem; mo antap long evri samting, sapos ol maot blong hel oli open bigwan blong solemdaon hem, nao hem i mas save se evri samting ia bae i givim eksperiens long hem, mo bae i blong gud blong hem.

Lod i bin talem se Pikinini blong Man i bin kamdaon mo fesem i bitim evri samting ia. Olsem wanem? Josef i moa hae long hem?

Lod i talem long hem se from hemia, hem i mas stap long rod blong hem, mo prishud bae i stap wetem hem; from Lod i makem ples blong olgeta, mo oli no save pas. Lod i save hamas dei blong Josef i stap, mo bae Hem i no katemsot laef blong Josef; from hemia, Josef i no mas fraet long wanem we man i save mekem, from we God bae i stap wetem hem blong oltaem mo oltaem.²

Long mi, i no gat wan moa gud ansa long kwestin ia se from wanem ol tes oli kam mo wanem bae yumi mekem, bitim wanem toktok blong Lod Hemwan i talem; Lod Hemwan i pas tru long ol tes, long bihaf blong yumi, we oli moa nogud bitim we yumi save ting long hem.

Yu tingbaot ol toktok blong Hem taem Hem i bin talem wanem nao yumi mas mekem, wetem fet long Hem: sakem sin.

Sevya i bin givim oda long yumi blong yumi sakem sin, sapos no bae Hem i kilim yumi wetem stik blong maot blong Hem, mo wetem bigfala kros blong Hem mo wetem bigfala nogud kros blong Hem, mo ol safaring blong yumi bae i bigwan tumas—bae i bigwan hamas, yumi no save; i soa hamas, yumi no save, yes, bae i had olsem wanem blong yumi tekem, yumi no save.

Sevya i bin talem se Hem i bin safa evri samting ia blong evriwan, blong evriwan i no safa sapos oli sakem sin;

Sevya i bin talem se sapos ol pipol oli no sakem sin, nao oli mas safa semmak olsem we Hem i bin safa;

Safaring ia i mekem Hem, we Hem i God, we Hem i hae long evriwan, i seksek from soa long bodi, mo blad blong Hem i ronaot long evri hol blong skin blong Hem, mo Hem i safa tugeta long bodi mo long spirit. Soa ia i bin bigwan tumas nao Hem i askem sapos bae Hem i no gotru long hem.

Be, Hem i bin givim glori i go long Papa. Hem i bin dring mo Hem i bin finisim wok blong Hem blong mekem rere evri samting blong gud blong yumi.³

Yu mo mi i gat fet ia, se wei blong go tru mo go antap long ol tes ia, i blong biliv se i gat wan “pomad blong Gilead”⁴ mo we Lod i bin promesem: “neva bambae mi lego yu samtaem.”⁵ Hemia nao wanem Presiden Tomas S. Monson i bin tijim yumi, blong helpem yumi mo olgeta we yumi givhan blong gotru long ol tes we yumi luk se yumi stap yumiwan long olgeta mo oli bigwan long yumi.⁶

Be Presiden Monson i bin waes tu mo tijim se fandesen blong fet blong mekem ol promes ia oli kamtru, i tekem taem blong bildim. Yu bin save luk nid blong gat fandesen ia, olsem we mi mi bin luk, long saed blong bed blong wan we i rere blong givap blong faet blong stap strong kasem en. Sapos fandesen blong fet i no fas insaed long wan pat blong hat blong yumi, paoa ia blong stap strong bae i go lus.

Stamba tingting blong mi, tedei, i blong tokbaot wanem mi save long olsem wanem yumi save bildimap fandesen ia we i no seksek. Mi mekem wetem fulap tingting i stap daon from tu samting. Faswan, wanem bae mi talem i save daonem tingting blong sam we oli stap traehad long medel blong bigfala agens mo oli save filim se fandesen blong fet blong olgeta i stap folfoldaon. Mo sekenwan, mi save se ol tes we oli moa bigwan oli stap long fored blong mi, bifo en blong laef blong mi. From hemia, ansa we mi givim long yufala, mi mas pruvum yet long laef blong mi taem bae mi stap strong kasem en.

Olsem wan yang man, mi bin wok wetem wan bisnisman we i stap bildim ol futing mo ol fandesen blong ol niu haos. Long hot blong sama taem, hem i hadwok blong ol pipol oli rere long ples we bae oli putum boksing we bae oli kapsaetem simen insaed long hem. I no gat masin. Mifala i yusum wan pik mo wan savel. Blong bildim ol fandesen blong ol bilding we bae oli stap longtaem, i bin wan hadwok long ol taem ia.

Hem i nidim tu blong gat fasin blong save wet longtaem. Afta we mifala i bin kapsaetem ol futing, mifala i mas wet blong i drae gud. Mifala i wantem tumas se wok i gohed, be mifala i mas wet tu, afta we mifala i kapsaetem simen, blong save tekemaot ol boksing.

Mo wanem i mekem ae blong mi we i jes open bigwan olsem wan yangfala bilda, i wanem mi ting se i wan wok we i hadwok mo i tekem taem, we i blong putum ol aean ba insaed long ol boksing ia blong mekem se fandesen i strong gud.

Semmak, yumi mas rere gud long graon blong mekem se fandesen blong fet blong yumi i stanap agensem ol hariken we bae i kam long evri laef. Strong stamba blong fandesen ia blong fet, hem i fasin blong wanwan long yumi blong stap strong mo tru.

Blong yumi jusum raet oltaem, taem we i gat wan joes i stap long fored blong yumi, i krietem wan strong graon we fet i stanap long hem. Hem i stat long taem wan i smol pikinini from se evri sol i bon wetem fri presen we i Spirit blong Kraes. Wetem Spirit ia, yumi save kam blong save taem yumi mekem wanem i raet long fored blong God mo taem yumi mekem wanem i rong long ae blong Hem.

Ol joes ia, handred long olgeta long wan dei, i mekem rere strong graon ia we bilding blong fet blong yumi bae i stanap long hem. Aean we i go raon, we oli kapsaetem simen blong fet blong yumi i go long hem, i gospel blong Jisas Kraes, wetem evri kavenan, odinens mo prinsipol blong hem.

Wan long ol ki samting blong wan fet we i stap strong, i blong jajem gud taem blong livim simen i drae gud. From hemia nao, hem i no bin waes blong mi prea, eli long laef blong mi, blong klaem long ol hae hil mo kasem ol bigfala tes.

Blong simen i drae gud, i no kam olsem nomo taem we taem i stap go, be hem i tekem fulap taem. Blong kam olfala i no mekem samting i kam hemwan. Hem i taem we yumi givim seves long God mo ol narawan oltaem wetem wan ful hat mo sol we i tanem testemoni blong trutok i kam wan paoa long saed blong spirit we man i no save brekemdaon.

Naoia, mi wantem blong leftemap tingting blong olgeta we oli stap naoia long medel blong ol had tes, we oli filim se fet blong olgeta i stap godaon from ol trabol we oli stap kam oltaem. Trabol hemwan, i save stap olsem rod blong mekem fet blong yu i kam strong moa mo afta, kasem fet we i nomo seksek. Moronae, boe blong Momon insaed long Buk blong Momon, i talem long yumi olsem wanem blesing ia i save kam blong hapen. Hem i tijim simpol mo swit trutok, se blong mekem samting nomata fet blong yumi i smosmol nomo, hemia i letem God i helpem fet ia blong gro:

“Mo nao, mi, Moronae, mi wantem tokbaot smol long saed blong ol samting ia; mi wantem soem long wol se fet i ol samting we i gat hop long olgeta mo i no lukim; from samting ia, no rao from se yufala i no lukim, from yufala i no kasem eni witnes kasem afta long tes blong fet blong yufala.

“From i bin tru long fet we Kraes i bin soemaot hemwan long ol papa blong yumi, afta we hem i bin girap aot long ded; mo hem i no bin soemaot hemwan long olgeta kasem afta we oli bin gat fet long hem; from samting ia, i mas nid i stap olsem se samfala i bin gat fet long hem, from hem i no bin soemaot hemwan long wol.

“Be from fet blong ol man, hem i bin soemaot hemwan long wol, mo i bin leftemap nem blong Papa, mo i bin mekem rere wan rod blong mekem se tru long hem ol narafala i save tek pat long presen blong heven, blong mekem se oli save hop long ol samting we oli no bin lukim.

“From samting ia, yufala tu i save gat hop, mo tek pat long presen ia, sapos be yufala i gat fet.”⁷

Smol pis blong fet we i impoten tumas mo yu mas protektem mo yusum long hamas yu save yusum, i fet long Lod Jisas Kraes. Moronae i bin tijim paoa blong fet ia, olsem: “Mo tu long eni taem i bin gat eni we i bin mekem ol merikel kasem taem afta fet blong olgeta; from samting ia fastaem oli bin bilif long Pikinini blong God.”⁸

Mi bin visitim wan woman we i bin kasem merikel blong gat inaf paoa long bodi blong stap strong tru long plante taem we hem i lusum famle, wetem simpol paoa ia blong ripripitim toktok ia gogo i no gat en: “Mi save Ridima Hem i laef.”⁹ Fet ia mo ol toktok blong testemoni oli stap ia yet taem ol memori blong hem oli stap go lus be ol memori ia oli bin neva lus evriwan.

Mi bin sek blong harem se wan nara woman i bin fogivim wan man we i bin mekem nogud hem blong plante yia. Mi bin sapraes mo askem hem from wanem hem i jusum blong fogivim mo fogetem plante yia blong bigfala abius.

Long kwaet voes hem i talem se: “Hem i samting we i moa had we mi bin mekem, be mi jes save se mi mas mekem. Mekem se mi mekem.” Fet blong hem se Sevya bae i fogivim hem sapos hem i fogivim ol nara man i bin mekem hem i rere wetem wan filing blong pis mo hop taem hem i bin fesem ded jes sam manis afta we hem i bin fogivim enemi blong hem we i no sakem sin.

Hem i askem mi: “Taem bae mi kasem longwe, bae i olsem wanem long heven?”

Mo mi jes talem: “Mi save, jes long wanem mi luk long paoa blong yu blong yusum fet blong yu mo blong fogivim man se taem ia we bae yu gobak hom, bae i wan gudfala taem blong yu.”

Mi gat wan nara toktok blong leftemap tingting long olgeta we, naoia, oli stap askem olgetawan sapos fet blong olgeta long Jisas Kraes bae i inaf blong oli stap strong kasem en. Mi bin gat blesing blong save sam long yufala we i stap lisin naoia, taem yufala i bin yangfala, gat fulap paoa, gat talem bitim sam raon long yufala, be yet, yufala i jusum blong mekem wanem we Sevya bae i mekem. Aot long ol blesing blong yufala, yufala i bin faenem ol wei blong helpem mo kea long olgeta we yufala i sarem ae long olgeta o lukdaon long olgeta, nomata yufala i stap gud.

Taem ol had tes oli kam, fet blong stap strong tru long olgeta bae i stap; yu bin bildimap fet be yu no bin luksave long tetaem ia we yu stap mekem samting wetem bigfala lav blong Kraes, taem yu stap givim seves long ol narawan mo stap fogivim man olsem Sevya bae i mekem. Yu bin bildim wan fandesen blong fet taem yu bin lavem man long wei we Sevya i bin lavem man, mo taem yu bin givim seves long bihaf blong Hem. Fet blong yu long Kraes i bin lidim yu blong mekem ol aksen blong lav we bae i givim hop long yu.

I neva let tumas blong mekem fandesen blong fet i kam strong moa. I gat taem oltaem. Wetem fet long Sevya, yu save sakem sin mo askem blong kasem fogivnes. I gat wan we yu save fogivim. I gat wan we yu save talem tangkyu long hem. I gat wan we yu save givim seves mo leftemap tingting blong hem. Yu save mekem long weaples yu stap long hem mo nomata sapos yu stap yuwan o filim se yu stap yuwan.

Mi no save promesem se trabol bae i finis. Mi no save talem stret long yu se tes blong yu bae oli blong sot taem nomo. Wan long ol samting we i stap long ol tes blong laef i olsem se oli stap mekem klok i slodaon, mo afta, i luk olsem se kolosap i stop.

I gat ol risen from ol samting ia. Blong save ol risen ia, maet i no stap givim tumas kamfot, be i givim filing blong save wet longtaem. Ol risen ia oli kam from wan samting nomo: wetem stret lav we Tufala i gat long yu, Papa long Heven mo Sevya i wantem se yu fit blong stap wetem Tufala blong laef olsem ol famle blong oltaem. Olgeta nomo we oli klin evriwan mo oli jenis tru long Atonmen blong Jisas Kraes, bae oli save stap long ples ia.

Mama blong mi i faet agensem kansa blong kolosap 10 yia. Ol tritmen mo ol operesen, mo afta blong stap long bed, oli bin sam long ol tes blong hem.

Mi tingbaot se papa blong mi i stap talem taem i stap lukluk hem i pulum las win blong hem, “Wan smol gel i go finis long hom blong spel.”

Wan long ol man we i toktok long fenerol blong hem, i Presiden Spensa W. Kimbol. Long medel blong ol gudfala toktok blong hem we hem i bin givim, mi tingbaot wan samting olsem: “Sam long yufala i ting se Mildred i bin safa longtaem olsem mo plante olsem from wan rong samting we hem i bin mekem, mekem se hem i kasem wan tes.” Afta hem i talem se: “No. God nomo i bin wantem blong mekem hem i kam stret gud, smol moa.” Mi tingbaot se long taem ia, mi tingting olsem: “Sapos wan woman we i gud olsem, i nidim blong hem i kam stret gud moa, nao wanem nao i stap long fored blong mi?”

Sapos yumi gat fet long Jisas Kraes, ol taem we oli had moa, mo tu, ol taem we oli isi moa long laef, oli save stap olsem wan blesing. Long evri situesen, yumi save jusum raet wetem help blong Spirit. Yumi gat gospel blong Jisas Kraes blong sepem mo lidim laef blong yumi, sapos yumi wantem. Mo wetem ol profet we oli stap soemaot long yumi ples we yumi stap long hem insaed long plan blong fasin blong sevem man, yumi save laef long wan stret hop mo wan filing blong pis. Yumi neva nid blong filim se yumi stap yumiwan, o yumi no kasem lav long wok blong Lod, from se i neva olsem. Yumi save filim lav blong God from samting ia. Sevya i promesem se bae i gat enjel long lef mo raet saed, blong leftemap yumi. Oltaem, hem i mekem folem toktok blong Hem.¹⁰

Mi testifae se God Papa i laef, mo we Pikinini blong Hem we Hem i Lavem Tumas i Ridima blong yumi. Tabu Spirit i bin konfemem trutok ia long konfrens ia, mo bae i mekem bakegen taem yu lukaotem taem yu stap lisin, mo afta, taem yu stadi long ol mesej blong ol wokman blong Lod we oli gat atoriti, we oli stap ia. Presiden Tomas S. Monson i profet blong Lod long ful wol tedei. Lod i stap lukaotgud long yu. God Papa i stap laef. Pikinini blong Hem we Hem i Lavem Tumas, Jisas Kraes, i Ridima blong yumi. Lav blong Hem i no save go daon. Mi testifae olsem long nem blong Jisas Kraes, amen.