2010–2019
Nce cov Roob
April 2012


Nce tej Roob

Yog tias peb ntseeg Yexus Khetos, yam nyuaj thiab yam yooj yim tshaj hauv lub neej no yuav coj koob hmoov los rau peb.

Muaj ib zaug kuv hnov Thawj Tswj Hwm Spencer  W. Kimball thov Vajtswv hauv lub tuam rooj sab laj kom Vajtswv muab cov roob rau nws nce. Nws hais tias, “Muaj hauj lwm hnyav rau peb ua yav tom ntej. Kuv zoo siab hais tias tej yam no yuav los, thiab kuv txo hwj chim thov tus Tswv kom ‘muab lub roob no rau kuv,’ muab tej kev sim siab no rau kuv ua.”1

Nov tau tshoov kuv lub siab lawm vim kuv paub tias Thawj Tswj Hwm Kimball tau raug kev nyuaj siab ntau. Kuv xav los ua neeg zoo li nws, thiab ua Vajtswv ib tug tub qhe. Tsis ntev tom qab ntawd, muaj ib hmo kuv txhos caug thov Vajtswv thov kom muab ib qho sim siab rau kuv. Kuv nco qab ntsoov. Kuv tau txhos caug hauv kuv chav pw muaj kev ntseeg loj tag npaud mas kuv xav tias kuv lub siab twb yuav tawg tas.

Ob peb hnub tom qab ntawd Vajtswv tau teb kuv tej lus thov lawm. Kuv txais ib qho kev sim siab uas hnyav kawg uas ua rau kuv xav tsis thoob thiab txo hwj chim. Nov qhia kuv ob yam. Yam thib ib, kuv paub tseeb tias Vajtswv tau hnov thiab teb kuv tej lus thov. Tiam sis yam thib ob, kuv pib kawm ua li cas kuv thiaj txaus siab them ntau npaum li cas los tau kom thiaj txais tej koob hmoov uas los thaum raug kev sim siab.

Txoj kev sim siab uas los rau kuv lub sij hawm ntawd mas yeej me me kawg thaum kuv xav txog tej uas tau los rau kuv thiab cov uas kuv hlub tom qab ntawd. Nej coob tug yeej raug kev sim siab ntawm sab cev nqaij daim tawv thiab ntawm sab ntsuj plig uas ua rau nej quaj thov zoo li Vajtswv ib tug tub qhev uas rau siab nntseeg uas kuv paub lawm. Nws tus nais maum hnov nws qw thaum nws mob hais tias: “Ua li cas tej yam no los rau kuv lawm thaum kuv tau sim ua zoo tag kuv lub neej lawm?”

Nej paub tias tus Tswv tau teb tus Yaj Saub Yauxej Xamiv li cas thaum nws nyob hauv tsev nkuaj. Nws hais tias:

“Thiab yog hais tias luag muab koj pov rau hauv lub qhov taub, los yog poob mus rau tej neeg tua neeg txhais tes, thiab raug luag txiav txim tias yuav muab koj tua; yog koj raug muab pov rau hauv dej tob; yog tej nthwv dej hiav txwv tuav hauv tawm tsam koj; yog tej cua daj cua dub rais los ua koj tus yeeb ncuab; yog saum ntuj cia li tsaus tsaus, thiab yog txhua yam ntuj tsim koom siab los rhuav txoj kev; thiab txhua yam, yog hais tias ntuj txiag teb tsaus lub qhov ncauj kiag yuav qhib loj loj raws koj, koj yuav tsum paub, kuv tus tub, hais tias tag nrho tej yam no yuav ua rau koj kawm tej yam tshiab, thiab yuav zoo rau koj.

“Neeg Leej Tub tau txo hwj chim qis tshaj lawv txhua tus. Koj puas zoo dua nws?

“Yog li ntawd, koj yuav tsum nyob twj ywm ntawm koj txoj kev, thiab lub pov thawj hwj yuav nyob nrog koj; vim lawv tej ciaj ciam twb muab teeb cia lawm, lawv hla tsis tau. Twb paub koj lub caij lub nyoog, thiab yuav tsis suav koj tej xyoo kom tsawg; yog li ntawd, tsis txhob ntshai tej uas neeg ua tau, vim Vajtswv yuav nrog koj nyob mus ib txhiab thiab ib txhis li.”2

Tus Tswv Nws tus Kheej, tus uas tau raug kev sim siab ntau tshaj peb txhua tus yuav paub, tau qhia meej lawm rau peb tias ua li cas tej kev sim siab thiaj los rau peb thiab thaum ntawd peb yuav tsum ua dab tsi.

Nej nco txog Nws tej lus thaum Nws ntuas peb tias peb yuav tsum rau siab ntseeg Nws, thiab hloov siab lees txim, hais tias:

”Yog li ntawd kuv txib koj kom cia li hloov siab lees txim---hloov siab lees txim, tsam kuv muab tus pas ntawm kuv lub qhov ncauj, thiab kuv txoj kev npau taws, thiab kuv txoj kev chim siab nplawm koj, ces koj tej kev txom nyem yuav mob heev---mob npaum li cas koj tsis paub, heev npaum li cas koj tsis paub, muaj tseeb tiag, nyuaj ris npaum li cas los koj tsis paub.

”Vim saib seb, kuv, tus uas yog Vajtswv, tau raug tej no rau tag nrho sawv daws, xwv kom lawv yuav tsis raug yog hais tias lawv yuav hloov siab lees txim;

”Tiam sis yog hais tias lawv yuav tsis hloov siab lees txim ces lawv yuav tsum raug kev txom nyem ib yam li kuv;

”Qhov kev txom nyem no uas tau ua rau kuv, tus uas yog Vajtswv, tus uas zoo tshaj plaws ntawm tag nrho sawv daws, kom tshee hnyo vim yog txoj kev mob, thiab los ntshav ntawm txhua lub qhov hws, thiab raug txom nyem ntawm sab cev nqaij daim tawv thiab sab ntsuj plig tib si---thiab tau ua kom kuv tsis xav haus lub khob dej iab, thiab tsum—

”Txawm li ntawd los, cia Leej Txiv tau lub yeeb koob, thiab kuv tau haus thiab tau ua tiav kuv tej kev npaj los mus rau noob neej sawv daws.”3

Nej thiab kuv ntseeg tias peb kov yeej peb tej kev sim siab vim peb ntseeg tias “muaj tshuaj nyob hauv cheeb tsam Nkile-as”4 thiab vim tus Tswv tau cog lus tias, “Kuv yuav tsis tso nej tseg.”5 Nov yog qhov uas Thawj Tswj Hwm Thomas S. Monson qhia peb kom pab peb thiab pab cov uas peb ua hauj lwm pab thaum peb raug tej kev sim siab uas peb xav tias peb kov tsis yeej los sis xav tias peb nyob peb ib leeg xwb.6

Tab sis mas Thawj Tswj Hwm Monson kuj qhia peb tias kev txhim tsa ib lub hauv paus ntawm kev ntseeg uas ruaj khov kho yuav siv sij hawm ntev. Tej zaum nej tau pom cov uas mob siab lawm uas yuav tsis thev mus txog hnub kawg mas, lawv toob kas lub hauv paus no. Yog hais tias lub hauv paus ntawm kev ntseeg no tsis nyob hauv peb lub siab, ces yuav tsis muaj cuab kav thev mus txog thaum kawg.

Hnub no kuv lub hom phiaj yog kom piav tias peb yuav tsum ua dab tsi kom txhim tsa lub hauv paus ruaj khov kho li no. Kuv txo hwj chim yuav qhia ob yam. Yam thib ib, tej zaum cov lus uas kuv hais yuav ua rau cov uas tab tom raug kev sim siab kom lawv poob siab thiab xav tias lawv lub hauv paus tsis ruaj khov lawm. Thiab yam thib ob, kuv paub tias tseem muaj tej yam uas yuav sim kuv lub siab ua ntej kuv tso lub neej teb no tseg. Tej uas kuv hais no yog tej uas kuv tau kawm los lawm tiam sis kuv tseem tsis tau thev mus txog thaum kawg.

Thaum kuv ua ib tug tub hluas, kuv pab ua tej tsev tshiab thiab kho lawv tej lub hauv paus kom ruaj khov lawm. Thaum lub caij ntug sov nyuaj heev rau peb npaj tej av kom thiaj txais cov xe mees uas peb nchuav ua lub hauv paus tsev. Tsis muaj tshuab dab tsi los pab peb npaj cov av no. Peb tsuas siv cov rab daus thiab rab khawb xwb. Yav tas los lawm txoj kev ua tej lub hauv paus tsev mas yeej nyuaj heev.

Yus kuj yuav tsum ua siab ntev. Tom qab yus nchuav tej xe mees kom ua lub hauv paus cia lawm yus yuav tsum tos kom cov xe mees kho khov lawm. Txawm tias peb maj npaum li cas los thiab xav ua hauj lwm ntxiv los peb tseem yuav tsum tos kom khov mam li tshem cov ntoo uas tuav cov xe mees cia.

Thiab cov uas nyuam qhuav pib ua tsev lawv kawm paub tias yus yuav tsum ua siab ntev tshaj thaum yus muab cov pas hlau tso rau hauv cov xe mees kom lub hauv paus thiaj muaj zog dua ntais.

Thiab zoo ib yam li ntawd, peb yuav tsum npaj peb thaj teb zoo zoo kom peb lub hauv paus ntawm kev ntseeg thiaj muaj zog txaus kom nws tiv thaiv txhua yam uas yuav los sim peb siab hauv peb lub neej. Yam uas ua lub hauv paus ntawm txoj kev ntseeg twb yog txoj kev ua ncaj ncees.

Thaum peb xaiv qhov zoo tas mus li thaum twg ib yam los sim peb lub siab mas, nov yuav pab peb lub hauv paus ntawm kev ntseeg haj yam kho khov. Peb pib ua li no thaum peb tseem me me muaj Tswv tus Ntsuj Plig los pab peb. Tus Ntsuj Plig ntawd yuav pab peb paub tias peb puas ua qhov zoo los sis qhov tsis zoo nyob ntawm Vajtswv lub qhov muag.

Tej yam uas peb xaiv, ntau yam txhua hnub, yog qhov uas npaj peb thaj teb zoo zoo kom thiaj ua tau peb lub tsev ntawm kev ntseeg. Tej pas hlau uas nyob hauv peb txoj kev ntseeg no mas yog Yexus Khetos txoj moo zoo nrog rau tej kev khi lus, tej kab ke, thiab tej ntsiab cai.

Ib qho uas yuav pab kom peb muaj kev ntseeg uas kav ntev mus yog kev paub tias nws yuav siv sij hawm ntev li cas kom thiaj ruaj khov. Vim li no kuv thiaj tsis muaj tswv yim zoo thaum kuv tseem hluas thiab kuv thov Vajtswv kom muab tej roob rau kuv nce thiab muab tej kev sim siab rau kuv.

Peb tos tsis tau txog ib hnub ces ua ciav txawm muaj ib txoj kev ntseeg uas ruaj khov lawm xwb, nws yeej siv sij hawm ntev. Peb kuj tsis txais nws thaum peb laus laus lawm thiab. Tiam sis nws los thaum peb ib sij ua hauj lwm pab Vajtswv thiab luag tej tag peb lub siab lub ntsws, ces peb zaj lus tim khawv txog tej kev tseeb thiaj rais los mus ua ib qho uas muaj dag zog ntawm peb sab ntsuj plig.

Nim no, kuv xav ntuas nej cov uas tab tom raug kev sim siab, cov uas xav tias lawv txoj kev ntseeg tsis tshua khov lawm vim muaj kev kub ntxhov. Tej kev sim siab no yog ib qho uas yuav pab nej txoj kev ntseeg kom ruaj khov lawm. Maulaunais, Maumoos tus tub hauv Phau Ntawv Maumoos, qhia peb tias tej yam no los li cas lawm rau peb. Nws qhia peb tias yog peb muaj kev cia siab rau Vajtswv ib nyuag qhov lawm ces peb txais tau:

“Thiab nim no, kuv, Maulaunais, yuav hais me ntsis txog tej yam no; kuv yuav ua rau ntiaj teb paub tias txoj kev ntseeg yog tej yam uas cia siab rau thiab tsis pom; yog li ntawd tsis txhob cam vim nej tsis pom, vim nej yuav tsis pom ib qho tim khawv mus txog thaum nej txoj kev ntseeg twb raug muab sim lawm tso.

“Vim nws tau yog los ntawm txoj kev ntseeg uas Khetos tau ua nws tus kheej rau peb tej yawg koob pom, tom qab uas nws tau sawv hauv qhov tuag los; thiab nws tsis tau ua rau lawv pom nws mus txog tom qab uas lawv tau muaj kev ntseeg nyob hauv nws; yog li ntawd, nws yeej yuav tsum yog tias ib txhia tau muaj kev ntseeg hauv nws, vim nws yeej tsis tau ua nws tus kheej rau ntiaj teb pom.

“Tiam sis vim yog tib neeg txoj kev ntseeg nws tau ua nws tus kheej rau ntiaj teb pom, thiab tau qhuas Leej Txiv lub npe, thiab tau npaj ib txoj kev xwv kom los ntawm qhov ntawd lwm tus yuav tau ua cov uas tau txais tej txiaj ntsim saum ntuj, xwv kom lawv yuav cia siab rau tej yam uas lawv tsis tau pom.

“Yog li ntawd, nej los kuj yuav tsum muaj kev cia siab, thiab ua cov uas tau txais qhov txiaj ntsim ntawd, yog nej tsuas yuav muaj txoj kev ntseeg.”7

Hais txog tag nrho nej txoj kev ntseeg mas, qhov uas nej yuav tsum siv tag li yog nej txoj kev ntseeg tus Tswv Yexus Khetos. Maulaunais qhia txog peb txoj kev ntseeg li no, hais tias: “Thiab ib txwm tsis muaj ib lub sij hawm uas muaj tau tej txuj ci tseem ceeb mus txog tom qab uas lawv muaj txoj kev ntseeg; yog li ntawd, lawv yeej xub ntseeg Vajtswv Leej Tub tso.”8

Kuv tau mus xyuas ib tug poj niam uas muaj zog heev muaj peev xwm nyiaj tej kev sim siab, nws tsuas tej lus me me hais tias “Kuv paub tias kuv tus Cawm Seej nyob tiag”9 ces nws nyiaj los tau. Nws txoj kev ntseeg no thiab nws tej lus tim khawv no yeej ruaj khov lawm txawm tias nws laus lawm thiab tsis tshua nco txog nws lub neej thaum nws tseem hluas.

Kuv kuj xav tsis thoob thaum kuv kawm paub txog lwm tus poj niam uas tau zam txim rau ib tug uas ua tsis zoo rau nws rau ntau xyoo lawm. Kuvxav tsis thoob thiab noog nws saib nws ua tau dab tsi kom thiaj zam txim li no txawm twb ua txhaum rau nws ntau xyoo los lawm.

Nws teb tias, “Qhov ntawd yog qhov nyuaj tshaj plaws. Kuv tsuas paub tias kuv yuav tsum zam txim. Yog li ntawd kuv txawm ua li ntawd xwb.” Nws txoj kev ntseeg tias tus Cawm Seej zam tau peb lub txim yog qhov uas pab nws zam txim rau nws tus yeeb ncuab es ua rau nws muaj kev thaj yeeb nyab xeeb thiab kev cia siab thaum nws yuav tso lub neej no tseg ob peb hlis tom qab nws zam txim tas.

Nws nug kuv hais tias, ”Thaum kuv mus txog lawm, yuav ua li cas thiaj yog ntuj ceeb tsheej?”

Thiab kuv tias, ”Kuv paub vim kuv twb pom koj txoj kev ntseeg lawm thiab koj txoj kev txawj zam txim koj thiaj yuav muaj kev zoo siab heev thaum koj rov qab mus tsev no.”

Kuv kuj muaj lwm cov lus ntuas rau cov uas tsis paub tias lawv tej kev ntseeg Yexus Khetos puas txaus kom thev mus txog hnub kawg. Kuv tau koob hmoov vim kuv tau paub nej ib co thaum nej tseem hluas, muaj zog, thiab muaj ntau tshaj cov uas nyob ncig nej, tiam sis txawm li ntawd los nej tseem txiav txim siab ua tej uas tus Cawm Seej yuav ua. Txawm tias nej muaj ntau nplua mias los, nej tseem tau pab cov uas tsis muaj npaum li nej.

Thaum tej kev sim siab los, nej yuav muaj txoj kev ntseeg txaus uas yuav pab nej nyiaj dhau tej kev sim siab, vim nej tau ua li Yexus yuav ua. Nej tau pab thiab zam txim rau luag zoo li tus Cawm Seej yuav ua. Nej tau txhim tsa ib lub hauv paus ruaj khov vim nej tau hlub thiab ua raws li tus Cawm Seej hais. Nej txoj kev ntseeg Nws yuav pab nej muaj kev cia siab.

Yeej tsis lig dhau rau nej tau txhim tsa nej lub hauv paus ntawm kev ntseeg. Yeej tshuav sij hawm. Yog tias nej ntseeg tus Cawm Seej, nej mauj cuab kav hloov siab lees txim thiab thov kom tau kev zam txim. Yeej muaj lawv cov uas koj zam tau lawv lub txim thiab. Yeej muaj cov uas koj hais tau ua tsaug rau. Yeej muaj lawv cov uas koj pab tau. Nej ua tau tej yam no nyob qhov twg los tau thiab txawm tias nej tau raug kev tu siab npaum twg lawm los xij.

Kuv cog lus tsis tau tias nej yuav tsis raug kev sim siab. Kuv hais tias tau tias nej tej kev sim siab yuav nyob ib pliag xwb. Tej yam uas sim peb siab mas, nws zoo li ib lub moo uas tsis ua hauj lwm ntxiv nws nyob nyob mus tsis txawj tas.

Yeej muaj ib lub ntsiab lus rau qhov no. Tej yam uas sim peb siab mas ib txwm tsis nplij peb siab, tiam sis qhia kom peb muaj siab ntev. Peb raug kev sim siab vim li no: Peb Leej Txiv Saum Ntuj thiab peb tus Cawm Seej hlub peb tag npaud tias Nkawd xav kom peb ua tsev neeg nyob ua ke nyob mus ib txhis. Cov uas raug ntxuav kom huv lawm los ntawm Yexus Khetos txoj kev Theej Txhoj thiaj ua tau li no.

Kuv niam raug mob cancer rau 10 xyoo. Tej uas sim nws lub siab mas yog tej tshuaj thiab tej kev phais thiab thaum kawg txoj kev nyob twj ywm pw hauv txaj xwb.

Kuv nco txog tej uas kuv txiv hais thaum kuv niam tso lub neej no tseg, nws hais tias, “Tus me ntxhais no rov qab mus tsev kom thiaj so.”

Nws tus txiv hluas Thawj Tswj Hwm Spencer W. Kimball tau hais lus hauv nws txoj kev pam tuag. Nws hais ntau yam zoo, tiam sis kuv nco txog thaum nws hais tias: “Tej zaum muaj nej ib co uas xav tias Mildred no tau raug kev sim siab ntev li no vim nws tau ua dab tsi hauv nws lub neej uas ua rau nws raug kev sim siab. Tiam sis tiag tiag mas, Vajtswv xav npaj nws zoo dua.”

Yog tias peb ntseeg Yexus Khetos, peb yuav txais koob hmoov hauv tej lub caij nyuaj thiab tej lub caij yooj yim huv tib si. Txhua lub sij hawm, peb muaj cuab kav xaiv tau yam zoo thaum peb cia tus Ntsuj Plig coj peb kev. Peb muaj Yexus Khetos txoj moo zoo los pab peb thiab coj peb kev yog peb txiav txim ua li ntawd. Thiab peb txais tau kev thaj yeeb nyab xeeb vim peb muaj cov yaj saub uas niaj hnub qhia peb txog peb txoj kev cawm seej peb thiaj muaj tau kev cia siab thiab kev thaj yeeb nyab xeeb. Thiab peb yeej tsis nyob peb ib leeg xwb vim peb muaj cov uas nrog peb nyob. Peb txais tau tus Tswv txoj kev hlub. Tus Cawm Seej tau cog lus tias Nws yuav txib tej tim tswv los nyob ntawm peb sab laug thiab sab xis kom txhawb nqa peb.10 Thiab Nws yeej ua raws li Nws cog lus tseg lawm.

Kuv ua tim khawv tias Vajtswv peb Leej Txiv nyob thiab tias Nws Tib Leeg Tub yog peb tus Txhiv Dim. Tus Vaj Ntsuj Plig Dawb Huv tau qhia qhov tseeb hauv lub tuam rooj sab laj no thiab yuav ua ib yam tom ntej thaum nej kawm tus Tswv cov tub qhe tej lus. Thawj Tswj Hwm Thomas S. Monson yog tus Tswv tus yaj saub hauv lub ntiaj teb no niaj hnub nim no. Kuv ua tim khawv li no los ntawm Yexus Khetos lub npe zoo, a-mees.