Nahna Kan Mehn Daur

I rong President Spencer W. Kimball nan ehu mihting en tiepene eh peki Koht en ketikihieng nahna kan en daur. E nda: “Mie kasongosong lap mwohtail, ansou mwahu lap mehn epwella. I kasamwoh irair kaperen wo oh men patohiong Kauno, ni karakarahk, “Ketikihieng ie nahna wet,’ ketikihieng ie kasongosong pwukat.”¹

Mohngiongie mwekidida, pwehki, ei ese, duwen ekei kahpwal kan oh kasongosong kan me e sohpaier. I ahniki pepehm en men ahpwete duwehla ih, sounpapah soupeikasal en Koht. Eri ehu nihpwongo I kapakapki sikeng en kamehlel ahi soupeikasal. I taman ni sansal. Nisoutiko I kelepwikihdi nan taht en ahi pereo ni pwoson me mwomwen kerenieng pahn audehla mohngiongi lao widiwidekiei.

Mwurin rahn ehu de riau ahi kapakapo pasapengla. Kasongosong me keieu apwal nan ahi mour kapwuriamweiihie oh kihieng ie karakarahk. E kidohng ie padahk ehu me paliriau. Keieu, I alehdi kamehlel me Koht ketin karonge oh sapeng ahi kapakap en pwoson. Ahpw keriau, I tapiada padahk ehu me wihwiawihte en esehla kahrepen ahi ahniki soangen koapwoaroapwoaro nihpwongo me kapai lap ehu kak kohdo sang kasongosong me pahn lipw laud dauliala suwedih.

Kasongosong me I lelohng nan rahn samwalahr pwuko met mwomwen tikitik ni ahr karasarasohng dahme kohdohier mwurin mwo—ong ie oh irail akan me I poakohng. Tohto kumwail mihmi nan kasongosong met me pid paliwar, pali en madamadau oh pali en pepehm, me kak elehieng kumwail en werkihla duwehte emen Sapwellimen Koht sounpapah lap me I ese mwahu. Me kin apwaliho rong eh ndahla sang ah peht en weireko, “Nan ei nantihieng erein ahi mour en kin mwahu, dahme met wiawihkiong ie?”

Kumwail ese duwen Kauno eh sapeng peideko ong Soukohp Joseph Smith nan imwetengo:

Kauno mahsanihong Joseph Smith me ma e pahn lekideklong nan pwoahr loal, de nan pehn soun kam aramas, oh koasoandihieng mehla; ma e pahn lekideklong nan pihl loal kan; ma ilok kan pahn anginda uhwong ih; ma kisinieng uk kan pahn wiahla ah imwintihti; ma lahng kan pahn rotorotla, oh soahng kan koaros patpene pwehn perehla ahlo; oh pohnangin mehkoaros, ma ewen ehl pahn sarahpeseng ewe laud mwurumw, e konehng ese me mepwukat koaros pahn kihieng ih koahiek, oh pahn ong kamwahupe.

Kauno mahsanih me Nein Aramas kohdi pahnangin koaros, Joseph laudsang Ih?

Kauno mahsanih en kolokolohngete ahlo, oh priesthood konehng en mihmi reh; pwe irepe kan soandihier, re sohte kak daulih. Ahn Joseph rahn akan dehdehier, oh ah sounpar akan sohte pahn malaulausang; e konehng en dehr masak dahme aramas kak wia, pwe Koht pahn mihmi reh kohkohlahte erein (tehk D&C 122:7–9).²

E mwomwen me sohte pasapengpen peidek en ia kahrepen kasongosong kan ahr kin kohdo oh dahme kitail en wia, me mwahusang mahsen en Pein Kauno, me powehdi kasongosong me apwalsang me kitail kak lemehda, pwehki kitail.

Kumwail taman Sapwellime mahsen ni ansou me E kaweidki me kitail konehng, sang ni pwoson Ih, koluhla:

Sounkomouro mahsanihong kitail en koluhla pwe E de woakihkin kitail tuhke en ewe oh sang ni Ah engieng, oh sang Ah lingeringer, oh atail lokolok pahn apwal—uwen apwal kitail sohte pahn ese, uwen kaselel kitail sohte pahn ese, uwen apwal en kakehng kitail sohte ese.

Sounkomouro mahsanih me e lokolongki soahng pwukat pwehki koaros pwe irail en kak dehr lokolok ma re pahn koluhla.

Sounkomouro mahsanih me ma aramas sohte pahn koluhla, irail pahn anahne lokolok duwe Ih.

Sapwellime lokolok kahrehieng Ih, lella Koht, me lapalapsang koaruhsiehn, en rerrerki weirek, nta en keresang kisin pwoahr kan ni kili, oh en lokolok ni paliwar oh pali ngehn. Weireko uwen laud me E peki ma E pahn kak en pitisang;

Ahpw, E ketikihieng Sahmo kilohri. E alehda oh kanekehla Sapwellime kaunop kan ong kitail (tehk D&C 19:15–19).³

Kumwail oh ngehi ahniki pwoson me ahl en uhdahsangnanpwungen oh pohnangin kasongosong kan iei en kamehlele me mie “wini nan Kilead”⁴ oh me Kauno inouki, “Sohte me pahn kak kaloweiukedi.”⁵ Iei me President Thomas S. Monson padahkihieng kitail pwehn seweseikitail oh irail akan me kitail kin papah nan dahme mwomwen wia kasongosong kan me kaloaloid oh toutou mehlel.⁶

Ahpw President Monson pil padahngki ni eripit me poahsoan ehu en pwoson ni me pid mehlelpen inou pwuko kin anahne ansou en kakairada. Kumwail mwein kilangehr anahnepen poahsoano, duweie, limwahn peht en emen me pahn pwangehr en dadaurete lel imwi. Ma poahsoan en pwoson wo sohte pahn loaledi nan mohngiongitail kan, manaman en dadaurete lel imwi pahn mweredi.

Ahi pwukoa rahn wet iei en kawehwehda dahme I ese me pid duwen atail kak wiahda poahsoan tengeteng wo. I wia met ni karakarahk mehlel pwehki kahrepe riau. Keieu, dahme I pahn nda kak kaluwetehla ekei me nannanti met nan kahpwal laud oh me pehm me arail poahsoan en pwoson wie mweremweredi. Oh keriau, I ese me kasongosong kan me ahpwete laudsang, I pil sosohpaite mwohn imwin ahi mour. Eri, kaweid me I kihieng kumwail saikinte kamehlel nan pein ahi mour sang dadaurete lel imwi.

Ni ei mwahnakapwo I iang doadoahk wiahda takain pwukekeimw oh poahsoan en ihmw kapw. Nan karakar en summer e kin apwal en doadoahk pwehn kaunopada pwehlo ong koakoan dinapw me se pahn widekihieng siment loale ong poahsoano. Sohte misihn. Se kin doadoahngki mete oh sapwel. Kauwada poahsoan en ihmw me pahn werei iei doadoahk laud nan rahn pwuko.

E kin mie anahnepen kanengamah. Mwurin aht wideki siment en takain pwukekeimw ko, se kin awih lao e madala. Mendahte aht kin men kerua doadoahko, se pil kin awih mwurin aht wideki poahsoano mwohn aht kihsang dinapw ko.

Me pil ahpwete kapwuriamwei ong me apwtehn pahn tepida nan doadoahko iei dahme mwomwen wia doadoahk kapwang oh kangala ansou en kihieng rihpoar mete kan nan koakoan dinapw kan pwehn kakehlailih poahsoano.

Pil duwe met, pwehlo anahne en kaunopda mwahu ong poahsoan en pwoson pwehn kakehng melimel kan me pahn kohdo nan mour koaros. Audepe kehlail ong poahsoan en pwoson iei mour mwahu en emenemen.

Atail kin kalapw pilada me pwung ni ansou me pilipil kin pwilidi mwohtail kin wiahda pwehl kehlail pahn atail pwoson. E kak tepida ni atail seri pwehki ngehn koaros ipwikihdi kisakis sohte isepe en Ngehn en Krais. Sang Ngehno me kitail kak ese ansou me kitail kin wia dahme pwung mwohn Koht oh ni ansou me kitail kin wiahda sapwung mwohn Sihlahngih.

Pilipil pwuko, epwiki kei ni pali laud en rahn akan, kin kaunop pwehl kehlail me ihmw en atail pwoson pahn kokouda powe. Koakoan mete me audepen atail pwoson kin widekieng loale iei rongamwahu en Sises Krais, me iangahki inou kan, tiahk sarawi kan, oh tepin padahk kan.

Ehu kih kan en pwoson tengeteng iei en kasawih ni pwung ansou me anahn ong en teng. Met me kahrehda I sohte eripit en kapakapki nohn mwadang nan ei mour nahna kan en daur oh kasongosong kan me ahpwete laud.

En kamad de teng sohte kin kohdohte pwehki ansou eh doula, ahpw e kin anahne ansou. Mahla sohte kin kelehpw wahdo. Iei kalapw papah Koht oh mehteikan ni mohngiong oh ngehn unsek me kin wikidala kadehde en mehlel ong kehlail en pali ngehn me sohte kak ohla.

Met, I men kangoange irail akan me mih nanwerengen arail kasongosong kan, me pehm me arail pwoson kakete wie sansarala pahn diren kahpwal laud. Kahpwal kak pil wia amwail wiepen alehdi kakehlail oh kedekedeo alehdi pwoson tengeteng. Moroni, nein Mormon pwutak nan Pwuken Mormon, padahkihieng kitail duwen kapai wo eh kak kin kohdo. E padahkihieng kitail duwen mehlel mengei oh mwahu me mwekidki menda ma kisin rah kis en pwoson eh kin mweidehng Koht en kakairada:

Moroni padahngki me pwoson iei soahng kan me kitail kasik me sohte sansal; eri, kitail sohte konehng akupwungki pwehki atail sohte kilang, pwe kitail sohte pahn alehdi kadehdehpe lao mwurin kasongosong en atail pwoson.

E mahsanih me iei sang ni pwoson me Krais kasalehda pein ih ong atail pahpa ko, mwurin eh iasada sang mehla; oh E sohte ketin kasale pein Ih ong irail lao irail pwoson Ih; eri, uhdahn mwein te mie ekei me pwoson Ih, pwe E sohte ketin kasalehda pein ih ong sampah.

Ahpw pwehki pwoson en aramas E ketin kasalehda pein Ih ong sampah, oh kalingana mwaren Sahmo, oh kaunopada ahl me mehteikan en kak iang alehda kisakis kaselel wo pwe irail en kak kasik soahng kan me re sohte kilang.

Eri, kitail pil ahniki koapwoaroapwoar, oh wia soun alehda kisakiso, ma kitail pahnte ahniki pwoson (tehk Ether 12:6–9).⁷

Kisin weren pwoson wo me keieu kesempwal oh me kumwail konehng sile oh doadoahngki ni uwen me kumwail kak iei pwoson Kaun Sises Krais. Moroni padahngki manaman en pwoson wo sang ni eh nda me sohte ansou ieu me aramas kapwaiada kapwuriamwei kan lao mwurin arail pwoson; eri irail tepida mahs kamehlele Iehros en Koht (tehk Ether 12:18).⁸

I pwarekehr lih emen me alehdi manaman en kehlail pwehn kakehng irair inenen apwal en eh mie me salongasang ih sang ni ihte mwekid mengei en kak kapwkapwurehieng lepin lokaia kan, “I ese me ahi Soundoaro ieias.”⁹ Pwoson wo oh lepin lokaia pwuko en kadehde sang ni ah tikitiko mihmihte nan edied me karotongehla ahpw sohte kihsang douluhl ah madamadau.

I pwuriamweiki ei esehda me emen lih tohrohr mahkehng aramas emen me wie sapwung ong ih erein sounpar kei. I pwuriamweiki oh idek reh kahrepen eh pilada en mahk oh manokehla soangen tohtohn sounpar pwuko en wiakau lemei.

E nda ni ngihl tikitik, “Ih me keieu apwal me I wiahier leledo met, ahpw I esehte me I anahne wia. Eri I wia.” Ah pwoson me Sounkomouro pahn mahkohng ih ma e mahkohng mehteikan kaunopiki ih pepehm en meleilei oh koapwoaroapwoar ni eh sohpai mehla sounpwong kei te mwurin eh mahkehng ah imwintihtio me sohte men koluhla.

E idek rehi, “Ni ansou me I pahn lella mwo, pahn ia mwomwe nanleng?”

Oh I nda, “I ese sangete dahme I kilangehr duwen omw koahiek en doadoahngki pwoson oh en mahk me e pahn wia sapahlla kaselel ehu ong nihmwo ong komwi.”

Mie pil ehu ahi kangoang ong irail akan me met medemedewe ma arail pwoson Sises Krais pahn itar irail en dadaurete lel imwi. I kapaikihda ahi ese ekei kumwail me wie rongorong met ni amwail pwulopwul, pwahtiet, oh koahieksang tohtohn me kapil kumwail, ahpw kumwail pilada en wia dahme Sounkomouro pahn wia. Sang amwail paiamwahu kumwail diar wiepe tohto en sewese oh apwalih irail akan me kumwail kakete pohnsehsehla de kilengdieng sang ni dewemwail nan mour.

Ni ansou me kasongosong apwal kan kin kohdo, pwoson en kak dadaurete ni mwahu pahn mie, kokouda ni amwail mwein tehkadahr met ahpw mwein sohte tehk ni ansouo me kumwail mwekidki limpoak unsek en Krais, wie papah oh mahkohng mehteikan ni duwen me Sounkomouro pahn wia. Kumwail kauwada poahsoan en limpoak sang amwail kin poak ni duwen Sounkomouro eh kin poak oh ni papah pwehki Ih. Amwail pwoson Ih me elehieng mwekid kan en limpoak unsek me pahn wahdohng kumwail koapwoaroapwoar.

E sohte pak ehu pahn pwandala en kakehlailih poahsoan en pwoson. Kin ansou koaros mie ansou ong met. Sang ni pwoson Sounkomouro, kumwail kak koluhla oh pekimahk. Mie emen me kumwail kak mahkehng. Mie emen me kumwail kak kalahnganohng. Mie emen me kumwail kak papah. Kumwail kak wia sohte lipilipil wasa me kumwail mihie oh sohte lipilipil uwen kelehpw de likidedkla me kumwail pehm.

I sohte kak inouki imwilahn amwail kasongosong nan mour wet. I sohte kak ndahieng kumwail me amwail kasongosong kan pahn mwomwen wia ansoukiste ong kumwail. Ehu mwohmw kan en kasongosong en mour iei me re kin mwomwen wiahda kuloak en wawaila oh eri mwomwen uhdi.

Mie kahrepen met. En ese kahrepe pwuko sohte kin kansenamwahu, ahpw e kak kihieng kumwail pepehm en kanengamah. Kahrepe pwuko kin kohdo sang ehu te ire: ni Ara limpoak unsek ong komwi, Sahm Nanleng oh Sounkomouro kupwurki kaunop komwi en mih Rehra pwehn mour nan peneinei kan kohkohlahte. Ihte irail akan me wideud pwehn mwakelekel unsek sang ni Tomw en Sises Krais kak mih mwo.

Ahi nohnohu pelian kanser kerenieng sounpar 10. Wini oh koadoahk kan oh kedekedeo sohla kakasang nan peht iei ekei ah kasongosong.

I taman ahi pahpao eh nda ni eh kilang ah esingek apwaliki keimwseklahn ah esingek, “Emen kisin serepein samwalahr nihmwo pwehn kommoal.”

Emen sounkapahrek ni ah mehlao iei President Spencer W. Kimball. Nanpwungen kawahu kan me e kihda, I taman ehu me duwe met: “Ekei kumwail mwein leme me Mildred lokolok werei oh laud pwehki mehkot sapwung me e wia me miehki anahnepen kasongosong ko.” Ih eri mahsanih, “Soh, iei pwehki Koht kupwurki kamwahuiala ekis.” I tamanda ei medewe ansouo, “Ma lih emen me mwahu duwe mwo anahne soangen kamwahula wo, dahme kohkohdo ong ie?”

Ma kitail pwoson Sises Krais, ansou kan me keieun apwal iangahki me keieun mengei nan mour kak wia kapai ehu. Nan irair koaros, kitail kak pilada me pwung sang ni kaweid en Ngehno. Kitail ahniki rongamwahu en Sises Krais en kamwakid oh kaweid atail mour kan ma kitail pahn pilada. Oh sang ni soukohp akan ahr kapwkapwurehieng ong kitail duwen dewetail nan pilahn en komouro, kitail kak mouriki koapwoaroapwoar unsek oh pepehm en meleilei. Kitail sohte anahne pehm me kitail kelehpw de me sohte me poakohng kitail ni atail papah Kauno pwehki kitail sohte kin sopwoupwou. Kitail kak kehn limpoak en Koht. Sounkomouro inouki me e pahn mie tohnleng ni pali maun oh pali meing, en utungkitailda.¹⁰ Oh E kin kapwaiada Sapwellime mahsen ansou koaros.

I kadehdeh me Koht Sahm ieias oh me Sapwellime Iehros Kempoake iei atail Sounkomour. Ngehn Sarawi kamehlel duwen mehlel pwoatet nan tiepene wet oh pahn pil pwurehng ni amwail rapahki, ni amwail rong, oh ni amwail onopiki mwuhr kaweid kan en sapwellimen Kauno sounpapah koasoandi kan, me pato met. President Thomas S. Monson iei sapwellimen Kauno soukohp ong sampah pwon. Kauno ketin tetehk kumwail. Koht Sahm ketin ieias. Sapwellime Iehros Kempoake, Sises Krais, iei atail Soundoar. Sapwellime limpoak poatoapoat. I kadehdehki ni mwaren Sises Krais, ahmen.