Ena Kena iVakarau Dodonu Wale Ga

Ni oti ga e dua na vula neirau vakamau, keirau a vodo vakabalavu tu ena motoka vata kei na marama watiqu. A draiva tiko o koya, kau tovolea meu vakacegu tu mada. Au tukuna na tovolea baleta ni gaunisala levu keirau muria tiko e kilai levu tu ni vanua dau yadravi matua ena draiva vakatotolo, ka yaco vei watiqu me via draiva sara toka vakatotolo ena siga o ya. Au kaya yani, “O sa rui lako vakatotolo; Vakamalua mada.”

A vakasamataka vakaikoya na watiqu vou, “Io, sa voleka ni 10 na yabaki noqu draiva tiko, e se bera vakadua ni bau dua me tukuna vei au ena gauna e liu meu draiva vakacava, vakavo ga noqu qasenivuli ni draiva.” A qai sauma lesu, “Na dodonu cava e tu vei iko mo tukuna kina vei au se meu draiva vakacava?”

Au dina sara ga, au leve davo sara ga ena nona taro. Ia, na noqu vakila na gagadre me toso cake na noqu itavi me vaka edua na turaga vakawati vou, au kaya, “Au sega ni kila-baleta ni o au na watimu ka tu vei au na matabete.”

Kemuni na taciqu, dua ga na ivakasala totolo: kevaka mo ni na sotava na ka vata o ya, e sega ni isau ni taro dodonu. Kau marau meu tukuna, ni se qai vakadua ka sa ikoya duadua ga oqori na gauna au vakayacora kina na cala o ya.

E vakamacalataka na Vunau kei na Veiyalayalati na dodonu ni kena vakayagataki na matabete e vale se evei tale na vanua e sa semati vakadodonu sara ga kei na bula savasava ena noda bula: “Ia e sega ni rawa me taurivaki se vakayacori na kaukauwa vakalomalagi ena sala tani, ena kena ivakarau dodonu ga.”¹ E toso tale na kena tukuni ni da vakayalia na kaukauwa o ya ena gauna eda “viavia lewai ira na [tani], se taurivaka ena ivalavala e sega ni dodonu.”²

E tukuna na ivolanikalou oqo ni dodonu meda liutaki mai ena “kena ivakarau dodonu.” Na kena ivakarau oqo e vakayagataki kivei ira kece na iliuliu ni Lotu vaka kina kivei ira kece na tama kei na tina ena nodra veivuvale.³ Eda vakayalia noda dodonu vua na Yalo ni Turaga kei na kaukauwa cava ga e solia vei keda na Kalou ena noda viavia lewai ira na tani ena ivalavala sega ni dodonu.⁴ E rawa beka ni da nanuma ni ivakarau vakaoqori e vinaka vua e dua na tamata “na bula lewai.” Ia na gauna ga eda tovolea kina meda vakasaurarataka e dua ki na bula savasava ni rawa ka dodonu vua me cakacakataka na nona digidigi vakaikoya ni bula savasava, eda sa cakava tiko na ivalavala sega ni dodonu. Na kena tuvai na vakadeitaki ni iyalayala me baleta e dua tale na tamata e sa dodonu, na iyalayala oqori e dodonu me wasoma na kena qaravi ena vosota ena yalololoma kei na dua na kena sala ni vakavulica na ivakavuvuli tawamudu.

E sega ni rawarawa noda vakasaurarataki ira eso mera cakava na ka dodonu. Na ivolanikalou e sa vakamatatataka ni sega ni o koya oqo na sala ni Kalou. Na veivakasaurarataki e tara cake na besetaka. E vakadewataka na sega ni veivakabauti ka vakavuna mera vakila na tamata na lecaika. E yali na madigi vivinaka ni vuli, ena nona vakabauta na tamata ka vakatulewa tiko ena dokadoka ni tu vua na kena isau dodonu ni ka kece sara me baleti ira tale eso. E tukuna na ivolanikalou ni “sa ivakarau ka itovo ni tamata kece ga” me tauca sara na “lewa tawadodonu,”⁵ sa dodonu kina vei keda meda qarauna ni sa rawarawa na coko ena dai oqori. E rawa tale ga vei ira na marama mera vakayacora na lewa tawadodonu oqo, dina ga ni ivolanikalou e vakatakila tu na leqa vakabibi vei ira na turaga.

Na vakatulewa tawadodonu e wasoma na kena sala vata mai kei na tudei ni vakalelewa kei na kena vesuki tu na veivakadonui se loloma. O ira mera ciqoma era vakila ni ra sega ni rawa mera vakayalovinakataki ira na iliuliu se itubutubu ka ni ra sa dau druka tu ga. O ira na itubutubu vuku e dodonu mera kila na gauna era sa vakarau tu kina na gonelailai mera tekivu cakacakataka nodra dui galala ni digidigi vakataki ira vakabibi na nodra vanua ni bula. Ia kevaka era taura tu ga na itubutubu na kaukauwa ni vakatulewa kece sara ka raica me vaka ni sa nodra “dodonu,” era sa yalana sara ga vakabibi na nodra tubucake kei na nodra vakatorocaketaki na luvedra.

E vakaiyalayala ga na gauna ni nodra tiko e noda vale o ira na luveda. Kevaka meda waraka nodra sa biubiu yani e vale ka qai soli kivei ira na kaukauwa ni nodra galala dina ni digidigi, eda sa rui wawa vakadede. E sega ni vakasauri ga nodra bucina mera rawata na vakatulewa vuku kevaka a sega vakadua ni bau soli vei ira na galala mera cakava na vakatulewa bibi cava ga ena nodra a se tiko voli e noda veivale. O ira na gonelalai vakaoqori e vakawasoma nodra dau saqata na ka mai na veivakasaurarataki oqo se sa sega kina ni rawa vei ira mera dau vakatulewa ga vakataki ira.

O ira na itubutubu yalomatua era vakavakarautaki ira na luvedra mera rawata nodra bula vakataki ira. Era vakarautaka na gauna donu me baleta na tubu cake me vaka na gonelalai era rawata vakataki ira na yalomatua vakayalo mera cakacakataka kina vakamatau na nodra galala ni digidigi. Io sa dina, e kena ibalebale oqo ni o ira na gonelalai era na dau caka cala ena so na gauna ka ra vuli mai kina.

Na neitou matavuvale a vakavulici keitou ena neitou sotava e dua na ka me baleta nodra vukei na gonelalai me vakatorocaketaki kina nodra rawa ni cakava nodra digidigi. Na luvei keirau yalewa, o Mary, a dua na dauqito kilai tani ena soka nona tubu cake tiko. A yacova me jabeni na nona timi ena dua na yabaki ia, kila na cava, na qito o ya a qai dodonu me vakayacori ena dua na Siga Tabu. Me vaka ga e dua na gone yabaki tini vakacaca, e sa vica vata na yabaki nona vakavulici o Mary ni Siga ni Vakacecegu sa ikoya e dua na siga ni vakacegu kei na veivakaukauwataki vakayalo, ka sega ni siga ni qito. Ia a vakila vakaukauwa na nodratou vinakata me qito ga o iratou na nona dauniveivakavulici kei ira na lewe ni timi, vaka kina na gagadre me kua ni vakayalorarawataka nona timi.

A tarogi keirau se cava e dodonu me cakava. A rawa sara tu ga vei keirau vakaveiwatini me keirau vakatulewa ena vukuna. Ia, keitou a sa vakatulewataka ni oti neitou masumasu ka vakanananutaka na tikina oqo ni sa tu vakarau me taura na luvei keirau goneyalewa na itavi vakayalo me baleta na nona vakatulewa ga vakaikoya. Keitou wilika vata kei koya eso na ivolanikalou, ka vakauqeti Mary me masu ka vakasamataka.

Ni mai cava e vica na siga sa tukuna sara na nona vakatulewa. E sa na qito ena Siga Tabu. Na cava me keirau cakava ena gauna oqo? Ni oti tale eso na veivosaki kei na ciqomi ni veivakadeitaki mai vua na Yalotabu, keirau cakava na veika keirau yalataka ka vakadonuya me vakayacora yani nona digidigi me qito. Ni mai cava na qito, a lako vakamalua yani o Mary vei tinana ka wawa toka mai. “Isa, Nau,” a kaya, “au sa bau cata dina saraga na ka ca o ya. Au sega ni na vinakata tale vakadua me yaco vei au. Au na sega tale vakadua ni qito ena Siga ni Vakacecegu.” Ka mai sega vakadua tale yani.

Ena gauna oqo sa qai kila vakaikoya o Mary na kena maroroi ka vakatabui na Siga ni Vakacecegu. Kevaka me keirau a vakasaurarataki koya me kakua ni qito, ke keirau a vakuwai koya mai na dua na vuli vakamareqeti ka kaukauwa a sotava vata kei na Yalotabu.

Me vaka o ni sa rawa ni raica, nodra vukei na gonelalai mera cakacakataka vakamatau nodra galala ni digidigi ka gadrevi mera vakavulici ena masumasu ka ciqoma na isau ni nodra masu. E dodonu tale ga me tiko na ivakavuvuli me baleta na kena yaga kei na inaki ni talairawarawa vaka kina me baleta na veivakavuvuli yaga kece sara ni kosipeli.⁶

Ena susugi cake ni noda matavuvale, eda sa vakatulewataka me noda inaki bibi duadua na nodra vukei na luveda mera tauyavutaka na kedra dui isema ki lomalalgi. Eda kila ni na yaco na gauna era na gadreva kina mera vakararavi vua na Turaga, se vei keda. A kaya o Brigham Young, “E dodonu beka meu vola e dua na ivakamacala ena itavi taucoko sara ka na vakacolati kivei ira na luve ni tamata, … au na biuta me kena ilutua na noda dau vakasaqara vua na Turaga na noda Kalou me yacova sara ni sa dolavi vei keda na sala ni veitaratara mai lomalagi ki vuravura—mai vua na Kalou ki na noda dui bula yadudua.”⁷

A sa dau ciqoma oti o Mary na isau ni nona masu, ena so talega na gauna eliu, ka da sa vakabauta ni sa vakatorocaketaka tiko na nona sala ni veitaratara vata kei lomalagi ena nona bula na luvei keirau yalewa. Sa yaco me vulica kina eso na ka dina mai na veika a sotava ka na vakaiyaragitaki me cakava na veidigidigi vinaka cake ena veigauna sa tu mai liu. Ke a sega na isema Vua na Yalotabu, ke a rawa vei ira na gone kei na itubutubu mera vakaiulubaletaka na nodra na veivakatulewa cala vaka nodra galala ni digidigi. Na yalayala ni ivolanikalou sa ikoya ni “ko ira sa yalomatua … ka ra sa taura na Yalo Tabu me dusimaki ira … [era na sega] ni rawai.”⁸

Me ikuri ni revurevu vakadomobula ni lewa cala oqo, sa na rawa me yali kina na vakabauti ni loloma ni Kalou. Au sa kila eso na tamata era dau kerea vakaukauwa ka lewai ira na iliuliu se itubutubu, ka sa dredre nodra vakila na loloma dina sara mai vua na Tamada Vakalomalagi ka na tokoni ira ka vakauqeti ira ki na gaunisala ni bula savasava.

Kevaka eda na vukei ira eda veiqaravi kina mera cakava na isema bibi duadua vakalomalagi, e dodonu meda mataqali itubutubu ka iliuliu e vakamacalataki ena Vunau kei na Veiyalayalati, wase 121. E dodonu meda vakayacora “ga ena veivakauqeti, na vosota vakadede, na yalomalua kei na yalomalumalumu, kei na loloma e sega ni veivakaisini.”⁹ Kaya o Peresitedi Henry B. Eyring, “Ena veivuke kece sara e rawa ni da solia … vei ira na itabagone, na kena e cecere duadua sa ikoya mera vakila noda yalodei ni ra sa lakova tiko na gaunisala ki vale vua na Kalou ka ra na rawa ni rawata dina.”¹⁰

Ena noda vakasamataka na ivakavuvuli e dodonu me dusimaki keda ena Lotu kei na lomanivale, meu sa tinia mada ena dua na ivakaraitaki mai na ivolatukutuku ni bula nei Peresitedi Thomas S. Monson. O Ann Dibb, na luvedrau yalewa na Monson, e kaya me yacova tiko mai nikua, ena nona dau curu mai ena mata ni katuba ni vale a susugi kina, ena dau kaya mai o tamana, “U, raica o cei sa tu qoka. Sa ka dina ni marau, sega li ni rairai totoka?” E tomana nona kaya: “Erau dau veivakacerecerei tu ga na noqu itubutubu; veitalia sara na kequ irairai se cava au cakava tiko mai. … Niu dau lai sikovi rau noqu itubutubu, au kila ni rau lomani au, au dau vakacerecerei, au dau vakalogavinakataki, kau vakila niu sa tu e vale.”¹¹

Kemuni na taciqu kei na ganequ, oqo na sala ni Turaga. Kevaka mada ga o a vakacacani ena gauna e liu, au kila ni Turaga e vinakata mo lako mai Vua.¹² O ni lomani kece. O ni ciqomi kece. Ena yaca i Jisu Karisito, emeni.