ការបូជា

ដោយ អែលឌើរ ដាល្លិន អេក. អូក

នៃកូរ៉ុមនៃពួកសាវកដប់ពីរនាក់

រូបភាព

ជីវិតនៃការបម្រើ និងការបូជារបស់យើង ជាការបង្ហាញដ៏សមគួរបំផុត ពីការតាំងចិត្តរបស់យើង ក្នុងការបម្រើលោកចៅហ្វាយ និងអ្នកជិតខាងយើង ។

ការបូជាដ៏ធួនរបស់ព្រះយេស៊ូវគ្រីស្ទត្រូវបានហៅថាជា « ព្រឹត្តិការណ៍ដ៏វិសេសវិសាលបំផុតនៃព្រឹត្តិការណ៍ទាំងអស់ តាំងពីការចាប់ផ្ដើមការបង្កបង្កើត រហូតដល់អស់កល្បជានិច្ច » ។¹ ការបូជានោះ ជាសារដំណឹងសំខាន់ជាងគេរបស់ព្យាការីទាំងអស់ ។ វាត្រូវបានធ្វើឲ្យឃើញជាមុន ដោយការបូជាសត្វ ដែលមានក្នុងច្បាប់ម៉ូសេ ។ ព្យាការីម្នាក់បានប្រកាសថា អត្ថន័យទាំងស្រុងរបស់ក្រិត្យវិន័យគឺ « [ បាន ] ចង្អុលទៅការបូជាដ៏មហិមា និងចុងក្រោយបង្អស់ [ នៃ ] ... ព្រះរាជបុត្រានៃព្រះ មែនហើយ គឺនិរន្តរ៍ និងអស់កល្បជានិច្ច » ( អាលម៉ា 34:14 ) ។ ព្រះយេស៊ូវគ្រីស្ទ បានស៊ូទ្រាំនូវការរងទុក្ខដែលមិនអាចយល់បាន ដើម្បីទ្រង់ផ្ទាល់ធ្វើការបូជាមួយសម្រាប់អំពើបាបរបស់មនុស្សទាំងអស់ ។ ការបូជានោះត្រូវថ្វាយនូវអ្វីដែលល្អបំផុត---កូនចៀមឈ្មោលឥតខ្ចោះមួយ---សម្រាប់អំពើអាក្រក់ច្រើនបំផុត---ជាអំពើបាបនៃពិភពលោកទាំងមូល ។ ក្នុងពាក្យដ៏គួរឲ្យចងចាំរបស់ អ៊ីឡៃស្សា អរ ស្នូ ថា ៖

ទ្រង់​បាន​បង្ហូរ​លោហិត​ដ៏​មាន​តម្លៃ​របស់​ទ្រង់​ដោយ​មិនគិតថ្លៃ
ទ្រង់​បាន​ប្រទាន​ព្រះជន្ម​ទ្រង់​ដោយ​មិន​គិត​ថ្លៃ
ជា​ការបូជា​មួយ​ដែល​គ្មាន​បាប​សោះ សម្រាប់​អំពើ​បាប
សង្គ្រោះ​ដល់​ពិភពលោក​ដែល​កំពុង​ផុតរលត់ ។2

ការបូជានោះ---ដែលជាដង្វាយធួននៃព្រះយេស៊ូវគ្រីស្ទ---ជាចំនុចកណ្ដាលនៃផែនការនៃសេចក្ដីសង្គ្រោះ ។

ការរងទុក្ខដែលមិនអាចយល់បានរបស់ព្រះយេស៊ូវគ្រីស្ទដោយការបង្ហូរព្រះលោហិត បានបញ្ចប់ការបូជា តែវាមិនបានបញ្ចប់សារសំខាន់នៃការបូជានៅក្នុងផែនការដំណឹងល្អនោះទេ ។ ព្រះអង្គសង្គ្រោះរបស់យើង តម្រូវឲ្យយើងបន្ដថ្វាយការបូជា តែការបូជាដែលទ្រង់តម្រូវនៅសព្វថ្ងៃនេះ គឺយើង « ត្រូវថ្វាយដល់ [ ទ្រង់ ] នូវចិត្តសង្រេង និងវិញ្ញាណទន់ទាបវិញ » ( នីហ្វៃទី 3 9:20 ) ។ ជាគោល ទ្រង់ក៏បញ្ជាឲ្យយើងម្នាក់ៗ---ត្រូវស្រឡាញ់ និងបម្រើគ្នាទៅវិញទៅមក ដើម្បីធ្វើតាមតែបន្ដិចបន្ដួចនៃការបូជារបស់ទ្រង់ ដោយការធ្វើការបូជាពេលវេលា និងអាទិភាពដ៏អាត្មានិយមរបស់យើងផ្ទាល់ ។ ក្នុងបទទំនុកតម្កើងដ៏បំផុសគំនិតមួយ យើងច្រៀងថា « ពលិកម្មនាំមកនូវពរជ័យពីស្ថានសួគ៌ » ។²

ខ្ញុំនឹងនិយាយពីការបូជាក្នុងជីវិតរមែងស្លាប់ ដែលព្រះអង្គសង្គ្រោះរបស់យើងសុំឲ្យយើងធ្វើ ។ នេះនឹងមិនរួមបញ្ចូលការបូជាទាំងឡាយ ដែលយើងត្រូវបានបង្ខំឲ្យធ្វើ ឬក៏ទង្វើដែលអាចត្រូវបានជម្រុញដោយការរកប្រយោជន៍ផ្ទាល់ខ្លួន ជាជាងការបម្រើ ឬការបូជានោះទេ ( សូមមើល នីហ្វៃទី 2 26:29 ) ។

I.

សាសនាពួកគ្រីស្ទាន មាននូវប្រវត្តិនៃការបូជា រួមទាំងការបូជាដ៏ធំបំផុត ។ ក្នុងគ្រាដំបូងៗនៃជំនាន់ពួក គ្រីស្ទាន ប្រជាជន រ៉ូម បានស្លាប់រាប់ពាន់នាក់ដោយសារជំនឿរបស់គេ ក្នុងព្រះយេស៊ូវគ្រីស្ទ ។ សតវត្សរ៍ក្រោយៗមក ការជំទាស់គ្នាខាងគោលលទ្ធិបានបែងចែកពួក គ្រីស្ទាន ក្រុមខ្លះបានធ្វើទុក្ខបុកម្នេញ និងសូម្បីតែដល់ថ្នាក់សម្លាប់ដល់សមាជិកនៃក្រុមផ្សេងៗទៀត ។ ពួក គ្រីស្ទាន ត្រូវបានសម្លាប់ដោយពួក គ្រីស្ទាន ផ្សេងទៀត គឺជាទុក្ករកម្មដ៏សោកសៅបំផុតនៃសាសនាពួក គ្រីស្ទាន ។

ពួក គ្រីស្ទានs ជាច្រើនបានផ្ដល់ការបូជាដោយស្ម័គ្រចិត្ត ដែលបានជម្រុញដោយជំនឿក្នុងព្រះគ្រីស្ទ និងបំណងដើម្បីបម្រើទ្រង់ ។ អ្នកខ្លះបានជ្រើសរើសដើម្បីលះបង់ជីវិតពេញវ័យទាំងអស់របស់ខ្លួនចំពោះកិច្ចការលោកចៅហ្វាយ ។ ក្រុមដ៏ឧត្ដមនេះរួមមានអង្គការសាសនា ព្រះវិហារកាតូលិក និងពួកអ្នកដែលបានផ្ដល់ការបម្រើអស់មួយជីវិត ក្នុងនាមជាពួកអ្នកផ្សព្វផ្សាយ គ្រីស្ទាន នៅក្នុងសាសនា ប្រូតេស្ដង់ ផ្សេងទៀត ។ គំរូរបស់ពួកគេ គឺជាការពុះពារ និងការបំផុសគំនិត តែអ្នកជឿទៅលើព្រះគ្រីស្ទភាគច្រើន ពុំបានរំពឹងទុក ហើយក៏មិនអាចលះបង់ពេលវេលាពេញមួយជីវិតរបស់ពួកគេ ដើម្បីការបម្រើខាងសាសនាឡើយ ។

II.

សម្រាប់អ្នកដើរតាមព្រះគ្រីស្ទភាគច្រើន ការបូជារបស់យើង គឺរួមបញ្ចូលទាំងអ្វីដែលយើងអាចធ្វើរាល់ថ្ងៃ ក្នុងជីវិតផ្ទាល់ខ្លួនធម្មតាយើង ។ ក្នុងបទពិសោធន៍នេះ ខ្ញុំមិនស្គាល់ក្រុមណាមួយ ដែលមានសមាជិកធ្វើការបូជាច្រើនជាងពួកបរិសុទ្ធថ្ងៃចុងក្រោយនោះទេ ។ ការបូជារបស់គេ---ការបូជារបស់អ្នក ជាបងប្អូនប្រុសស្រីរបស់ខ្ញុំ---គឺវាផ្ទុយពីដំណើរស្វែងរកខាងលោកិយដែលយើងដឹងថា ជាការបំពេញចិត្តខ្លួនផ្ទាល់ ។

គំរូទីមួយរបស់ខ្ញុំ គឺពួកអ្នកត្រួសត្រាយមរមនរបស់យើង ។ ការបូជាដ៏វីរភាពនៃជីវិត, ទំនាក់ទំនងគ្រួសារ, ផ្ទះ, និងភាពសុខស្រួលរបស់ពួកគេ គឺជាគ្រឹះនៃដំណឹងល្អដែលបានស្ដារឡើងវិញ ។ សារ៉ា រីច បាននិយាយពីអ្វីដែលបានជម្រុញពួកអ្នកត្រួសត្រាយទាំងនេះ ពេលគាត់បានពណ៌នាពីស្វាមីរបស់គាត់ ឆាលឡេស ដែលត្រូវបានហៅទៅបម្រើបេសកកម្ម ៖ « នេះពិតជាពេលមួយដ៏លំបាក សម្រាប់ខ្ញុំ ក៏ដូចជាស្វាមីខ្ញុំ តែកាតព្វកិច្ចបានហៅយើងឲ្យឃ្លាតមួយរយៈ ហើយដោយដឹងថា យើង [ កំពុង ] ធ្វើតាមព្រះទ័យនៃព្រះអម្ចាស់ នោះយើងមានបំណងបូជាអារម្មណ៍ផ្ទាល់ខ្លួនយើង ដើម្បីជួយកិច្ចការ ... នៃការជួយកសាងនគរព្រះលើផែនដី » ។⁴

ថ្ងៃនេះ កម្លាំងដ៏ជាក់ស្ដែងបំផុតនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺការបម្រើ និងការបូជារបស់សមាជិកដោយមិនគិតពីខ្លួនឯង ។ មុនការឧទ្ទិសឆ្លងព្រះវិហារបរិសុទ្ធមួយរបស់យើងឡើងវិញ អ្នកបម្រើខាង គ្រីស្ទាន ម្នាក់ បានសួរប្រធាន ហ្គរដុន ប៊ី ហ៊ិងគ្លី ថា ហេតុអ្វីបានជាមិនមានតំណាងឈឺឆ្កាងណាសោះ ដែលជាតំណាងដ៏សាមញ្ញបំផុតនៃជំនឿពួក គ្រីស្ទាន ។ ប្រធាន ហ៊ិងគ្លី បានឆ្លើយតបថា និមិត្តសញ្ញានៃជំនឿពួក គ្រីស្ទាន របស់យើង គឺ « ការរស់នៅរបស់សមាជិកយើង » ។⁵ ជាការពិត ជីវិតនៃការបម្រើ និងការបូជារបស់យើង ជាការបង្ហាញដ៏សមគួរបំផុត ពីការតាំងចិត្តរបស់យើង ក្នុងការបម្រើលោកចៅហ្វាយ និងអ្នកជិតខាងយើង ។

III.

យើងពុំមានបព្វជិតដែលបានទទួលការហ្វឹកហ្វឺនយ៉ាងជំនាញ និងមានប្រាក់ខែនោះទេ នៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដោយហេតុនោះ សមាជិកដែលមិនមានប្រាក់ខែ និងជំនាញដែលត្រូវបានហៅឲ្យដឹកនាំ និងបម្រើដល់ក្រុមជំនុំយើង ត្រូវតែបម្រើទាំងអស់ ទាំងការប្រជុំ, កម្មវិធី, និងសកម្មភាពជាច្រើនក្នុងសាសនាចក្រ ។ ពួកគេធ្វើកិច្ចការនេះក្នុងក្រុមជំនុំជាង 14,000 កន្លែង គ្រាន់តែនៅក្នុងសហរដ្ឋ និងកាណាដាប៉ុណ្ណោះ ។ ពិតណាស់ យើងមិនមានអ្វីប្លែកនោះទេ ដែលមានសមាជិកដែលមិនមានប្រាក់ខែ និងជំនាញក្នុងក្រុមជំនុំរបស់យើង ដែលបម្រើជាគ្រូបង្រៀន និងជាអ្នកដឹកនាំនោះ ។ ប៉ុន្តែទំហំពេលវេលាដែលត្រូវបានលះបង់ដោយសមាជិករបស់យើង ដើម្បីហ្វឹកហ្វឺន និងបម្រើគ្នាទៅវិញទៅមកគឺធំធេញប្លែកពីគេ ។ ការប្រឹងប្រែងរបស់យើងដើម្បីមានគ្រូបង្រៀនតាមផ្ទះចុះសួរសុខទុក្ខដល់គ្រួសារនីមួយៗក្នុងក្រុមជំនុំយើងជារៀងរាល់ខែ និងមានគ្រូបង្រៀនសួរសុខទុក្ខពីសមាគមសង្គ្រោះជួបជាមួយស្ត្រីពេញវ័យម្នាក់ៗជារៀងរាល់ខែ គឺជាគំរូទាំងឡាយពីការណ៍នេះ ។ យើងដឹងពីការបម្រើដែលមិនអាចប្រៀបបានក្នុងគ្រប់អង្គការក្នុងពិភពលោក ។

គំរូដ៏ល្បីមួយនៃការបម្រើ និងការបូជារបស់ អិល.ឌី.អែស ដែលខុសពីគេ គឺកិច្ចការអ្នកផ្សព្វផ្សាយសាសនារបស់យើង ។ បច្ចុប្បន្នមានបុរស និងស្ត្រីវ័យក្មេងច្រើនជាង 50,000 នាក់ និងបុរស និងស្ត្រីវ័យចំណាស់ជាង 5,000 នាក់ ។ ពួកគេលះបង់ចាប់ពីប្រាំមួយខែ ទៅពីរឆ្នាំនៃជីវិតរបស់គេ ដើម្បីបង្រៀនដំណឹងល្អនៃព្រះយេស៊ូវគ្រីស្ទ និងផ្ដល់សេវាមនុស្សធម៌ក្នុង 160 ប្រទេស ក្នុងពិភពលោក ។ កិច្ចការរបស់ពួកគេតែងតែរួមបញ្ចូលការបូជា រួមទាំងចំនួនឆ្នាំដែលគេផ្ដល់ដល់កិច្ចការព្រះអម្ចាស់ និងការបូជាដែលបានធ្វើឡើងដើម្បីផ្គត់ផ្គង់ផ្នែកថវិការបស់គេផងដែរ ។

ពួកអ្នកដែលនៅផ្ទះ---ឪពុកម្ដាយ និងសមាជិកគ្រួសារផ្សេងទៀត---ក៏បានបូជាផងដែរ ដោយរស់នៅដោយគ្មានភាពជាដៃគូ និងគ្មានការបម្រើពីពួកអ្នកផ្សព្វផ្សាយ ដែលពួកគេបានបញ្ជូនទៅ ។ ជាឧទាហរណ៍ យុវជនជនជាតិប្រេស៊ីលម្នាក់បានទទួលការហៅជាអ្នកផ្សព្វផ្សាយ ពេលគេកំពុងធ្វើការដើម្បីផ្គត់ផ្គត់បងប្អូនប្រុសស្រីរបស់គេ បន្ទាប់ពីឪពុកម្ដាយបានស្លាប់ទៅ ។ អ្នកមានសិទ្ធិអំណាចទូទៅម្នាក់បានពណ៌នាពី ការជួបប្រឹក្សាគ្នារបស់កូនៗទាំងនេះ ហើយចងចាំពីឪពុកម្ដាយដែលបានស្លាប់ទៅហើយរបស់ពួកគេ ដែលបានបង្រៀនពួកគេពីរបៀបដើម្បីពួកគេគួររៀបចំខ្លួនបម្រើព្រះ ។ យុវជននោះបានទទួលការហៅរបស់គ ហើយប្អូនប្រុសអាយុ 16 ឆ្នាំ បានទទួលខុសត្រូវជំនួស ក្នុងការផ្គត់ផ្គត់គ្រួសារ ។⁶ ពួកយើងភាគច្រើនស្គាល់គំរូផ្សេងៗទៀតពីការបូជា ដើម្បីបម្រើបេសកកម្ម ឬដើម្បីផ្តត់ផ្គង់ដល់អ្នកផ្សព្វផ្សាយម្នាក់ ។ យើងមិនបានដឹងពីការបម្រើ និងការបូជាដោយស្ម័គ្រចិត្តផ្សេងទៀតបែបន នៅក្នុងអង្គការណាផ្សេងទៀតក្នុងពិភពលោកនេះទេ ។

ជាញឹកញាប់យើងត្រូវបានចោទសួរថា « តើអ្នកបញ្ចុះបញ្ចូលមនុស្សវ័យក្មេង និងសមាជិកវ័យចាស់របស់អ្នកយ៉ាងណា ដើម្បីឲ្យពួកគេទុកចោលសាលារៀន ឬការចូលនិវត្តន៍របស់ពួកគេ ដើម្បីបូជារបៀបនេះនោះ ? » ខ្ញុំបានឮមនុស្សជាច្រើនពន្យល់បែបនេះថា ៖ « ដោយដឹងពីអ្វីដែលព្រះអង្គសង្គ្រោះបានធ្វើសម្រាប់ខ្ញុំ---ព្រះគុណទ្រង់ក្នុងការរងទុក្ខសម្រាប់អំពើបាបខ្ញុំ និងការឈ្នះក្ដីស្លាប់ ដើម្បីខ្ញុំអាចរស់ម្ដងទៀត---នោះខ្ញុំមានអារម្មណ៍ថាមានឯកសិទ្ធិក្នុងការធ្វើការបូជាដ៏តូចនេះ ដែលខ្ញុំត្រូវបានសុំឲ្យធ្វើក្នុងការបម្រើទ្រង់ ។ ខ្ញុំចង់ចែកចាយនូវការយល់ដឹងដែលទ្រង់បានប្រទានដល់ខ្ញុំ » ។ តើយើងបញ្ចុះបញ្ចូលអ្នកដើរតាមនៃព្រះគ្រីស្ទបែបនេះ ឲ្យបម្រើដោយរបៀបណា ? ដូចព្យាការីបានពន្យល់ថា « យើង [ គ្រាន់តែ ] សុំពួកគេប៉ុណ្ណោះ » ។⁷

ការបូជាផ្សេងទៀតដែលបានមកពីការបម្រើជាអ្នកផ្សព្វផ្សាយ គឺជាការបូជារបស់ពួកអ្នក ដែលអនុវត្តការបង្រៀនរបស់ពួកអ្នកផ្សព្វផ្សាយ ហើយក្លាយជាសមាជិកនៃសាសនាចក្រ ។ សម្រាប់អ្នកប្រែចិត្តជឿជាច្រើន ការបូជាទាំងនេះគឺសំខាន់ណាស់ រួមទាំងការបាត់បង់ទំនាក់ទំនងមិត្តភក្ដិ និងគ្រួសារផងដែរ ។

ជាច្រើនឆ្នាំកន្លងមកហើយ នៅក្នុងសន្និសីទនេះ យើងបានឮពីយុវជនម្នាក់ ដែលបានរកឃើញដំណឹងល្អដែលបានស្ដារឡើងវិញ ពេលគេកំពុងសិក្សាក្នុងសហរដ្ឋ ។ ពេលបុរសនេះជិតត្រឡប់ទៅទឹកដីកំណើតវិញ ប្រធាន ហ្គរដុន ប៊ី ហ៊ិងគ្លី បានសួរគេថា តើនឹងមានអ្វីកើតឡើងដល់គេ ពេលដែលគេត្រឡប់ទៅផ្ទះវិញក្នុងនាមជាពួកគ្រីស្ទានម្នាក់ ។ យុវជននោះបានឆ្លើយតបថា « គ្រួសារខ្ញុំនឹងខកចិត្ត ពួកគេប្រហែលជាដេញខ្ញុំចេញពីផ្ទះ ហើយចាត់ទុកថាខ្ញុំបានស្លាប់ហើយ ។ សម្រាប់អនាគត និងការងាររបស់ខ្ញុំ គ្រប់ឱកាសទាំងអស់ប្រហែលត្រូវបិទទ្វារចំពោះខ្ញុំ » ។

ប្រធាន ហ៊ិងគ្លី បានសួរថា « តើអ្នកមានបំណងឲ្យតម្លៃយ៉ាងខ្លាំងចំពោះដំណឹងល្អឬទេ ? »

យុវជននោះបានឆ្លើយដោយទឹកភ្នែកថា « វាជាការពិត មែនទេ ? » ពេលដែលត្រូវបានបញ្ជាក់ហើយ គេបានឆ្លើយថា « ដូច្នេះ តើមានបញ្ហាអ្វីទៀត ? »⁸ នោះជាវិញ្ញាណនៃការបូជាក្នុងចំណោមសមាជិកថ្មីរបស់យើងជាច្រើននាក់ ។

គំរូផ្សេងទៀតនៃការបម្រើ និងការបូជា មានក្នុងជីវិតសមាជិកស្មោះត្រង់ជាច្រើន ដែលបម្រើក្នុងព្រះវិហារបរិសុទ្ធរបស់យើង ។ ការបម្រើក្នុងព្រះវិហារបរិសុទ្ធគឺពិសេសដល់ពួកបរិសុទ្ធថ្ងៃចុងក្រោយ តែសារសំខាន់នៃការបូជាបែបនោះ គួរតែអាចយល់បានដោយពួកគ្រីស្ទានទាំងអស់ ។ ពួកបរិសុទ្ធថ្ងៃចុងក្រោយពុំមានប្រពៃណីនៃការបម្រើក្នុងវត្តនោះទេ តែយើងនៅតែអាចយល់ ហើយគោរពដល់ការបូជានៃពួកអ្នកដែលពួកសាសនាគ្រីស្ទានជម្រុញពួកគេឲ្យលះបង់ជីវិតរបស់ពួកគេដល់សកម្មភាពសាសនានោះ ។

មួយឆ្នាំកន្លងមកហើយ នៅក្នុងសន្និសីទនេះ ប្រធាន ថូម៉ាស អេស. ម៉នសុន បានចែកចាយគំរូមួយនៃការបូជាទាក់ទងនឹងកិច្ចការព្រះវិហារបរិសុទ្ធ ។ ឪពុកពួកបរិសុទ្ធថ្ងៃចុងក្រោយដ៏ស្មោះត្រង់ម្នាក់ ដែលនៅលើកោះដាច់ស្រយាលក្នុងសមុទ្រប៉ាស៊ីហ្វិក បានធ្វើការងារដោយប្រើកម្លាំងកាយយ៉ាងធ្ងន់ នៅកន្លែងដ៏ឆ្ងាយអស់ពេលប្រាំមួយឆ្នាំ ដើម្បីមានលុយគ្រប់គ្រាន់នាំភរិយា និងកូន 10 នាក់ រៀបការ និងផ្សារភ្ជាប់អស់កល្បជានិច្ច នៅព្រះវិហារបរិសុទ្ធនូវែស្សឺឡង់ ។ ប្រធាន ម៉នសុន បានពន្យល់ថា « អ្នកដែលយល់ពីពរជ័យដ៏អស់កល្បជានិច្ច មកពីព្រះវិហារបរិសុទ្ធ ដឹងថា គ្មានការពលិកម្មណាមួយមហិមាខ្លាំងពេក, គ្មានតម្លៃណាខ្ពស់ពេក, និងគ្មានការពុះពារណាលំបាកពេក ដើម្បីទទួលពរជ័យទាំងនោះទេ » ។⁹

ខ្ញុំមានអំណរគុណចំពោះគំរូដ៏អស្ចារ្យនៃក្ដីស្រឡាញ់, ការបម្រើ, និងការបូជានៃពួកគ្រីស្ទាន ដែលខ្ញុំបានឃើញក្នុងចំណោមពួកបរិសុទ្ធថ្ងៃចុងក្រោយ ។ ខ្ញុំឃើញអ្នកបំពេញការហៅបម្រើរបស់អ្នកក្នុងសាសនាចក្រ ជាញឹកញាប់ ជាការបូជាដ៏ធំនៃពេលវេលា និងធនធាន ។ ខ្ញុំឃើញអ្នកបម្រើបេសកកម្មដោយការចំណាយផ្ទាល់ខ្លួន ។ ខ្ញុំឃើញអ្នកលះបង់ជំនាញវិជ្ជាជីវៈរបស់អ្នកដោយរីករាយ ក្នុងការបម្រើមនុស្សទូទៅ ។ ខ្ញុំឃើញអ្នកខ្វល់ខ្វាយចំពោះអ្នកទាល់ក្រ តាមរយៈការប្រឹងប្រែងផ្ទាល់ខ្លួន និងតាមរយៈការគាំទ្រដល់សុខមាលភាពសាសនាចក្រ និងការបរិច្ចាគដល់ផ្នែកមនុស្សធម៌ ។¹⁰ ទាំងអស់នេះត្រូវបានអះអាងក្នុងការសិក្សាថ្នាក់ជាតិមួយ ដែលបានសន្និដ្ឋានថា សមាជិកសកម្មនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ « ស្ម័គ្រចិត្ត និងបរិច្ចាគច្រើនជាងជនជាតិអាមេរិកដែលមានជីវភាពមធ្យម ហើយមានចិត្តល្អក្នុងការបរិច្ចាគពេលវេលា និងប្រាក់កាស [ 20 ភាគរយ ] ច្រើនជាងអ្នកកាន់សាសនាក្នុងសហរដ្ឋ » ។¹¹

គំរូនៃការផ្ដល់កម្លាំងដល់អ្នកដទៃ បានពង្រឹងដល់យើងទាំងអស់គ្នា ។ វារំឭកយើងពីការបង្រៀនរបស់ព្រះអង្គសង្គ្រោះ ៖

« បើអ្នកណាចង់មកតាមខ្ញុំ នោះត្រូវឲ្យលះកាត់ចិត្តខ្លួនឯងចោល ។ …

« ព្រោះអ្នកណាដែលចង់ឲ្យរួចជីវិត នោះនឹងបាត់ជីវិតទៅ ៖ តែអ្នកណាដែលបាត់ជីវិត ដោយព្រោះខ្ញុំ នោះនឹងបានវិញ » ( ម៉ាថាយ 16:24–25 ) ។

IV.

ប្រហែលគំរូដ៏សំខាន់ និងច្បាស់បំផុតនៃការបម្រើ និងការបូជាដោយមិនគិតខ្លួនឯង គឺត្រូវបានធ្វើឡើងនៅក្នុងគ្រួសារយើង ។ ម្ដាយលះបង់ខ្លួនឯងដើម្បីបង្កើត និងបីបាច់កូនៗ ។ ស្វាមីលះបង់ខ្លួនឯងដើម្បីផ្គត់ផ្គង់ប្រពន្ធ និងកូនៗ ។ ការបូជាដែលមានក្នុងការបម្រើដ៏សំខាន់អស់កល្បជានិច្ច ដល់គ្រួសារយើង គឺច្រើនសន្ធឹកសន្ធាប់ ហើយវាច្បាស់ហួសប្រមាណ ដែលយើងត្រូវតែពណ៌នា ។

ខ្ញុំក៏ឃើញពួកបរិសុទ្ធដែលគ្មានភាពអាត្មានិយមយកកូនមកចិញ្ចឹម រួមទាំងកូនដែលពិការ និងព្យាយាមផ្ដល់ដល់កូនចិញ្ចឹម នូវក្ដីសង្ឃឹម និងឱកាស ដែលមិនបានមានដល់ពួកគេពីមុនមក ។ ខ្ញុំឃើញអ្នកថែទាំសមាជិកគ្រួសារ និងអ្នកជិតខាង ដែលរងទុក្ខដោយកូនកើតមកមិនគ្រប់លក្ខណៈ, ជំងឺផ្លូវចិត្ត និងរូបកាយ, និងការលំបាកដែលមានដល់មនុស្សចាស់ ។ ព្រះអម្ចាស់ស្គាល់អ្នកផងដែរ ហើយទ្រង់បណ្ដាលឲ្យព្យាការីទ្រង់ប្រកាសថា « កាលដែលអ្នកបូជាសម្រាប់គ្នាទៅវិញទៅមក និងសម្រាប់កូនចៅអ្នក នោះព្រះអម្ចាស់នឹងប្រទានពរអ្នក » ។¹²

ខ្ញុំជឿថា ពួកបរិសុទ្ធថ្ងៃចុងក្រោយ ដែលផ្ដល់ការបម្រើ និងការបូជាដោយគ្មានអាត្មានិយម ក្នុងធ្វើតាមព្រះអង្គសង្គ្រោះពេញដោយការគោរព គឺប្រកាន់ខ្ជាប់ដល់គុណតម្លៃដ៏អស់កល្បជានិច្ច ខ្លាំងជាងក្រុមផ្សេងៗណាទាំងអស់ ។ ពួកបរិសុទ្ធថ្ងៃចុងក្រោយចាត់ទុកការបូជាពេលវេលា និងធនធានរបស់ខ្លួន ថាជាផ្នែកនៃការរៀន និងការធ្វើឲ្យសក្ដិសមសម្រាប់ភាពអស់កល្បជានិច្ច ។ នេះជាសេចក្ដីពិតដែលបានបើកសម្ដែងក្នុង ការបង្រៀនពីសេចក្ដីជំនឿ (Lectures on Faith) ដែលបានបង្រៀនថា « សាសនាដែលមិនតម្រូវឲ្យមានការបូជាអ្វីទាំងអស់ គឺមិនដែលមានអំណាចគ្រប់គ្រាន់ ដើម្បីបង្កើតជំនឿដែលចាំបាច់ដល់ជីវិត និងសេចក្ដីសង្គ្រោះនោះទេ ។ ... វា [ គឺ ] តាមរយៈការបូជានេះប៉ុណ្ណោះ ដែលព្រះបានតែងតាំងមនុស្សនោះឲ្យរីករាយជាមួយនឹងជីវិតដ៏អស់កល្បជានិច្ច » ។¹³

ដូចជាការបូជាដ៏ធួនរបស់ព្រះយេស៊ូវគ្រីស្ទ ដែលជាចំនុចកណ្ដាលនៃផែនការនៃសេចក្ដីសង្គ្រោះ នោះយើងជាអ្នកដើរតាមព្រះគ្រីស្ទត្រូវតែធ្វើការបូជាផ្ទាល់ខ្លួន ដើម្បីត្រៀមខ្លួនសម្រាប់គោលដៅ ដែលផែនការនោះផ្ដល់ដល់យើង ។

ខ្ញុំដឹងថា ព្រះយេស៊ូវគ្រីស្ទជាព្រះរាជបុត្រាតែមួយគត់នៃព្រះជាព្រះវរបិតាដ៏អស់កល្បជានិច្ច ។ ខ្ញុំដឹងថា ដោយសារការបូជាដ៏ធួនរបស់ទ្រង់ នោះយើងមាននូវការធានាអះអាងពីអមតៈភាព និងឱកាសសម្រាប់ជីវិតអស់កល្ប ។ ទ្រង់ជាព្រះអម្ចាស់, ព្រះអង្គសង្គ្រោះ, និងព្រះប្រោសលោះរបស់យើង ហើយខ្ញុំថ្លែងទីបន្ទាល់ពីទ្រង់ ក្នុងព្រះនាមនៃព្រះយេស៊ូវគ្រីស្ទ អាមែន ។