Kihsac
Sel Elder Dallin H. Oaks
Ke U luhn Mwet Sap Singucul Luo
Moul lasr ke kuhlwacnsap ac kihsac uh pa ma ahkkahlwemyeyuck yohk emet ke otwelah in kuhlwacnsapuh Met Luti Fuhlwact ac mwet wiyacsr.
Kihsackuhnlah luhn Jisus Kraist etweyuck tari muh “pa fuhlwact emet ke ma sikyak ke muhtwacwacyacn facluh nuh ke ma pahtpaht wacngihn sahflahiyac.”1 Kihsac sac pa yohk srihpac emet ke pweng ma tuhkuh sin mwet pahluh nuh kwewa. Kihsac ke ma orahkrahk mwe akucl se ke masap lal Moses an. Sie mwet pahluh fahkwack lah kalmacn ma inge kwewa srihsrngi [ac] kihsackuhnlah sahflah luhlahp [luhn] … Wen nuhtin God, ahok, wacngihn sahflahiyac ac ma pahtpaht (liye Alma 34:14). Jisus Kraist el muhtweng kweok yohk liki nuh kwewa Elan muh kuh in elah ma koluk nuh kwewa lasr. Kihsac sac sang ma wolacna—soko sip fuhsr mukul wacngihn ma koluk kac—nuh ke ma koluk nuh kwewa—ma koluk luhn facluh nohfohn. Ke kahs lal Eliza R. Snow:
Srah sacohk Lal el osraclihk;
Moul Lal el suhpwaclihk,
Kihsac wacngihn mwacta nuh ke ma koluk,
Facluh muhnahslah se in moullac.2
Kihsac sac—Iwaclah luhn Jisus Kraist—pa ma yohk srihpac emet ke plwacn in molwelah.
Kweok na upac liki nuh kwewa luhn Jisus Kraist ahksahfyelah kihsackuhnlah ke sohrohrlah luhn srah, tuhsruhktuh tiac ahksahfye ma yohk srihpac ke kihsackuhnlah ke plwacn luhn wosasuc. Mwet Lahngo lasr el enenwekuht in tahfwelah in sang kihsac, tuhsruhktuh kihsac El sapkihn ingena pa kuht in sang nuh [Sel] inse pwacye ac sie nguhna puhsisacl (liye 3 Nephi 9:20). El oayacpacna sap kais sie sesr in luhngse ac kuhlwacnsapuh sie sin sie—pwacnwacng, in sang ma srihk oacna kihsac Lal ke kuht sang pacl ac kena lasr. Ke puhsren on na moklweyuck soko, kuht yuck, Kihsaci use mwe insewowo lucng me.”3
Nga ac sramsram ke kihsac luhn moul Mwet Lahngo lasr El siyuck sesr in oruh. Nga ac tiac sramsramkihn kihsac kuht ahkkohsyeyuck in oruh kuh mukwikwi ma tuhkuh ke ahkyohkye luhn mwet se a tiac ke kuhlwacnsap kuh kihsackuhnlah (liye 2 Nephi 26:29).
I.
Alu luhn Kraist oasr kihsac puhkantwen ke sramsram mahtuh, oacyacpac kihsackuhnlah luhlahp. Ke yac emet ke pacl luhn mwet Kristin, Rome uniyac tausin ke mwet luhlahlfongi lalos ke Jisus Kraist. Ke yac foko tohkoh, ke ip seyacna luhn wosasuc orwaclihk mwet Kristin, kuht U ahkkolukye ac uniyac mwet ke U sahyac. Mwet Kristin uniyucklac sin mwet Kristin sahyac pa ma ahsor emet ke mwet suc misac suc wi alu luhn mwet Kristin.
Puhs mwet Kristin sukohsohk in sang kihsac ke srihpen luhlahlfongi ke Kraist ac kena se in Kuhlwacnsapwacl. Kuhtuh sulwaclah in sang moul lalos nohfohn nuh ke kuhlwacnsap luhn Mwet Luti Fuhlwact. U wolacna inge oasr ke Alu Catholic ac mwet suc oruh kuhlwacnsap ke moul lalos nohfohn luhn misineri luhn mwet Kristin ke alu Protestant. Srihkasrak lalos wi ma upac ac mokleyuck, tuhsruhktuh inkaiyacn mwet luhlahlfongi ke Kraist tiac enenuh kuh kuh in sang moul lalos nohfohn nuh in kuhlwacnsap ke luhlahlfongi.
II.
Nuh sin inkaiyacn mwet ukwe Kraist uh, kihsac lasr uh kuh in tuhkuh ke kuht oruh ke kais sie lwen ke kais sie moul lasr uh. Ke ohiyac inge nga nihkihn kuhtwena U suc mempucr orek kihsackuhnlah yohk liki Mwet Luhlahlfongi ke Lwen-sahflah. Kihsac lalos—kihsac lowos, tamuhlwel ac tahmtahel luhk—pa ohiyac siena liki ohiyac luhn facluh ke ahkyohkye kom sifacna.
Mwe srihkasrak se met luhk pa mwet sramtweack luhn Mormon. Kihsackuhnlah wo luhn moul, kuhpahsr luhn sucu, lohm, ac ahkkweye pa ke pwelucng luhn wosasuc fohlohkihnyuckyak se. Sarah Rich el sramsramkihn ma tuh kahsruh mwet sramtweack inge ke el ahkuhtweyac ke mukul tuhmwacl ah, Charles, suc pahngonyuck nuh ke sie misin: “Pa inge pacl upac se nuh sihk ac oayacpac nuh sin mukul tuhmuhk; tuhsruhktuh kunohkohn pahngon kuht in fahsrwelihk ke kuhtuh pacl ac kuht etuh kuh ahkos kena luhn Leum, kuht puhla yohk in kihsackuhnlah puhla lasr in kahsruh akiyac orekma uh … ke kahsruh muhsahi Tohkohsrahi luhn God fin facluh.”4
Mihsenge ma liyeyuck fokoko emet ke Alu luhn Jisus Kraist luhn Mwet Luhlahlfongi ke Lwen-sahflah uh pa sekuhtasrihk in kuhlwacnsap ac kihsac luhn mempucr an. Met liki sifil kihsaciyuck sie sin tempuhl lasr uh, sie mwet luti Kristin siyuck sel Prestuhn Gordon B. Hinckley lah efuh wacngihn sahkseng kac, akucl ma orekmakihnyeyuck yohk emet ke alu Kristin. Prestuhn Hinckley el topuk lah akucl ke luhlahlfongi luhn mwet Kristin lasr pa “moul luhn mwet lasr.”5 Pwacyelah, moul lasr ke kuhlwacnsap ac kihsac uh pa ma ahkkahlwemyeyuck yohk emet ke otwelah in kuhlwacnsapuh Met Luti Fuhlwact ac mwet wiyacsr.
III.
Wacngihn mwet ke alu uh suc eis etwacack yohk moliyuck in oruh mwet sihm ke Alu luhn Jisus Kraist luhn Mwet Luhlahlfongi ke Lwen-sahflah. Pwacnwacng, mempucr suc tiac eis molo pahngonyuck in kol ac kuhlwacnsapuh u in alu lasr uh enenuh in karihngihn ma nuh kwewa luhn miting, prokracm, ac mukwikwi luhn Alu uh. Elos oruh ma inge ke pihsen u in alu ahluhkwelah 14,000 fin acn United States ac Canada muhkwena. Pwacye, kuht tiac sielacna in sang mwet ke u in alu lasr uh in kuhlwacnsap in ekihn mwet luti ac mwet kol. Tuhsruhktuh lusen pacl ma sang sin mempucr in luti ac karihngihn sie sin sie pa yohk na pwacye. Kuhiyacsr ine eis sie sucu ke u luhn alu lasr ke mwet forfor luti som muhtwacta yohrohlos ke kais sie mahlwem ac in oasr muhtwacn mahtuh ke Rilif Sosaiti suc mwet forfor luti som muhtwacta ke kais sie mahlwem pa mwe srihkasrak ke ma inge. Kuht nihkihn kuhtwena kuhlwacnsap ohinge ke u in alu sahyac fin facluh.
Mwe srihkasrak ma etweyuck emet ke kuhlwacnsap ac kihsac sie na kain luhn LDS pa orekma luhn misineri. Ingena ahluhkwelah 50,000 mukul ac muhtwacn fuhsr ac ahluhkwelah 5,000 mukul ac muhtwacn mahtuh. Elos kuhlwacnsap yac se tahfuh nuh ke yac luo ke moul lalos in luti ke wosasuc luhn Jisus Kraist ac sang kuhlwacnsap in kahsruh mwet nuh ke muhtuhnfacl ahluhkwelah 160 fin facluh. Orekma lalos oasr kihsac orek pacl nuh kwewa, oacyacpac ke yac elos sang nuh sin Leum ac kihsac ke mani enenweyuck in moli ma lalos.
Mwet suc muhta luhlah lohm uh—pahpah ac ninac ac mempucr sahyac luhn sucu—kihsackuhnlah ke lwelah luhn misineri elos suhpwaclah. Nuh ke mwe srihkasrak, mukul Brazil fuhsr se eis pahng lal ke el orekma in karihngihn tuhlihk nahtuhl tukun pahpah tuhmwacl ac ninac kiyacl misac ah. Sie Mwet Wal Luhlahp fahk ma inge ke toeni in kahsruh luhn tuhlihk ac esam lah pahpah ac ninac suc misac tari lotwelos fuhkah in ahkolah pacl nuh kwewa in kuhlwacnsap nuh sin Leum. Mukul fuhsr sac insese nuh ke pahng lal ke misineri, ac sie mukul wiyacl suc matwac yac 16 eis kunohkohn in orekma in karihngihn sucu.6 Puhkantwen sesr etuh srihkasrak sahyac luhn kihsac in som wi misin kuh in tahpuhk misineri. Kuht nihkihn kuhtwena kuhlwacnsap ac kihsac sahyacn ma inge ke kuhtwena u in alu sahyac fin facluh.
Puhs pacl mwet siyuck sesr, “Kowos oruh fuhkah in kai mempucr fuhsr kuh mahtuh lowos in som liki lutlut kuh retirement lalos in kihsackuhnlah ohinge?” Nga lohng puhs mwet topuk ohinge: “Ke etweyacn ma Mwet Lahngo el oruh nuh sihk—kuhlwacng Lal in kweok ke ma koluk luhk ac in kuhtanglah misac nga in muh kuh in moul—nga puhla arlac wo in oruh sie kihsac srihk siyuckyuck sihk in oruh ke kuhlwacnsap Lal. Nga ke akacsruhi ke kahlwem El use nuh sihk tari.” Kuht kai mwet ukwe Kraist in kuhlwacnsap fuhkah? Oacna mwet pahluh el ahkuhtweyac, “Kuht siyuck [na] selos.”7
Kihsac sahyac suc tuhkuh ke srihpen kuhlwacnsap luhn misineri pa kihsac suc tuhkuh ke srihpen mwet ukwe mwe luti luhn misineri ac wi mempucr nuh ke Alu. Nuh sin mwet eklac pucspucs, kihsac inge yohk srihpac na pwacye, weacng tuhlac luhn kawuck ac sucu.
Yac pucspucs somlah ke toeni se inge kuht lohng ke sie mukul fuhsr suc konwacack wosasuc fohlohkihnyuckyak ke el lutlut fin acn United States. Ke mukul se inge apkuhran in fohlohk nuh acn sel ah, Prestuhn Gordon B. Hinckley el siyuck sel lah meac ac fah sikyak ke kom ac fohlohk in ekihn sie mwet Kristin. “Sucu luhk ah e suhpwacrlac sihk,” mukul fuhsr sac topuk. “Sahp elos ac fah lahfwekihn yuc ac nuhnkuh tuh nga tuhlac. Nuh ke pacl tok ac orekma luhk, pacl wowo nuh kwewa kuh in lihsrlihsryak likiyuc.”
“Kom luhngse in sang yohk kuhiyom nuh ke wosasuc?” Prestuhn Hinckley el siyuck.
Na mukul fuhsr sac luhluhyak muhtahl topuk, “Ma na pwacye, tuh pwacye?” Ke ma ingacn ahkpwacyeiyucklac ah, el topuk, “Na oasr ma sahyac yohk srihpac liki na?”8 Pa inge nguhnin kihsac oasr yurin mempucr sasuc lasr uh.
Mwe srihkasrak sahyac ke kuhlwacnsap ac kihsac sikyang ke moul luhn mempucr luhlahlfongi suc kuhlwacnsap ke tempuhl lasr uh. Kuhlwacnsap luhn tempuhl sie na kain nuh sin mempucr luhn Mwet Luhlahlfongi ke Lwen-sahflah, tuhsruhktuh ma yohk srihpac ke kihsac inge enenuh in ahkkahlwemyeyuck nuh sin mwet Kristin nuh kwewa. Wacngihn facsin ke kuhlwacnsap lun lohm in alu luhn Mwet Luhlahlfongi ke Lwen-sahflah, tuhsruhktuh kuht kuh in srackna kahlwem ac ahkfuhlwactye kihsackuhnlah luhn mwet Kristin inge suc sang moul lalos nuh ke alu ingacn.
Ke toeni se inge ke yac se tari ah, Prestuhn Thomas S. Monson el akacsruhi ke sie mwe srihkasrak luhn kihsac ke kuhlwacnsap luhn tempuhl. Sie pahpah Luhlahlfongi ke Lwen-sahflah fin tuhka srihsrihk ke Pacific oruh orekma toasr ke acn loesloes ke yac ohnkohsr in eis mani enenweyuck in us muhtwacn kiyacl ac tuhlihk 10 ah in pahyuck ac siliyac nuh ke ma pahtpaht ke Tempuhl New Zealand ah. Prestuhn Monson el ahkuhtweyac, “Mwet suc kahlwem ke mwe insewowo ma pahtpaht ma tuhkuh ke tempuhl uh etuh lah wacngihn kihsac ma yohklac, wacngihn molo yohklac, wacngihn ma toasr upaclac in eis mwe insewowo ingacn.”9
Nga sruikihn mwe srihkasrak wo luhn luhngse, kuhlwacnsap, ac kihsac luhn mwet Christin nga liye tari ke Mwet Luhlahlfongi ke Lwen-sahflah. Nga liye kowos oruh ma kunowos ke Alu uh, ac pacl puhs kowos sang yohk pacl ac ma lowos. Nga liye kowos kuhlwacnsap ke misin ke mani lowos. Nga liye kowos engan in sang ma lowos in kuhlwacnsapuh mwet tuhlan lowos. Nga liye kowos karihngihn mwet suhkahsruhp nuh ke ohiyac lowos ac wi kahsruh ke kowos sang mani nuh ke mwe kahsruh luhn Alu.10 Ma nuh kwewa ke ma inge ahkpwacyeiyuck ke mwe lutlut luhn muhtuhnfacl tuh fahk lah mempucr oaru ke Alu luhn Jisus Kraist luhn Mwet Luhlahlfongi ke Lwen-sahflah “sang ma yohk likina inkaiyacn mwet Macrike ac sang yohk pacl ac mani likina [20 percent] luhn mwet luhn alu fin acn Macrike.”11
Kain mwe srihkasrak inge ahkfokokoye kuht nohfohn. Elos ahkacsmakihnye kuht ke mwe luti luhn Mwet Lahngo:
“Kuhtwena mwet fin luhngse wiyuc, el enenuh in lahfwekuhnuhl sifacna. …
“Tuh el suc luhngse molwelah moul lal, ac fah tuhlac luhkwel; ac el suc moul lal tuhlac luhkwel keik, el fah konwacack moul lal” (Mattu 16:24–25).
IV.
Sahp mwe srihkasrak ma etweyuck ac yohk srihpac emet ke kuhlwacnsap ac kihsac sekuhtasrihk uh orek ke sucu lasr uh. Ninac uh oaru in isus ac karihngihn tuhlihk nahtuhlos. Pahpah uh sang ma nuh kwewa lalos in ahkkweye muhtwacn ac tuhlihk nahtuhlos. Kihsac ke kuhlwacnsap yohk luhn ma pahtpaht nuh sin sucu lasr uh yohklaclac in fahk kac ac etweyuck yohk in enenuh in fahk kac.
Nga oayacpac liye Mwet Luhlahlfongi ke Lwen-sahflah sekuhtasrihk in nuht tuhlihk, weacng tuhlihk suc yohk enenuh la, ac suk in sang tuhlihk karihngihnyuck uh finsrak ac pacl wowo lusrongohloslac ke ma sikyak met. Nga liye kowos karihngihn mempucr luhn sucu ac mwet tuhlan ma kweokkihn suhkahpahs, mas ke mwe nuhnak ac mahno, ac ma sikyak ke yac fahfahsruh uh. Leum el esam kowos pac, ac El oruh mwet pahluh Lal in fahkwack lah “ke kowos kihsackuhnlah nuh sin kais sie ac tuhlihk nuhtuwos uh, Leum El ac ahkinsewowoye kowos.”12
Nga luhlahlfongi lah Mwet Luhlahlfongi ke Lwen-sahflah suc sang kuhlwacnsap ac kihsac sekuhtasrihk in alu nuh sin Mwet Lahngo ac ukwe srihkasrak lal wi ip yohk ma pahtpaht yohklac liki kuhtwena mwet sahyac. Mwet Luhlahlfongi ke Lwen-sahflah liye ke kihsac lalos luhn pacl ac ma lalos in oruh ip se luhn lutlut ac ahkolah lalos nuh ke ma pahtpaht. Pa inge ma pwacye ahkkahlwemyeyuck ke Sramsram ke Luhlahlfongi, suc luti lah “alu se ma tiac siyuck in kihsackuhnlah ma nuh kwewa tiac kuh in orwaclah luhlahlfongi fal in sun moul ma pahtpaht yurin God. … Ke kihsac se inge, ac ma se inge sefanna, lah God el ahkkweye mwet in wi moul engan ma pahtpaht.”13
Oacna ke kihsaciyacn iwaclah luhn Jisus Kraist pa ma yohk srihpac emet ke plwacn in molwelah, kuht mwet ukwe Kraist enenuh in oruh kihsac lasr sifacna in ahkoo nuh ke acn lasr ma plwacn se use nuh sesr uh.
Nga etuh lah Jisus Kraist pa Wen Kuloh Sefanna nuhtin God Pahpah ma Pahtpaht. Nga etuh lah ke srihpen kihsaciyacn iwaclah Lal, kuht etuh tari ke moul kawihl ac pacl wowo nuh ke moul ma pahtpaht. El pa Leum lasr, Mwet Lahngo lasr, Mwet in Molwelah lasr, ac nga fahkwack Kacl ke inen Jisus Kraist, amen.