Meiroang

Pelien lamalam en Souleng audaudiki poadoapoad en tohnmetei, iangahki meiroang lapo. Nan tepin pahr akan en mwehin Souleng kan, wehin Rom kemehla kid kei pwehki arail pwoson Sises Krais. Nan pahr akan doudo mwuri, ansou me pingiping oh akupwung kan me pid padahk kan en lamalamo katohrepeseng Souleng kan, ekei pwihn kan kaloke oh pil kemehla towe kan en pwihn teikan. Souleng me kamakamala rehn Souleng teikan wia meiroang keieu kapwuriamwei nan poadoapoad en lamalam en Souleng.

Souleng tohto kin pein wia arail meiroang kan pwehki ahr pwoson Krais oh arail ineng en papah Ih. Ekei pilada en tohnmeteikihla arail mour unsek pwehn papah Mwohnsapwo. Pwihn lapalap wet iangahki irail akan me towe Mwomwohdiso Kadilik oh irail akan me wia misineri erein arail mour nan pelien lamalam kan en Proahs. Arail karasaras kan me kapwuriamwei, ahpw pali laud en me kin kamehlele Krais sohte kasik de sohte kak en meiroangki arail mour unsek ong nan doadoahk en lamalam.

Ong palilaud en me kin idawehn Krais, atail meiroang kan kin pid dahme kitail kak wia nan ehuehu rahn nan pein atail mour kan. Nan irair wet sohte ehu pwihn me I ese me wia arail meiroang laudsang Souleng en Imwin Rahn Akan. Arail meiroang kan—amwail meiroang kan, riei ohl akan oh riei lih akan—kin weksang douluhl mwekid kan en sampah me kin kangoange aramas en kapwaiada pein nsenarail oh arail ineng.

Keieun karasaras me I pahn kasalehda iei neitail paionihr en Mormon kan. Arail meiroang laud en mour, peneinei kan, ihmw, oh nsenamwahu kan wia poahsoan en rongamwahu kopwurupwurdohu. Sarah Rich koasoaia duwen me kin kangoange paionihr pwukat ansou me E koasoaia duwen malipilip en ah pwoud, Charles, en kohla nan misin: “Met mehlel wia ansou apwal ong ie oh ei pwoud; ahpw duwen me koasoandi se anahne mihpeseng ansou kis oh ni aht ese me se peikong kupwuren Kauno, se pehm me se anahne meiroangki pein aht pepehm kan pwehn sewese kairada doadoahko … doadoahk en kairada Wehin Koht pohn sampah.”⁴

Rahn wet me keieu sansal nan Mwomwohdiso en Sises Krais en Souleng en Imwin Rahn Akan iei tohnmetei oh meiroang en towe kan. Mwohn kasarawisapahl en ehu atail tehnpas sarawi kan, emen wahnpoaron en ehu Mwomwohdiso tohrohr idek rehn President Gordon B. Hinckley dahme sohtehki kasansal en lohpwuo, kasansal me keieu rek nan pelien lamalam en Souleng Kan. President Hinckley sapengki me kasansal kan en atail pelien lamalam en Souleng iei “mour en neitail aramas akan.”⁵ Ni mehlelo, atail mour en papah oh tohnmetei iei me wia mehn kasansal keieu konehng pwehn kasalehda atail ngoangki papah Mwohnsapwo oh aramas akan.

Sohte kaun de soun apwalih mwomwohdiso me kaiandahr oh kin ale pweipweiki ah pwukoa nan Mwomwohdiso en Sises Krais en Souleng en Imwin Rahn Akan. Met me kahrehda, towe kan me kin alehda malipilip en kaun oh papah nan atail pwihn kan kin anahne apwalih mehkoaros me iangahki katanga mihting, pwurokirahm, oh kemwekid kan en Mwomwohdiso. Irail kin wia met nan pwihn 14,000 samwa nan United States oh Canada. Ni mehlelo, kaidehn kitail kelehpw me kin pein apwalih pwukoa kan en kaun oh sounpadahk nan atail pelien lamalam wet. Ahpw ansou me towe kan kin meiroangkihla pwehn kaiahne oh apwalih towe teikan me inenen lap mehlel. Atail nannanti kan pwe sounpadahk kan en kak pas nan imwen ehuehu peneinei nan atail ward kan oh sounpadahk en pas kan sang Pwihn en Sawas en Lih en kak tuhwong lih me re pwukoahki tuhwong nan ehuehu sounpwong wia karasaras mwahu en met. Sohte ehu pwihn me se ese me duwehte met nan sampah pwon.

Karasaras me keieu ndand me pid meiroang oh papah en Souleng en Imwin Rahn Akan iei doadoahk en neitail misineri kan. Met uwen mwahnakap oh peinakapw daulihier 50,000 oh aramas laud daulihier 5,000. Irail kin meiroangkihla sang sounpwong weneu lel sounpar riau en arail mour pwehn padahngki rongamwahu en Sises Krais oh patohwanda sawas ong aramas nan wehi 160 nan sampah. Arail doadoahk kin ansou koaros pid tohnmetei, me iangahki sounpar akan me re kin meiroangki ong doadoahk en Kauno oh pil meiroang en pein patohwanda pweinen epwelparail.

Irail akan me kin mihmi ni ihmw—pahpa nohno oh towe teikan en peneinei—pil kin kihda arail meiroang ni ahr kin kadarowei misineri kan. Ni karasaras, emen mwahnakapw sang Brazil alehdi malipilip en wia misineri ansou me E wie doadoahk pwehn kamourih rie pwutak oh rie serepein kan mwurin ah pahpa oh nohno ahr mehlahr. Emen Kaun Lapalap koasoaiahda duwen seripwukat ahr tuhpene nan konsel oh tamanda me arail pahpa nohno padahkihieng irail en kaunop ansou koaros en papah Kauno. Mwahnakapwo sapeng oh alehda malipilip en papah oh rie pwutak sounpar 16 me uhd pwukoahki apwalih peneineio.⁶ Pali laud en kitail pil ese karasaras teikan en meiroang me pid papah nan misin de apwalih misineri. Sohte ehu meiroang de tohnmetei duwehte met me se patohwandahr rehn ehu pwihn sohte lipilipil nan sampah.

Aramas kin kalapw peidek reht, “Ia duwen amwail kin kangoange noumwail me pwulopwul kan oh towe me mahlahr kan en tohnmeteikihla arail sukuhl de ansoun kommoal (retire) pwe ren wia met?” I rongehr tohto me kin kawehwe duwen met: “Ni ahi ese dah me Sounkomouro ketkihda pwehki ngehi—Sapwellime mahk oh lokolongki dipei kan oh eh ketin powehdi mehla pwe I en kak komourla—I ahniki ansou mwahu en wia meiroang tikitik wet ni ahi malipilipiengehr en wia Sapwellime doadoahk. I men ehukihong aramas teikan wehwehih me Kauno ketkihiengiehier.” Ia duwen atail kin kangoange irail soun idawehn Krais pwukat en papah? Duwen me emen soukohp kawehwe, “Se kin pekihte rehrail.”⁷

Ekei meiroang kan me kin wia kisehn doadoahk en misineri kan iei meiroang kan sang irail akan me kin mwekidki padahk kan en misineri kan oh wiahla tohn Mwomwohdiso. Ong tohtohn irail me weliakapwalahr, meiroang pwukat me inenen laud mehlel, me iangahki meiroangkihla kompoakapahrail oh arail peneinei kan.

Sounpar tohto samwalahro nan tiepene lap wet kitail rong duwen mwahnakapw men me diarada rongamwahu kopwurupwurdohu ni ansou me E wie suksukuhl nan United States. Ni ohl menet eh pahn kerenieng pwuralahng nan sapweo, President Gordon B. Hinckley idek reh ma dah me pahn wiawi ni eh pahn pwurala ni eh wialahr Souleng men. “Ahi peneinei pahn nsensuwed,” mwahnakapwo sapengki. “Irail pahn keseiehla oh wiakinie me I melahr. Ahi doadoahk oh mour, pai koaros kakete ritidi sang ie.”

“Ke kak pwain uwen laud en meiroang duwe met pwehki rongamwahuo?” President Hinckley kalelapak.

“Ni pilen mese eh keredi, mwahnakapwo sapengki, “Ahpwe E sou mehlel?” Ansou me pasapengpe kohdo me ei, E ndahla, “Eri soahng teikan sohte katepe?”⁸Met iei ngehn en meiroang me mie rehn tohto neitail towe kapw kan.

Pil ekei karasaras tohrohr en papah oh meiroang sansal nan mour en towe loaloapwoat kan me kin papah nan atail tehnpas sarawi kan. Souleng en Imwin Rahn Kan te me kin papah nan tehnpas sarawi kan, ahpw kesempwalpen meiroang pwukat konehng en dehde ong Souleng koaruhsiehn. Souleng en Imwin Rahn akan, nin duwen me sansal, sohte kin papah nan wasahn kaiahne padre, ahpw kitail kak wehwehki oh wauniki meiroang en irail akan me arail pelien lamalam en Souleng kin kangoange irail en meiroangkihieng arail mour ong ni koasoandi en arail mwomwodiso kan.

Nan tiepene lap wet sounpar samwalahro, President Thomas S. Monson ehukihda karasaras en meiroang me pid papah nan tehnpas sarawi. Emen pahpa me wia Souleng en Imwin Rahn Akan me kin koukousoan pohn ehu deke tikitik nan Pacific ahpw kohla oh wie doadoahk laud nan ehu sahpw me doh erein sounpar weneu pwehn wiahda mwohni pwe ih oh ah pwoud oh neira seri 10 en kak kohla nan Tehnpas Sarawi en New Zealand pwehn kapwopwoud oh katengteng ong mour soutuk. President Monson kawehwe me, “Irail akan me wehwehki duwen kapai soutuk kan me kin kohda nan tehnpas sarawi ese me sohte meiroang nohn laud, sohte pweipwei nohn toutou, sohte kahpwal nohn apwal me kak irehdi alahldi en kapai pwukat.”⁹

I kapingki karasaras kaselel kan en limpoak, papah, oh meiroang en Souleng me I kilangehr rehn Souleng en Imwin Rahn Akan. I kin kilang amwail kin meirongkihla amwail ahnsou oh pai pwe kumwail en kak kapwaiada amwail pwukoa malipilip kan en Mwomwohdiso. I kin kilang amwail kin pein pwain epwelpamwail ni amwail kin papah nan misin kan. I kin kilang amwail ehukihda amwail koahiek ni amwail kin papah iengemwail aramas akan. I kin kilang amwail apwalih me paisuwed akan sang pein amwail sawas oh sang ni amwail sawas ong welfare en Mwomwohdiso oh sawas ong aramas.¹⁰ Koaros mepwukat kamehlel nan ropirop ehu me wiawi nan wehin America me kasalehda me towe kan en Mwomwohdiso en Sises Krais en Souleng en Imwin Rahn Akan “kin kihda arail sawas ni tohnmetei laudsang mehn Amerika teikan oh pil kin ahpwete sapan nan arail sawaskihda arail ansou oh neirail mwohni laudsang pali [percent 20] en mehn America me kin sansarawi sang mwomwohdiso teikan.”¹¹

Soangen karasaras pwukat en meiroang ong aramas teikan kin kakehlailih kitail koaros. Re kin katamankin kitail padahk en Sounkomouro:

“Mehmen me men idawehniehdo, en tounmeteikihla pein ih …

“Pwe aramas emen me men doarehla eh mour, e pahn pwupwusang; a mehmen me men tounmeteikihla eh mour, pwehki ngehi, e pahn diar”(Madiu 16:24–25).

Mwein tohnmetei me keieu dehde oh keieu kesempwal wia karasaras kan en papah oh tohnmetei me kin wiawi nan atail peneinei kan. Nohno kan kin meiroangki arail ansou ong epwelpen oh keirdahn serihkan. Ohl pwopwoud kan kin meiroangki arail ansou ong arail pwoud oh serihkan. Meiroang pwukat pid papah soutuk kesempwal ong atail peneinei kan me nohn tohto oh nohn dehde mwahu kahrehda kitail sohte anahne kasalehda.

I pil kin kilang Souleng en Imwin Rahn Akan me kin pwokada serihkan, iangahki serihkan me kin ahniki kahpwal tohrohr, oh me kin rapahki en sewese serihkan me mih pahn epwelpen wehi pwehn kihieng irail koapwoaroapwoar oh pai kan me re sohte ahniki. I kin kilang amwail kin apwalih tohn amwail peneinei oh mehn mpwomwail kan me kin ahniki soumwahu de kahpwal, oh me likeilapalahr kan. Kauno ketin mwahngih mehkoaros, oh E ketin kaweidiher Sapwellime soukohp akan en kalohkihda me “ni amwail kin tohnmetei ong emenemen oh noumwail serihkan, Kauno pahn ketin kapaikumwailda.”¹²

I kamehlele me Souleng en Imwin Rahn Akan me kin papah oh tohnmetei ni arail kin pwongih atail Sounkomouro kin loaloapwoat ong padahk en Kauno me sohte kin sohrala laudsang sohte lipilipil pwihn en aramas tohrohr. Souleng en Imwin Rahn Akan kin wiahki arail tohnmetei mehn kasukuhl oh pwe ren kak warohng mour soutuk. Met iei me mehlelo me pwarada nanLectures on Faith, me padahngki me “pelien lamalam ehu me sohte kin kangoange tohnmetei nan soahng koaros sohte ahniki manaman itar en kakairada pwoson me anahnepe mie pwehn alehdi mour soutuk. … Iei sang ni tohnmetei wet, oh ihte met, me Koht ketin koasoanedier me aramas pahn iang ahniki mour soutuk.”¹³

Pwehki meiroang en tohnmetei en Sises Krais eh wia poahsoan en pilahn en komouro, kitail me kin idawehn Krais anahne wia pein atail meiroang pwehn kak alehdi dahme koasoandihier ong kitail.

I ese me Sises Krais iei Ihte Sapwellimen Koht Sahm Soutuk Iehros. I ese me pwehki Sapwellime meiroang en tomw, kitail tungoaleniki likilik en kaiasada ong mour soutuk oh ansou mwahu ong komourla soutuk. Iei ih atail Kaun, atail Sounkomour, oh atail Soundoar, oh I kadehdehki met duwen Ih ni mwaren Sises Krais, ahmen.