2010–2019
Osigataulaga
Aperila 2012


Ositaulaga

O o tatou olaga o le auauna atu o faaaliga aupito talafeagai ia o la tatou tautinoga e auauna atu i le Matai ma o tatou uso a tagata.

O le taulaga togiola a Iesu Keriso sa ta’ua “o le mea aupito sili ona le mafaatusalia o mea uma na tutupu mai le amataga o le foafoaga e oo atu i le faavavau.”1 O le taulaga o le savali tutotonu lea a perofeta uma. Sa faataimua mai i taulaga na faia i manu lea na manaomia i le tulafono a Mose. Sa tautino mai e se perofeta o lo latou faauigaga atoa lava e “faasino atu i lena taulaga tele ma mulimuli [a le] … Alo o le Atua, ioe, ua le gata ma e faavavau” (Alema 34:14). Na onosaia e Iesu Keriso le mafatiaga e le mafuatiaina, ina ia ositaulagaina ai o Ia lava mo agasala a tagata uma. O lena taulaga na ofoina atu ai le Tamai Mamoe e lelei atoatoa—e aunoa ma se ila—mo le aofaiga atoa o mea leaga—o agasala a le lalolagi atoa. I upu e le galo a Eliza R. Snow:

O Lona toto sa faamasa’a;

Ma sa ofo mai Lona soifua,

Se taulaga e fai mo agasala,

E lavea’i ai tagata.2

O lena taulaga—o le Togiola a Iesu Keriso—ua i ai lea i le totonugalemu o le ata o le faaolataga.

O puapuaga le mafuatiaina o Iesu Keriso na faamuta ai taulaga na faia i le faamaligiina o le toto, ae e le’i muta ai le taua o taulaga i le fuafuaga o le talalelei. O loo manaomia e le Faaola i tatou e ofo atu pea taulaga, ae o taulaga ua Ia poloaiina ai nei i tatou ia tatou “osi atu mo [Ia] se taulaga o le loto momomo ma le agaga salamo” (3 Nifae 9:20). Ua ia poloaiina foi i tatou taitoatasi e alolofa ma auauna atu le tasi i le isi—o lona uiga, ia ofo atu sina faataitaiga itiiti o Lana lava taulaga e ala i le ositaulagaina o o tatou lava taimi ma mea ua tatou manatu faapito e faamuamua. I se viiga musuia tatou te pepese ai, “O le ositaulaga tatou te aumaia ai faamanuiaga o le lagi.”3

O le a ou talanoa e uiga i nei taulaga faaletino o loo talosaga mai le Faaola tatou te faia. O le a lē aofia ai taulaga ua poloaiina i tatou e faia, po o faatinoga e faaosofia e ala i avanoa patino nai lo le auauna atu po o le ositaulaga (tagai 2 Nifae 26:29).

I.

O le faatuatuaga faa-Kerisiano e i ai se talaaga o le ositaulaga, e aofia ai ma le taulaga atoatoa. I le popofou o le vaitau o Kerisiano, sa faamaturoina ai i Roma le faitau afe ona o lo latou faatuatua ia Iesu Keriso. I seneturi mulimuli ane, ina ua fevaevaeai Kerisiano ona o mataupu faavae, o lea na sauaina ai ma fasiotia tagata o isi faapotopotoga. O le fasiotia o Kerisiano e isi Kerisiano, o maturo aupito matautia ia i tapuaiga faa-Kerisiano.

E toatele tagata Kerisiano na ofoina atu e i latou lava ni osigataulaga sa faaosofia i lo latou faatuatua ia Keriso ma le manao e auauna atu ia te Ia. E i ai nisi sa filifili e tuuto atu o latou olaga atoa o ni tagata matutua, i le galuega a le Matai. O lena vaega o tamalii e aofia ai faalapotopotoga faalelotu a le Ekalesia Katoliko, ma i latou ua tuuina atu la latou tautua i o latou olaga atoa e avea o ni misionare Kerisiano i tapuaiga eseese Porotesano. O a latou faataitaiga e faigata ma musuia, ae o le toatele lava o i latou e talitonu ia Keriso e le o faamoemoe pe le o mafai foi ona tuuto atu o latou soifua atoatoa i auaunaga faalelotu.

II.

O le toatele lava o e mulimuli ia Keriso, o a tatou osigataulaga e aofia ai mea e mafai ona tatou faia i lea aso ma lea aso i o tatou olaga patino masani. O lena aafiaga, ou te le iloa lava se isi faalapotopotoga e sili atu ona ositaulaga ona tagata nai lo le Au Paia o Aso e Gata Ai. O a latou osigataulaga—o a outou osigataulaga, o’u uso e ma tuafafine—e tetee atu i tulimataiga masani a le lalolagi mo le faamalieina o le tagata lava ia.

O a’u faataitaiga muamua o o tatou paionia Mamona. O a latou osigataulaga maoae o o latou ola, sootaga faaleaiga, o fale, ma olaga sololelei, o loo i ai lea i le faavae o le talalelei toefuataiina. Sa ta’ua e Sarah Rich le mea sa faaosofia ai nei paionia ina ua ia faamatalaina lana tane, o Salesa, ina ua valaau e alu i se misiona: “O se taimi faigata moni lea mo au faapea foi i lo’u toalua; peitai o le tiute na valaau mai ina ia o ma’ua valavala mo se vaitau ma ina ua iloa ai [sa] ma usitaia le finagalo o le Alii, sa ma naunau ai e ositaulagaina o ma’ua lava lagona e fesoasoani ai i le fausiaina o le Malo o le Atua i le lalolagi.”4

O le taimi nei, o le malosiaga vaaia o Le Ekalesia o le Au Paia o Aso e Gata Ai, o le auaunaga lē manatu faapito lea a ona tagata. A o lei toefaapaiaina se tasi o o tatou malumalu, sa fesili se faifeau Kerisiano ia Peresitene Gordon B. Hinckley pe aisea sa leai ai se satauro, o le faatusa taatele o tapuaiga Kerisiano. Sa tali atu Peresitene Hinckley e faapea o faatusa o la tatou tapuaiga Kerisiano o “olaga ia o o tatou tagata.”5 E moni lava, o o tatou olaga o le auauna atu o faaaliga aupito talafeagai ia o la tatou tautinoga e auauna atu i le Matai ma o tatou uso a tagata.

III.

E leai ni o tatou faifeau e aoaoina faapolofesa ma totogi i le Ekalesia a Iesu Keriso o le Au Paia o Aso e Gata Ai. O le taunuuga, o tagata o le ekalesia e tofia e taitai ma tautuaina a tatou faapotopotoga, e tatau ona latou tauaveina le avega atoa o le anoanoai o a tatou sauniga faale-Ekalesia, polokalama, ma gaoioiga. Latou te faia lenei mea i le silia ma le 14,000 faapotopotoga i totonu o le Iunaite Setete ma Kanata. E moni, e le o tulaga ese i tatou i le i ai o tagata tofia e galulue fua o a tatou potopotoga e avea ma faiaoga ma taitai. Peitai, o le aofaiga o le taimi e tuuina atu e o tatou tagata e aoao faamasani ai ma auauna atu ai o le tasi i le isi e matuai tele lava. O a tatou taumafaiga ina ia asia aiga taitasi o a tatou faapotopotoga e faiaoga o aiga i masina taitasi, ma asia tamaitai matutua taitasi e faiaoga asiasi o le Aualofa i masina taitasi, o ni faataitaiga ia o lea mea. Tatou te le iloaina lava se auaunaga e faatusalia i ai i soo se faalapotopotoga i le lalolagi.

O le faataitaiga sili lauiloa o le auaunaga ma le ositaulaga a le AAG, o le galuega a o tatou faifeautalai. O le taimi nei, ua silia ma le 50,000 alii ma tamaitai talavou, ae silia ma le 5,000 alii ma tamaitai matutua. Ua latou tuuto atu mai le ono masina e oo atu i le lua tausaga o o latou olaga i le aoaoina atu o le talalelei a Iesu Keriso, ma tuuina atu le auaunaga fesoasoani i le silia ma le 160 atunuu i le lalolagi. O la latou galuega e aofia ai lava i taimi uma le ositaulaga, e aofia ai tausaga latou te tuu atu i le galuega a le Alii faapea foi osigataulaga e faia e ala i le tuuina atu o tupe e lagolagoina ai.

Ua ositaulaga foi i latou o loo nonofo i fale—matua ma isi tagata o le aiga—e ala i le motusia o mafutaga ma le auaunaga a faifeautalai latou te auina atu. Mo se faataitaiga, sa maua e se talavou mai Pasila se valaauga faafaifeautalai a o faigaluega o ia e lagolagoina ona uso ma tuafafine ina ua maliliu lona tama ma lona tina. Sa faamatala e se Pulega Aoao le fonotaga a nei fanau, ma sa manatua ai na aoaoina i latou e o latou matua ua maliliu, e tatau ona latou saunia i taimi uma e auauna atu i le Alii. Na talia e le alii talavou lona valaauga, ae sa suitulaga lona uso e 16 tausaga le matua i ona tiutetauave e faigaluega e lagolago ai le aiga.6 O le toatele o i tatou e silafia le tele o isi faataitaiga o le ositaulaga ina ia auauna atu ai i se misiona, pe lagolagoina foi se faifeautalai. Tatou te le iloa lava se isi auaunaga ofo fua atu ma se osigataulaga faapenei i se isi lava faapotopotoga i le lalolagi.

E tele lava ina fesiligia i tatou, “E faapefea ona outou faatauanauina o outou tupulaga talavou ma tagata ua matutua atu e tuua a latou a’oga po o tulaga litaea ae ositaulaga faapenei?” E toatele ua ou faalogo i ai o tuuina atu le faamatalaga lenei: “O le iloa ai o le mea sa faia e lo’u Faaola mo au—o Lona alofa tunoa sa puapuagatia ai mo a’u agasala ma le faatoilaloina o le oti ina ia ou toe ola ai—ua ou lagonaina ai o se avanoa paia le faia o se osigataulaga laitiiti ua talosagaina au e fai i Lana galuega. Ou te fia faasoa atu le malamalama na Ia tuuina mai ia te au.” E faapefea ona tatou faatauanauina na tagata ua mulimuli ia Keriso e auauna atu? E pei ona sa faamatalaina e se perofeta, “Na [ona] tatou fesili lava ia i latou.”7

O isi osigataulaga e afua mai i le auaunaga faafaifeautalai, o taulaga ia a i latou o e faatinoina aoaoga a faifeautalai ma avea ai ma tagata o le Ekalesia. O le toatele o tagata e liliu mai, e taua tele nei taulaga, e aofia ai le le toe i ai o ni uo ma mafutaga faaleaiga.

E tele tausaga ua mavae, sa faafofoga ai i latou o i lenei konafesi i se alii talavou sa mauaina le talalelei toefuataiina a o a’oga o ia i le Iunaite Setete. Ina ua oo i le taimi e toe taliu ai lenei alii i lona nuu moni, sa fesili Peresitene Gordon B. Hinckley ia te ia po o le a se mea o le a tupu ia te ia pe a toe taliu atu i lona aiga a ua avea ma Kerisiano. “O le a le fiafia lo’u aiga,” na tali atu ai le alii talavou. “Atonu latou te tuliesea au ma manatu faapea ua ou oti. O lo’u lumanai foi ma la’u matata faalegaluega, atonu foi o le a tapunia mo au.”

“Pe ua e naunau lava la e totogi se tau tele mo le talalelei?” sa fesili ai Peresitene Hinckley.

Sa tali mai le alii talavou ma loimata, “E moni, a ea?” Ina ua faamautinoaina lena mea, sa ia tali mai, “O le a la se isi mea e toe popole ai?”8 O le agaga lena o le ositaulaga i le toatele o tagata fou o le ekalesia.

O isi faataitaiga o le auauna atu ma le ositaulaga o loo alia’e mai i olaga o tagata faamaoni o le au paia, o loo galulue i o tatou malumalu. O le auauna ai i le malumalu e tulaga ese i le Au Paia o Aso e Gata Ai, peitai o le taua o lena osigataulaga e tatau ona malamalama ai Kerisiano uma. O le Au Paia o Aso e Gata Ai e leai ni tu ma ni aga masani o auaunaga i se nofoaga faafaifeau, ae e mafai lava ona tatou malamalama ma faamamaluina le osigataulaga a i latou ua faaosofia e lo latou faatuatuaga faa-Kerisiano, le tuuto atu o o latou soifua i lena gaoioiga faalelotu.

I lenei konafesi i le na o le tasi le tausaga talu ai, sa faasoa mai ai e Peresitene Thomas S Monson se faataitaiga o le ositaulaga e tusa ai ma le auauna atu i le malumalu. Sa i ai se tamā faatuatua o le Au Paia o Aso e Gata Ai i se motu tuufua i le Pasefika, sa ia faia galuega mamafa faaletino i se nofoaga mamao lava mo le ono tausaga, ina ia maua ai le tupe sa moomia e ave ai lona toalua ma le fanau e toa 10 mo le faaipoipoga ma le faamauga mo le faavavau i le Malumalu i Niu Sila. Sa faamatala e Peresitene Monson, “O i latou e malamalama i faamanuiaga e faavavau e maua mai i le malumalu, latou te iloa e leai se osigataulaga e telē tele, leai se tau e mamafa tele, leai se tauiviga e faigata tele ina ia maua ai na faamanuiaga.”9

Ou te faafetai lava mo faataitaiga ofoofogia o le alofa faa-Kerisiano, auaunaga, ma le ositaulaga ua ou vaai i ai i le Au Paia o Aso e Gata Ai. Ua ou vaai ia te outou o faatino o outou valaauga i le Ekalesia, o le tele lava o taimi e faia i se osigataulaga tele o taimi ma meatotino. Ua ou vaai ua outou auauna atu i ni misiona e totogiina e outou lava ia. Ua ou vaai i lo outou foai atu ma le fiafia o o outou tomai faapolofesa e auauna ai i o outou uso a tagata. Ua ou vaai o outou tausia e matitiva e ala i taumafaiga patino ma le lagolagoina o saofaga i le uelefea a le Ekalesia ma fesoasoaniga mo tagata.10 Ua faamautu nei mea uma i se suesuega faalemalo lea na faaiuina e faapea o tagata toaaga o Le Ekalesia a Iesu Keriso o le Au Paia o Aso e Gata Ai “e ofofua atu ma foai atu le tele e sili atu ma se tagata averesi Amerika ma sili atu foi ona foai atu ma le agalelei ia taimi ma tupe nai lo le [20 pasene] pito i luga o tagata lolotu i Amerika.”11

O na faataitaiga o le foai atu i isi e faamalolosia ai i tatou uma. E faamanatu mai ai ia i tatou le aoaoga a le Faaola:

“Ai se tasi e fia mulimuli mai ia te au, aua ne’i usiusitai o ia ia te ia. …

“Aua ai se fia faasaogalemuina lona ola, e maumau ai ia te ia; a o le faamaumau lona ola ona o a’u, e maua ai e ia” (Mataio 16:24–25).

IV.

Atonu o faataitaiga e aupito sili ona masani ai ma taua o le auaunaga e le manatu faapito ma le ositaulaga, e faatino lea i o tatou aiga. E tuuto atu e tina i latou lava i le tausiga ma le faafaileleina o a latou fanau. E tuuina atu e tane i latou lava i le lagolagoina o a latou ava ma fanau. O osigataulaga e aofia ai i le auaunaga faavavau i o tatou aiga, e tele naua e le mafai ona ta’ua ma ua masani lelei ai, e tau le ta’ua ai lava.

Ua ou vaai foi i le Au Paia o Aso e Gata Ai e le manatu faapito, ua vaetamaina fanau, e aofia ai i latou e i ai manaoga faapitoa, ma saili e tuuina atu i fanau fai le faamoemoega ma avanoa ua latou le maua ona o tulaga na i ai muamua. Ua ou vaai ia te outou o tausia tagata o aiga ma tuaoi o ē o mafatia mai faaletonu ina ua fananau mai, o ma’i o le mafaufau ma le tino, ma aafiaga faigata o le matua o le soifua. O loo manatua foi outou e le Alii, ma ua Ia uunaia ai Ana perofeta e tautino atu “a outou ositaulaga o le tasi mo le isi ma a outou fanau, o le a faamanuiaina outou e le Alii.”12

Ou te talitonu o le Au Paia o Aso e Gata Ai e tuuina atu le auaunaga ma le osigataulaga e le manatu faapito ma tapuai i le Faaola e ala i le mulimuli i Ana faataitaiga, e sili ona tumau i latou i tulaga faatauaina o le faavavau nai lo se isi lava vaega o tagata. E manatu le Au Paia o Aso e Gata Ai i a latou osigataulaga o taimi ma meatotino, o se vaega o lo latou a’oa’oina ma le faaagavaaina mo le faavavau. O se upumoni lenei na faaalia mai e Iosefa Samita, i Lectures on Faith, o lē sa aoao mai “o se tapuaiga e le manaomia ai le ositaulagaina o mea uma, e le maua ai le mana lea e lava ma totoe e maua ai le faatuatua e tatau ai mo le olaga ma le faaolataga. … O le osigataulaga lenei, ma na o le pau lava lea, na faauuina e le Atua ina ia olioli ai tagata i le ola e faavavau.”13

Pei lava ona totonugalemu le taulaga togiola a Iesu Keriso i le ata o le faaolataga, e tatau foi ia i tatou o e mulimuli ia Keriso ona faia a tatou lava osigataulaga e saunia ai mo le taunuuga o lena ata mo i tatou.

Ou te iloa o Iesu Keriso o le Alo Pele e Toatasi o le Atua le Tama e Faavavau. Ou te iloa ona o Lana taulaga togiola, ua tatou maua ai le faamautinoaga o le tino ola pea ma le avanoa mo le ola e faavavau. O Ia o lo tatou Alii, o lo tatou Faaola, ma lo tatou Togiola, ma ou te molimau atu ai i le suafa o Iesu Keriso, amene.

Faamatalaga

  1. Bruce R. McConkie, The Promised Messiah: The First Coming of Christ (1981), 218.

  2. “Maeu le Poto ma le Alofa,” Viiga, nu. 109.

  3. “Viia Le Na Fetaiai ma Ieova,” Hymns, nu. 15.

  4. Sarah Rich, i le Guinevere Thomas Woolstenhulme, “I Have Seen Many Miracles,” in Richard E. Turley Jr. and Brittany A. Chapman, eds., Women of Faith in the Latter Days: Volume 1, 1775–1820 (2011), 283.

  5. Gordon B. Hinckley, “O Le Faatusa o lo Tatou Faatuatua,” Liahona, Apr. 2005, 3.

  6. Tagai Harold G. Hillam, “Sacrifice in the Service,” Ensign, Nov. 1995, 42.

  7. Gordon B Hinckley, “O Le Vavega o le Faatuatua,” Liahona, Iulai 2001, 84.

  8. Gordon B. Hinckley, “It’s True, Isn’t It?” Tambuli, Oct. 1993, 3–4; tagai foi Neil L. Andersen, “E Sa’o, a Ea? O Le a La Se Isi Mea e Sili Atu Ona Taua?” Liahona, Me 2007, 74.

  9. Thomas S. Monson, “O Le Malumalu Paia—o se Faailoilo i le Lalolagi,” Liahona, May 2011, 91–92.

  10. Tagai, mo se faataitaiga, Naomi Schaefer Riley, “What the Mormons Know about Welfare,” Wall Street Journal, Feb. 18, 2012, A11.

  11. Ram Cnaan and others, “Called to Serve: The Prosocial Behavior of Active Latter-day Saints” (draft), 16.

  12. Ezra Taft Benson, “I Uso Nonofo Toatasi o le Ekalesia,” Ensign, Iulai 1988, 49.

  13. Lectures on Faith (1985), 69.