Miligach

Taliw ko pi Kristiano e bay e chep riy ko pin’en ni kan rrin’, nib mu’un e pi miligach nib alamrin ngay. Napan kafram ko Kristiano, ma piyu Rome e kar gafgow niged biyu’ e gidii’ ni ta’abrogon e taliw roraed ngak Yesus Kristus. Napan boech e duw nga m’on, napan nibe togpluw e Taliw nikan fu’eoth u but, ma boech e ulung e kan gafgow nag e pi memba ko boech e ulung ma kiyima li’ raed ngar m’ad. Boech e Kristiano e kar li’yed boech e Kristiano e gidii’ nima gafgow ko Kristiano.

Bukun e Kristiano e kar rrin’ed boech e ban’en ni be yib ko mich ngak Kristus nge gelngin ni yiba adag ni ngan tapigpig Ngak. Boech e kar pired u lane yafas roraed ni yaed be rrin’ ed e murwel rok fare Masta. Biney e ulung nib yul’yul’ e mu’un e pi cha’an u lane Galasia ko Katolic ni kan yarmeg nge picha’an ni kan pi’ ngoraed ni ngar manged e tamachib ko Kristiano u lane taliw ko Protestan. Pi mithmith roraed e rib momaw’ ma ba mangil, machane oren e gidii’ nib mich’ u wan’ raed ngak Kristus e dar lem nag fa dar finey ni ngan murwel u lane galasia u lane yafas rorad.

Oren e pi gachalpen Kristus, ma pin’en ni gadad be rrin’ e mu’un e n’en ni rayog ni ngad rrin’ed u lan gubin e rran u lane yafas rodaed. Ko binem nike buch ma danug nang reb ko ulung ni pi gothon nikar rrin’ed e miligach nib yo’or ko pi Gidii’en Got ko Tin Tomur e Rran. Miligach roraed—miligach rom, pi walgeg ni pumo’on nge ppin—e ke paer ni dabun e gidii’ ni fan ko pin’en ni ngan rrin’.

Bin somm’on e ni nggog e pi pioneer ni Mormon rodaed. Pi n’en ni kar rrin’ed u lane yafas rorad, rogon e paer ko tabinaew roraed, tabinaew, nge pi gapas e def ko fare gospel nikan fulweg. Ke yoeg Sarah Rich e n’en ni mithmitheg e pi pioneer ney napan ni weliy mornga’agen e pumo’on rok, i Charles, nikan pining ni nge yaen ko mission rok: “Biney e ngiyal’ ni rib momoaw’ rogon ngog nge pumo’on rog; machane murwel e ke pining mow ni ngug dar gow ko nochi ngiyal’ ma gomow manang ni gomow [be] fol ko n’en ni ba’adag Somoel ni ngug rrin’ew, ma kug thamiyew nib tu’uf ni ngug tew rogon e adag romow nga wuru’ ngeyog ni ngug rrin’ew fare murwel … ni ngan ayuw ni ngan toey gil’ilungun Got nga dakean e fayleng.”⁴

Daba’ ma gelngiy ni baga’ nibe m’ug ko Fare Galasia ku Yesus Kristus ni Fan ko Gidii’en Got ko Tin Tomur e Rran e murwel ni dariy e lanin’uy nib tagan riy nge miligach ko pi memba. Kafram nikan toey reb e temple rodaed, ma bea’ nib Kristiano nima machib e fith President Gordon B. Hinckley ko mongfan ni dariy e kuruth riy, bin ni baga’ ni pow ni mich ko Kristiano. Me fulweg president Hinckley ni pow ko mich ko birodaed e Kristiano e “yafas ko gidii’ rodad.”⁵Riyul’, ni murwel u lane yafas rodad nge miligach e bin tha’abi mangil e n’en ni gadad ma rrin’ ni ngad pigpig gaed ngak fare Masta nge pi tafagar rodaed.

Dariy ban’en ni kan fil ngodad ni gadad be cheg riy nge n’en ni yima pi’ pulwoy riy u lane Fare Galasia ku Yesus Kristus ni Fan ko Gidii’en Got ko Tin Tomur e Rran. Biney, ma pi memba nikan pining raed ni ngar gagyeg gaed ma ngar ayuw gaed u lane mo’olung rodaed e ngari ayuweg bukun e mo’olung ko galasia rodaed, pi n’en ni yima rrin’ riy, nge pi gosgos. Yaed ma rrin’ e biney u lan 14,000 e mo’olung ni kemus ni bay u lane yu Mariken nge yu Canada. Arrogon, machane gathi gadad ba thil ni gadad bay e gidii’ u lane mo’olung rodad nima murwel nib sensey, fa pi toygang’. Machane pi taym nima pi’ e memba rodad ni ngar ayuw gaed ma ngar machib gaed ngak bea’ e rib ga’ nib thil.

Bin ni baga’ ni yi manang ko pi murwel nima rrin’ e Gidii’en Got ko Tin Tomur e Rran nge miligach e murwel ko pi tamachib rodaed. Kafin ni tha’eg raed ni pag e 50,000 e pumo’on nib fal’ yangren nge ppin ni rugod ma paeg 5,000 e pumo’on nge ppin nib ilal. Nel’ e pul i yan ko lagruw e duw e kar pi’yed u lane yafas rorad ni ngar filed fare gospel rok Yesus Kristus man pi’ e ayuw u lan sana 165 e nam u fayleng. Murwel roraed e mu’un e miligach ngay, nge duw ni yaed be pi’ ko murwel rok Somoel ma pi miligach ni yima pi’ ni ngan ayuweg raed.

Picha’an ni kar mageyed u tabinaew—pi galabthir nge kuboech e tabinaew nib memba—e kiyaed ma miligach ni yaed ma athamgil nag e fagar nge murwel ko pi tamachib ni yaed be pi’ nge yaen nga m’on. Boed ni, bea’ nib Brazilian e ke thap e col rok ko tamachib napan nibe murwel ni nge ayuweg e pi walagen nib pagal nge ppin napan ni yim’ e papa’ nge nina’ rok. Ke weliy e General Authority ni mo’olung ko tiney e bitir ni tay u lane council man sulaen’uy ni galabthir roraed e fil ngoraed rogon ni ngar fal’eged rogon raed ni ngar ayuweged Somoel. Fare pumo’on ni fal’ yangren e feek fare col ko tamachib, ma ba pagal ni walagen nib ragag nge nel’ e duw rok e mang ir e murwel ni nge ayuweg e tabinaew.⁶Oren i gadad e manang boech e wo’ ko miligach ni ngan serv nag e mission fa ngan ayuweg e tamachib. Dananged reb e murwel niwad e biney nike buch u lane reb e ulung u dakean e fayleng.

Baga’ ni gadad ma fith, “Urogon ni ngam moeg ngak bee’ rom nib fal’ yangren nge pi memba nib ilal ni nge pag e sikuul roraed fa murwel roraed ni arrogon?” Ku rung’ag bukun ni yoeg e biney: “Gumanang ko mang e ke rrin’ e Tathapeg nifan ngog—murnguy rok nike gafgow ni bachane denen rog me fas ko yam’ ni bachani ngayog ni ngug fas biyay—Ku thamiy ni gu ba adag ni ngug rrin’ bochi ban’en ni ngug rrin’ e murwel Rok. Gu ba adag ni ngug weliy e n’en ni kug nang fan ni ke pi’ ngog.” Urogon ni ngad mithmith gaed ni gadaed e pi gachalpen Kristus ni ngad murwel gaed? Rogon ni weliy e profet, “[Kemus] ni gadad ma fith raed.”⁷

Ku boech e miligach nike buch ko murwel ko tamachib e pi miligach ko picha’an nima rrin’ e pin’en nike fil e pi tamachib me mang e memba ko fare Galasia. Ko oren e pi gidii’ nikan tawfe nag raed, ma pi miligach ney e rib ga’fan, mu’un e pi tafagar ni ke pag dad fa magawon u tabinaew.

Bukun e duw kafram ma gidii’ u lane biney e mo’olung e ke runga’ag ba pumo’on nib fal’ yangren ni pir’eg fare gospel nikan fulweg napan ni study u Mariken. Napan ni nge sul e ra pumo’on ney ko nam rok, ma baga’ nima fith President Gordon B. Hinckley ngak ko mang e ra buch ngak napan ni ra sul nga tabinaew nike mang e Kristiano. “Ke kireb laniyaen’ e tabinaew rog,” e be yoeg fare pumo’on nib fal’ yangren. “Kar yoen’ed gag nga wen mar ted gag ni ku gum’. Ma murwel tin ni bay buch rog nga m’on nge murwel rog, gubin e sana ra maen ngog.”

“Ri ga ba adag ni ngam pag ban’en ni fan ko gospel?” E ke fith president Hinckley.

Me fulweg fare pumo’on nibe yoer, “Riyul’ fa?” Napan nike mudugil, me fulweg ni ga’ar, “Arame kumang e ba ga’fan?”⁸ Binem e kan thothup ko n’en nima rrin’ oren e memba rodad nib bi’ech.

Kuboech e kanawo’ ko murwel nge miligach e ma m’ug u lane yafas ko pi memba nib yul’yul’ nima murwel u lane pi temple rodaed. Murwel u lane temple e rib thil ko Gidii’en Got ko Tin Tomur e Rran, machane pi n’en ni yima rrin’ e thingari nangfan urngin e Kristiano. Gidii’en Got ko Tin Tomur e Rran e dariy e yilen ko murwel nib mangil, machane kurayog ni ngad nangfaned ma gadad tay fan e pi n’en ni yibe rrin’ ni fan ko picha’an ni mich roraed ni Kristiano e be n’anggin raed ni ngar pi’yed e yafas rorad ko binem e n’en ni yima rrin’.

Reb e duw nike yaen u lane biney e conference, ma ke weliy President Thomas S. Monson e kanawo’ ko n’en ni ngam pag u lane murwel ko temple. Ba papa’ nib Gidii’en Got ko Tin Tomur e Rran u dakean ba nam u lane Pacific e rrin’ ba murwel nib alamrin u bang nib palog u lane nel’ e duw ninge yag e salpiy ninge feek e ppin rok ko mabgol nge ragag faak ni ngan chiyliy nib manemus u lane Temple u New Zealand. Ke weliy President Monson, “Picha’an nima nang fan e pi tawa’ath nib manechubog nima yib u temple e manang ni dariy ban’en nib mangil, dariy rogon nib tomal, dariy ba athamgil nib momaw’ ngeyog ni nge yag e pi tawa’ath nem.”⁹

Gub falfalen’ ngay ni fan ko tu’ufeg ko Kristiano, murwel, nge miligach ni ku guy u fithik Gidii’en Got ko Tin Tmour e Rran. Gube guyem ni gabe rrin’ e murwel rom u lane Galasia, nge ngiyal’ ni gama pag ban’en nge salpiy. Gube guyem ni gabe serv nag e mission rom ko pulwom. Gube guyem ni gab falfalen’ ni gabe dag e tin ni gab cheg riy ni ngam ayuweg e pi tafagar rom. Gube guyem ni gabe ayuweg e gidi’ nib gafgow u dakean e murwel rom nge dakean e ayuw ko Galasia nge salpiy ni yibe pi’ ni fan ni ngan ayuw.¹⁰ Gubin e pin’ey e kandag u dakean ga’ngin yang u fayleng ni yima fil ni be yoeg ni pi memba ko Fare Galasia ku Yesus Kristus ni Fan ko Gidii’en Got ko Tin Tomur e Rran “kar uned ma kar pi’yed e ayuw nib alamrin ngak oren e Mariken nima rrin’ ma yaed ba yul’yul’ ko taym nge salpiy ngak oren e gidii’ nib mangil u Mariken [raliw’ e pasent].”¹¹

Tinem e kanawo’ ni yima pi ngak e gidii’ e ma gel nag daed. Ma pugran nag ngodad e n’en ni fil fare Tathapeg:

“Fa’anra ba’adag be’ ni nge un ngog, ma thangri pag talin ir. …

“Ma en nra finey ni nge ayuweg e pogofan rok e ra thay rok: ma en nra thay e pogofan rok ni bochag e ra pir’eg” (Matthew 16:24–25).

Sana bin baga’ ni yimanang nge bin tha’abi ga’fan ko pi kanawo’ ko murwel ni dariy e lanin’uy riy nib kireb nge pin’en ni ngam pag e yima rrin’ u lane tabinaew rodaed. Pi chitinngiy e kar ted raed ni ngar gargel gaed ma ngar chugliyed pifaak raed. Pi figirngiy e kar pag raed ni ngar ayuweged e ppin roraed nge piffak raed. Fapi miligach nib mu’un ko pi ayuw nib ga’fan nib manemus ea kaygi yo’or ni ngan yog marib macham ya dariy fan ni ngan yog.

Kugbe guy boech e Gidii’en Got ko Tin Tomur e Rran nib fal’ laniyan’ nibe poef e bitir, mu’un e picha’an nib tu’uf e ayuw roraed, ma be gay rogon ni nge ayuweg e pi bitir ni dariy e tabinaew roraed u fithik e athap nge pi murwel ni dabin feek raed ngay kafram. Gube guyem ni gabe ayuweg e gidii’ u tabinaew nge cha’ nibe paer nib chugur nibe gafgow napan nike gargel, nge gidii’ nike kireb loelgen nge gidii’ nike m’ar, nge magawon nima yib ko gidii’ nike labthir. Kube guyem Somoel, ma ke n’anggin e pi profet Rok ninge yoeg ni “rogon ni gabe rrin’ ban’en ni fan ngak bee’ nge pifaakam, ma ra fal’eg Somoel wa’atham.”¹²

Mich u wun’ug ni Gidii’en Got ko Tin Tomur e Rran nima pi’ e murwel nib fal’ laniyan’ nge miligach nibe rrin’ ni nge tay fan fare Tathapeg ni nge leak ko pi n’en nib falel nib manemus nib mangil ko boech e ulungi gidii’. Gidii’en Got ko Tin Tomur e Rran e yaed ma tay e pi miligach roraed u fithik e taym nge bang i n’en ni yaed be fil ngeyog ni ngar thap gaed ko manechubog. Biney e ba riyul’ e kan dag u lan fare Tin ni ngan Fil ko Mich, ni fil ni “taliw ni dariy e miligach riy ko gubin ban’en e ri dariy gelngin ni nge pi’ e mich nib ga’fan ko yafas nge tamilangeg rogon min thap.”¹³

Rogon ni fare bayul rok Yesus Kristus e bay u lukngun e wo’en e thap, ni gadad ni pi gachalpen Kristus e ngad fal’eged e birodad e miligach ni ngad rrin’ed e n’en ni kan tunom nag ni fan ngodad.

Gumanang ni Yesus e kemus ni Ir e ba Magirag ni Fak Got ni fare Chitamangiy nib Manemus. Gumanang e binem ni bachane bayul rok, ma bay e n’en ni kan dugliy ko yafas ni darma mus nge yafas nib manechubog ni ngeyog. Ir e somoel rodad, Tathapeg rodad, nge Tabiyul rodad, ma gube micheg Ir nga dakean fithngan Yesus Kristus, amen.