Saili le Aoaoina: O Loo I Ai Sa Outou Galuega e Fai

A’u tamaitai talavou pele, matou te alolofa tele ia te outou. Ua matou vaaia lo outou tutulai ae ma le lotototoa ma susulu atu ma se malamalama i se lalolagi o loo vaavaalua mai ai avanoa sili ma luitau maoae. Atonu o le a afua ai ona outou taumanatunatu, o le a se mea o i ai i le lumanai mo au? Ou te faamautinoa atu ia te oe, o oe o se afafine amiomama o le Atua, e susulu manaia lou lumanai! Ua e ola i se taimi ua toefuatai mai ai upumoni o le talalelei, ma e mafai ona maua nei upumoni i au tusitusiga paia. Sa e mauaina le meaalofa o le Agaga Paia i le taimi o lou papatisoga, ma o le a aoao atu e le Agaga Paia ia te oe ia upumoni ma saunia oe mo luitau o le olaga.

Na tuuina atu e le Atua ia te oe se faitalia moni ma le avanoa e te aoao ai a o e i ai i le lalolagi, ma o loo ia te Ia se galuega e te faia. Ina ia faataunuuina la lenei galuega, ua ia te oe se tiutetauave patino e te saili ia aoaoina. O le ki i lou lumanai, lou “ave susulu o le faamoemoe,”¹ e mafai ona maua i le tamaitusi fou o le Mo Le Malosi o le Autalavou i lalo o le tulaga faatonuina o a’oga ma i le tulaga faatauaina a Tamaitai Talavou, o le poto.

“O a’oga … o le a tatala ai faitotoa o avanoa.”² A e mulimuli i le apoapoaiga a le Alii e “saili ia aoao, e ala i le suesue ma le faatuatua,”³ e le gata ina e maua le poto mai lou suesue ae e faaopoopo atu ai foi le malamalama a’o e aoaoina e ala i le faatuatua.

Saili e aoao e ala i le suesue ma le maelega. E seasea ona mafai ona e faaaluina se taimi tele e tuuto atu ai i le aoaoina e pei ona e mafaia i le taimi nei. Sa fautuaina ma le poto e Peresitene Gordon B. Hinckley le autalavou a le Ekalesia: “O le mamanu o au suesuega e te faavaeina i le taimi o lau a’oga aloaia, o le a tele ina aafia ai lou naunau mo le poto i lou olaga atoa.”⁴ “E tatau ona e mauaina aoaoga uma e te mafaia. … Ositaulaga soo se mea e tatau ona ositaulagaina ina ia faaagavaaina ai outou lava e faia le galuega a [lenei] lalolagi. … Aoao faamasani o outou mafaufau ma lima ina ia avea o se uunaiga mo le lelei a o outou agai atu i luma i o outou olaga.”⁵

Ina ua saunoa patino atu i tamaitai, na saunoa ai Peresitene Thomas S. Monson: “E tele lava ina le mailoa le lumanai; o le mea lea, e tatau ai ona tatou tapenapena mo mea e le o mautinoa. … Ou te uunaia outou e tulimatai a outou aoga ma aoaoina tomai e manaomia tele, a oo ai ina tulai mai se tulaga faapena, a o la ua outou saunia e tuuina atu.”⁶

Tamaitai talavou, mulimuli i fautuaga a nei perofeta popoto ma musuia. Ia avea oe o se tagata aoao lelei. Tulai ma susulu atu i a outou a’oga ma galulue malosi, faamaoni, ma ia amiosa’o. Afai o outou tauivi pe lotovaivai i a outou faatinoga i le a’oga, saili atu se fesoasoani mai o outou matua, faiaoga, ma tagata loto fesoasoani o le Ekalesia. Aua lava nei fiu!

Fai se lisi o mea e te manao e aoao; ona “faasoa atu lea o au sini faaleaoaoga i lou aiga, uo ma taitai ina ia mafai ai ona latou lagolago atu ma faamalosiau atu ia te oe.”⁷ O le mamanu lena o le Alualu i Luma o le Tagata Lava ia.

O le i ai o tekinolosi, ua outou molimauina ai le pa mai o le poto. Ua lofituina pea outou i leo, vitio, ma upegafesootai. Filifili tatau ma aua nei faatagaina lenei tafe mai o faamatalaga e faalavelaveina ai oe pe faatelegese ai foi lou alualu i luma. Tulai mai, tamaitai talavou! O oe e fuafuaina au sini. Filifili oe po o a mea e faaulufale i lou mafaufau ma lou loto.

O nisi o mea aupito taua e te aoaoina, o le a faia i fafo atu o le potuaoga. Ia siosiomia oe lava i tamaitai o faataitaiga, o ē e mafai ona aoao atu ia te oe tomai faatausiaiga, faatufugaga, musika, talafaasolopito o aiga, taaloga, tusitusi, po o le failauga. Faamasani ia i latou ma talosaga i ai e faiaoga ia te oe. A oo ina e aoaoina se mea fou, ia e aoaoina atu i le Motuale pe avea oe ma se faiaoga i isi tamaitai talavou e avea o se vaega o tulaga e manaomia mo lau pine o le Pi Faamamaluina.

E le gata i lo’u tina maoae, e tele ni o’u faiaoga sa i ai i lo’u olaga. Na muamua o’u masani i le faiga faafaiaoga ina ua faatoa iva o’u tausaga. Sa aoaoina au e lo’u faiaoga o le Peraimeri e su’i kolosi le “O Le a Ou Aumaia le Malamalama o le Talalelei i Lo’u Aiga,” o se ata sa tautau i lo’u potu i tausaga o lo’u talavou. Sa taialaina au e lo’u faiaoga, faasa’o au, ma faamalosiauina lava au i taimi uma. Na sosoo mai ai ma isi faiaoga. Sa aoaoina au e ni fafine su’isu’i se toalua o la’u uarota ia ou iloa su’isu’i. O la la’ua taitaiga, onosai, ma le faamalosiauga, sa ou ulu atu ai i se tauvaga su’i ofu ina ua 14 o’u tausaga ma sa ou manumalo ai i se faailoga! O lea faagasologa na faateleina ai lo’u naunau i le poto ma le tulaga aupito silisili i isi foi vaega.

O le mauaina o le poto i le taimi nei, o le a matua taua lava pe a avea oe o se tina. “O le maualuga o le a’oga a se tina, e matuai tele se faatosinaga i filifiliga faaleaoaoga a lana [fanau].”⁸ O le aoaoina o se tina e mafai ona umia ai le “ki e taofia ai [le] taamilosaga o le mativa.”⁹ O tamaitai e a’otauina lelei … “e aga atu ina: Fanauina ni pepe e maloloina lelei, e maloloina a latou fanau, e tele atu le mautinoa ma e i ai foi le faautautaga lelei.”¹⁰

Ua tatou aoaoina i le “O Le Aiga: O Se Folafolaga i le Lalolagi” e faapea “o le uluai matafaioi a tina o le faafaileleina lea o a latou fanau.”¹¹ O le tuuina atu o lau fanau ia aooga, o se vaega o lena faafailelega, ma o lou tiutetauave paia. Faapei o le autau talavou “na aoaoina e o latou tina,”¹² o le a avea oe ma faiaoga aupito sili ona taua i lau fanau, o le mea lea ia filifili ai ma le faaeteete lou aoaoina. Ia e faamanuiaina lau fanau ma lou aiga i le lumanai e ala i lou aoaoina o mea uma e te mafaia i le taimi nei.

Saili e aoao e ala i le faatuatua. Tatou te aoaoina e ala i le faatuatua pe a tatou mauaina ma le maelega le poto faaleagaga e ala i le tatalo, suesue i tusitusiga paia, ma le usiusitai ma a o tatou saili atu i le taitaiga a le Agaga Paia, o lē e molimau mai i upumoni uma. Afai e te faia lau vaega ina ia maua ai le poto, e mafai e le Agaga Paia ona faamalamalamaina lou mafaufau. A o e taumafai e tausisia lou agavaa, o le a tuu atu e le Agaga Paia le taitaiga ma faaopoopo atu le malamalama i lou aoaoina.

A o avea au ma se tamaitai talavou, sa ou faaaogaina ni mea faase’e e uumi tele ma ni seevae e lapopo’a tele, ma sa aoaoina au e se uo e faase’e! Sa ma o i se aso matagofie o le tautotogo i le mutigitigi o le la, manaia atoatoa le kiona, ma le lagi lanumoana ma maninoa. Na suia le popole i malifa faatafato, i le fiafia a o ou aoaoina. E ui foi ina ou palasi faafia i na mea faase’e uumi, ae sa ou tu i luga ma sa ou taumafai pea. Sa oo ina ou fiafia i le taaloga!

Peitai, e lei umi ae ou iloa, e le o aso uma ma tau e faase’e ai e lelei. O aso e faamalumalu mai ai le lagi, sa matou faase’e ai i se tulaga sa ta’ua o le “sulu mafolafola.” E tupu le sulu mafolafola pe a faasalalau le malamalama o le la e ao. A tilotilo atu la i luma i le kiona pa’ema, o le a e iloa ai e mou atu le iloa o le loloto, ma faigata ai ona fuafua le tifato o le malifa pe vaaia foi nai mati’e ma patupatu i luga o le a’ega.

Tamaitai talavou, e mafai ona outou vaavaai atu i o outou lumanai e faapei ona sa ou vaai atu i lena malifa faase’e tafato. Atonu e i ai taimi tou te lagonaina ai o loo outou ola i le sulu mafolafola, ua le mafai ona iloa atu le mea la e i luma atu. O le aoaoina e ala i le faatuatua, o le a outou maua ai le mautinoa ma o le a fesoasoani ia te outou e faatautaia ai lo outou ala i taimi e le mautinoa ai.

I le mataupu e 25 o le Mataio, o loo aoao mai ai i tatou e le faataoto i taupou e toasefulu e faapea, e taua le tapenaga faaleagaga ma e tatau lava ona faia e le tagata lava ia. Tou te manatua sa valaaulia ia taupou e toasefulu e faafeao le faatoafaiava i le taumafataga o le faaipoipoga, ae sa na o le toalima taupou popoto sa saunia ma a latou suauu i a latou lamepa.

“Ona fai atu lea o e valea i e popoto, Au mai ni a outou suauu ma matou; aua o le a mamate a matou lamepa.

“A ua tali mai o e popoto, ua faapea mai, Ne’i le lava ia i matou ma outou: a e lelei ona outou o i e faatau ma faatau mai ai ni a outou.

“Ua latou o e faatau, ona sau ai lea o le faatoafaiava; o e ua saunia foi ua latou ulufale atu faatasi ma ia i le tausamaaga, ona pupuni ai lea o le faitotoa.”¹³

Atonu tou te manatu ua manatu faapito ia taupou popoto i lo latou le faasoa atu o a latou suauu, ae sa le mafai. O le saunia faaleagaga e tatau lava ona faia e le tagata lava ia, o lea mataua ma lea mataua, ma e le mafai ona vaeluaina.

O le taimi lenei mo oe e maelega ai oe lava ia faateleina lou poto faaleagaga—o lea mataua ma lea mataua—e ala i le tatalo, suesue i tusitusiga paia, ma usiusitai. O le taimi lenei e tulitulimatagau ai lau a’oga—o lea mataua ma lea mataua. O mafaufauga mama taitasi ma faatinoga e faaopoopo atu ai foi i a outou lamepa, ma faaagavaaina ai outou mo le taitaiga a le Agaga Paia, lo tatou faiaoga faalelagi.

O le a taialaina oe e le Agaga Paia i lau malaga i le olaga nei, tusa lava pe e te lagona ua e i ai i se sulu mafolafola, ua le mautinoa po o le a le mea o i luma. E le tatau lava ona e fefe. A e tumau ai i luga o le ala e tau atu i le ola e faavavau, o le a taialaina oe e le Agaga Paia i au faaiuga ma i lou aoaoina.

Ou te molimau atu mai o’u aafiaga patino, afai e te saili atu i le aoaoina e le gata i le suesue ae faapea foi i le faatuatua, o le a taialaina oe i le mea “o le a manaomia … oe e le Alii e te faia ma le mea e tatau ona e iloa.”¹⁴

Sa maua lo’u faamanuiaga faapeteriaka a o ou talavou, ma sa fautuaina au ia saunia au lava ia lelei sa’u aoga ma ia vave ona ou aoao i lo’u olaga ia uiga auau mama e moomia i le faatausiaiga ma le tausiga o se aiga. O lea sa ou manao ai lava i le faamanuiaga o se aiga; peitai, e lei faataunuuina lena faamanuiaga seia oo ina ua 37 o’u tausaga ma sa ou faatoa faaipoipo ai. Sa nofofua lo’u toalua ina ua maliu lona toalua, ma o le aso na faamauina ai i ma’ua i le malumalu, sa faafuasei ai ona faamanuiaina au e le gata i se toalua a o se aiga e toafa le fanau.

A o lei taitai oo i lena taimi, sa tele ni aso sa ou lagonaina ai o la ou te faase’e i le sulu mafolafola, ma ou fesili ai, “O le a se mea o i ai i le lumanai mo au?” Sa ou taumafai e mulimuli i apoapoaiga mai lo’u faamanuiaga faapeteriaka. Sa ou suesue ma le maelega e avea ma faiaoga, ma faaauau ai lava a’u a’oga ia avea ma se puleaoga i aoga tulagalua. Sa ou tatalo i lo’u Tama Faalelagi ma sailia le taitaiga a le Agaga Paia. Sa ou pipiimau ma le naunautai i folafolaga a perofeta o ē na faamautinoa mai ia te au afai ou te “tumau faamaoni ma faatuatua, ma tausia [a’u] feagaiga, auauna atu i le Atua, ma alofa [i lo’u] Tama i le Lagi ma Iesu Keriso, o le a le taofia lava ia te [a’u] se faamanuiaga e faavavau a lo tatou Tama Faalelagi mo Ana fanau faamaoni.”¹⁵

Ou te iloa o la’u a’oga, na saunia ai au mo se olaga ou te lei mafaufauina o se tamaitai talavou. Sa ou mafaufau sa ou a’oga ina ia ou faiaoga ai i se aoga ma a’u fanau i le lumanai, peitai ou te lei iloaina o la foi sa saunia au e le Alii e faiaoga i le gagana Peretania i Monokolia i se misiona ma lo’u toalua, ma faiaoga i tamaitai talavou o le Ekalesia i le lalolagi atoa, ma aoao atu foi i fanau a la’u fanau le taua o le poto—o faamanuiaga ofoofogia uma sa le mafai ona ou manatunatu i ai.

Ou te molimau atu e silafia oe ma e alofa lo tatou Tama i le Lagi ia te oe. Ua Ia tuuina atu le faatuatuaga tele ia te oe ma ua i ai se galuega e na o oe e mafai ona faia. Ou te fia faamautinoa atu ia te oe o le a saunia oe mo lena galuega tele pe afai e te saili atu i le aoaoina e ala i le suesue ma faapea foi i le faatuatua. Ou te molimau atu ai i nei mea i le suafa o Iesu Keriso, amene. ◼