O Lesona Faapitoa

Mo le 20 masina ua tuanai, sa faamanuiaina ai lo matou aiga i se avanoa e maua ai se pepe e sili ona faapitoa.

O Paxton laitiiti, o le tama a le ma tama, sa fanau mai ma se ma’i e seāseā tupu, o le faaletonu o koromasoma, o se ma’i tau kenera e iloagofie ai le ese o ia, o le mea moni, o se toatasi i le faitau selau o miliona. Mo lo ma afafine ma lona toalua, na amatalia se malaga e le’i fuafuaina, suia-olaga, ina ua fanau mai Paxton. O lenei aafiaga ua avea ma se tofotofoga faigata mo le aoaoina o lesona faapitoa e faatatau i le faavavau.

Na aoao mai le susuga a Elder Russell M. Nelson, o le faatoa maea ona laugaina i tatou:

“Mo mafuaaga e masani ona le mailoa, e fananau mai ai nisi o tagata ma ni tapulaa faaletino. Atonu e faaletonu ni vaega faapitoa o le tino. Atonu e le paleni vaega e faagaoioia ai le tino. Ma o o tatou tino uma lava e oo i ai faama’i ma le oti. Ae ui i lea, o le meaalofa o se tino faaletino e matuai taugata lava. …

“E le manaomia se tino atoatoa ia maua ai se faasinomaga e faavavau. O le mea moni, o nisi o agaga e sili ona lelei o i totonu o ni tino auma’ia. …

“Mulimuli ane, o le a oo mai le taimi o le a ‘toe faatasia … agaga ma le tino i … foliga atoatoa; o lima ma vae ma soogaoivi o le a toefuataiina i ona tulaga e tatau ai’ (Alema 11:43). Ona, faafetaia lea o le Togiola a Iesu Keriso, ua mafai ona faaatoatoaina i tatou ona o Ia.”¹

O outou uma o e o i ai luitau, atugaluga, faanoanoaga, po o le lototiga ona o se tasi e pele ia te outou, ia outou silafia le mea lenei: e le uma le alofa ma e faavavau le agalelei o le Atua lo tatou Tama Faalelagi i lau pele o lē ua puapuagatia ma e alofa foi o Ia ia te oe!

Atonu e fesili nisi pe a feagai ma ni mafatiaga faapena, e mafai faapefea ona faatagaina e le Atua Silisili Ese lenei mea e tupu? Ona sosoo ai lea ma lena fesili e foliga mai o se fesili masani, aisea ua tupu ai lenei mea ia te a’u? Aisea e tatau ai ona tatou oo i faama’i ma mea e faamuta ai pe vave maliliu ai tagata faapelepele o o tatou aiga po o le faaumiumi o o latou tausaga i mea tiga? Aisea e tutupu ai nei mea faamafatia loto?

O taimi faapenei tatou te liliu atu ai i le fuafuaga sili o le fiafia na foafoaina e lo tatou Tama Faalelagi. O lena fuafuaga, ina ua folasia mai i le olaga i le muai olaga, sa faaosofia ai i tatou e alalaga i le olioli.² O se faaupuga faigofie, o le olaga lenei o le aoaoga faamasani mo le faaeaga e faavavau, ma o lena faagasologa o lona uiga o suega ma tofotofoga. O le tulaga lava lena sa i ai, ma e leai se tasi e sao mai ai.

O le faatuatuaina o le finagalo o le Atua e totonugalemu i lo tatou olaga i le tino. Faatasi ai ma le faatuatua ia te Ia, tatou te utuvai mai ai i le mana o le Togiola a Keriso i na taimi pe afai ua anoanoai le mau fesili ae ua tau leai ni tali.

Ina ua mavae Lona Toetu, a o asiasi atu i Amerika, sa aapa atu lo tatou Faaola, o Iesu Keriso i tagata uma ma le valaaulia lenei:

“E i ai ea ni isi o ia te outou ua mama’i? Ia aumai i latou iinei. E i ai ea ni isi o outou ua pipili, pe ua tauaso, pe ua setu, pe ua manua, pe ua lepela, pe ua supa, pe ua tutuli, pe ua puapuagatia i soo se ala? Ia aumai i latou iinei ma o le a ou faamaloloina i latou, ona ua ou agaalofa tele ia te outou; ua tumu lo’u loto i le alofa mutimutivale. …

“Ma sa oo ina ua uma ona fetalai mai o ia faapea, sa o atu faatasi uma le motu o tagata, ma o latou tagata mamai ma o latou tagata puapuagatia, ma o latou pipili, ma o latou tauaso, ma o latou gugu, ma i latou uma o e na puapuagatia i soo se ala; ma sa ia faamaloloina i latou uma taitoatasi ina ua aumaia i latou ia te ia.”³

E tele se malosi e mafai ona maua i upu “sa o atu … uma le motu o tagata”—uma, uso e, ma tuafafine. E feagai uma i tatou ma luitau. Ona sosoo ai lea ma le fuaitau: “na puapuagatia i soo se ala.” Tatou te malamalama uma lava i ai, a ea?

E le’i leva ona uma le fanau mai o Paxton faapelepele, sa matou iloaina o le a faamanuia ma aoao mai i matou e le Tama Faalelagi i ni lesona faapitoa. A o tuu o ma tamaitamailima ma lona tama i luga o si ona tamai ulu i le faamanuiaga muamua mai le tele o faamanuiaga faaleperisitua, sa oo mai i lo’u mafaufau upu mai le Ioane mataupu e iva: “ia faaalia ai galuega a le Atua ia te ia.”⁴

Ua mautinoa lava le faaalia o galuega a le Atua e ala mai ia Paxton.

O loo matou aoaoina le onosai, faatuatua, ma le agaga faafetai e ala i le mana faamafanafana o le auauna atu, o itula e tele o lagona o’oo’o, loimata o le agaga malamalama, ma tatalo ma faailoaga o le alofa mo e pele o loo manaomia le fesoasoani, ae maise lava o Paxton ma ona matua.

Sa saunoa Peresitene James E. Faust, o la’u peresitene o le siteki ao ou tamaitiiti: “E tele naua lo’u talisapaia o na matua agalelei o e onosaia ma le faapalepale ma faatoilaloina lo latou lototiga ma le lotonutimomoia mo se tamaitiiti o lē sa fanau mai ma se ma’i tuga faalemafaufau pe faaletino. O lenei lototiga e masani ona faaauau i aso uma lava, e aunoa ma se mapusaga, i le olaga atoa o le matua po o le tamaitiiti. E masani lava, e tatau i matua ona tuuina atu se tausiga faafailele e sili atu lea e le taitai ai ona malolo, i le ao po o le po. E toatele lava tina o e o loo galulue faaletino ma faalemafaufau mo le tele o tausaga, i le tuuina atu o le faamafanafanaga ma le tau faamāmāina o le mafatiaga a lana tama faapitoa.”⁵

E pei ona faamatalaina i le Mosaea, ua matou molimauina le alofa mama o le Faaola ua tuuina mai i le aiga o Paxton, o lea alofa e avanoa mo tagata uma: “Ma o lenei sa oo ina faamāmāina avega sa tuu i luga o Alema ma ona uso; ioe, sa faamalosia i latou e le Alii ina ia mafai ona latou tauave ma le faigofie a latou avega, ma sa latou gauai atu ma le fiafia ma le onosai i le finagalo atoa o le Alii.”⁶

I se tasi o po a o laitiiti lava ia Paxton, sa matou i ai i le iunite mo pepefou e tigaina i le falemai matagofie o le Primary Children’s Medical Center i le Aai o Sate Leki, Iuta, sa matou maofa i le vaaiga ma le tausiga tuuto, ma le atoatoa na tuuina atu e fomai, tausi soifua, ma tausimai. Sa ou fesili atu i lo’u afafine pe o le a faapefea ona matou totogiina lenei auaunaga ma tuuina atu se taumatematega i se tau o le a i ai. Sa fautua mai e se fomai sa tu latalata mai e faapea sa “matuai maualalo” la’u tau ma o le totogi mo le tausiga o Paxton laitiiti o le a matuai tele lava e tele atu nai lo le aofai na ou valoia. Sa matou iloaina ai o le tele o le tupe e totogiina mo tausiga e faia i lenei falemai e uma lava ona totogi i meaalofa agalelei o le taimi ma foai tupe a nisi. O ana upu sa ou lagona ai le faamaualalo a o ou mafaufau i le taua o lenei alualutoto ia i latou o e sa matuai faaeteete i le vaaiga o ia.

Sa ou manatua ai se mau masani a faifeautalai i sona faauigaga fou: “Ia manatua ua tele lava le taua o agaga i le silafaga a le Atua.”⁷

Sa ou tagi a o ou mafaufau loloto i le alofa lē faatuaoia o lo tatou Tama Faalelagi ma Lona Alo Pele, o Iesu Keriso, mo i tatou taitoatasi, a o ou aoaoina i se auala mamana le taua o se agaga, faaletino ma le faaleagaga, i le Atua.

Ua iloa e le aiga o Paxton o loo siomia i latou e le anoanoai o agelu fesoasoani faalelagi ma faalelalolagi. O nisi sa o mai e fesoasoani i taimi na manaomia ai ma toe tuumuli filemu atu. O isi sa tutu mai i le faitotoa ma mea taumafa, fai tagamea, aumai tamaiti [mai le aoga], telefoni mai e faamalosiau mai, ma tatalo faapitoa mo Paxton. Sa faapea foi ona aoaoina ai se isi lesona faapitoa: Afai e te tau atu i se tagata o malemo, mata e te fesili pe latou te manaomia se fesoasoani—pe o le a sili atu le lelei o le puna i totonu ma laveai mai o i latou mai le vai loloto? O le ofo, “Ta’u mai pe a i ai se mea e mafai ona ou fesoasoani atu ai,” e ui lava ina lelei le faamoemoega, ma e masani foi ona tuuina atu, ae o le mea moni e le o se fesoasoani lea.

E faaauau pea ona tatou iloa le taua o le aoga o le nofouta ma le fiafia i olaga o i latou e siomia i tatou, i le aoaoina e le gata i le taua o le tuuina atu o le fesoasoani ae faapea foi i le maoae o le olioli lea e oo mai mai le fesoasoani atu i isi.

Na saunoa le susuga ia Peresitene Thomas S. Monson, o le faataitaiga lelei lava lea o le siitia o e puapuagatia e faapea: “Ia faamanuia le Atua ia i latou uma o e taumafai ia avea ma leoleo i o latou uso, o e foai atu ina ia maua ai se toomaga mai mafatiaga, o e taumafai i le lelei atoatoa ia faia se lalolagi sili atu ona lelei. Pe ua outou matauina o tagata faapena e sili atu lo latou foliga fiafia? O o latou tulagavae e sili atu ona mautinoa. E i ai so latou lagona o le lotomalie ma le faamalieina … aua e leai se tasi e mafai ona tuuina atu le fesoasoani i isi e aunoa ma le matuai faamanuiaina o ia lava.”⁸

E ui o le a tatou fetaiai ma tofotofoga, mafatiaga, lē atoatoa, lototiga, ma ituaiga uma o puapuaga, ae o le a i ai pea iina lo tatou Faaola agalelei ma agaalofa mo i tatou. Ua Ia folafola mai:

“Ou te le tuua outou o matuaoti: ou te sau ia te outou. …

“Ou te tuuina atu ia te outou le manuia: o lo’u manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.”⁹

Matou te matuai faafetai i lo tatou Tama Faalelagi mo la matou siamupini o Paxton. E ala mai ia te ia ua faaali mai ai e le Alii ia Ana galuega ma faaauau pea ona aoaoina i matou i nei lesona taua, paia, ma faapitoa.

Ou te fia faaiu atu i upu mai se pese e sili ona ou fiafia i ai:

Uso e ma tuafafine, ou te faamoemoe ma tatalo o le a faaauau pea ona tatou tauaveina faatamalii a tatou avega ma ia aapa atu ia i latou o ē o loo puapuagatia o siomia ai i tatou ma manaomia ona siitia ma faamalosiauina. Talosia ia taitasi i tatou ma faafetai ae i le Atua mo Ana faamanuiaga ma toe faafou la tatou tautinoga i lo tatou Tama oi le Lagi, ia tuuina atu ni auaunaga faatauvaa i Ana fanau. I le suafa o Iesu Keriso, amene.