Kaskasukuhlih Neitail Serihkan en Wehwe Mwahu

Ni sounpar akan ahr kin doula, audepen ahi mour I solahr nohn taman, ahpw me I kin tamatamante ni sansal iei ipwidien emenemen aht tungoal serihkan. Nanleng mwomwen kerendo mehlel ansou pwuko, oh ma I kin song, I kerenieng kak pwurehng kehn pepehm pwuko en waun oh kapwuriamwei me I kehn ni ehuehu ansou me seri kesempwal pwuko pwilidieng nan pehi kan.

Neitail “seri kan, iei kisakis ehu sang rehn Kauno” (Melkahka Kan 127:3). E mwahngi oh poakohng emenemen ni limpoak unsek (tehkMoroni 8:17). Meid sarawi pwukoa me Sahm Nanleng ketikihong kitail en wia nohno pahpa oh patehng Ih sewese Sapwellime seri ngehn kaselel kan en wiahla dahme E ketin mwahngih me re kak wiahla.

Pwukoa sarawi wet en kakairada atail tungoal serihkan wia pwukoa ieu me laudsang me kitail kak kelehpw wia, ma Kauno sohte sawas. E mwahngi mengihtik en dahme atail tungoal serihkan anahne ese, dahme re anahne wia oh dahme re anahne kapwaiada pwe irail en kak pwurala Reh. E kin ketikihong nohno pahpa kan iren kaweid oh kamarain sang nan pwuhk sarawi, sang Sapwellime soukohp akan, oh Ngehn Sarawi.

Nan ehu kaudiahl en imwin rahn akan me sang Soukohp Joseph Smith, Kauno mahsanih me nohno pahpa kan en kin kasukuhlih neirail serihkan ren wehwehki padahk en koluhla, pwoson Krais, pepdais, oh kisakis en Ngehn Sarawi. Tehk me Kauno sohte mahsanih te kitail en “kasukuhliki duwen padahko”; Sapwellime kehkehlik iei me kitail en kasukuhlih serihkan ren “wehwehki padahko.” (Tehk D&C 68:25, 28; lipw tohrohr kapatapatehng.)

Nan Melkahka Kan kitail wadek, “Komw ketin kawehwehiong ie sapwellimomwi kosonned kan, oh I pahn kapwaiada; I pahn kapwaiada ni mohniongi unsek” (Melkahka Kan 119:34).

Kaskasukuhlih neitail serihkan en wehwehki mehkot iei mehkot me laudsang ndindahiengete irail mehkot. Ahpw iei sewsewese neitail serihkan koledi padahko nan mohngiongirail ni wiepe ehu me E pahn wiahla kisehn ihs irail oh pahn sansal nan arail lamalam oh nan arail wiewia erein arail mour.

Nephi padahngki me pwukoa en Ngehn Sarawi iei en ketikihong mehlel “nan mohngiong en aramas akan” (2 Nephi 33:1). Atail pwukoa duwen nohno pahpa iei en wia uwen atail kak koaros en koasoanehdi wasa oh irair me neitail serihkan pahn kak kehn kaweid en Ngehn Sarawi oh eri sewese irail en kasawiada dahme re wie pepehm.

I tamanda duwen delepwohn ieu me I alehdi sang nait serepeino Michelle. Ni ngilen me mie mehkot laud sair ih e nda, “Nohno, I apwtehn alehdi irair kapwuriamwei ehu rehn Ashley.” Ashley iei nah serepein me sounpar limau ahnsouo. Michelle kawehwehda me ni mensengo Ashley oh Andrew me sounpar siluh wie akahkamai sohte uhdi—emeno sohte men ehuong rieo ah mehteio kin uhd poakih. Mwurin eh sewese ira en wiahda mwahu, Michelle ahpw uhd kohla tehk pwelelo.

Sohte pwand, Ashley tangolong, lingeringer pwe dene Andrew sohte men ehukihieng mehkot. Michelle eri katamanehng Ashley inou me irail wiahda nan arail soutik en peneinei me re pahn nantiong en ahpwete kadekpene nanpwungarail.

E idek rehn Ashley ma E men kapakap oh peki sawas rehn Samatail Nanleng, ahpw Ashley, wie linglingeringerte, sapengki, “Soh.” Peidek kohieng ma E kamehlele me Samatail Nanleng pahn sapeng ah kapakap, Ashley nda me E sehse. Ah nohnohu uhd peki en song eri koledi peh oh ira kelepwikihdi.

Michelle eri kaweidki me Ashley kak peki rehn Sahm Nanleng en sewese Andrew en kak ese ehupene—oh sewese ih en kadek. Madamadau me Samatail Nanleng kak ketin sewsewese rie pwutak tikitiko en ese ehupene mwein sairada Ashley, oh E tepida kapakap, ni eh tepikihda mahs peki Sahm Nanleng en sewese Andrew ese ehupene. Ni Ashley eh pekpeki rehn Kauno en sewese ih en kadek, E tepida sengiseng. Ashley kaimwsekala ah kapakapo oh kihdiong moange pohn pwopwen ah nohnohu. Michelle koledi ih oh peidek reh dahme E sengisengki. Ashley sapengki me E sehse.

Ah nohnohu nda, “I ese dahme ke sengisengki. Ke ahniki pepehm mwahu loalomw?” Ashley tuwelek, oh eh nohnohu doula, “Met iei Ngehno me sewseweseiuk en ahniki pepehm wet. Ih mwomwehn met me Samatail Nanleng kin kasalehiong uhk me E poakpoakeiuk oh E pahn seweseiuk.”

Ih eri peidek rehn Ashley ma E kamehlele met, ma E kamehlele me Samatail Nanleng kak sewese ih. Ni kisin mesehkan ahr direkihla pilen mese, Ashley nda me ehng.

Ekei ahnsou wiepe keieu mwahu en kasukuhlih neitail serihkan ren wehwehki padahk ehu iei en padahk ong ni ahnsouohte me re mih nan irairo . Soangen ahnsou pwuko kin pein pwarada, sohte kin koasoandi oh kin wiawi nan mwekid en ehuehu rahn nan mour en peneinei. Re kin kohdo oh mwadangete pil kohkohla, eri kitail anahne en kin mwasahn oh kasawiada ahnsoun padahk ehu ni ahnsou me neitail serihkan kin pwarkido peidek de kapwunod, ni ahnsou me re ahniki kahpwal en nanpwungen pirien de kompoakapah kan, ni ahnsou me re anahne kanengamah, de re wiahda sapwung, de anahne wiahda koasoandi. (Tehk Teaching, No Greater Call: A Resource Guide for Gospel Teaching [1999], 140–41; Marriage and Family Relations Instructor’s Manual [2000], 61.)

Ma kitail onopehr oh pahn mweidohng Ngehno en kaweid nan irair pwukat, neitail serihkan pahn alehdi kasukuhl ni laudlahn lipwe oh wehwe mwahu.

Me kesempwal duwehte iei ahnsoun kasukuhl kan me kin kohdo ni atail kin koasoanehdi mwahu mwekid kan en ehuehu rahn rasehng kapakap oh onop pwuhk sarawi nan peneinei, soutik en peneinei, oh kemwekid teikan en peneinei.

Nan irair en padahk koaros kasukuhl koaros oh wehwe koaros kin keirda keieu mwahu nan irair en pepehm mwahu oh limpoak wasa me Ngehno kin kak ketiket ie.

Sounpwong riau mwohn nah tungoal serihkan ahr lel sounpar waluh, pahpa men kin koasoanehdi ahnsou nan ehuehu wihk pwehn kaunop irail ong pepdais. Nah serepeino nda me ni eh lel ah ahnsou, eh pahpao kihong ih ehu pwuhk oh ira mwohdpene, irahte, oh koasoaiapene ara pepehm me pid tepin padahk kan en rongamwahuo. Ni ara doula eh pahpao ndahiong en mahlenihda duwen me ira pahn koasoaiahdao. Mahleno kasalehda mour mwohn mour wet, mour en pohn sampah oh dahme E anahne wia pwehn pwurala kousoan rehn Sahm Nanleng. Eh pahpao kihda ah kadehde en ehuehu dake kan en pilahn en komouro ni ansou me E padapadahkihieng ih.

Ni ahnsou me nah serepeino tamando irair wet ni eh laudehr, E nda, “I sohte pahn manokehla duwen limpoak me I pehm nan ansou pwuko rehn ahi pahpao.… I kamehlele me irair wet iei kahrepe keieu en ei tungoaleniki kadehde en rongamwahuo ni ahnsou me I pepdaisla.” (Tehk Teaching, No Greater Call, 129.)

Kaskasukuhl pwe en wehwe mwahu kin anahne ngoang oh pwersek. E kin anahne padahk sang ni karasaras oh ni mehlel sang ni sewsewese neitail serihkan en momourki dahme re esehla.

President Harold B. Lee padahngki, “Ma sohte irair nan mour me pid tepin padahk en rongamwahuo eh kin pweida, e kin … apwal en kamehlele tepin padahko” (Teachings of Presidents of the Church: Harold B. Lee [2000], 121).

I tepin esehla duwen kapakap sang ni iang ahi peneinei kelepwukihdi nan kapakap en peneinei. I kasukuhliki mahsen en kapakap rongorong ahi nohno pahpa kapakap oh ni ara sewese ie kihda ahi tepin kapakap kan. I esehla me I kak patohieng Sahm Nanleng oh peki kaweid.

Ni menseng koaros sohte sapwung, ahi nohno oh pahpa kin kihkitpene ni tehpel en mwengeo mwohn mwengehn menseng, oh se kin kelepwukihdi kapakap en peneinei. Se kin kapakap ni ahnsoun mwenge koaros. Ni soutik mwohn aht pahn meir, se kin kelepwukihdi nan aht pere lap en ihmwo oh kaimwsekala rahno ni kapakap en peneinei.

Mendahte eh tohto me I sohte wehwehki duwen kapakap ni ei serio, E wiahla mehlel kisehn ahi mour me mihmihte rehi. I wie doudoulahte kaikaiahn, oh ahi wehwe me pid manaman en kapakap wie kekeirdahte.

Elder Jeffery  R. Holland mahsanih, “Kitail koaros wehwehki me pweidahn mahsen en rongamwahuo kin pahsan eh kin padahk oh eri wehwe mwahu oh eri pweida nan mour ni wiepe me inoupe me pid peren oh komour kak en alahldi.” (“Teaching and Learning in the Church” [mihting en kaiahn en kaun nan sampah pwon, Pepweri 10, 2007], Liahona, Suhn 2007, 57; Ensign, Suhn 2007, 89).

Kasukuhl pwehn wehwehkihla ni unsek padahk kan en rongamwahuo wia mehkot me pahn wiawihki erein mour oh kin alahldi “ehu ire mwuri ehu lain, ehu padahk mwuri ehu, ekis me oh ekis mwo” (2 Nephi 28:30). Ni serihkan ahr kin koledi oh wia dahme re esehlahr, arail wehwe kin kalaudla, me elehieng kasukuhl eh laudla, wiewia eh laudla, oh wehwe kin pil tehlapala oh tengedi.

Kitail kak ese me neitail serihkan tepidahr wehwehki padahk ni ansou me e kin sansalda nan arail lamalam kan oh mwekid kan mendahte ma sohte kehkehlik de kisakis. Ni neitail serihkan ahr kin esehla wehwehki padahk kan en rongamwahuo, re kin ahpwete uhtohrda oh koahiekla. Re kin iang apwaliala kahpwal kan nan atail peneinei oh kin sawas ong wiahda irair mwahu nan imwatail kan oh pweidahn atail peneinei.

Kitail pahn padahkihong neitail serihkan en wehwe mwahu ni atail isaniki ahnsoun kasukuhl koaros, luke Ngehno, wia karasaras mwahu, oh sewese irail en mourki dahme re esehlahr.

Ni atail kin kilang nan mesen seri pwelel, kitail kin tamanda koulo:

Kitail en wia met. Ni mwaren Sises Krais, ahmen.