Sensey nag Pifakdad ningar Nanged Fan

Fini ke yaen boech e duw, ma de yog ninggu puguran gubin e yafos rog, machane boech e tin ni kugu manang ni rib tamilang e ngiyal napan nikan gargeleg pifaak mow. Kug thamiy nrib chuchugur e tharmiy, ma fa’anra gu gay rogon, ma rayog ninggu thamiy ni boed rogon e pi thamtham nib mangil nge tafney ni ke buch rog ko ngiyal’ ni ra reb fapi madway ma kan tay nga pa’ag.

Pi “bitir rodad e ba tow’ath nma pi’ Somoel” (Psalm 127:3). Ir ma nang ma ba’adag gubin nib machalbog rogon (muguy ko Moroni 8:17). Ba murwel nib thothup e nike tay e Chitimangiy nu Tharmiy nga dakadad ni galabthir ni ngad ayweged Ir ningan chathowliy e pi ya’el Rok ni ngar manged e gidii’ boed ni manang ni ryaog rorad.

Biney e tawa’ath nib thothup ma rib ga’ ni ngad chathowliyed pifak dad ya aramfan nib b’tuf e ayuw ku Somoel rodad. Ir e manang ko mang e ba tu’uf ni nge nang pifakdad, n’en ni ngar rin’ed, nge n’en nib tu’uf ngoraed ni ngar suloed nga powchen. Ke pii’ e n’en ni nge rrin’ nge gagyeg ngak e pi chitingiy nge chitamangiy udakaen pi chep nib thothup, pi profet Rok, nge Kan ni Thothup.

Ulane thogthog ke thap re profet Joseph Smith, Somoel ke fonow nog ko galabthir ni ngar sensey niged pifak rad ni ngar nanged fan nanged fan e machib ko kalgnan’, mich ngak Kristus, tawfe, nge fare tawa’ath ko fare Kan ni Thothup. Musap ni dani yoeg Somoel kemus ni ngad filed fare machib; pi thin Rok e ngan sensey nag pifak dad ni ngar nanged fan e machib. (Muguy ko D&C 68:25, 28; kubang nikan uneg ngay.)

U lane Psalms ma gadad be bi’eg ni, “Mu tamilang nigeg ko motochiyel rom, mu gu fol riy; ma bay gu cha’riy u polo’ i gum’iracha’eg” (Psalm 119:34).

Sensey nag pifak dad ni ngar nanged fan e gathi kemus ni yibe sabathin. Be ayuweg pifaak dad ni ngar feked fare machib nga lan gum’iracha’ raed ko e kanawo’ ni ngar manged me m’ug ko pangin raed nge ngonglen raed u lane yafas rorad.

Ke fil Nephi ni muruwel ko Kan Thothup e ngan fek iyaen e tin riyul’ “nga langgin gum’iracha’en e gidii’” (2 Nephi 33:1). Muruwel rodad ni galabthir e ngan muruwliy nib gel ni ngan fal’eg tafen nra ayuweg pifak dad ni ngar thamiyed fare Kan Thothup min ayuweg rad ni ngar nanged fan e thamtham rok.

Ke sul an’nug ba call ni yib ko faak mow ni Michelle ni bukun duw kafram. Ke yog u fithik e sobutaen’ ngog, “Nina’, ke buch e ban’en ni rib falel’ rog nge Ashley.” Ashley e faak nib piin ni laal e duw rok e chirofen nem. I weliy Michelle e tin nike buch ni kadbul nibe memel’eg thin i Ashley nge Andrew nib dalipoe duw rok—bagyow e dabi ser ma bagyow e be cham. Tomuren ke ayuweg row, me yaen Michelle nge guy fare bitir.

De’ n’uw napan, me mil Ashley i yib nike puwaen’ ni dar ser Andrew biyay. Me pogran Michelle ngak Ashley fare thin nikar yoeggew u lane gak ko tabinaw ni balayal’ni ngar gol gow ngorow.

Ke fith Ashley f’anre ba’adag ni nge meybil ning e ayuw rok e Chitimangdad nu Tharmiy, machane kab puwaen’, Ashley me ga’ar, “Danga’.” Napan ni fith fa’anra mich u waen’ ni ra fulweg Chitimangdad nu Tharmiy e meybil rok, me ga’ar Ashley e dani nang. Nina’ rok e yoeg ngak ni nge gay rogon me fek pa’ me un ngak ko garbog.

Ke yog Michelle ni mangil rayog ninge fith Ashley ngak e Chitimangdad nu Tharmiy ni nge ayuweg Andrew ni nge ser—me ayuweg ni nge gol ngak. Tafney ni Chitimangdad nu Tharmiy ni nge ayuweg Andrew ni nge ser e sana ke chalban Ashley ngay, me tabab ko meybil, som’on e yoeg ngak e Chitamangiy nu Tharmiy ni nge ayuweg Andrew ni nge ser. Napan ni yoeg Ngak ni nge ayweg ni nge gol, me tabab ko miyoer. Ke ning e meybil rok me tay lolugen nga dakaen e keru ko nina’ rok. Me koel Michelle pa’ me fith ko mangfan nibe yoer. Me ga’ar Ashley e de nang.

Me ga’ar e nina’, “Gube lem nang ni gumanang fan gabe yoer. Kam thamiy nib fel’ u gumircha’em?” Me ga’ar Ashley e ea, me ulul e nina’ rok, “Iraray fare Kan Thothup nibe ayuwegem ni ngam thamiy ni ararogon. Amrogon Kanawo’en e Chitamangdad nu Tharmiy nibe yoeg ni gab tu’uf Rokma ra ayuwegem.”

Me fith Ashley ko fa’anra michaen’ ngay, fa’anra michaen’ ni Chitamangdad nu Tharmiy e ra ayuweg. Owchen nib sug ko lu’, me yoeg Ashley ni arrogon.

Boech ngiyal’ ma kanawo’ ni tha’abi fel’ ni ngad filed ko pifakdad ni ngar nanged fan e machib e ngan sensey nag ko pin’en ni be buch rorad ko chirofen nem. Ngiyal’ nem e yugma buch daworin tanam nag ma yugma buch u lane tabinaew. Ma yib nge yaen nib machrag, ere ba tu’uf ni ngad poeyed e ngiyal’ ni ngad filed ko napan ni ra yib pifaak dad ngodad ni bay e duwer rok fa be magar, napan ni bay boech e magawon rorad ko pi tafagaer fa pi walagen, napan nib tu’uf ni dabkir puwan’ gaed, napan ni kar ngongliyed e oloboch, fa napan ni ngar rrin’ed ban’en. (Muguy ko Teaching, No Greater Call: A Resource Guide for Gospel Teaching [1999], 140; Marriage and Family Relations Instructor’s Manual [2000], 61.)

Fa’anra kad fal’eg rogdad ma gad ra pag e fare Kan Thothup ni nge powi’y e pi magawon ney, ma pifaak dad e yaed ra fil rogon u fithik e n’agan’ nge mangil.

Rogon nib ga’ fane pi ngiyal’ nima yib napan ni gadad ra lem nag rogon i tanam nag u lane meybil ko tabinaw, chep nib thothup ni yibe fil u lane tabinaw, gak ko tabinaw ni balayal’, nge ku boech e gosgos u tabinaw.

U lane gubin e ngiyal urngin e lowaen’ nge nangfan e tha’abi fel’ i fithik e mangil nge t’ufeg ni bay fare Kan Thothup riy’.

Badake l’agruw e duw ou’mon ni ra mang meruk e duw e pifak, reb e papa’ e ra duwgliy ngiyal’ u lane reb e wik ni fan ko tawfe rorad. Fak nib ppin e yog ni ir e bin migid, me pii’ journal ngak miyow paer nga but, kemus go’yow, mar weliyew pi thamtham ni mornga’agen pi kenggin e yalen ko gospel. Ke yoeg ngak ninge art nag marnga’agen ni yow be weliy. Be dag e yafos u’mon ko fayleng, yafos uroy u fayleng, nge pi n’en nib tu’uf ninge rrin’ ni nge sul ngak e Chitamangiy nu Tharmiy. Ke yoeg e mich rok ngak mornga’agen pa’ngin fare rogon e thap ni rogon nike fil ngak.

Napan nni pugurran e bitir rok napan nike ilal, me ga’ar: “Ri Dabugu pag talin e re tu’ufeg ni kug thamiy ko papa’ rog napan ni bay rog. … Mich u wun’ug ni biney nike buch e fan ni bay e mich ko fare gospel napan ni kug tawfe.” (muguy ko Teaching, No Greater Call, 129).

Ni ngan fil ko na’ab e ba tu’uf e athamgil u wun’um nge murwel. Mu’un ni ngan sensey u fithik e ngongol romma rib ga’ fan ni ngan ayuweg pifaak dad ni ngar ngongoliyed e n’en kar filed.

Ke fil President Harold B. Lee ni, “Kenggin e yalen ko gospel ni dabin rrin’, e ba … momaw’ ni ngan mich u wun’uy ko binem e kenggin e yalen” (Teachings of Presidents of the Church: Harold  B. Lee [2000], 121).

Somm’on e kug fil rogon e meybil ni kug ragbug nga but’ ni nggu meybil gaed e tabinaw rog.Kug fil rogon e thin nib liyor ko meybil napan ni gu motoyil ko gallabthir rog ni yow be meybil, nge napan ni ri filew ngog ni nggu meybil ni somm’on rog. Kug fil ni rayog ni nggu non ngak e Chitamangiy nu Tharmiy ni nggu ning e ayuw.

Gubin e kadbul, ma nina’ nge papa’ rog e ri kunuyew gamad nga ta’abang ou’mon ni ngan abich, ma gamad ragbug gad nga but’ ni nggu meybil gad. Gamad ma meybil ni gubin ngiyal ou’mon ni nggu abich gad. Gubin e nep oum’on ni nggu mol gad, gamad ma ragbug nga but’ ma gamad ning e binem e rran ko meybil.

Mus ni gathi ban’en ni rigu be nang fan mornga’agen e meybil ni kugub ba bitir, ma ke mang bang ko yafos rog ni ke paer rog. Gube ulul ni gube fil, ma gonop rog ko gelingin e meybil e kube ulul nibe ga’.

Ke ga’ar Elder Jeffery R. Holland, “Gadad ma nang ni n’en nib mangil ko fare mulwol ko gospel e be yan ko rogon ni yibe fil ma aram man nang fan ma aram man paer u fithik ni nge yog e micheg ko falflan’ nge tamilangeg rogon min thapni rayog ni ngan rrin’” (“Teaching and Learning in the Church” [worldwide leadership training meeting, Feb. 10, 2007], Liahona, June 2007, 57; Ensign, June 2007, 89).

Fil ni ngarin nang fan fapi machib ko fare gospel e ba kanawo’ u lane yafas me yib “bayil’ nga dakean bayil’, nib yalen nga dakean yalen, ni buch’uw aray nge buch’uw aram” (2  Nephi 28:30). Napan ni ra fil fapi bitir mar rrin’ed e n’en ni kar filed, ma n’agan’ rorad e ra ga’, ni ra fek ko boech ni ngan fil, boech e mithmith, nge nangfan ni tha’bi fel ni dabi m’ay.

Rayog ni ngad nanged ni be tabab pifaak dad nanged fan fare machib napan ni gadad ra guy ko pangin raed nge mithmith roraed ni dariy e kireb u fonow fa gechig u fithik. Napan ni ra nangfan pifaak dad e machib ko gospel, miyad mang e gidii’ nibyul’yul’ mab ta murwel. Yaed ra mang bang ko fulweg ko pi duweg nge magowan ko tabinaw, mar ayuweged e tabinaw nge gidii’.

Gadad ra sensey nag pifaak dad ni ngar nanged fan u napan ni gadad be fil rograed ni gubin ngiyal’, pinning fare Kan Thothup, mu dag rogon, min ayuweg rad ni ngar ngongolyed e n’en ni kar filed.

Napan ni gadad ra sap nga lan owchen e chi madway, ke sulaen’ dad ko ba tang:

Aygun rinn’ed. U dakean fithingan Yesus Kristus, amen.