Ina Ia Maua Le ua Leiloa

Saunia e Elder M. Russell Ballard

O Le Korama a Aposetolo e Toasefululua


A o e saili atu e ola i le talalelei ma aoaoga faavae a Keriso, o le a taialaina oe ma lou aiga e le Agaga Paia.

Uso e ma tuafafine, e tusa ai ma le mau, o le Liahona o “se polo lapotopoto sa uiga ese lona gaosiga” e i ai ona vae e lua, ma o le tasi vae sa faasino mai ai le ala e tatau ona o ai le aiga o Liae i le vao (1 Nifae 16:10).

Ou te manatu ua ou iloa le mafuaaga na matuai ofo ai Liae, ina ua ia faatoa vaai i ai, aua ou te manatua a’u taga ina ua ou faatoa vaai lava i se GPS. I lo’u mafaufau, o se masini faaona po nei “e uiga ese lona gaosiga.” Peitai, i se itu ou te lei mafaufauina, o lenei tama’i masini, lea ua i ai i la’u telefoni, e mafai ona ta’u tonu maia le mea lea ou te i ai ma ta’u tonu maia foi pe faapefea ona ou oo i le mea ou te fia alu i ai.

Ia i ma’ua ma lo’u toalua, o Barbara, o le GPS o se faamanuiaga. Ia Barbara, o lona uiga na te le toe tau ta’uina mai ia te au e taofi ae fesili mo se faasinoala; ae mo a’u o lona uiga e mafai ona ou sa’o pe a ou faapea atu, “Ou te le toe tau fesili fua i se tasi. Ua ou iloa tonu le mea ou te alu i ai.”

O lea uso e ma tuafafine, ua avanoa mo i tatou se meafaigaluega e sili atu ona ofoofogia nai lo le GPS aupito sili. E i ai lava le taimi e le iloa ai e tagata uma lo latou ala. O uunaiga a le Agaga Paia e mafai ai ona tatou toe foi saogalemu i le ala sa’o, ma o le taulaga togiola a le Faaola e mafai ai ona tatou toe foi i lo tatou aiga.

O le leiloloa e mafai ona faatatau i nuu uma faapea foi i tagata taitoatasi. Ua tatou ola nei i se taimi o le tele naua o lenei lalolagi lea ua leiloa lona ala, aemaise lava o tulaga faatauaina ma mea e faamuamua i totonu o o tatou aiga.

I le selau tausaga talu ai, na faafesootai sa’o ai e Peresitene Iosefa F. Samita le fiafia i le aiga ma apoapoai mai ia te i tatou e taulai atu a tatou taumafaiga iina. Fai mai a ia: “E le mafai ona i ai se fiafia moni e tu ese pe vavaeesea mai le aiga. … E leai se fiafia e aunoa ma le auauna atu, e leai foi se auauna atu e sili nai lo lea e liua ai le aiga e avea o se faalapotopotoga faalelagi e siitia ai ma faasaoina le olaga faaleaiga. … O le aiga o le mea e manaomia ona toefaaleleia” (Aoaoga a Peresitene o le Ekalesia: Iosefa F. Samita [1998], 382, 384).

O o tatou aiga ma auaiga o loo manaomia ona toefaatulaga i lenei lalolagi ua faateleina le pupū i tupe ma oa o le lalolagi. O se faataitaiga e maofa ai, o le faatupulaia lea o le faatuatuanai o faaipoipoga iinei i le Iunaite Setete. I le amataga o le tausaga nei na lipotia mai ai e le New York Times e faapea “ua oo atu nei i se tulaga maualuga tele le aofai o tamaiti e fananau mai i fafine e le faaipoipo: e silia ma le afa o tamaiti e fananau mai i fafine Amerika e i lalo o le 30 tausaga, ae le faaipoipo” (Jason DeParle and Sabrina Tavernise, “Unwed Mothers Now a Majority Before Age of 30,” New York Times, Feb. 18, 2012, A1).

Ua tatou iloa foi o ulugalii i le Iunaite Setete ua faaipoipo, e toetoe lava o le afa ua tatala faaipoipoga. E oo foi ia i latou e nonofo faaipoipo, e tele lava ina galo ona faamalolosia a latou faaipoipoga i lo latou faatagaina o isi mea e faalavefau i a latou sootaga faaleaiga.

E tutusa foi le popole i le faatupulaia o le va o e mauoa ma e matitiva, faapea le va o i latou o loo taumafai e tausisia tulaga faatauaina ma tautinoga faaleaiga ma i latou ua le toe faia. I se tulaga faafuainumera, o i latou e le lava le a’otauina ma afua ai ona maualalo tupe maua, e tele lava ina le faaipoipo ma o i le lotu, ma tele ina aafia i solitulafono ma fai fanau ae lei faaipoipo. Ma o amioga foi ia ua tele ina aafia ai le lalolagi uma. (Tagai i le W. Bradford Wilcox and others, “No Money, No Honey, No Church: The Deinstitutionalization of Religious Life among the White Working Class,” o loo maua i le www.virginia.edu/marriageproject/pdfs/Religion_WorkingPaper.pdf.)

E faafeagai ma le mea sa mafaufauina e le toatele, o le manuia ma a’oga ua foliga mai e soofaatasi i se tulaga maualuga atu e tulai mai ai ni aiga masani ma tulaga faatauaina.

O le fesili moni, ioe, e faatatau i le mafuaaga ma le aafiaga. Pe i ai i ni vaega o o tatou nuu ni tulaga faatauaina ma aiga e malolosi atu ona e tele atu lo latou a’otauina ma ua manuia, pe ua tele atu lo latou a’otauina ma manuia ona e i ai o latou tulaga faatauaina ma aiga malolosi? I lenei Ekalesia i le lalolagi atoa, ua tatou iloa e mafua, ona o tulaga faatauaina ma aiga malolosi. A oo ina faia e tagata ia tautinoga faaleaiga ma faalelotu i mataupu faavae ua toefuataiina, ona amata lea ona manuia faaleagaga ma e tele foi ina faapena le faaletino.

E tele foi ina faamalolosia nuu a o faatupulaia le malolosi o aiga. O tautinoga i le aiga ma tulaga faatauaina o le mafuaaga autu lea. Toetoe o isi mea uma e aafia ai. A faaipoipo ia ulugalii ma faia tautinoga a le tasi i le isi, latou te matua faateleina lava o latou avanoa e soifua manuia ai faaletamaoaiga. A fananau mai fanau i se ulugalii ua faaipoipo ma i ai uma se tina ma se tama, e tele foi o latou avanoa ma le manuia tau galuega. A oo foi ina galulue ma taaalo faatasi aiga, e lauusiusi foi tuaoi ma nuu, e faaleleia le tamaoaiga, ma e itiiti foi ma tau le manaomia e le malo ni polokalama fesoasoani mo e matitiva.

O le tala faanoanoa la, o le malepelepe o aiga ua mafua ai le anoanoai o faafitauli o nuu ma le tamaoaiga. Peitai, o le tala fiafia, e pei lava o soo se mafuaaga ma aafiaga, e mafai ona liliu na faafitauli pe afai e suia mea e mafua ai. E foia le faaitu’au e ala i le ola ai i mataupu faavae sa’o ma tulaga faatauaina. Uso e ma tuafafine, o le mafuaaga aupito taua o o tatou olaga, o o tatou aiga. Afai o le a tatou tuuto atu i tatou lava i lenei faamoemoe, o le a tatou faaleleia isi vaega uma o o tatou olaga, o ni tagata ma se ekalesia, o se faataitaiga ma se faailoilo mo tagata uma o le lalolagi.

Ae e le faigofie lena mea i se lalolagi ua liliu atu loto i le mau itu, ma ua foliga ai o loo sosolo pea ma suia le paneta i se saoasaoa e le’i mafaufauina muamua. E leai se mea o toe tumau mo se taimi umi. O sitaili, o tifiga, o manatu lauiloa, o le sa’o faaupufai, e oo lava i manatu i suiga o le sa’o ma le sese. E pei ona valoia e le perofeta o Isaia, e avea le mea sese ma le mea sa’o, o le mea sa’o foi ma mea sese (tagai i le Isaia 5:20).

O le vavāega faaleagaga i le va o le lelei ma le leaga ua matua lautele naua, a o faateleina le taufaasese ma le maaleale o mea leaga ma toso atu i ai tagata e faapei o se maneta pogisa—e faapei foi ona faatosinaina e le talalelei o le upumoni ma le malamalama i latou o ē faamaoni i le loto ma ē mamalu o le lalolagi, o loo sailia le mea mama ma lelei.

Atonu e laitiiti tele lo tatou aofai, ae o le avea ai o ni tagata o lenei Ekalesia, e mafai ona tatou aapa atu i nei va lautetele. Ua tatou iloa le mana o le auaunaga e totonugalemu ia Keriso lea e aumai faatasi ai le fanau a le Atua, tusa lava po o a o latou tulaga faaleagaga o i ai po o lo latou tulaga faaletamaoaiga. Ua tasi le tausaga talu ai, sa valaaulia ai i tatou e le Au Peresitene Sili e auai i se aso o le auaunaga, e faamanatu ai le 75 tausaga o le polokalama o le uelefea lea e fesoasoani ai i tagata ia ola faalagolago atili ia i latou lava. E faitau miliona itula sa tuuina atu e o tatou tagata i le lalolagi atoa.

O le Ekalesia o se maluapapa i lenei vasa sousou, o se taula i le sami fesouaiina o suiga ma fevaevaeaiga, ma o se moli taiala mo i latou e faatauaina ma sailia le amiotonu. Ua faaaoga e le Alii lenei Ekalesia o se meafaigaluega i le tosoina mai o Ana fanau i le lalolagi atoa agai mai i le puipuiga a Lana talalelei.

O le Agaga o Elia, lea e lē faatuaoia, o se mana tele foi lea i faamoemoega o le Alii mo le taunuuga e faavavau o Ana fanau. I upu a Malaki, o le Agaga o le Agaga Paia e liliuina “loto o tama i le fanau, o loto foi o le fanau i o latou tama” (Malaki 4:6).

O loo avea le Ekalesia o se faataitaiga o le liliuina o loto ma se auala mo le lelei i le lalolagi. I tagata o le Ekalesia ua faaipoipo i le malumalu ma e auai e le aunoa i sauniga i Aso Sa, e matua laitiiti lava le fuainumera o faaipoipoga e tatala nai lo le lalolagi, ma e tumau le vavalalata o aiga ma tele ina fesootai soo. E sili atu ona lelei le soifua maloloina i aiga, ma tele atu tausaga e ola ai nai lo le averesi o tagata. E maualuga atu punaoa tautupe ma tele atu le tautua tatou te ofoina atu ia i latou e manaomia, ma e tele foi ina saili atu i a’oga e maualuluga atu. Ua ou ta’ua nei mea, e le ina ia faaviivii ai ae e molimau atu ai e sili atu ona lelei o le olaga (ma sili ona fiafia) a o liliu atu loto i aiga ma a o ola ai aiga i le malamalama o le talalelei a Keriso.

O le a la le mea e mafai ona tatou faia ina ia le leiloloa ai? Muamua, se’i ou fautuaina atu ia tatou faia mea e faamuamua. Tuu uma lava mea e te faia i fafo atu o le aiga, e faalona lua ma ia lagolago ai mea e tutupu i totonu o lou aiga. Manatua le fautuaga a Peresitene Harold B. Lee e faapea “o le galuega… e aupito sili ona taua tou te faia, o le a faia i totonu lava o puipui o o outou lava aiga” (Aoaoga a Peresitene o le Ekalesia: Harold B. Lee [2000], 134) ma le saunoaga e le suia a Peresitene Tavita O. MaKei “E leai se isi manuia e mafai ona suitulaga mo le toilalo i le aiga” (sii mai le J. E. McCulloch, Home: The Savior of Civilization [1924], 42; i le Conference Report, Apr. 1935, 116).

Faatulaga o outou olaga patino ia maua ai se taimi mo tatalo ma tusitusiga paia ma gaoioiga faaleaiga. Tuu atu i a outou fanau ni tiutetauave i le aiga e aoao ai i latou pe faapefea ona galulue. Aoao i latou o le ola ai i le talalelei, o le a puipuia ai i latou mai mea eleelea, sootaga feusuai le mama, ma mea malolosi o le Initoneti, ala o faasalalauga, ma taaloga faavitio. O le a lē sē lava i latou, ma o le a saunia i latou e taulimaina tiutetauave pe a tuu atu i o latou luga.

Lona lua, e tatau ona tatou faia mea i le faatulagaga sa’o! Faaipoipo muamua ona fai ai lea o le aiga. Ua toatele naua tagata i le lalolagi ua faagaloina le faatulagaga masani o mea ma ua mafaufau e mafai ona latou suia pe toe liuaina. Aveese soo se mea e te atuatuvale ai, i le faatuatua. Talitonu i le mana o le Atua e taialaina ai oe.

Ia te oe lena e le’i faaipoipo, ia gauai atoatoa atu i le sailia o lau soa e faavavau. Alii talavou, manatua le isi mea na saunoa mai ai Peresitene Iosefa F. Samita: “O le nofofua e leai se toalua … [e tuu ai] i le mafaufau papa’u le manatu [e] manaomia lena itu aua e [aumai ai] le tiutetauave itiiti. … E pa’ū lava i alii talavou. O le le lava o le faafoeina lelei o tausaga o le talavou matutua, e taitai ai i latou mai ala o le tiute ma le tiutetauave. … O le a aafia fua o latou tuafafine i le talalelei … [ma] o le a faaipoipo pe a latou mafaia, ma o le a taliaina ma le fiafia ia tiutetauave o le olaga faaleaiga” (Gospel Doctrine, 5th ed. [1939], 281).

Ma ia te outou na tamaitai talavou, ou te fia faaopoopo atu e le tatau foi ona galo ia te outou lenei tiutetauave. E leai se matata e mafai ona outou maua ai se fiafiaga tele e tusa ma le tausiaina o se aiga. Ma a outou aulia tausaga o lo’u matua, o le a outou iloa atili ai.

Lona tolu, o tane ma ava, e tatau ona avea outou o ni paaga tutusa i a outou faaipoipoga. Faitau soo ma ia malamalama i le folafolaga i le aiga ma mulimuli ai. Taumamao mai soo se ituaiga o pulega amioletonu. E leai se tasi e pule i se toalua po o a tatou fanau; o le Atua o le Tama o i tatou uma ma ua tuuina mai ia i tatou le avanoa mo o tatou lava aiga, lea sa na o Ia muamua, e fesoasoani ai ia tatou avea atili e faapei o Ia. I le avea ai ma Ana fanau, e tatau ona tatou aoao i le fale e alolofa i le Atua ma ia iloa e mafai ona tatou fesili atu ia te Ia mo le fesoasoani tatou te manaomia. E mafai ona fiafia tagata uma, pe faaipoipo pe nofofua, ma felagolagoma’i i totonu o soo se ituaiga o aiga o ia te oe.

Ma le mea mulimuli, faaaoga ia punaoa faaleaiga a le Ekalesia. I le tausiga o le fanau, e mafai e aiga ona maua mai le fesoasoani a le uarota. Lagolago ma galulue faatasi ma taitai perisitua ma ausilali ma faaaoga lelei polokalama a le Ekalesia mo autalavou ma aiga. Manatua se tasi o fasifuaitau ‘anoa a Peresitene Lee—o le Ekalesia o le fatamanu lea tatou te fausia ai aiga e faavavau. (tagai i Aoaoga: Harold B. Lee [200], 148).

Ia, afai e i ai se mafuaaga ua leiloa ai lou lava ala pe ua sē ai se aiga, ona manaomia lea ona tau lava ina faaaogaina aoaoga a le Faaola mai le Luka mataupu e 15 e faasa’o ai lou ala. O iina o loo ta’u mai ai e le Faaola le taumafaiga a se leoleo mamoe e saili lana mamoe na se, o se fafine sa sailia se tupe itiiti na leiloa, ma le faafeiloaiga na maua e le atalii faamaumau oa ina ua toe foi i le aiga. Aisea na aoao mai ai e Iesu nei faataoto? Sa finagalo o Ia ia tatou iloa e leai lava se tasi o i tatou o le a matuai leiloa, e le mafai ai ona tatou toe maua le auala e ala i Lana Togiola ma Ana aoaoga.

A o e saili atu e ola i le talalelei ma aoaoga faavae a Keriso, o le a taialaina oe ma lou aiga e le Agaga Paia. O le a e maua se GPS faaleagaga e ta’u atua ia te oe i taimi uma, le mea la e te i ai ma le mea e te alu i ai. Ou te molimau atu, e alofa le Togiola toetu o tagata ia i tatou uma, ma ua Ia folafola mai afai tatou te mulimuli atu ia te Ia, o le a Ia toe taitai saogalemu atu i tatou i le afioaga o lo tatou Tama Faalelagi, lea ou te molimau atu ai i le suafa o Iesu Keriso, amene.