Olgeta Man blong Wok long Plantesen

Blong Kworom blong Olgeta Twelef Aposol


I Kam long Jefri R. Holan
Plis lisin long smol toktok blong Tabu Spirit we i stap talem long yu naoia, long stret taem naoia, se yu mas akseptem presen blong Lod Jisas Kraes we i pemaot man, mo stap glad long wanem wok Hem i bin mekem.

Wetem ol koling mo ol rilis we Fas Presidensi i jes anaonsem, mi wantem toktok long bihaf blong evriwan mo talem se bae yumi tingbaot mo lavem oltaem olgeta we oli bin fetful blong wok wetem yumi, semmak olsem yumi lavem mo welkamem olgeta we oli kam holem ofis naoia. Hat blong yumi i talem tangkyu long evriwan long yufala.

Mi wantem tokbaot parabol blong wan masta, “we hem i go eli moning blong tekem sam man blong oli kam wok.” Afta we hem i tekem fas grup long 6 klok moning, hem i gobak long 9 klok moning, mo long 12 klok medeldei, mo bakegen long 3 klok long aftenun blong tekem moa man blong kam wok, from oli mas pikimap kaekae kwiktaem. Skripja i talem se hem i kambak long wan las taem, “samples long 11 aoa” (we i 5 klok aftenun), mo i tekem sam moa man bakegen we i las grup. Afta, jes wan aoa afta nomo, evri wokman oli kam tugeta long wanples blong kasem pei blong olgeta. I wan sapraes. Evriwan i kasem sem pei nomo, nomata long hamas aoa oli bin wok. Wantaem nomo, olgeta faswan oli bin kros, mo talem: “Olgeta ya oli jes kam, oli wok wan aoa nomo, be mifala i wok ful dei long big san ya.”1 Taem yu ridim parabol ia, ating yu, semmak olsem ol wokman ia, i filim se samting i no stret long ples ia. Bae mi tokbaot smol poen ia.

Faswan, hem i impoten blong luk se i no gat wan we oli mekem nogud long hem long ples ia. Ol fas wokman oli bin agri blong kasem ful pei blong dei ia, mo oli kasem ful pei. Antap long hemia, mi ting se oli bin glad tumas blong kasem wok. Long taem blong Sevya, wan man mo famle blong hem we i kasem gud mane, i no save mekem moa samting, be oli laef nomo long wanem oli winim long wan dei. Sapos yu no wok, o wok long garen, o go huk, o salem samting, bae yu no save kakae. I gat moa man blong wok bitim we i gat wok, mo ol fas wokman ia oli laki tumas aot long ful grup blong man blong wok, long moning ia.

I tru, sapos yumi mas sore long sam man, bae i yumi mas sore long ol man ia we oli no bin jusum olgeta, mo olgeta tu oli gat famle blong fidim mo ol bak blong putum klos long hem. Laki i neva stap wetem olgeta. Wetem evri visit blong masta ia truaot long dei, oltaem oli luk nara man i go wok.

Be, taem we dei i stap blong go finis, masta i gobak nambafaef taem wetem wan wok blong mekem long 5 klok aftenun! Olgeta las wokman we oli slakem tingting finis, oli harem nomo se bae oli pem olgeta i stret, oli akseptem wok mo oli no save se bae oli pem olgeta hamas, be oli save nomo se i moa gud blong gat wan smol samting bitim nating, from se oli bin gat nating long fastaem. Afta, taem oli kam tugeta blong kasem pei, oli bin sapraes tumas blong kasem sem pei olsem ol narafala man blong wok! Hemia bae oli sapraes mo oli talem tangkyu bigwan tu! Ating i tru, neva oli bin luk lav mo sore olsem long samtaem we oli bin stap wok.

Hem i wetem save ia nao we yumi mas lukluk long komplen blong ol fas wokman. Taem masta insaed long parabol i talem long olgeta (mo mi katem sot smol nomo): “Maefren. Mi mi no ravem yu. Yu yu agri long mi finis, blong yu wok wan ful dei blong wan gud pei. Yufala i bin hapi blong kasem wok, mo mi hapi long hao yufala i wok. Mi pem yufala fulwan. Tekem pei blong yu mo glad long blesing. Long ol narawan, yes, mi fri blong mekem wanem mi wantem wetem mane blong mi.” Afta kwestin ia we i stikim eniwan long tetaem ia mo naoia, we i nidim blong harem: “From wanem yu jalus long ol man ya we mi mi kaen long olgeta?

Ol brata mo sista. Bae i gat ol taem long laef blong yumi taem wan narawan i kasem wan blesing we yumi no ting, o i kasem wan ona. Mi askem yufala blong yufala i no harem nogud—mo yufala i no jalus—taem gud samting i hapen long narafala man. Yumi no go daon taem wan narawan i kam antap. Yumi no stap resis agensem wanwan long yumi blong luk se hu i gat fulap mane, o gat moa talen, o i moa naes, o i gat moa blesing. Resis we yumi staptru insaed long hem, hem i agensem sin, mo i tru, jalus i wan long ol sin blong yunives.

Antap long hemia, fasin blong jalus i wan mistek we i stap gohed blong kam nomo oltaem. Yes, yumi safa smol taem sam nogud samting i hapen long yumi, be jalus i nidim yumi blong yumi safa long ol gud samting we i hapen long evriwan we yumi save! Hemia i no givim gud hop long fiuja ah!—blong no stap hapi evri taem we eniwan raon long yu i gat wan hapi taem! Bae i moa nogud nao long en blong hem, taem yumi faenem se God i gat tugeta fasin ia, i stret mo i gat sore, i givim, long evriwan we i stanap wetem Hem, “evri samting we Hem i gat”2 olsem we skripja i talem. So, lesen nambawan we i kam long plantesen blong Lod: blong kavet, no wantem toktok long man, o daonem nara man, i no leftemap standet blong yu, mo fasin blong tokbaot nogud nara man bae i no mekem yu yu luk gud moa. I gud blong yu stap kaen, mo stap talem tangkyu se God i wan gud man. Hem i wan hapi wei blong laef.

Wan seken poen we mi wantem tekemaot long parabol ia, i nogud mistek we sam i save mekem sapos oli wantem sakemaot pei blong olgeta long en blong dei, from se oli bin wari tumas wetem ol samting we oli ting se oli ol problem we oli kamaot fastaem long dei. Hem i no talem long ples ia se i gat wan i sakemaot mane blong hem long fes blong masta mo i go, i no gat wan samting, be mi ting se i mas gat wan i mekem.

Ol brata mo sista we mi lavem tumas. Wanem i bin hapen long stori ia long 9 klok, o medeldei, o 3 klok i no impoten tumas bitim bigfala gladhat blong pei we oli kasem long en blong dei. Fasin blong developem fet i blong holemtaet yumiwan, blong wok, blong luk wok i go tru, mo letem hadwok we i pas finis—ol truwan mo hemia blong tingting—oli go lus nating from bigfala praes i kamaot. No stap tingbaot bakegen ol olfala problem o harem nogud—we oli abaot yuwan, o neiba blong yu, o iven, mi save ademap, jos ia we i tru mo i laef. Hamas laef blong yu i gud tumas, o laef blong neiba blong yu i gud tumas, o blong gospel blong Jisas Kraes i gud tumas, bae i kamaot long las dei, nating we evriwan oli no luk se i hem i gud tumas long fas ples. So, yu no stap ripripitim samting we i bin hapen long 9 klok moning, taem we gladhat blong God i stap traem blong givim pei blong yu long 6 klok naet—nomata hamas agrimen blong wok i bin hapen truaot long dei ia.

Yumi stap spendem tumas filing mo paoa long saed blong spirit blong stap hang strong long memori blong wan nogud toktok we yumi talem long taem yumi bin smol, o wan samting we waef o hasban i bin talem o mekem 20 yia i pas, we yumi mekem strong tingting blong yumi blong holem olsem poen antap long hed blong hem blong nara 20 yia bakegen; o wan samting long histri blong Jos we i pruvum nomo se ol man blong wol ia bae oli traehad oltaem blong stap gud inaf nomo folem wanem God i wantem olgeta blong stap. Nating we wan nogud samting i no stat wetem yu, long en, i save stap long yu. Mo wanem pei nao bae i stap blong yu taem we bae Lod blong plantesen bae i luk yu long ae blong yu, mo i pemaot yu long en blong dei we yu spenem long wol ia.

Hemia i lidim mi long nambatri mo las poen. Parabol ia—olsem evri parabol—i no abaot ol wokman o ol pei, semmak olsem se ol nara parabol oli no abaot ol sipsip mo ol nani. Hemia i stori abaot gud fasin blong God, fasin blong Hem blong save wet longtaem mo stap fogivim man, mo abaot Atonmen blong Lod Jisas Kraes. Hem i wan stori abaot fasin blong gat gud hat, mo lav mo sore. Hem i wan stori abaot gladhat. Hem i eksampol blong tingting we mi bin harem plante yia i pas, se i tru, samting we God i glad tumas blong mekem olsem God, i blong stap gat sore, speseli long olgeta we oli no ting se oli save kasem, mo plante taem oli ting se oli no naf blong kasem.

Mi no save huia, long bigfala grup we i stap lisin tedei, i nidim blong harem mesej ia blong fogivnes we i kamaot long parabol ia, be nating yu ting se yu let, nating yu ting se yu mestem hamas janis, nating yu filim se yu mekem fulap mistek tumas, o se yu no gat talen, o yu travel i go longwe hamas long hom mo famle mo God, mi testifae long yu, se yu yu notravel yet i go bitim ples ia we tabu lav ia bae i no kasem yu. Hem i no posibol blong yu draon i go daon bitim ples we laet blong Atonmen blong Kraes we i saen long hem.

Nomata yu no memba blong jos yet, o yu bin wan memba bifo mo yu nomo stap, i no gat wan samting, long tufala kes ia, we yu bin mekem finis we oli no save tekemaot. I no gat problem we yu no save winim. I no gat drim, we long taem long wol ia mo long taem we i no save finis, i no save hapen. Nomata sapos yu filim se yu yu lus mo yu las wokman we i kam long 5 klok ia, Lod blong plantesen i stanap i singaot: “Kam long fes blong God we i stap givhan long gladhat blong hem,”3 mo foldaon long leg blong Tabu Wan blong Isrel. Kam mo kakae long lafet ia “we oli no pem mo i no gat praes”4 long tebol blong Lod.

Mi toktok i go speseli long ol hasban mo ol papa, olgeta we oli holem prishud o bae oli kasem prishud, blong mekem olsem Lihae i bin talem: “Wekap! mo girap long das, mo … stap olsem ol man.”5 I no oltaem, be plante taem, ol man nao oli stap jusum blong no ansarem singaot ia blong “ kam joenem ami.”6 Ol woman mo ol pikinini, fulap taem oli wantem mekem. Ol brata. Tekem step. Mekem blong gud blong yufala. Mekem blong gud blong olgeta we oli lavem yufala mo stap prea se bae yu go mekem. Mekem blong gud blong Lod Jisas Kraes, we i bin pem wan bigbigfala praes from fiuja we Hem i wantem yu blong gat.

Ol brata mo sista blong mi we mi lavem tumas. Long yufala i bin gat blesing blong gospel blong plante yia from se yufala i bin laki blong faenem gospel ia eli. Long yufala we i bin kam long gospel sloslo, mo long yufala—we yufala i memba o no memba yet—we yufala i stap holembak yufala yet. Long wanwan long yufala, yuwan mo yufala evriwan, mi testifae long bigfala paoa blong lav blong God we i save mekem man i kam niu bakegen, mo mi testifae long merikel blong gladhat blong Hem. Wari blong Hem, i we bae yu kasem fet ia o nogat, be i no long wanem taem blong dei nao we bae yu kasem.

So, sapos yufala i bin mekem ol kavenan, kipim olgeta. Sapos yu no mekem olgeta, mekem olgeta. Sapos yu bin mekem olgeta, mo brekem olgeta, sakem sin mo stretem. Hem i neva let tumas, kasem taem nomo Masta blong plantesen i talem se taem i pas. Plis lisin long smol toktok blong Tabu Spirit we i stap talem long yu naoia, long stret taem naoia, se yu mas akseptem presen we i pemaot man blong Lod Jisas Kraes, mo stap glad long wanem wok Hem i bin mekem. Yu no pusumbak taem. Taem i stap kam let nao. Long nem blong Jisas Kraes, amen.

Show References

  1.  

    1. Luk long 20:1–15.

  2.  

    2.  Luk 12:44.

  3.  

    3.  Hibrus 4:16.

  4.  

    4.  Aesea 55:1.

  5.  

    5.  2 Nifae 1:14, 21.

  6.  

    6. “We Are All Enlisted,” Hymns, no. 250.