O Le e Alofa Atu e Alofaina Mai

O mafutaga e pisipisia ma malepelepe ua loa ona i ai talu lava ona i ai le tagata. O Kaino o anamua o le tagata muamua lea na faatagaina le le fiafia ma le ita e faaleagaina lona loto. Sa ia galueaiina le ta’ele o lona agaga i le lotoleaga ma le ita ma faataga ai nei lagona ia fua mai seia oo ina ia faia se mea na lē mafaufauina—o le fasiotia lea o lona lava uso ma avea ai lena faiga, ma faatamā o pepelo a Satani.²

Talu mai na uluai aso, ua avea lagona o le lotoleaga ma le ita ma afuaga o nisi o tala sili ona matautia i le talafaasolopito. Sa liua ai Saulo e faasagatau ia Tavita, o atalii o Iakopo sa faasagatau i lo latou uso o Iosefa, o Lamana ma Lemuelu sa faasagatau ia Nifae, ma Amalekia sa faasagatau ia Moronae.

Ou te manatu e aafia uma tagata i le lalolagi i nisi o ala o lagona faataumaoi o le fefinaua’i, ita, ma le taui ma sui. Atonu e i ai foi taimi tatou te iloaina ai nei lava lagona i totonu o i tatou lava. Pe a tatou lagonaina le tiga, ita, po o le lotoleaga, e faigofie lava le faamasino o isi tagata, e tele lava ina tuuaia i latou i uunaiga leaga o amioga ina ia ta’uamiotonu ai o tatou lava lagona o le ita.

Ioe, ua tatou iloa e sese lenei mea. Ua manino lava le aoaoga faavae. Tatou te faalagolago uma lava i le Faaola; e leai ma se tasi o i tatou e mafai ona faaolaina e aunoa ma Ia. O le Togiola a Keriso e le mafuatia ma e faavavau. O le faamagaloga mo a tatou agasala e o mai faatasi ma tuutuuga. E tatau ona tatou salamo, ma e tatau ona tatou naunau e faamagalo atu i isi. Na aoao mai Iesu, “Faamagalo i le tasi; ona o ia o le e le faamagalo atu … e tu ta’usalaina o ia i luma o le Alii; aua e tumau ia te ia le agasala tele atu”³ ma “Amuia e alolofa atu: aua e alofaina mai i latou.”⁴

Ioe, e matua talafeagai lelei nei upu—pe a faatatau i se isi tagata. E mafai ona tatou vaaia ma le manino tele ma le faigofie ia taunuuga faatiga e oo mai pe a faamasino mai isi ma faitio mai. Ma e mautinoa lava tatou te le fiafia i ai pe a faamasino i tatou e tagata.

Ae a oo mai i lo tatou lava faailoga tagata ma faitioga, e tele ina tatou ta’uamiotonuina lo tatou ita faapea ua tonu ma ua na o la tatou faamasinoga e faatuatuaina ma talafeagai. E ui e le mafai ona tatou vaai i le loto o le isi tagata, ae tatou te manatu lava tatou te iloaina se uiga leaga po o se tagata leaga pe a tatou vaaia se tagata faapena. Tatou te faia ni ‘alofaga pe a oo mai i o tatou lava lē fiafia ona ua tatou lagonaina lena mea, i o tatou tulaga, ua ia i tatou faamatalaga uma tatou te manaomia e ta’ulēaogaina ai le isi tagata.

Sa saunoa le Aposetolo o Paulo i lana tusi i tagata Roma e faapea o i latou e ta’usalaina isi e “le mautali.” O le taimi lava tatou te faamasinoina ai se isi tagata, na ia faamalamalama mai ai, ua tatou ta’usalaina foi i tatou, aua e leai se tagata e aunoa ma se agasala.⁵ O le musu e faamagalo atu o se agasala matuia—le agasala lea na lapatai mai ai le Faaola. O soo o Iesu lava Ia sa “saili ni mea e faasaga i le [tasi ma le isi] ma lē faamagalo i le isi i o latou loto; ma o lenei mea leaga na faapuapuagatia ma aoai mamafa tele ai i latou.”⁶

Ua fetalai manino lo tatou Faaola i lenei mataupu o lea e faigata ai ona malamalama sese i Lana fetalaiga. “O A’u o le Alii, Ou te faamagalo i lē o le a Ou faamagaloina,” ona Ia fetalai mai ai lea, “… ae o outou ua poloaiina ia faamagalo atu i tagata uma.”⁷

Pe mafai ona ou faaopoopoa se vaefaamatalaga ii? Pe a poloaiina e le Alii ia tatou faamagalo atu i tagata uma—o lona uiga e aofia ai ma le faamagaloina o i tatou lava. O nisi taimi, mai tagata uma i le lalolagi, o le tagata e sili ona faigata ona faamagaloina—atonu e faapea foi ma le tagata e sili ona manaomia la tatou faamagaloga—o le tagata lena e vaai mai ia i tatou i le faaata.

O lenei autu o le faamasinoina o isi e mafai ona aoaoina tonu i se lauga e lua upu. Pe a oo mai i le ita, faitatala, lē amanaiaina, taufaaleaga, faitio, po o le manao e faatupu se manua, faamolemole faaaoga le faatonuga lenei:

Tuu loa!

O le faigofie ia. E ao lava ona tuu le faamasinoina o isi ma suia ia mafaufauga ma lagona faamasinosino i se loto ua tumu i le alofa mo le Atua ma Lana fanau. O le Atua o lo tatou Tama. O tatou o Lana fanau. O tatou uma o uso ma tuafafine. Ou te le iloa tonu pe faapefea ona talatala atu lenei manatu o le le faamasinoina o isi ia lava le manino, naunautaiga, ma le faatauanauina ina ia manatua ai. E mafai ona ou sii mai ni mau, e mafai ona ou taumafai e faamalamalamaina ia aoaoga faavae, e mafai foi ona ou sii maia se faamatalaga o pipii i tua o taavale sa ou vaai i ai talu ai nei. Sa pipii i tua o se taavale a se tagata sa foliga mai e fai si fulufululele, ae o upu sa i luga o le pepa faapipii sa aoao mai ai se lesona manino. E faitauina faapea, “Aua le faamasino mai ia te au aua e ese foi a’u agasala nai lo oe.”

E tatau ona tatou iloaina tatou te le atoatoa uma—o tatou o tagata aisi i luma o le Atua. Pe sa tatou le faalatalata atu ea i se tasi taimi po o le isi ma le agamalu i le nofoa o le alofa ma aioi atu mo le alofa tunoa? Pe sa tatou le i momoo ea i le malosi atoa o o tatou agaga mo le alofa mutimutivale—ina ia faamagaloina mo mea sese ma agasala sa tatou faia?

Ona tatou te faalagolago uma i le alofa mutimutivale o le Atua, e mafai la faapefea ona tatou taofia mai i isi soo se vaega o le alofa tunoa o loo tatou matuai mananao ai lava mo i tatou lava? Ou uso e ma tuafafine pele, pe tatau ea ona tatou le faamagalo atu ae mananao pea ia faamagaloina i tatou?

E faigata ea ona fai lenei mea?

Ioe, e faigata.

O le faamagaloina o i tatou lava ma isi e le faigofie—e oo lava i se liua o le loto. Ae o loo i ai se tala manaia. O lenei “liuga tele”⁸ o le loto o le mea tonu lena na mamanu ai le talalelei a Iesu Keriso ina ia aumaia i totonu o o tatou olaga.

E faapefea ona fai? E ala mai i le alofa o le Atua.

Pe a faatumulia o tatou loto i le alofa o le Atua, e tupu mai se mea lelei ma mama ia i tatou. Tatou te “tausia ana poloaiga: e le mamafa foi ana poloaiga. “Aua o i latou uma o e fanau mai i le Atua, e manumalo i latou i le lalolagi.”⁹

O le tele o lo tatou faatagaina o le alofa o le Atua e puleaina o tatou mafaufau ma lagona—o le tele foi lena o lo tatou faatagaina o lo tatou alofa mo lo tatou Tama Faalelagi ia tupu ae i totonu o o tatou loto—o le faigofie foi lena o le alofa atu i isi i le alofa mama o Keriso. A tatou tatala atu o tatou loto ia faatumulia i le alofa susulu o le Atua, o le a le pine ae mou ese atu lo tatou ita ma le lotoleaga.

E pei lava ona masani ai, o Keriso o lo tatou faataitaiga. I Ana aoaoga e pei ona atagia i Lona soifuaga, sa Ia faaali mai ai le ala ia i tatou. Sa Ia faamagalo i tagata leaga, o e le taupulea, ma i latou na saili e faatiga ma faamanua ia te Ia.

Sa fetalai mai Iesu e faigofie lava le alofa atu ia i latou e alolofa ia i tatou; e oo lava i tagata leaga e mafai ona latou faia lena mea. Ae sa aoao mai e Iesu Keriso se tulafono maualuga atu. Sa Ia fetalai i nei upu i seneturi ua leva ae e faatatau foi ia i tatou i aso nei. Ua faatatau ia i latou uma e mananao ia avea ma Ona soo. Ua faatatau mo oe ma au: “Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuai fua mai ma faasaua mai ia te outou.”¹⁰

Pe a faatumulia o tatou loto i le alofa o le Atua, e oo ina tatou “feagaleleia’i, femutimutivalea’i lo [tatou] alofa [i le tasi ma le isi], faapei ona faamagaloina [i tatou] e le Atua ia Keriso.”¹¹

E mafai e le alofa mama o Keriso ona aveesea ia lagona o le le fiafia ma le ita mai la tatou vaai, ma faatagaina ai i tatou e vaai i isi i le ala o loo silasila mai ai le Tama Faalelagi ia i tatou: o ni tagata sese ma le le atoatoa o e o i ai le gafatia ma le agavaa e sili atu ma lo tatou malosi e mafaufauina ai. Talu ai e alofa tele le Atua ia i tatou, o lea e ao ai foi ona tatou alolofa atu ma faamagalo atu le tasi i le isi.

Ou uso e ma tuafafine, mafaufau i fesili nei e fai ma suega mo le tagata lava ia:

Pe o tumau ia oe se lagona o le ita i le isi tagata?

Pe e te faitatala, e tusa lava pe moni le mea lena e te tautala ai?

Pe e te vavaeesea, tulei ese, pe faasala isi ona o se mea na latou faia?

Pe e te lotoleaga faalilolilo i le isi tagata?

Pe o e fia manao e faamanua se isi tagata?

Afai o lau tali i soo se tasi o nei fesili o le ioe, e mafai ona e faaaoga le lauga e lua upu mai le amataga: tuu loa!

I se lalolagi o tuuaiga ma le feitagai, ua faigofie lava le tau o le pua ma lafo. Ae tatou le i faia lena mea, ia tatou manatua ia upu a Ia o lo tatou Matai ma faataitaiga: “O so outou e leai sana agasala, ia lua’i togi se maa.”¹²

Uso e ma tuafafine, tuu i lalo a tatou maa.

Ia tatou agalelei atu.

Ia tatou faamagalo atu.

Ia tatou talanoa ma le filemu i le tasi ma le isi.

Ia faatumulia e le alofa o le Atua o tatou loto.

“Ia tatou agalelei … i tagata uma lava.”¹³

Sa folafola mai e le Faaola: “Ia outou foai atu, e foaiina mai ai ia te outou; e foai mai e i latou i lo outou lava ie pulupulu le fua lelei, e lolomi ma luluina, e tumu ma solo i tua. … Aua o le fua tou te fuaina atu ai, e fuaina mai ai ia te outou.”¹⁴

Pe ua le tatau ea ona lava lea folafolaga e taulai atu ai pea a tatou taumafaiga i faatinoga o le agalelei, faamagaloga, ma le alofa mama nai lo soo se amioga le lelei lava?

I le avea ai ma soo o Iesu Keriso, ia tatou taui atu le leaga i le lelei.¹⁵ Aua nei o tatou taui ma sui pe faatagaina le ita e faatoilaloina i tatou.

“Aua ua tusia, ua faapea mai ai le Alii; o ia te au le taui ma sui.

“O lenei a matelaina le ua ita mai ia te oe, fafaga ia te ia; a fia inu ia, avatu ia te ia e inu ai. …

“Aua le faatoilaloina oe i le leaga, a ia faatoilaloina le leaga i le lelei.”¹⁶

Manatua: i le iuga, o le e alofa atu o le a alofaina mai.¹⁷

I le avea ai ma tagata o le Ekalesia a Iesu Keriso o le Au Paia o Aso e Gata Ai, pe o fea lava o tatou i ai, ia lauiloa i tatou o tagata e “fealofani.”¹⁸

Uso e ma tuafafine, ua lava le lototiga ma le faanoanoa i lenei olaga e aunoa ma lo tatou faaopoopo atu i ai e ala i lo tatou lotomaaa, lē fiafia, ma le ita.

Tatou te le atoatoa.

O tagata o siomia ai i tatou e le atoatoa foi.¹⁹ E fai e tagata ni mea e faaosoita, e te le fiafia ai, ma ita ai. Ma o le a faapena ai lava i lenei olaga faaletino.

Ae ui i lea, e tatau ona tatou lafoai a tatou faitioga. O se vaega o le faamoemoega o le olaga faaletino o le aoao lea pe faapefea ona lafoai na mea. O le ala lena a le Alii.

Ia manatua, ua faatumulia le lagi ia i latou o loo i ai le tulaga tutusa lenei: Ua faamagaloina i latou. Ma latou te faamagalo atu.

Ia lafo atu lau avega i aao o le Faaola. Lafoai le faamasino atu. Ia faatagaina le Togiola a Keriso e suia ma faamalolo lou loto. Ia fealofani. Ia faamagalo e le tasi le isi.

O le e alofa atu e alofaina mai.

Ou te molimau atu ai i lenei mea i le suafa o Lē e alofa lelei ma atoatoa, lea na Ia ofoina mai ai Lona soifua mo i tatou, o Ana uo—i le suafa paia o Iesu Keriso, amene.