Paoa blong Kam Fri long Sin

Mi gat wan gud fren we i stap sendem long mi, wan niu nektae blong mi werem long taem we bae mi toktok long wanwan jeneral konfrens. Hem i gat gudfala ae blong jusum nektae, yu agri?

Yangfala fren blong mi, i gat sam had jalenj. Ol jalenj ia, oli stap stopem hem long sam wei, be long nara wei hem i naes tumas. Eksampol, fasin blong hem blong stap olsem wan misinari mo talem samting klia, i moa strong bitim fasin blong ol boe blong Mosaea. From se ol bilif blong hem oli simpol nomo, nao ol tingting blong hem oli strong mo oli semmak oltaem. Mi biliv se long maen blong Skot, hem i no posibol blong evriwan i no wan memba blong Jos blong Jisas Kraes blong ol Lata-dei Sent, mo i no posibol blong evriwan i no bin ridim Buk blong Momon yet mo kasem wan testemoni se buk ia i tru.

Bae mi talem long yu abaot wan taem blong laef blong Skot, long taem we hem i bin fas taem blong hem i flae hemwan long plen blong go visitim brata blong hem. Wan neiba we i sidaon kolosap long hem, i bin harem Skot we i stap toktok wetem man we i stap narasaed long hem:

“Halo, nem blong mi Skot. Wanem nem blong yu?

Fren blong hem i talem nem blong hem.

“Wanem nao wok blong yu?”

“Mi wan enjinia.”

“Hemia i naes. Yu stap wea?”

“Long Las Vegas.”

“Mifala i gat wan tempol longwe. Yu save weaples Momon tempol i stap long hem?”

“Yes. I wan naes bilding.”

“Yu, yu wan Momon?”

“No.”

“Yes, yu mas kam wan. I wan gudfala relijin. Yu bin ridim Buk blong Momon?”

“No.”

“O, yu mas ridim. Hem i wan gudfala buk.”

Mi agri wetem ful hat blong mi wetem Skot—Buk blong Momon i wan gudfala buk. Ol toktok blong Profet Josef Smit we i stap long pej blong fas toktok blong Buk blong Momon i bin spesel tumas long mi: “Mi bin talem long ol brata se Buk blong Momon i moa stret long eni narafala buk long wol, mo i ki ston blong bilif long God blong yumi, mo wan man bae i kam moa klosap long God sapos hem i folem ol tijing blong hem, bitim eni narafala buk.”

Long yia ia, long Sandei Skul klas blong yumi, yumi stap stadi long Buk blong Momon. Taem yumi stap rere mo tekem pat long Sandei skul klas, bae yumi gat tingting blong folem eksampol blong Skot blong serem lav blong yumi blong ol spesel skripja wetem ol narawan we oli no blong jos blong yumi.

Wan bigfala stamba toktok blong Buk blong Momon i kamaot long las ves blong fas japta blong Fas Nifae. Nifae i raetem: “Be luk, mi, Nifae, bae mi soemaot long yufala se Lod i gat fulap sore long olgeta we hem i bin jusum, from ol fet blong olgeta, blong mekem olgeta i strong mo gat paoa tu we i save sevem olgeta bakegen” (Fas Nifae 1:20).

Mi wantem blong tokbaot olsem wanem Buk blong Momon, we hem i wan sore blong Lod we Hem i holemtaet gud blong ol lata dei ia, i mekem yumi fri taem hem i stap tijim yumi long wan wei we i klin mo “i stret gud evriwan” abaot doktrin blong Kraes.

Fulap long ol stori blong Buk blong Momon, oli ol stori abaot fasin blong kam fri long sin. Lihae aot wetem famle blong hem blong oli kam fri long taem blong smas gud blong Jerusalem. Stori blong ol man blong Jared i wan stori blong kam fri long sin, semmak long stori blong ol man blong Myulek. Yangfala Alma i bin kam fri long sin. Ol strong soldia blong Hileman oli bin kam fri long faet. Nifae mo Lihae i bin kam fri long kalabus. Stamba toktok ia, blong kam fri, i kamaot gud insaed long ful Buk blong Momon.

I gat tu stori long Buk blong Momon we i kolosap semmak mo i tijim wan impoten lesen. Faswan i kamaot long buk blong Mosaea, stat long japta namba 19. Long ples ia yumi lanem abaot King Limhae we i stap laef long graon blong Nifae. Ol man blong Leman oli bin mekem wo agensem ol man blong Limhae. Risal blong wo ia, i we bae ol man blong Leman bae oli letem King Limhae blong rul ova long ol man blong hem, be, bae oli stap olsem ol slef blong ol man blong Leman. I no wan isi taem blong pis. (Luk long Mosaea 19–20.)

Taem ol man blong Limhae, oli kam taed long ol nogud tritmen blong ol man blong Leman, oli bin winim tingting blong King blong olgeta blong mekem wo agensem ol man blong Leman. Ol man blong Limhae oli bin lus tri taem. Ol hevi samting i bin kam long olgeta. Long en, oli bin putum ol tingting blong olgeta i stap daon mo oli bin krae strong i go long Lod blong Hem i mekem olgeta i go fri. (Luk long Mosaea 21:1–14.) Long ves 15 long japta 21 i talem long yumi long saed blong ansa blong Lod: “Mo nao Lod i bin tekem taem blong harem ol prea blong olgeta from ol rabis fasin blong olgeta; be Lod i bin harem ol prea blong olgeta, mo i bin stat blong mekem ol hat blong ol man blong Leman i kam sofsof, mekem se oli bin stat blong tekemaot ol hevi samting long bak blong olgeta; be stil Lod i no bin luk se i stret taem blong tekem olgeta i kamaot long slef.”

I longtaem afta, Amon mo wan smol grup blong ol man blong Sarahemla i bin kam, mo wetem Gidion—wan long lida blong ol pipol blong Limhae—oli bin mekem wan gudfala plan, mo oli bin kam fri long ol nogud tritmen blong ol man blong Leman. Lod i bin slo blong harem ol krae blong olgeta. ?From wanem? From ol rabis fasin blong olgeta.

Seken stori i semmak long plante wei be i defren tu. Stori i stap insaed long Mosaea 24.

Alma mo ol pipol blong hem, oli bin stap long graon blong Helam, taem wan ami blong ol man blong Leman, oli bin kam long baondri blong graon ia. Oli bin mit mo oli bin faenem wan gudfala plan. (Luk long Mosaea 23:25–29.) Smol taem nomo, ol lida blong ol man blong Leman oli stat blong fosem ol pipol blong Alma blong folem olgeta mo putum long olgeta ol hevi samting (luk long Mosaea 24:8). Long ves 13 yumi rid, “Mo i bin hapen se voes blong Lod i bin kam long olgeta long ol hadtaem blong olgeta, i talem se: Leftemap ol hed blong yufala mo yufala i glad, from mi save kavenan we yufala i bin mekem wetem mi; mo bae mi mekem kavenan wetem ol pipol blong mi mo mekem olgeta i go fri long slef.”

Ol pipol blong Alma, oli bin kam fri aot long ol han blong ol man blong Leman mo oli bin gobak sef mo stap wan wetem pipol blong Sarahemla.

Wanem i defren wetem ol pipol blong Alma mo ol pipol blong King Limhae? I gat sam samting we i defren: ol pipol blong Alma oli stap long pis mo oli moa stret mo gud; oli bin kasem baptaes finis mo oli bin mekem kavenan wetem Lod; oli putum ol tingting blong olgeta i stap daon long fored blong Lod iven bifo hadtaem blong olgeta we i bin stat. Evri samting ia, i mekem se i bin stret nomo blong Lod i mekem olgeta i go fri kwiktaem long wan merikel wei, aot long han we i holem olgeta i stap long slef. Olgeta skripja ia, oli stap tijim yumi abaot paoa blong Lod blong mekem man i fri long sin.

Ol profesi oli bin talem fastaem abaot laef mo misin blong Jisas Kraes we i promesem yumi abaot fasin blong kam fri we bae hem i givim. Atonmen blong Hem mo laef bakegen i givim long yumi evriwan wan wei aot long ded long saed blong bodi, mo sapos yumi sakem sin, wan wei aot long ded long saed blong spirit, we i kam wetem ol blesing blong laef we i no save finis. Promes blong Atonmen mo laef bakegen long ded, ol promes blong kam fri long ded long saed blong bodi mo spirit, God i talem long Moses taem Hem i talem se hemia i wok mo glori blong Hem, blong mekem man i nomo save ded mo i kasem laef we i no save finis (Moses 1:39).

Long wanem i defren long ol naes bilif blong yumi we oli raetem insaed long olgeta skripja, yumi faenem paoa we i stap blokem yumi blong bilif long ol tabu toktok—ol toktok we oli stap soem yumi rod tru long fulap yia blong some ol valiu mo ol standet we oli no save finis blong ol fasin blong yumi tru long laef. Oli talem se ol tijing blong Baebol oli rong mo ol tijing blong Masta i no blong taem blong yumi naoia. Oli talem strong se wanwan man o woman i mas fri blong setemap standet blong hemwan; oli wantem blong jenisim raet blong ol man we oli biliv, we i no folem wanem we i stap insaed long olgeta skripja mo long ol toktok blong ol tabu profet.

I wan blesing blong gat ol stori blong misin blong Lod mo Sevya i stap long Buk blong Momon blong ademap wan seken witnes long doktrin we Baebol i talemaot. From wanem i impoten long wol blong gat tugeta, Baebol mo Buk blong Momon? Mi bilif se ansa i stap insaed long japta 13 blong Fas Nifae. Nifae i raetem: “Mo enjel i bin toktok long mi, i se: ol lasfala histri ia, we yu bin luk long medel blong Jentael, [Buk blong Momon]bae oli witnes long saed blong trutok blong faswan [Baebol], we i blong ol twelef aposol blong Smol Sipsip, mo bae i soem ol samting we i klia mo gudgudfala we oli bin tekemaot long faswan; lanwis, mo pipol se Smol Sipsip blong God i Pikinini blong Papa we I No Save Finis, mo Sevya blong wol; mo we evri man i mas kam long hem, o oli no save sev” (ves 40).

Baebol o Buk blong Momon, wanwan long tufala i no inaf. Tugeta, tufala i impoten long yumi blong tij mo lanem abaot doktrin blong Kraes we i fulwan mo i komplit. Nid blong narawan, i no putum daon wan long tufala. Tugeta, Baebol mo Buk blong Momon oli impoten long yumi blong yumi save sev mo kam olsem god. Olsem Presiden Esra Taf Benson i bin talem wetem paoa: “Taem yumi yusum tugeta, Baebol mo Buk blong Momon, i putum daon giaman doktrin” (“A New Witness for Christ,” Ensign, Nov. 1984, 8).

Mi wantem endem toktok wetem tu stori—wan i kam long OlTesteman, mo narawan i kam long Buk blong Momon—blong soem olsem wanem tufala buk ia i wok gud tugeta.

Stori blong Ebraham i stat taem hem i kam fri aot long ol man Koldia we oli stap wosipim aedol (luk long Jenesis 11:27–31; Abraham 2:1–4). Hem mo woman blong hem Sara i bin kam fri long harem nogud mo tufala i bin kasem promes se tru long laen blong tufala, bae evri nesen blong wol bae i kasem blesing (luk long Jenesis 18:18).

OlTesteman i holem stori blong Ebraham we i karem Lot, bubu blong hem wetem hem aot long Ijip. Lot i kasem janis blong jusum graon, nao hem i jusum flat ples blong Jodan, mo hem i putum tenet blong hem i fesem Sodom, wan siti blong bigfala rabis fasin. (Luk long Jenesis 13:1–12.) Plante long ol problem we Lot i fesem long laef blong hem, mo i bin gat plante, i bin risal from fas joes blong hem blong putum doa blong tenet blong hem blong i lukluk i go long Sodom.

Ebraham, papa blong ol stretwan, i bin eksperiensem laef long wan defren wei. I tru se i bin gat fulap jalenj, be i bin sapos blong stap olsem wan laef we i gad blesing. Yumi save naoia, wea nao, doa blong tenet blong Ebraham i bin fesem, be i gad wan strong pruf long las ves blong japta 13 long Jenesis. I talem: “Nao Ebraham i aot long ples ia, i go long graon blong wan man long Mamre, we i Hebron, mo hem i wokem wan olta bakegen blong mekem wosip long Hae God” (Jenesis 13:18).

I nomata we mi no save, mi bilif long miwan se ol doa blong tenet blong Ebraham i bin fesem olta we hem i bin mekem long Lod.? Olsem wanem mi save talem samting ia? I from se mi save Buk blong Momon stori abaot King Benjamin we i toktok long ol pipol blong hem taem oli bin kam tugeta blong harem ol las toktok blong hem. King Benjamin i talem long olgeta blong oli mekem ol doa blong ol tenet blong olgeta i fesem tempol (Luk long Mosaea 2:1–6).

Yumi save kam fri long ol wei blong devel mo rabis fasin sapos yumi tanem yumi i go long ol tijing blong ol tabu skripja. Sevya i bigfala man blong mekem man i go fri, from Hem i mekem yumi fri long ded mo sin (luk long Rom 11:26; Seken Nifae 9:12).

Mi talemaot se Jisas i Kraes mo yumi save kam kolosap long Hem taem yumi ridim Buk blong Momon. Buk blong Momon i wan nara testeman blong Jisas Kraes. Ol fas testeman blong Sevya blong yumi, oli OlTesteman mo Niu Testeman—o Baebol.

Bakegen, bae yumi tingbaot fren blong mi Skot, long hao hem i tokbaot Buk blong Momon: “I wan gudfala buk.” Mi testifae long yufala abaot ol bigfala lesen we oli go wetem tabu Baebol, long nem blong Jisas Kraes, amen.