Na Kaukauwa ni Veisereki

E dua na noqu itokani vinaka e dau vakauta mai e dua na neketai vou meu daramaka ena soqoni au dau vosa kina ena veikoniferedi raraba yadua. E vakasakiti na veika e dau taleitaka, se vakaevei?

Na noqu itokani gone oqo e sotava tiko eso na veika dredre, ka sa yalani kina ena so na sala na veika e rawata, ia ena so tale na sala e daumaka sara kina o koya. Me vaka oqo, na nona yalodoudou vakadaukaulotu e vakatauvatani vei iratou na luvei Mosaia. Au vakabauta ni oqo e vu mai na rawarawa ni nona vakabauta sa dei vakavinaka kina. Au vakabauta ena nona vakasama o Scott e sega ni rawa ni raitayaloyalotaki kina ni sega ni lewena kece na Lotu i Jisu Karisito ni Yalododonu Edaidai na tamata ka ni sega ni tamata kece sa wilika na iVola i Momani se tu vua na ivakadinadina ni kena dina.

Meu tukuna mada e dua na ka a yaco ena bula nei Scott ena nona vuka tiko ena imatai ni gauna ena waqavuka me lai sikova na tacina. E dua na itokani a dabe volekati koya e rogoca na nona veitalanoa tiko vata kei koya erau dabe veitikivi:

“Bula, na yacaqu o Scott. O cei na yacamu?”

A tukuna na yacana o koya e rau dabe veitikivi toka.

“Na cava o dau cakava”

“O au e dua na idinia.”

“Totoka oqori. O vakaitikotiko mai vei?”

“Mai Las Vegas.”

“E tiko mai keri e dua na neimami valetabu. O kila beka na vanua e tu kina na valetabu ni Momani?”

“Io, E dua na vale totoka oya.”

“O iko na Momani?”

“Sega.”

“E dodonu mo dua. Oqo e dua na lotu totoka. O sa wilika beka na iVola i Momani?”

“Sega.”

“Io, e dodonu mo wilika. Oya e dua na ivola totoka.”

Au duavata mai vu ni yaloqu kei Scott—na iVola i Momani e dua na ivola totoka. E dau voqa tu ga vei au na nona vosa na Parofita o Josefa Simici ka kunei ena tabana ni ivakamacala taumada ni iVola i Momani: “Au tukuna vei iratou na veitacini ni iVola i Momani e ivola dodonu duadua vei ira kecega na ivola e vuravura, ka vatuivakadei ni noda lotu, ka na voleka cake yani vua na Kalou e dua na tamata ena nona muria na kena ivakavuvuli, mai na veiivola kece tale e tu.”

Ena yabaki oqo ena kalasi ni Wilivola ni Sigatabu eda vulica tiko kina na iVola i Momani. Ni da vakavakarau ka vakaitavi, me da vakauqeti me da muria na ivakaraitaki doudou nei Scott me da wasea na noda lomana na ivolanikalou digitaki oqo vei ira e sega ni tautauvata na noda vakabauta.

E dua na ulutaga kilai levu ena iVola i Momani e vakaraitaki ena iotioti ni itikina ena imatai ni wase ni 1 Nifai. E vola vaqo o Nifai, “Ia koi au ko Nifai, au na vakatakila vei kemudou ni sa yalo loloma na Turaga vei ira kecega sa digitaka ko Koya ena vuku ni nodra vakabauta; a sa vakaukauwataki ira me ra bula kina” (1 Nifai 1:20).

Au gadreva meu vosa vei kemuni ena ivakarau e sereki keda kina na iVola i Momani, sai koya na loloma kaukauwa ni Turaga ka maroroi tu me baleta na gauna oqo, ena nona vakavulici keda ena dua na sala savasava ka “dodonu duadua” na ivunau i Karisito.

E vuqa na italanoa ena iVola i Momani era italanoa ni veisereki. Na nona lako yani o Liai ki na lekutu kei na nona matavuvale e baleta na nodratou sereki mai na kena vakarusai o Jerusalemi. Na kedra italanoa na Jeretaiti e italanoa ni veisereki, ka vakakina na kedra italanoa na Mulokaiti. A sereki mai na ivalavala ca o Alama Lailai. Era a sereki mai na ivalu na sotia yaloqaqa nei Ilamani. Erau a sereki mai valeniveivesu o Nifai kei Liai. Na ulutaga ni veisereki e vakadinadinataki ena loma taucoko ni iVola i Momani.

E rua na italanoa ena iVola i Momani e rau tautauvata ka vakavuvulitaka e dua na lesoni bibi. Na kena imatai mai na ivola i Mosaia, tekivu ena ika 19 ni wase. Eke eda vulica kina na nona tiko voli ena vanua o Nifai na Tui o Limiai. Era sa vakacibi ivalu tiko na Leimani vei ira na tamata i Limiai. Na vua ni ivalu oqori ni ra na vakatarai Tui Limiai o ira na Leimani me lewai ira tikoga na nona tamata, ia me ra na bobula tiko ga vei ira. Sa dua na sautu logaloga ca. (Raica na Mosaia 19–20.)

Ni sa tekivu me ra vakila na tamata i Limiai na nodra veivakalolomataki na Leimani, era sa vakauqeta na Tui me valuti ira. Era vakadrukai vakatolu. E vakataqari vei ira na icolacola bibi. Oti era sa qai vakayalomalumalumutaki ira ka ra tagi vakaukauwa vua na Turaga me sereki ira. (Raica na Mosaia 21:1–14.) Na tikina 15 ena wase 21 e tukuna vei keda na nona vosa na Turaga: “A sa berabera ni rogoca na Turaga na nodra tagi ena vuku ni nodra talaidredre; ia sa qai rogoca na Turaga na nodra tagi ka vakamalumalumutaka na yalodra na Leimani ka sa tekivu me ra vakamamadataka na nodra icolacola; ia e sega ni vakadonuya na Turaga me sa tei sereki ira mada mai na veivakabobulataki.”

Ni ratou yaco ga yani o Amoni kei na dua na ilala tagane mai Saraemala, vata kei Kitione—e dua vei ira na iliuliu vei ira na tamata i Limiai—eratou tuva e dua na ituvatuva ka qai qaqa, ka ra dro tani kina mai na nodra veivakalolomataki na Leimani. A berabera ni rogoca na nodra masu na Turaga. Baleta na cava? Baleta na nodra talaidredre.

Na ikarua ni talanoa e viavia tautauvata ena vuqa na vakasama ia e duidui talega. E volai na kena itukutuku ena Mosaia 24.

Era sa laki tiko ena vanua ko Ilami ko Alama kei ira na nona tamata, ena gauna era sa curuma yani kina na Leimani na iyalayala ni vanua. Era sota ka veivosakitaka e dua na iwali ni tiko sautu. (Raica na Mosaia 23:25–29.) Sega ni dede sa tekivu me ra vakayacora na nodra iliuliu na Leimani na nodra lewa vei ira na tamata i Alama ka vakacolata vei ira na icolacola bibi.(raica na Mosaia 24:8). Ena tikina 13 eda wilika kina, “Ia ni ra sa rarawa tiko sa qai rogo mai vei ira na domo ni Turaga ka kaya: dou laveta cake na ulumudou ka vakacegu, niu sa kila tu na veiyalayalati dou a cakava vei au; ia au sa dauveiyalayalati kei ira na noqu tamata ka vakabulai ira mai na nodra vakabobulataki.”

Era a sereki na tamata i Alama mai na ligadra na Leimani ka ra lesu tale yani ena bula vinaka me ra laki duavata tale kei ira mai Saraemala.

Na cava na kedra duidui na tamata i Alama kei ira na nona tamata na Tui o Limiai? E kena irairai, ni vica vata tiko na duidui: o ira na tamata i Alama era tiko sautu ka buladodonu cake, era sa papitaiso oti ka cakava e dua na veiyalayalati kei na Turaga; era vakamalumalumutaki ira ena mata ni Turaga ni se bera ni tekivu na nodra veika dredre. Na veiduidui oqo sa kilikili kina ka dodonu me sereki ira vakatotolo na Turaga ena dua na ivakarau mana mai na liga e vakabobulataki ira tiko. Na ivolanikalou oqo e vakatavulica vei keda na nona kaukauwa ni veisereki na Kalou.

Na veiparofisai ka tukuni taumada kina na bula kei na itavi nei Jisu Karisito e yalataki kina vei keda na veisereki ena vakarautaka o Koya. Na Nona Veisorovaki kei na Tucaketale sa vakarautaki kina vei keda e dua na sala me da dro bula kina mai na mate vakayago ka, kevaka eda veivutuni, me da dro tani kina mai na mate vakayalo, ka kauta vata mai na veivakalougatataki ni bula tawamudu. Na yalayala ni Veisorovaki kei na Tucaketale, na yalayala ni veisereki mai na mate vakayago kei na mate vakayalo, a tukuna na Kalou vei Mosese ena Nona kaya, “Raica, oqo na inaki kei na lagilagi ni noqu cakacaka—me tucake tale mai na mate na tamata kecega ka rawata na bula tawamudu” (Mosese 1:39).

E veibasai kei na vakabauta tuvalaki vakamatau vei keda ena ivolanikalou savasava, eda kunea kina na kaukauwa veivorati ni veika vakavuravura, ka nakiti me bolea na veivakabauta sa tu makawa ena veivola savasava—na volavola sa dau dusimaki keda ena vuqa na veisenijiuri, ena kena vakamacalataki na veika tawamudu na kena yaga, kei na ivakatagedegede ni noda itovo ni bula. Era tukuna ni cala na ivakavuvuli ena iVolatabu ka sa makawa na nona ivakavuvuli na Turaga. Era kaya ni dodonu me tiko ki na tamata yadua na galala me virikotora na nona ivakatagedegede; era segata me ra moica na nodra dodonu na vakabauta, veibasai kei na veika e vakavuvulitaki ena ivolanikalou kei na nodra vosa na parofita.

Sa dua na veivakalougatataki me tu vei keda ena iVola i Momani e dua na itukutuku me baleta na nona veiqaravi na noda Turaga ka iVakabula me vakuria ena dua tale na ivakadinadina ki na ivunau e tukuni ena iVolatabu. Na cava e bibi kina me tu e vuravura na iVolatabu kei na iVola i Momani? Au vakabauta na kena isau ena kunei ena ika 13 ni wase ni 1 Nifai. E vola vakaoqo o Nifai: “A sa vosa vei au na agilosi ka kaya: Na ivola ko qai raica oqo e muri vei ira na kai Matanitu Tani [iVola i Momani], sa vakadinadinataka na ivola ko a raica taumada [iVolatabu], ia sa volai tu kina na veitikina macala vinaka sara ka talei, ka sa kau tani mai na nodratou itukutuku na iapositolo ni Lami e le tinikarua; ia sa tukuna vei ira na veimataqali, duivosavosa kei ira na tamata, ni sa luve ni Tamada Tawamudu na Lami ni Kalou ka sa iVakabula kei Vuravura; ia me ra lako vua na tamata kecega, kevaka e sega era na sega ni vakabulai” (tikina e 40).

E sega ni sa rauta ga na iVolatabu se na iVola i Momani vakataki koya ga. Erau gadrevi ruarua me da veivakavulici ka vulica kina me baleta na ivunau taucoko i Karisito. Na kena gadrevi e dua vei rau e sega ni vakalailaitaki kina na kena ikarua. E rau gadrevi ruarua na iVolatabu kei na iVola i Momani me baleta na noda vakabulai kei na bula vakacerecerei. Me vaka e vakavuvulitaka vakaukauwa sara o Peresitedi Ezra Taft Benson: “Ni rau vakayagataki vata, erau na vakamaduataka na ivunau lasu na iVolatabu kei na iVola i Momani” (“A New Witness for Christ,” Ensign, Nove. 1984, 8).

Au vinakata meu tinia ena noqu tukuna e rua na italanoa—e dua mai na Veiyalayalati Makawa, na kena ikarua mai na iVola i Momani—me vakaraitaka na ivakarau e rau cakacaka vata kina ena duavata na ivola e rua oqo.

Na italanoa kei Eparama e tekivu mai na nona sereki mai vei ira na kai Kalitia dauqaravi kalou matakau (raica na Nai Vakatekivu 11:27–31; Eparama 2:1–4). Erau a qai sereki kei na watina o Serai mai na nodrau rarawa ka yalataki vei rau ni na vakalougatataki na veimatanitu e vuravura mai na nodrau kawa (raica na Nai Vakatekivu 18:18).

E tu ena Veiyalayalati Makawa na itukutuku ni nona kauti Loti na vugona o Eparama mai Ijipita. Ni soli vua me digitaka e liu na nona vanua, a digitaka o Loti na bucabuca ni Joritani, ka birika na nona valelaca me qaravi Sotoma, e dua na koro ni ivalavala ca. (Raica Nai Vakatekivu 13:1–12.) E vuqa na leqa a qai sotava o Loti ena nona bula, e vica vata toka, e rawa ni semati lesu ki na nona a lewa taumada me vaqara na katuba ni nona valelaca me raici Sotoma tu.

O Eparama, na tama ni vakabauta, a duatani na nona sotava na bula. E dina sara, ni a tu e vuqa na bolebole, ia e bula vakalougatataki. Eda sega ni kila se a vaqara ki vei na katuba ni nona valelaca o Eparama, ia e dua na ivakatakilakila kaukauwa ena iotioti ni tikina ni ika 13 ni wase e Nai Vakatekivu. E tukuni kina: “A sa cavuta na nona valelaca ko Eparama ka laki tiko mai na kau eso mai Mamire, ko koya mai Epironi, a sa cakava mai kea e dua na icabocabo ni soro vei Jiova” (Nai Vakatekivu 13:18).

Au sega ni kila, au vakabauta vakataki au ni katuba ni valelaca nei Eparaama e qarava na icabocabo ni soro a tara vua na Turaga. Au yaco rawa vakacava ki kea? E baleta niu kila na italanoa ni iVola i Momani me baleta na ivakaro nei Tui Penijamini vei ira na nona tamata ena nodra soqo vata me ra rogoca na iotioti ni nona vosa vei ira. A vakaroti ira na Tui o Penijamini me ra vaqara na katuba ni nodra valelaca ki na valetabu (raica na Mosaia 2:1–6).

E rawa ni da sereki mai na sala ca kei na daucaka ca ena noda goleva na ivakavuvuli ni ivolanikalou tabu. Na iVakabula sai Koya na dauveisereki cecere, ni sereki keda mai na mate kei na ivalavala ca (raica na Roma 11:26;2 2 Nifai 9:12).

Au kaya ni o Jisu na Karisito ka rawa ni da toro voleka yani Vua ena noda wilika na iVola i Momani. Na iVola i Momani e dua tale na ivakadinadina kei Jisu Karisito. Na imatai ni ivakadinadina kei Jisu Karisito na Veiyalayalati Makawa kei na ka Vou—se na iVolatabu.

Vakadua tale, me da nanuma na nona ivakamacala ni noqu itokani o Scott me baleta na iVola i Momani: “Oqo e dua na ivola totoka.” Kau vakadinadinataka vei kemuni ni levu na kena cecere na iVola i Momani e basoga mai na kena duavata kei na iVola Tabu, ena yaca i Jisu Karisito, emeni.