Ekkewe Manamanen Nang

Ewe pristut a ewe mwumwutan Kot ngeni ekkoch mwan won ei fonufan pwe repwe anisi aramas ngeni manau ese much (nengeni Spencer W. Kimball, “The Example of Abraham,” Ensign, June 1975, 3). Pristut a fofforun ewe Samon me ren ekkoch mwan pwe epwe amanaua ngunun aramas. Eu napanapan ewe Mwichefenin Jises Kraist, non fansoun nom me ikenai, mi chok An we mwumwuta. Ese tongeni wor eu Mwichefen mi ennet ika ese wor mwumwuta seni nang.

Mwan usuch chok ra angei ewe mwumwutan pristut. Esap seni ar sineiochu, angangoch, ika ar sukkun pwe repwe tongeni seikita ngeni ewe pristut nge seni chok ar aneasochis me ar mochen awora aninis.

Non ewe enimuan nongonongen achifoua a aiti kich ifa usun emon epwe angei mwumwutan pristut: “Sia nuku pwe aramas repwe koko seni Kot, seni osini, ar iseta paw won mokurer seni ekkewe mi wor ar mwumwuta, pwe repwe tongeni afanafana ewe Kapas Allim me angang annukun ewe kapas allim.” Iwe, emon at ika emon mwan a angei ewe mwumwutan pristut me a seikita ngeni eu ofis seni emon a nom ren ewe pristut me a fen mutata seni emon souemwen a nom ren ekkewe kien pristut.

Mi namwot pwe emon chon pristut epwe aea ei mwumwuta mi pin ren pungupungoch fan An Kot ekiek me popun. Mokutokutun ewe pristut esap usun pwisin kich. Fansoun meinisin sia aea ewe pristut pwe epwe anisi, efeiochu, me apochokuna aramas.

Emon a angei ewe pristut mi tekia me ren eu pwon mi pin pwe epwe wisen fori mettoch meinisin mi kapachenong non ei mwumwuta (nengeni D&C 68:8) me non ei ofis (nengeni D&C 107:99) a angei. Pun a nom rech An Kot mwumwuta mi pin, sia chon foffor mwitir me sisap witi tori emon epwe tingoreikich (nengeni 2 Nifai 2:26). Ewe pristut mi angang weires me ese chipwang.

Preseten Ezra Taft Benson a aiti kich:

“Ese naf pwe sipwe chok angei ewe pristut me mommot chok me witi tori emon epwe pesei ngeni kich pwe sipwe angang. Nupwen sia angei ewe pristut, a wor wisach pwe sipwe angang weires me sipwe mochen wenechar non ach aninis me foffor mi murino won ewe fonufan, pun ewe Samon a era: ‘

“‘…Ekkewe ir ese wor ar foffor tori emon epwe annuku i, me a angei annuk ren tipemwaramwar, me a chipwang non an epwe aneasochiki, iwe ena emon epwe weri ninni’ [nengeni D&C 58:29]” (So Shall Ye Reap [1960], 21).

Preseten Spencer W. Kimball a pwan esinna pwe netipen ewe pristut mi tipeu ngeni angang. “Emon a atai ewe pwonun pristut ren an aneasonap annuk—pwan ren an chipwangano wisan kewe. Iwe, ika emon a mochen ataieno ei pwon mi pin esap chok fori och mettoch” ” (The Miracle of Forgiveness [1969], 96).

Nupwen sia angangoch non wisach kewe non pristut, sia tongeni feioch ren pochokunun pristut. Pochokunun pristut a chok An Kot manaman me ren mwan me at usuch chok me a feito seni nukuchar, aneasochis, angang weires, me nimenimochun pwisin kich. Emon at ika emon mwan a tongeni angei mwumwutan pristut seni iseta paw won mokuran nge esap wor an manamanen pristut ika a aneasonap, nimengau, ika ese mochen fori aninis.

“Tufichin ewe pristut ra chok ririfengeni ren pochokunun nang, me … emon ese tongeni aea ekkewe manamanen nang chinon chok epwe fori nongonong mi pung me wenechar.

Sia tongeni angei tufichin ewe pristut, nge ika sia achocho ne apwonu ach kewe tipis, ika apwapwaiti ach namanam tekia ika ach mochen mi nusmwan, ika sia achocho ne nemeni ngunun aramas fiti foffor mi mwan, nang epwe suu seni kich me Ngunun ewe Samon epwe netipechou. Nupwen Ngunun ewe Samon a suu seni emon, ese chuen wor an pristut ika mwumwuta. (nengeni D&C 121:36–37; mi pachenong esisin).

Pwi kana, ika emon at ika emon mwan a angei mwumwutan pristut nge a chipwang ne fori met mi namwot pwe epwe angei pochokunun pristut ewe Samon esap etiwa i. Chon pristut seni anuon ngeni chinnap mi namwot ngenir pwe epwe wor ar mwumwuta me manaman—ewe mutata me tufich non pekin ngun pwe repwe fori An Kot angangen manau ese much.

Ua mamarita non eu imw ren emon in mi nukuchar me emon sam mi amwarar. Inei we a mwirimwirin chon sai fetan me ir ra fangano mettoch meinisin fan iten ewe Mwichefen me ewe mun Kot. Semei we esap emon chon ach Mwichefen me, nupwen a emon anuon, a mochen pwe epwe emon souemwenin Catholic. Nge a finata pwe esap fiti sukunun souemwen me a chok fiti sukun pwe epwe fori pisekin angang.

Fan chommong ier nupwen a pupunu, semei we a fiti mwichen Ewe Mwichefenin Jises Kraist ren Aramas mi Pin non Fansoun Soponon ren am famini. Ennet, napengeni chon am wart ra chok ekieki pwe semei we a emon chon ewe Mwichefen. A fiti me nemeni chon iyakiu non am wart, a anisi ekkewe anuon non mwichen Scout, me a anisi inei we non an kewe wis. Ua mochen aporausa ngeni kemi eu nesen mi nap ua kaeo seni semei we usun mumutan me manamanen pristut.

Nupwen ua emon at fan chommong iteitan wik ua eisini semei we inet epwe papatais. Iteitan fansoun ua eisini i a era ngeniei non mongungun mi ekkis pochok fiti tong: “David, usap fiti ewe Mwichefen fan iten inom we, fan itom, ika fan iten pwan emon. Upwe fiti ewe Mwichefen nupwen ua sinei pwe mi pung.”

Ai nuku pwe ngang emon anuon non ei atun nupwen am me semei we aua poraus fengen. Aua keran war seni am fiti fengen mwichen Raninifel, me ua eisini semei we inet epwe papatais. A chok emenimen me a era, “Fansoun meinisin ka kapas eis ngeniei usun ai fansoun papatais. Ikenai a wor ai kapas eis ngonuk.” Ua men pwapwa me ua chok ekiek pwe a men murino ekkei mettoch!

Semei we a soposopono, “David, om mwichefen a era pwe ewe pristut a no seni ei fonufan non fansoun nom me a niwinsefanito seni chon nang me ren ewe Soufos Joseph Smith, ika met?” Ua era pwe mi pung an kewe kapas. Iwe a era, “Iei ai kapas eis. Iteitan wik non mwichen pristut ua ausening ngeni ewe pisop pwan ekkoch souemwenin pristut me ra achema, tingor, me pesei ngeni ekkewe mwan pwe repwe fori ar wisen sensen famini me repwe apwonueta ar wisen pristut. Ika An Kot pristut a wesewesen niwinsefanito me a nom non om mwichefen, pwata ekkewe mwan non om mwichefen ra angang ngeni wiser kewe usun chok ekkewe mwan non ai mwichefen?” Non na fansoun ese wor masouen ai ekiek. Use tongeni ponueni semei we non napanapoch.

Ua nuku ese pung pwe semei we a apungu pwe ach Mwichefen esap ennet me ese wor mumutan nang fan iten ekkoch mwan non am we wart mi ekkis chipwang. Nge an kapas eis mi pwan ekkis pung pun mi namot pwe ekkewe mwan a nom rer An Kot prisut mi pin repwe sokkono seni ekkoch mwan. Ekkewe ir a nom rer ewe pristut rese pwan nap seni pwan ekkoch mwan, nge mi namwot pwe ar foffor epwe sokkono. Ekkewe ir ra angei ewe pristut resap chok angei mumutan pristut nge repwe pwan nukuchar pwe pochokunun Kot epwe torir. Ewe Samon a era pwe ekkewe ir mi kefinita repwe nimoch (nengeni D&C 38:42).

Use menuki ewe nesen usun mumutan me manamanen pristut ua kaeo seni semei we, emon mwan ese fiti ach nuku nge mi murino, me a ekieki pwe mi auchea pwe chon An Kot we pristut repwe achocho non wiser. Seni ei fansoun poraus fengen ren semei we non neanowasen na Raninifel a awora ai mochen pwe upwe emon “at mi murino”. Use mochen emon minen appiru mi ngau pwe semei we esap tongeni fefeita non an kaeo usun niwinsefaniton ewe kapas allim. Ua chok mochen winiti emon at mi murino. Ewe Samon a mochen pwe meinisin kich sia angei An we mwumwuta pwe sipwe wenechar, nimenimoch, me at mi murino fansoun me neni meinisin.

Eni oua mochen sinei pwe mwirin chommong ier, semei we a papatais. Me non pwan ekkoch atun, a wor ai tufich pwe ua tongeni efeiochu i pwe a angei ewe pristut seni Aaron me seni Melkisetek. Eu fansoun mi wesewesen auchea non manauei a nupwen ua kuna semei we a angei ewe mumuta, me manamanen ewe pristut.

Ua aporausa ei nesen mi auchea seni semei we pwe upwe esinna eu mettoch mi ennet. Fansoun angei ewe mumutan ewe pristut seni iseta paw won mokuren emon mi auchea nepoputan, nge ese naf. Seikita a ngeni mwumwuta, nge foffor mi pung me wenechar mi namwot pwe epwe wor ach manaman non ach achocho ne ekieta ngunun aramas, afanafan me pwarata, efeiochu me aururu, me angang ngeni manau ese much.

Non ei fansoun mi auchea won ei fonufan, mi namwot pwe kich chon ewe pristut sipwe mwan mi wenechar me sipwe usun pisekin angang non poun Kot. Mi auchea pwe sipwe uta usun chok mwanin Kot. Mi och ika sipwe kaeo seni me tapweno mwirin Nifai, noun noun Helaman me i ewe aewin chon kaeo mi kokko seni ewe Chon Amanau nepoputan an afanafan me nein ekkewe chon Nifai. Nifai a tutumunur non chommong mettoch. … Me Nifai a tumunur ren manamanen me mwumwuta mi nap (3 Nifai 7:17).

Nespopononun ekkewe interfiu ren taropwen mwumwutan non tempel ua fori nupwen ua emon pisop me presetenin steik, fan chommong ua eisini ekkewe fefin mi pupunu ifa usun ua tongeni anisir me ar famini. Ar kewe kapas mi nonnochok me ar kewe kapas ra aitiei me ua ekkis mairu nupwen ua ausening. Ekkewe fefin rese fos ngau, nge fan chommong ra era ei sokkun mettoch. “Kose mochen kopwe anisi punuei we pwe epwe weweiti wisan pwe epwe emon souemwenin pristut non imwem. Ua pwapwa ren ai upwe emweni am kaeo pukfel, iotekin famini, me pwinin famini, me upwe soposopono ei foffor. Nge ua mochen pwe punuei we epwe pwan anisiei me epwe awora manamanen pristut. Kose mochen kopwe anisi punuei we pwe epwe kaeo ifa usun epwe emon petriark me emon souemwenin pristut non imwem.”

Fan chommong ua ekieki usun ekkana fefin me ar tingor. Souemwenin pristut ra pwan rong ei sokkun tingor. Chommong fefin ra titingor pwe esap chok nom ren punuer kewe mwumwutan pristut nge epwe pwan wor manamanen pristut. Ra mochen pwe repwe angang fengen ren punuer kewe pwe repwe tongeni angang ngeni me ekieki usun Kraist me ewe kapas allim non imwer.

Pwi kana, ua pwon ngeni kemi pwe ika oupwe iotek o ekipwichi usun tingoren ekkei fefin, ewe Ngun mi Fel epwe anisi kich pwe sipwe esinna wisach kewe (nengeni D&C 93:24) me anisi kich pwe sipwe esinna mettoch sipwe siwini me aochu. Me iei epwe ach fansounen foffor!

Non ei pwin ua era sefani afanafanan Preseten Thomas S. Monson, minne A tingoreikich chon pristut pwe sipwe “minen appiru ren fofforoch.” A achema kich fan chommong pwe sia fori angangen ewe Samon me a mut ngeni kich An aninis ika sia nimenimoch fan mesan (nengeni “Examples of Righteousness,” Liahona me Ensign, May 2008, 65–68). A nom rech ewe mumutan pristut mi niwinsefanito ngeni ei fonufan non ekkei ranin soponon me ren chon nang, seni John ewe Sou-Papatais me Peter, James, me John. Iwe meinisin ekkewe ir mi angei ewe prisut seni Melkisetek mi tongeni pwisin kuna pwe ar mwumwuta a feito seni ewe Samon Jises Kraist. Ua tipeni pwe sia kinisou ren ei feioch mi amwarar. Ua iotek pwe sipwe nimenimoch pwe sipwe tongeni minen appiru ren ewe Samon nupwen sia aea An we mwumwuta mi pin. Amo pwe kich meinisin sipwe tongeni angei manamanen pristut.

Ua pwarata pwe ewe pristut mi pin a wesewesen niwinsefanito ngeni ei fonufan non ekkei ranin soponon me a nom non Ewe Mwichefenin Jise Kraist ren Aramas mi Pin non Fansoun Soponon. Ua pwan pwarata pwe Preseten Thomas S. Monson a ewe prist mi tekia me i chon nemeni ewe pristut mi tekia non ewe Mwichefen (nengeni D&C 107:9, 22, 65–66, 91–92) me a nom ren meinisin ekkewe kien pristut me a wor an mumuta pwe epwe aear. Ekkei nongonong mi ennet ua pwarata ren unusan netipei fan iten Jises Kraist, amen.