2010–2019
Kajoor ko an Lan̄
Eprōļ 2012


Kajoor ko an Lan̄

Rikabwijer priesthood ro redik ak rūtto aikuji mālim im kajoor eo jim̧or—mālim eo emenin aikuj im maron̄ eo ilo jetōb n̄an jutak ilo etan Anij ilo jerbal in lo̧mo̧o̧r.

Em̧m̧aan ro jeiū im jatū, Ij kam̧oolol bwe jemaron̄ kabun̄-jar ippān doon āinwōt juon ānbwiin eļap an ro rej kabwijer priesthood eo. Ij iakwe im nōbar kom̧ kōn erreo eo ami im kareel eo ami n̄an em̧m̧an ilo aolepen laļ in.

Ij kūr kom̧ kajjojo n̄an ļōmņak kōn ekōjkan ami maron̄ uwaake kajjitōk kein kar kwaļo̧ki n̄an membōr ro an Kabun̄ in elōn̄ iiō ko remootļo̧k jen Būreejtōn David  O. McKay: “Eļan̄n̄e ilo iien in kajjojo iaami naaj kar kajjitōk n̄an kwaļo̧k ilo juon jentōj ak naan men eo eļap tata an kōjeno̧lo̧k Kabun̄ eo an Jisōs Kraist im Armej ro Rekwojarjar ilo Raan-ko Āliktata, ta eo enaaj kar uwaak eo ami?” (“The Mission of the Church and Its Members,” Improvement Era, Nob. 1956, 781).

Uwaak eo Būreejtōn McKay eaar kwaļo̧k n̄an kajjitōk eo an make eaar “maron̄ eo ekwojarjar” an priesthood eo. Kabun̄ eo an Jisōs Kraist im Armej ro Rekwojarjar ilo Raan ko Āliktata ej jutak make ļo̧k jān kabun̄ ko jet me rej ba mālim eo aaer ej tōprak in jān armej n̄an armej kōn naan, jeje ko rekwojarjar, ak kaminene kōn jikuuļ in baibōļ. Ad kean̄ kake eoktak bwe maron̄ eo an priesthood eo kar letok kōn likūt pā ko ioon bar kajju jān rikwōj meļan in lan̄ n̄an Rikanaan Joseph Smith.

Ennaan eo aō ej pedped ioon priesthood kwojarjar in im kajoor ko an lan̄. Ij lukkuun jar kōn jipan̄ eo an Jetōb eo an Irooj ilo ad katak ippān doon kōn m̧ool kein raorōk.

Mālim im Kajoor an Priesthood eo

Priesthood eo ej mālim eo an Anij kar leļo̧k n̄an em̧m̧aan ro ioon laļ in n̄an jerbal ilo aolep men n̄an lo̧mo̧o̧r eo an aolep armej (laleSpencer W. Kimball, “The Example of Abraham,” Ensign, Juun 1975, 3). Priesthood eo ej wāween eo me Irooj ej jerbal kōn em̧m̧aan ro n̄an lo̧mo̧o̧ren jetōb ko. Juon iaan men ko rekōjeno̧lo̧k an Kabun̄ eo an Jisōs Kraist, jim̧or etto im rainin, ej mālim eo An. Ejjab maron̄ wōr juon Kabun̄ em̧ool ilo an ejjeļo̧k mālim eo ekwojarjar.

Em̧m̧aan ro rej leļo̧k n̄an er mālim eo an priesthood eo. Erreo im m̧ōņōņō—ejjab tijem̧ļo̧k, kapeel, ak jeļāļo̧kjeņ—rej men ko aikuji n̄an ekkapit eo an priesthood eo.

Jon̄ak eo n̄an bōk mālim eo an priesthood eo ej kōmeļeļeik ilo laajrak in tōmak ļalem: “Kōmij tōmak bwe juōn armej ej aikuj kūr jān Anij, kōn kanaan ko, im kōn likūt pā ko ioon bōran jen em̧m̧aan ro ewōr maron̄ ippāer, n̄an kwaļo̧k gospel eo im kōm̧m̧ani kain̄ ko barāinwōt.” Kōn menin, juon ļaddik ak em̧m̧aan ej bōk mālim eo an priesthood eo im ej kapit n̄an juon opiij ejeno̧lo̧k jān juon em̧ōj an kabwijer priesthood eo im kar kōmālim i jān juon ritōl kōn kii ko an priesthood eo remenin aikuj.

Juon rikabwijer priesthood eo kōtmene bwe en kōjerbal mālim in ekwojarjar ekkar n̄an ļōmņak, kōņaan, im jipadpad kwojarjar eo an Anij. Ejjeļo̧k jabdewōt kōn ļōmņak kōn e make. Iien otemjej priesthood eo kar kōjerbal n̄an jerbal, n̄an kōjeram̧m̧an, im n̄an kōkajoorļo̧k armej ro jet.

Priesthood eo eutiej ļo̧k ej bōk kōn juon bujen em̧ool me ej koba eddo eo n̄an jerbal ilo mālim eo (lale D&C 68:8) im ilo opiij eo (lale D&C 107:99) me em̧ōj an kar bōke. Āinwōt rikabwijer ro an mālim kwojarjar eo an Anij, jej rijerbal ro n̄an jerbal im jab men ko n̄an kipeli (lale 2 Nipai 2:26). Priesthood eo ej wāmourur ijello̧kin pād bajjōk.

Būreejtōn Ezra Taft Benson eaar katakin:

“Ejjab bwe n̄an bōk priesthood eo innām eppejo̧rjor im kōttar m̧ae iien juon ej kōm̧akūt kōj n̄an m̧ōm̧akūtkūt. N̄e jej bōk priesthood eo, ewōr ad eddo n̄an niknik im kijoroor ilo bōk kūņaad ilo kōketak jerbal eo an jim̧we ilo laļ in, kōnke Irooj ej ba:

“‘… Eo ejjab kōm̧m̧an jabdewōt m̧ae iien ej kakien e, im bōk juon kien kōņ būruwōn pere, im dāpiji kōn jowaan, ejja wōt eo kakkure’ [D&C 58:29]” (So Shall Ye Reap [1960], 21).

Būreejtōn Spencer W. Kimball eaar barāinwōt āliji kōn kajoor niknik eo make an priesthood eo. “Juon eo ej rupe bujen an priesthood eo kōn jab pokake kien ko—ak barāinwōt kōn jab kōm̧m̧ani eddo ko an. Ekkar n̄ani, n̄an rupe bujen in juon ej aikuj in jab kōm̧m̧an jabdewōt” (The Miracle of Forgiveness [1969], 96).

N̄e jej kōm̧m̧ane ijo em̧m̧an tata ippād n̄an kakūrm̧ool eddo ko an priesthood eo ad, jemaron̄ jeram̧m̧an kōn kajoor an priesthood eo. Kajoor eo an priesthood eo ej kajoor an Anij ej jerbal ilo em̧m̧aan ro im ļaddik ro āinwōt kōj im ej tōprak in tiljek, pokake, niknik, im jim̧we an juon make. Juon ļaddik ak em̧m̧aan emaron̄ bōk mālim eo an priesthood eo kōn likūt pā ko ioon bōran bōtaab ejjamin wōr kajoor in priesthood eo eļan̄n̄e ejjab pokake, jab erreo, ak jab kōņaan jerbal.

Jim̧we ko an priesthood eo rejjab jepeļļo̧k jān kajoor ko an lan̄, im kajoor ko an lan̄ rejjab maron̄ kōjbwebweik ak kōjeikik ijello̧kin kōn pedped ko an jim̧we.

Jim̧we ko an priesthood eo remaron̄ letok iood, em̧ool; bōtaab n̄e jej kajieon̄ kalbubuik jerawiwi ko ad ak kabun̄ būruwōn utiej bōro, kije eo ad ewaan, ak n̄an kōjerbal kōjeikik ak kajoor ak maron̄ ioon jetōb ko an ajri ro nejin armej, ilo jabdewōt jon̄ak an jab jim̧we, lan̄ ko rej eļļo̧k im Jetōb eo an Irooj ej būrom̧ōj. N̄e Jetōb an Irooj ej eļļo̧k, armej eo ejjeļo̧k an priesthood ak mālim n̄an jidik (lale D&C 121:36–37; kar kakobaba tok).

Em̧m̧aan ro, n̄an juon ļaddik ak juon em̧m̧aan n̄an bōk mālim an priesthood eo ak kowaan n̄an kōm̧m̧ane ta eo emenin aikuj n̄an karbōb n̄an kajoor an priesthood ejjab em̧m̧an n̄an Irooj. Rikabwijer priesthood ro redik ak rūtto aikuji mālim im kajoor eo jim̧or—mālim eo emenin aikuj im maron̄ eo ilo jetōb n̄an jutak ilo etan Anij ilo jerbal in lo̧mo̧o̧r.

Juon Katak jān Jema

Iaar rūttoļo̧k ilo juon kapijuknen ippān juon m̧am̧a eo etiljek im juon baba eo em̧m̧an. Jinō eaar bwijjin bainiier ro me raar karmejete eļap n̄an Kabun̄ in im aelōn̄ in kiin̄ an Anij. Jema eaar jab juon membōr in Kabun̄ in ad im, āinwōt juon likao, eaar ikrelel n̄an erom juon pris in Catholic. Āliktata, kar kālet n̄an jab etal n̄an jemenere in katak kōn baibōļ im ijello̧kin jipadōk juon jerbal āinwōt juon rikōm̧m̧an kein jerbal im rikōļar.

Ilo enan̄in aolepen mour in m̧are eo an, jema eaar pād ilo kwielo̧k ko an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ilo m̧ool, enan̄in aolepen armej ro ilo ward eo am kar ejjeļo̧k aer jeļā bwe jema eaar jab juon membōr in Kabun̄ in. Eaar ikkure im kooje kumi in iakiu eo an ward eo am, kar jipan̄ kōn m̧akūtkūt ko an Jikauut, im kar rie m̧am̧a ilo kūr ko an rellōn̄ im eddo ko an. Ikōņaan ba n̄an kom̧ kōn juon iaan katak ko rem̧m̧an Iaar katak jān jema kōn mālim im kajoor an priesthood eo.

Āinwōt juon ļaddik Iaar kajjitōk ippān jema elōn̄ kōttan kajjojo wiik n̄e enaaj kar peptaij. Eaar uwaak ilo iakwe bōtaab kajjojo iien pen Iaar kōmatōrtōr n̄an e: “David, Ijjamin naaj koba waj ilo Kabun̄ in kōn jinōm̧, kōn kwe, ak kōn jabdewōt. Inaaj koba waj ilo Kabun̄ in n̄e Ijeļā ej juon men ejim̧we n̄an kōm̧m̧ane.”

Ij tōmak Iaar pād ilo jinoin iiō in jodikdik ko aō ke bwebwenato kein raar waļo̧k ippān jema. Kōmij kab rool n̄an kapijuknen eo am jān am̧ kar pād ilo kweilo̧k in Jabōt ko am ippān doon, im Iaar kajjitōk ippān jema n̄e eo enaaj kar peptaij. Eaar ettōn̄ im ba, “Kwoj make wōt iien otemjej kajjitōk ippa kōn peptaij. Rainin ewōr juon aō kajjitōk n̄an kom̧.” Iaar m̧ōkaj im itoklimo ilo kōjem̧ļo̧ke bwe kiiō kom̧ kar kōm̧m̧an wōnm̧aanļo̧k!

Jema eaar wōnm̧aanļo̧k wōt, “David, kabun̄ ņe am ej katakin bwe priesthood eo kar bōk jān laļ in etto im em̧ōj an bar jepļaaktok jān rikwoj meļan in lan̄ ro n̄an Rikanaan Joseph Smith, ejim̧we ke?” Iaar uwaak bwe ennaan eo an eaar jim̧we. Innām eaar ba, “En̄in ej kajjitōk eo aō. Kajjojo wiik ilo kweilo̧k eo an priesthood Ij ron̄jake bisop eo im ritōl ro jet an priesthood eo kakememej, akweļap, im jabnejeej n̄an em̧m̧aan ro n̄an kōm̧m̧ane katakin eo aer im̧ōko im n̄an kōm̧m̧ani jerbal ko an priesthood eo. Eļan̄n̄e kabun̄ eo am̧ em̧ool epād ie priesthood eo kar kōjepļaaktok an Anij, etke ekanooj lōn̄ iaan em̧m̧aan ro ilo kabun̄ eo am̧ ejjeļo̧k oktak ilo aer kōm̧m̧ane jerbal eo aer an kabun̄ jān em̧m̧aan ro ilo kabun̄ eo aō?” Ļōmņak eo aō edik em̧ōkaj an ejjeļo̧k kobban. Eaar ejjeļo̧k aō uwaak n̄an jema.

Ij tōmak jema eaar bōd n̄an ekajete maron̄ eo an ennaan eo an Kabun̄ in ad kōn mālim eo ekwojarjar kōn likjab ko an em̧m̧aan ro me ej koba ļo̧k ippāer ilo ward eo am. Bōtaab kwaļo̧k kajjitōk eo an n̄an n̄a eaar juon ennaan eo ejim̧we bwe em̧m̧aan ro me rikabwijer an priesthood eo ekwojarjar an Anij rej aikuj oktak jān em̧m̧aan ro jet. Em̧m̧aan ro me rej kabwijer priesthood eo rejjab em̧m̧an ļo̧k jān em̧m̧aan ro jet, bōtaab ej aikuj oktak aer jerbal. Em̧m̧aan ro me rej kabwijer priesthood eo rejjab aikuj bōk wōt mālim an priesthood eo ak barāinwōt erom erreo im kein jerbal etiljek an kajoor eo an Anij. Irooj eaar ba bwe ro me rej bōk wa ko an Irooj aikuj in erreo (lale D&C 38:42).

Ijjan̄in kar meļo̧kļo̧k katak ko kōn mālim im kajoor an priesthood eo Iaar katak jān jema, juon em̧m̧aan em̧m̧an ejjab jān tōmak in ad, eo eaar kōtmene eļapļo̧k jān em̧m̧aan ro me raar ba raar kabwijer priesthood eo an Anij. Ālkin rāelep in Jabōt jab eo ippān jema elōn̄ iiō ko remootļo̧k kar ļōme ilo n̄a juon ikrelel n̄an erom juon “ļaddik em̧m̧an.” Iaar jab kōņaan erom juon waanjon̄ak enana im menin ļōkatip n̄an eddōk in katak eo an jema kōn ko̧jpeļ eo kōjepļaaktok. Iaar kōņaan erom juon ļaddik em̧m̧an. Irooj ej aikuj aolepedwōj āinwōt rikabwijer ro an mālim eo An n̄an erom em̧m̧an, wānōk, im ļaddik ro rem̧m̧an ilo iien otemjeļo̧k im ilo jikin otemjej.

Kom̧ maron̄ kar itok limoimi n̄an jeļā bwe iiō ko tok ālik, jema eaar peptaij. Im ilo tōre ko rejejjet, eaar wōr aō iien em̧m̧an n̄an leļo̧k ioon Priesthood eo an Aron im Melkisedek . Juon iaan en̄jake ko rem̧m̧an an mour eo aō eaar lale an jema bōk mālim eo im, āliktata, kajoor eo an priesthood eo.

Ij kwaļo̧k ippāmi katak in aorōk Iaar katak jān jema n̄an kalikkar juon m̧ool ejej uwaan. Bōk mālim an priesthood eo kōn likūt pā ko ioon bar ej juon ijjino eo ekāal, bōtaab ejjab bwe. Leļo̧k ekkapit an mālim, bōtaab jim̧we ej menin aikuj n̄an jerbal kōn kajoor eo ilo ad kajieon̄ ļōn̄aj jetōb ko, n̄an katakin im kam̧ool, n̄an kōjeram̧m̧an im kapilōk, im n̄an koonm̧aanļo̧k jerbal in lo̧mo̧o̧r eo.

Ilo tōre in eaorōk an bwebwenato an laļ in, kwe im n̄an āinwōt rikabwijer ro an priesthood eo aikuj in erom em̧m̧aan ro rerreo im kein jerbal ko ilo pein Anij rewejepedik. Jej aikuj in ļōn̄jak lōn̄ ļo̧k āinwōt em̧m̧aa in Anij. Kwe im n̄an jenaaj em̧m̧an n̄an ad katak jān im wujlepļo̧k ad n̄an waanjon̄ak eo an Nipai, ļaddik eo jibūn Helamōn im eo kein kajuon iaan rikaļoor an jon̄oulruo kar kūr jān Rilo̧mo̧o̧r eo ilo jino in jerbal in kwaļo̧k eo An ibwilijin Ri Nipai ro. “Im eaar kōnono elōn̄ men ko n̄an er; … im Nipai eaar kōnono kōn kajoor im kōn maron̄ eļap” (3 Nipai 7:17).

“Jouj im Jipan̄ Ļeo Pāleō Meļeļe”

Ilo jem̧ļo̧k in intōrpiu ko an peba in mālim an tampeļ Iaar kōjekiik āinwōt juon bisop im stake būreejtōn, emakijkij aō kōn kajjitōk ippān sister ro raar m̧are ekōjkan aō maron̄ ilo em̧m̧an tata jerbal n̄an er im baam̧le ko aer. Uwaak ko rejjab oktak Iaar būki jān kōrā rein retiljek eaar ļap tokjāer im kailbōkbōk. Ejjab ikutkut an sister ro jekpen ņae ak kōrraat, bōtaab emakijkij aer kōn uwaak āinwōt in. “Jouj im jipan̄ ļeo pāleō meļeļe eddo eo an āinwōt juon ritōl an priesthood ilo kapijuknen eo am. Ij m̧ōņōņō in bōk m̧aan ilo ekkatak jeje ko rekwojarjar, jar an baam̧le, im nokon in jota an baam̧le, im Inaaj wōnm̧aanļo̧k wōt n̄an kōm̧m̧ane āindein. Bōtaab Ikōņaan bwe ļeo pāleō en juon m̧ōtta eo ejokkuun wōt juon im letok tōl an priesthood eo ekajoor me e wōt emaron̄ letok. Jouj im jipan̄ ļeo pāleō katak ekōjkan erom juon petriak im juon ritōl an priesthood ilo kapijuknen eo am eo ej tōl im kejparok.”

Emakijkij aō kejōkļo̧kjeņ kōn m̧ool eo an sister rein im kajjitōk eo aer. Ritōl ro an priesthood eo rej ron̄ ejja n̄ūrbōktak kein rainin. Elōn̄ lim̧aro pālele rej jabneejej kōn ļōm̧aro pāleer me rejjab kabwijer wōt mālim an priesthood eo ak barāinwōt kajoor an priesthood eo. Rej jan̄ in iuwade n̄an jokkun wōt juon ippān ļeo pālele etiljek im priesthood eo m̧ōttan ilo jerbal in ejake juon kapjuknen eo ej ioļapļap ilo Kraist im kalimjōk wōt ko̧jpeļ eo.

Em̧m̧aan ro jeiū im jatū, Ij kalim̧m̧ur bwe eļan̄n̄e we im n̄a naaj tiljek ilo jar im kejōkļo̧kjeņ kōn kajjitōk eo an sister rein, Jetōb Kwojarjar enaaj jipan̄ kōj lo kōj make ilo ad lukkuun in (lale D&C 93:24) im jipan̄ kōj kile men ko jej aikuj ukōti im kōkōm̧anm̧ani ļo̧k. Im tōre eo n̄an jerbal ej kiiō!

Erom Waanjon̄ak ko an Jim̧we

Joten in Ij bar ālij katak ko an Būreejtōn Thomas S. Monson eo eaar kūr kōj n̄an erom “waanjon̄ak ko an jim̧we.” Eaar kakememej kōj ilo an āliji bwe jej pād ilo jerbal eo an Irooj im jej maron̄ bōk jipan̄ eo An kar letok ekkar n̄an erreo eo ad (lale “Examples of Righteousness,” Liahona im Ensign, Māe 2008, 65–68). Kwe im n̄a jej kabwijer mālim an priesthood eo me kar bar kōjepļaaktok n̄an laļ in ilo epepen in jān rikwoj meļān ro an lan̄, em̧ool John Ripeptaij im Piter, Jemes, im Jon. Im kōn menin aolep em̧m̧aan ro me rej bōk Priesthood eo an Melkisedek eo remaron̄ ļoor likļo̧k ļain in mālim eo aer make kajju ļo̧k n̄an Irooj Jisōs Kraist. Ij kōjatdikdik jej kam̧oolol kōn kōjeram̧m̧an in ekabwilōn̄lōn̄. Ij jar jenaaj karbōb im erreo n̄an jutak ilo etan Irooj ilo ad kōjerbal mālim kwojarjar eo An. Kōm̧m̧an bwe jān karbōk n̄an kajoor in priesthood eo.

Ij kam̧ool priesthood ekwojarjar eo ilo m̧ool em̧ōj an bar jepļaaktok n̄an laļ in ilo raan kein āliktata im loe ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ij barāinwōt kam̧ool bwe Būreejtōn Thomas S. Monson ej pris eo eutiej ej tōl ioon priesthood eo eutiej an Kabun̄ in (lale D&C 107:9, 22, 65–66, 91–92) im armej eo de eo ioon laļ in me ej jim̧or kabwijer im kar kōmālimi n̄an kōjerbal aolep kii ko an priesthood eo. Kōn men kein Ij ilo m̧ool kam̧ool ilo āt eo ekwojarjar etan Irooj Jisōs Kraist, amen.