Manaman Kan en Nanleng

Priesthood iei mweimwei en Koht me kohieng ohl akan pohn sampah pwe irail en mwekidki irair kan me pid komourlahn aramas (tehk Spencer W. Kimball, “The Example of Abraham,” Ensign, Suhn 1975, 3). Priesthood iei wiepe me Kauno kin ketin doadoahngki ohl akan pwehn komourala aramas. Ehu me wia mwohmw tohrohr en Mwomwohdiso en Sises Krais, me duwepenehte kawao oh pil nan mwehi wet, iei Sapwellime mweimwei. Mwomwohdiso mehlel sohte kak mie ma sohte mweimwei sarawi.

Ohl akan kin alehdi mweimwei en priesthood. Arail mour warohng oh kupwurarail—kaidehn arail koahiek, semen, de kasukuhl—me mweidohng irail en kasarawi ong priesthood.

Mwohmw ong alehdi mweimwei en priesthood dehde nan kelimau en iren pwoson akan: “Se kamehlele me Koht uhdahn pahn ketin malipe aramas emen sang ni kokohp, oh sang ni kepwilpwildien pehkan sang rehn irail akan me ahneki manaman en kalohki oh wia tiahk sarawihkan en Rongamwahuo.” Eri, pwutak emen de ohl emen pahn ale mweimwei en priesthood oh pahn kasarawi ong ehu ohpis de pwukoa sang rehn emen me kolokolehr priesthood oh me alehier mweimwei en kasarawi sang kaun emen me kolokol kihkan en priesthood.

Emen me kolokol priesthood anahne doadoahngki mweimwei sarawi wet ni duwen madamadau oh kupwuren Koht oh Sapwellime koasoandi. Sohte mehkot duwen priesthood me doke pein atail ineng kan. Ansou koaros, priesthood kin doadoahk ong papah, kapaiada, oh kakehlailih aramas teikan.

Priesthood lapo kin alahldi sang ni inou kesempwal oh sarawi ehu me pelialihki pwukoah en mweikidki mweimwei (tehk D&C 68:8) oh ohpis (tehk D&C 107:99) me alahldier. Ni atail wia ohl me kolokol mweimwei sarawi en Koht, kitail wia aramas me ahniki manaman en mwekidki atail madamadau, ah kaidehn en wia dipwisou me emen tohrohr pahn wiahkihieng nsene (tehk 2 Nephi 2:26). Mwohmw en priesthood iei en kin mwekmwekid ong me mwahu, kaidehn en awiawih pwe emen tohrohr en mwekidkin kitail.

President Ezra Taft Benson padahngki:

“E sohte itar kitail en alehdi priesthood eri uhd mwohmwohd oh awiawih lao emen tohrohr pahn ndahiong kitail en mwekid. Ni atail kin alehdi priesthood, kitail ahniki pwukoa en mwekidki oh towehda ni ngoang doadoahk en kadaur mour pwuhng pohn sampah, pwehki Sapwellimen Kauno mahsen ketihtihki me:

emen me sohte wia mehkot lao E alehdi ni kosonned, oh me alehdi kosonned ieu ni mohngiong peikasal, oh me kin kapwaiada kosonnedo ni dangahnga, pahn riahla. [Tehk D&C 58:29]” ((So Shall Ye Reap [1960], 21).

President Spencer W. Kimball pil kangoange me mwomwen priesthood iei en kin mwekmwekid. “Emen kin kawehla inou en priesthood sang ni kasapwungehla kosonned akan— oh pil sang ni sohte wia ah pwukoa. Eri, pwehn kauwehla inou wet emen anahnehte en dehr wia mehkot” (The Miracle of Forgiveness [1969], 96).

Ni atail wia uwen atail kak en kapwaiada atail pwukoa en priesthood, kitail kak kapaikihda manaman en priesthood. Manaman en priesthood iei sapwellimen Koht manaman me kin doadoahk rehn ohl akan oh pwutahngkan duwehte kitail oh kin anahne emenemen en mour pwung, loaloapwoat, peik, oh pwerisek. Pwutak emen de ohl emen kak alehdi mweimwei en priesthood sang ni kepwilipwildi en pehkan ahpw E sohte pahn ahniki manaman en priesthood ma E sapeik, sohte warohng, de soukautih en papah.

Pwuhng kan en priesthood sohte douluhl kak en mweisang manaman kan en nanleng, oh …manaman kan en nanleng sohte kak en kemwekid de doadoahk likin tepin padahk kan en mour pwung.

Mehlel me mweimwei en priesthood kak en kasarawihong kitail, ahpw ni atail pahn song en ekihla pein dipatail kan, de ahniki, kihda pein kitail, de en kaunda ni itoit pali ngehn en aramas akan, ni wiepe sohte lipilipil en mwour sohte pwung, tehk pwe, nanleng pahn ritipene, oh Ngehn en Kauno pahn pahtoula. Ni ansou me Ngehn en Kauno pahn kohsang rehn ohl emen, E solahr pahn ahniki priesthood de mweimwei (tehk D&C 121:36–37; lipw tohrohr kapatapatehng).

Riei ohl akan, ma pwutak emen de ohl emen pahn alehdi mweimwei en priesthood ahpw sohte kapwaiada me anahnepe pwehn warohng manaman en priesthoodo met sohte wia kupwuren Kauno. Irail akan me kolokol priesthood me pwulopwul oh me mah anahne koaros mweimwei oh manaman—mweimwei me anahn oh koahiek en pali ngehn pwe irail en kak wia weliepen Koht nan doadoahk en komour.

I tikida nan ihmw ehu rehn nohno loaloapwoat men oh pahpa mwahu men. Ahi nohnohu wia kadaudok en paionihr kan me tohnmeteikihla soahng koaros pwehki Mwomwohdiso oh wehin Koht. Ahi pahpao sohte wia tohn atail Mwomwohdiso oh, ni eh mwahnakapwo, e men wiahla pahdre en mwomwohdiso Catholic. Ni imwilao, E pilada en sohte iang kasukuhl on pelien lamalamo ahpw uhd doula oh wia doadoahk ong wiahda dipwisoun doadoahk.

Erein palilaud en ah mour mwurin eh pwopwoudida, ahi pahpao kin iang kaudok en Mwomwohdiso en Sises Krais en Souleng en Imwin Rahn Akan rehn aht peneinei. Ni mehlel, tohto aramas kan nan aht ward sehse me ahi pahpa sohte wia tohn Mwomwohdiso. E kin iang mwadong oh kaunda aht pwihn en iakiuh, E kin sawasiki kemwekid en Scouts, oh E kin utung ahi nohnohu nan ah pwukoa malipilip kan. I men ndahiong kumwail duwen padahk kesempwal pwoat me I alehdi sang ahi pahpao me pid mweimwei oh manaman en priesthood.

Ni ei wia kisin pwutak I kin kalapw idek rehn ahi pahpao ma iahd E pahn pepdais. E kin pasapengki ni limpoak ahpw ni dehde ansou koaros me I kin kapeidekih: “David, I sohte pahn iangala Mwomwohdiso pwehki ahmw nohnohu, de kowe, de emen tohrohr. I pahn iangala Mwomwohdiso ni ansou me I ese me iei me koasoandi oh E pwung I en wia.”

I kamehlele me ni ei apwtehn wiahla mwahnakapw men, me ngehi oh ei pahpao koasoaipene ni duwen me sansal pah. Se apwtehn pwurodo sang kaudok en Rahn Sarawi, oh I idek rehn ahi pahpao ma iahd E pahn pepdais. E sirei oh nda, “Kowe me kin kalapw idek rehi ma iahd I pahn pepdais. Rahn wet mie ahi peidek ong uhk.” Ansouohte I perenda oh lemeleme me mie mehkot pahn pweidahr!

Ahi pahpao doula, “David, ahmw Mwomwohdiso kin padahngki me priesthood lipsang pohn sampah kawao oh me E kopwurupwurdo sang tohnleng kan ong Soukohp Joseph Smith, pwung?” I sapengki me E pwung. Eri E nda, “Iet ahi peidek en. Ehuehu wihk nan mihting en priesthood I kin rong pisopo oh kaun teikan en priesthood ahr kin katkataman oh pekpeki ni ngidingid ohl akan en wia arail padahk en peneinei oh irail en wia arail pwukoa en priesthood. Ma amwail Mwomwohdiso ahniki mehlel priesthood kopwurupwurdo en Koht, dahme kahrehda dihren ohl akan nan ahmw Mwomwohdiso sohte weksang ohl akan me wia tohn ahi mwomwohdiso ni duwen arail ngoang en wia arail pwukoa sarawi kan?” Ansouohte soahng koaros sarasang nan ahi madamadau pwulopwulo. Sohte douluhl ahi pasapeng mwahu ong ahi pahpao.

I kamehlele me ahi pahpao sapwung ni eh kadeik duwen mehlel en atail Mwomwohdiso eh kol mweimwei sarawi sang ni eh sohngki souitar akan en ohl akan me E kin tuhwong nan aht ward-o. Ahpw nan ah kalelapako ong ie mie madamadau pwung me ohl akan me kolokol sapwellimen Koht priesthood sarawi konehng en weksang ohl teikan. Ohl akan me kin kolokol priesthood sohte mwahusang ohl teikan, ahpw re konehng mwekid weksang mehteikan. Ohl akan me kolokol priesthood konehng alehdi mweimwei en priesthood oh en pil wiahla ohl me loaloapwoat oh warohng pwe Sapwellimen Koht manaman en kak doadoahk rehrail. Kauno ketin mahsanih me irail me kolokol mene anahne mwakelekel (tehk D&C 38:42).

I sohte kak manokehla padahk kan duwen mweimwei oh manaman en priesthood me I alehdi sang ahi pahpao, ohl mwahu men me sohte wia kisehn atail lamalam, me kasik me mwahu sang ohl akan me ndandki kolokol Sapwellimen Koht priesthood. Koasoaipene me se wia Rahn Sarawio sounpar kei samwalahro elehieng ei inangih en wia “pwutak mwahu men.” I sohte men wia kasarasaras sapwung de en wia takai en dipekelekel ong keirdahn ahi pahpao ni me pid esehla rongamwahu kopwurupwurdohu. I men wia pwutak mwahu. Kauno ketin kupwurki kitail koaros me kolokol Sapwellime mweimwei en kin waun, mwakelekel, mwahu ni ansou koaros oh nan wasa koaros.

Kumwail mwein pahn men ese me, sounpar kei mwurin mwo, ahi pahpao pepdaisla. Ni ansou kan me konehng, I ahniki ansou mwahu en kasarawihong ih Priesthood kan en Aaron oh Melkisedek. Ehu irair keieu kaselel nan ei mour iei ansou me I kilang ahi pahpao alehdi mweimwei oh, ni mehlelo, manaman en priesthood.

I ehukihieng kumwail padahk inen wet me I alehdi sang rehn ahi pahpao pwehn koangoangehkin kumwail mehlel pwoatet. Alehdi mweimwei en priesthood sang ni kepwilipwildien pehkan iei tepida kesempwal ehu, ahpw E sohte itar. Kasarawi kin kihieng kitail mweimwei, ahpw mour pwung me keieu anahn pwehn mwekidki manamano ni atail pahn nantihiong en kakehailih aramas, padahk oh kihda kadehde, en kapaiada oh kaweid, oh en kakairada doadoahk en komour.

Nan mwehi kesempwal wet nan poadoapoad en sampah, kumwail oh ngehi ni duwen me kolokol priesthood anahne wia ohl mour pwung kan pwe Koht en kupwurki doadoahngkin kitail. Kitail anahne kesihnenda ni duwen ohl akan en Koht. E pahn mwahu ong kitail en esehla oh idawehn karasaras en Nephi, me wia wahn Helaman oh keieu en tohnpadahk ehk-riemen me Sounkomouro ketin malipe ni tepin Sapwellime kalohk nanpwungen mehn Nephi kan. Oh Nephi kalohngki soahng tohto ong aramas oko. … Oh Nephi kalohk ni manaman oh mweimwei lap (tehk (3 Nephi 7:17).

Ni keimwseklahn kapeidek ong alehdi kisin likoun mweimwei ong nan tehnpas sarawi me I kin wia ni ahi wia pisop oh president en stake, I kin kalelapak rehn lih akan me pwopwoud ma ia duwen ahi kak papah irail oh arail peneinei kan. Pasapeng me I kin kalapw alehdi sang lih loaloapwoat pwuko kin kasukuhlihie oh kin kapwuriamwei. Lih oko sohte kin kaulim de lipahned, ahpw re kin kalapw pasapeng nin duwe wet. “Menlau sewese ahi pwoud en wehwehki ah pwukoa ni duwen kaun en priesthood nan imwato. I kak kaunda aht onop en pwuhk sarawi, kapakap en peneinei, oh soutik en peneinei, oh I pahn wenlahte wiewia. Ahpw I mwahuki ma ahi pwoudo kak wia ahi werek pahrek oh kihda kaweid kehlail en priesthood me ihte kelehpw kak kihda. Menlau sewese ahi pwoud en esehla ia mwomwen wiahla patriark oh kaun en priesthood nan imwato me kin kakaun oh sinsile.”

I kin kalapw medewe duwen mohngiong mehlel en lih oko oh arail pekipek. Kaun kan en priesthood kin rong soangen kahpwal pwukat rahn wet. Diren lih pwopwoud kan kin pekipeki arail pwoud kan en ahniki mweimwei en priesthood ahpw pil iangahki manaman en priesthood. Irail men ahniki werek me wia ohl loaloapwoat me kolokol priesthood me iang irail ni pahrek nan pwukoa en kairada peneinei nan ihmw me poahsoankihda Krais oh rongamwahuo.

Riei ohl akan, I inoukihong kumwail me ma kumwail oh ngehi pahn kapakapki duwen pekipek en lih pwuko, Ngehn Sarawi pahn seweseikitail en kilang pein kitail ni duwen me kitail uhdahn wia (tehk D&C 93:24) oh sewese kitail en kasawiada dahme kitail anahne wekidala oh kamwahuiala. Oh ansou en mwekid iei met!

Pwohng wet I pahn kapwurehiong padahk sang President Thomas S. Monson, me luke kitail ni atail wia me kolokol priesthood en wia “karasaras en mour pwung.” E kin kalapw katkatamankin kitail me kitail wiewia sapwellimen Kauno doadoahk oh ahniki pwuhng en alehdi Sapwellime sawas ma kitail warohng (tehk “Examples of Righteousness,” Liahona oh Ensign, , Mei 2008, 65–68). Kumwail oh ngehi kolokol mweimwei en priesthood me kopwurupwurdohr pohn sampah nan irair en ansou wet sang tohnleng kan, iei Sohn Sounpapidais oh Piter, Seims, oh Sohn. Eri emenemen ohl me alehdi Priesthood en Melkisedek kak pein daur kodoudou en ah mweimwei lella rehn Kauno Sises Krais. I koapwoaroapwoarki me kitail kalahnganki kapai laud wet. I kapakapki me kitail pahn mwakelekel oh warohng en wia weliepen Kauno ni atail pahn doadoahngki Sapwellime mweimwei sarawi. Emenemen kitail en warohng manaman en priesthood.

I kadehdeh me priesthood sarawi uhdahn kopwurupwurdohr pohn sampah nan imwin rahn pwukat oh me E dierek nan Mwomwohdiso en Sises Krais en Souleng en Imwin Rahn Akan. I pil kadehdehki me President Thomas S. Monson wia kaun en priest lapalap en priesthood koaruhsiehn nan Mwomwohdiso (tehk D&C 107:9, 22, 65–66, 91–92) oh iei ihte aramas pohn sampah me kolokol oh ahniki mweimwei en doadoahngki kih kan koaruhsiehn en priesthood. Duwen mehlel pwukat I kadehdehki mehlel ni lengileng sarawi en Kauno Sises Krais, ahmen.