Fapi Gelngin e Tharmiy

Rok Elder David A. Bednar

Ko fare Ulung ko fare Ragag nge L’agruwi Apostle


Pi cha’an nibe koel fare priesthood nib fal’ yangren fa ba labthir e bay mat’won nge gelngin—kan pi’ mot’woy nib ga’fan nge gelngiy nib thothup ni ngan yup’ fan Got u lane murwel ko tamilangeg rogon min thap.

Pi walageg nib t’uf rog, kug falflaen’ ni kad mukun gad nga ta’abang ni ngad ted fan u lane ulung ni ga’ ko priesthood holder. Rigu ba’adag med ni fan e mat’awaen med’ nge ngongal ko muruwel romed u lan ea fayleng.

Ngug pining med ngam lemniged ea bin baray ea duwer ni ke fith President David O. Mckey ngak ea girdi’en ea galasia bukun ea duw ni kafram: “Fa’anra ngiyal ney ea kan fith ngom ni ngam mog u lane ta’areb e sentence ko mang ea rib thil fa fel ko Fare Galasia ku Yesus Kristus ni Fan ko Gidii’en Got ko Tin Tomur e Rran, ma mang ea gara yog?” (“The Mission of the Church and Its Members,” Improvement Era, Nov. 1956, 781).

Sulweg ko sabathin ku President Mckay i marung’agen ea priesthood ea “gilngin ku tharmiy.” Fare Galasia ku Yesus Kristus ni Fan ko Gidii’en Got ko Tin Tomur e Rran ea ba thil ko reb ea galasia nima gay ea matwon’ raed ko tin nike buch ni kakrom, babyor nib thothup, fa e skul ko galasia. Kad ninged fan ni gelngin ea matwon ko priesthood ea ni pi fan nge gelngin napan nitay ea girdi’ nu tharmiy pa’rad nga daken loelgan Profet ni Joseph Smith.

Milwol rog ea nge yip fan ea motwon ea priesthood nge gelngin ea tharmiy. Gube meybil ning ayuw ko fare Kan Thothup rok’ Somoel nap’an gadad gubin ra fil ko fapi tin nib riyul’ nib ga’fan.

Matwon nge Gelngin ea Priesthood

Priesthood ir ea gelngin ku Got ni ke pii’ nga mo’on u fayleng ningar ngongoliy gubin ba’nen ni nge bitbit e gidii’. (muguy ko Spencer W. Kimball, “The Example of Abraham,” Ensign, June 1975, 3). Priesthood ea rogon ni Somoel ma murwel udakean e mo’on ni nge thapeg boech e ya’el. Reb ea pow ko fare Galasia ku Yesus Kristus, u kakrom nge daba’, e ba mat’awaen’ Rok. Dariy ea Galasia nib riyul’ fa’anra dariy’ e matowan’ ku tharmiy.

Urngin ea pum’on ea ra pii’ ea matow’an ea priesthood ngak. Mangil nge fel’ rarogon—gathi fal’ngin, salap, fa skul—ea ba tu’uf ko yan nag e priesthood.

Rogon ni nike pii’ motawon ea gelngin fare priesthood ea bay u lan ea bin laal ea fan ko mich: “Ba mich u wan’mad ni gidii’ e thingari yib e pong rok’ Got ngak’ u daken e pi profet ni wol, rogon ni kan midil nag, ngan tay pa’ay nga daken lolgey, ni pi’in ni bay matowrad, ni nge machib nag e Gospel nge pi gam’ing nge rogon e motochiyal ni bay.” Ere, reb ea pagal fa pum’on ea ra thapeg ea gelngin ea matow’aen ko reb ea bee’ ni bay priesthood rok ni kan pii’ gilngiy e tiyugang ni bay e key ko priesthood nib t’uf.

Fare priesthood ea thingar ri muruwliy ea matow’an u dakan ea thothup rok Got u tafinay rok, murwel rok nge fan rok. Dariy ban’nan ko priesthood ni fonowan’. Priesthood ea kan pii’ ni nge awuyeg, tow’athnag, me pii ea guman’ngak ea gidii’.

Bin tolang ea priesthood ea kan yan nag ko michmich i chilen ni ngan ngonliy u gilngin (muguy ko D&C 68:8) ngefare ofis (muguy ko D&C 107:99) ni kan athapeg. Bay fare gelngin nib thothup ku God rodad, dabda soen gad ngan nog ngodad ko tin ni ngad rined (muguy ko 2  Nephi 2:262 . Fare Priesthood ea ba gel gathi mo’owar.

President Ezra Taft Benson ea fil ni:

“Dani fal’ ni rayog ea priesthood ngak bee’ me soen nag bee’ ni nge yog ko mang ea nge rin’. Napan ni ra yog fare gelngin ea priesthood ngodad ke ning chilen nogdad ni ngad uned fa daged ea murwel nib mat’aw u fayleng, ni bachan ea kea ga’ar Somoel:

“‘… Cha’an ni dabi pii’ ngoliy nge taw e motochiyel ngak, nge fek e motochiyel ko waer gumircha’en, nge fol riy’ nib malmal, cha’nem e ke gathibthib’ (muguy ko [D&C 58:29]” (So Shall Ye Reap [1960], 21).

President Spencer W. Kimball ea kiki rog ea tin ni rib ga’afan ko murwel ko priesthood: “Enra tha’ab e michmich ko motochiyel udakaen e denen—machane de rin’ e muruwel rok. Rogon, ra ngan tha’eb e biney e m’ag ma ra bee’ ma kemus ni dabi rrin’ ban’en” (The Miracle of Forgiveness [1969], 96).

Napan ni gadad ma rrin’ ea tin rayog rodad ni ngad tay’ fan ea murwel ko priesthood, mara rog ea gilngiy ko priesthood ngodad. Gelngin ea priesthood ir ea murwel rok Got nima yan udakaen ea pagal fa mo’on ni woed gadad gubin ni bachane michaen’, ta’fan, guman’ nge mot’awaen’ ko gidii’. E pagal fa mo’on ra thapeg ea priesthood udakaen ta’ pa’ay nga dakaen loelgay machane era thang e gilngiy ko priesthood fa’anra de ta’fan, dani bi’ech, fa kireb dabun ninge pigpig.

Mat’awon ea priesthood ea riba chuchgur ko gelngin u tharmiy ya, fapi gelngin ea tharmiy ea dabiyog ni ngan kireb nag ni fanra bay u tan paa’ ea tin nib mat’aw.

Pii n’en nib mil fan ko priesthood ea ran tay nga dakean daed, machane napan ni gadaed ra gay rogon ni ngad upnguyed e pi denen rodaed fa pi ufuf rodaed fa pi n’en nib tagan, fa ni rrin’ e pin’en ni dani mat’aw ko pi ya’el ko pifaak e gidii’ ko gubin mit e tagan, ma fare tharmiy e ra palog ma fare Kan Thothup rok Somoel e ra kirbaen’. Napan ni ra chuw e Kan Thothup rok Somoel, ma dakriy fare priesthood ara fare mat’woy (muguy ko D&C 121:36–37; kubang nikan uneg ngay).

Pi walageg, fare pagal fa pum’on ni ke thap ea priesthood ngak me dibay ea mangil riy ea dabi un fa fek Got. Priesthood ni ilal fa labthir ea ba tu’uf ea matow’an nge gelngin—ea fare gelngin ea Kan ni Thothup ni ma yip fan ea pii murwel rok ea an Ga’.

E Machib ku Chitamangig

Kug ilal rok ea papa’ nge nina’ rog ni baga’ ea mich rorow. Nina’ rog ea ir reb ea fapi cha’ ko pioneer ni kakrom ni pii’ urngin bin’en rok ni fan ko Galasia rok nge gil’lungun Got. Papa’ rog ea gathi chongin ko Galasia machane ba’adag ni nge mang reb ea priest ko Catolic. Machane, da’an ni un ko fare liw ii mich mea un ko reb ea murwel ni ba talne murwel nge yim’.

Napan ea mabgol rok, ma papa’ rog ea ma un boch ko pii mo’olung ko fare Galasia ku Yesus Kristus ni Fan ko Gidii’en Got ko Tin Tomur e Rran ko tabinaw rog. Machane oren ea girdii’ ko Galasia ea da’an nang ni gathi ir reb ea gidii’ ko galasia. Ii mang reb ea coached ko softball team u lane ward romaed, me uyuweg ea pii fafal ko Scout, ma ii pii’ ea ayuw ngak nina’ rog ko fapi callings nge murwel rok. Ngug yog ngomed ea reb ea machib ni kug fil rok ea papa’ rog ni marngegean fapi mat’won nge gelngin ea priesthood.

Napan ni gub pagal mug fith ngak ea papa’ rog ko we’in ea ngan tawfe nag. Mea ga’ar ngog nib munguy, napan ni gube tuwasriy: “David, dabug un ko Galasia ni fan ngom fa nina’ fa kubea’ u bang. Bay gu un napan kug nang nib riyul’.”

Mich u wun’nug ni ulane duw nib fel yangreg ea kug weliyew biyay ea papa rog marunga’gan ea tawfe. Kafan gu sul gow ko mo’olung ko galasia mug fith ngak ko we’in ea nge tawfe. Mea saminmin mea ga’ar, “gur ea yag ma fith ngog ko we’in ea ngug tawfe. Daba’ ea bay ea duwer rog.” Mug papay nigeg ngugog ni yibe mo’onog bochuw!

Mea ga’ar, “David, galasia rom ea ma fil ni priesthood ea ni chuweg u fayleng kakrom mi kun pii biyay udakaen e tamilwol nu tharmiy ngak fare profet i Joseph Smith, fa?” Mug ga’ar e ba riyul’. Me ga’ar, “Baray ea duwer rog. Gubin ea week ma guma rungag ko bishop nima pag oren, me wenig ngak ea pii priesthood ni ngar rinead ea murwel rorad. Fa’anra galasia rom ea ribay ea priesthood riy ni fan Got, mangfan ni bitbit riy ea dani thil ko birog ea galasia ni darma’ ma’ag ea pii murwel riy?” Fare ilal ii loelgeg ea kea ma’ath. Ma dariy ea fulweg rog nib bo’or ngak ea papa’ rog.

Da’ani fal u wun’ug ni papa rog ea kea sap nga buut’ ko galasia rog ni bachan ea mithmith ko pagal nibay ea priesthood rok unlane ulung. Machane duwer rok ngog ea ba riyul ni pum’on nike yog ngak ea pii mot’awon nib thothup ku Gotea thangri thil ko boch ea pum’on. Pum’on nibay ea priesthood rok ea gathi ba feal’ ko boch ea pum’on, machane dingar ra bitbit gad nib thil. Pum’on nibay mat’owan ea priesthood rok ea thingar ri bi’ech ea ngongol rok, me mich u wan’ fare gelngin rok Got. Kea yoeg Somoel ni cha’an ni nikea taw ea pong ngak ea thangri bi’ech ea ngongol rok (muguy ko D&C 38:42).

Ridabgu patlin ea n’en ni kug fil rok a papa’ rog ni marung’agan ea mat’awon ea priesthood, ya ir ea gathi bea’ ko galasia rodad machane bea gonpeag ea ngongol nib mangil ko priesthood. Ra misiw’ nem ko Sunday ea napan a thin romow ea papa’ rog mug tay u wun’ug ni gumang reb ea “pagal nib mangil.” Dabug ni ngug mang reb ea mo’owar fa doeldoel’ ko papa’ rog niba fil ni mornga’agen fare gospel nikan fulweg. Guba adag ni nggu mang reb ea pagal nib mangil. En Ga’ ea ba’adag ni ngad tay’ fan ea gelngin ea mat’awon migad liyor, bi’ech nag dad, miged mang reb ea pagal nib mangil u gubin yang.

Gimed ra adag ni ngam nang ni bukun e duw ni yaen, man tawfe nag ea papa’ rog. Ni ngiyal’ ni kea taw ngay, man pi mot’owog ni ngu pii’ ea Aaronic nge Mekchizedek Priesthoods ngak. Reb ea binean ni kug falfalean’ ngay ea napan nike thap gelngin, nga tomur, ea gelgnin ko prieshthood.

Kug share nag marungegean ea machib ko papa’ rog ngomed ko ta’areb riyul ba’nen. Bin som’on ea kea thap ea priesthood ngom u daken pa’ay machane gathi kea mus ea murwel riy aram. Kan pii’ gelngin ea mat’awon ngom ma yul’yul’ rom ea kea mil fan ko rogon ni ngam ayuw ea girdii’, machib nge mornguy, tow’ath nge pow’iy nag ea girdii’ mornga’agen fare murwel ko tamilangeg rogon min thap.

U lane ea tiney ea ran ea thingar da ted fan miged yul’yul’ ko mat’awon ea priesthood u lan pa’ ngak ea an Ga’. Thingar dibad nga lang ni pum’on ngak fan ea an Got. Gur nge gag ea mangil ni ngad filew ea tapigpig rok Nephi, fak fak Helaman nge bin ni pining Tathapeg ni kakrom u fathik fapi ulung ko Nephites. “Ere weliy [Nephi] bogi ban’en nib yo’or ngoraed. … Ere Nephi e pigpig u gelingin nge mat’awon” (3 Nephi 7:17).

“Wenig Mu Ayuweg Ea Pumo’on Rog Nge Nangfan”

Napan ea tomur ko temple recommend mug mang reb ea bishop nge stake president, ma guma fith ea pi pinn ni walageg ko urgon ni royog ni ngu pigpig ngorad u lane tabinaw rorad. Guma rungag ea thin ko pii walag nem niba morus ma ba tu’uf ea ayuw rorad. Pin ni walageg ea gathi riyad ma nonon fa togopluw machane rogon ea sulweg ko thin rorad ea arogon: “Wenig mu ayuweg ea pum’on rog nge nangfan ea murwel rok ko priesthood ulane tabinaw romad. Kug falfalean ni guma pii ea ayuw ko bi’eg ea scriptures, maybil u tabinaw, fa mo’olung u tabinaw, ya guba’adag ni kug bea rin’. Machane guba adag ni nge pii’ boch ea pum’on rog nibay ea tow’ath ko priesthood rok ea ayuw ngog u tabinaw. Wenig mu auyweg ea pum’on rog nge mang reb ea patriarch nge priesthood leader nib mangil me ayuweg ea tabinaw rok.”

Guma lemnag ea pi thin ko pi pinn ni walageg. Priesthood leaders ea kiyad ma rung’ag ta’ab re binen’ ea daba’. Urngin ea pinn ea yad be ning ea ayuw ko pum’on nibay ea mat’awon nge gelngin ea priesthood rok. Yad ba’adag ni ngar murwel gad ea pum’on rorad nib sug ko mich u ta’abang ni fan ea michmichan u lane yofos rok Kristus nge thin ku sumoel u lane tabinaw.

Pi walageg, gube michmich nag ma rugra meybil nag ni fa’anra gad ra ti’en dad ko pii ayuw ngak ea pii pinn ni walagdad, ma fare Kan ni Thothup ea ra yib nga daken dad nge dag ngodad (muguy ko D&C 93:24) ko gad mini’ mea thiliyeg nge mo’onog nag gubin banen’ u lane yafos rodad. Kachiney ea ngad mithmith gad!

Mu Dag Ea Ngongol Nib Mataw’

Daba’ ea kug fil biyay ea fare machib rok President Thomas S. Monson ni kea pining dad ni gadad be koel fare priesthood ni ngad manged ea “ngogol ko mataw’”. Kea pug e rran ngodad ni gadad ea tapigpig rok en Somoel thingar da pii’ed ea ayuw u daken ea ngongol ni bi’ech rodad (muguy ko “Examples of Righteousness,” Liahona nge Ensign, May 2008, 65–68). Gur nge Gag ea bay gelngin ea priesthood rodow ni kan sulweg nga fayleng rok fapi tapigpig u tharmiy, John ni Tawfe, Peter, James, nge John. Ere gubin ea pum’on ni ra yog ea priesthood ngak ea thingari lamnag ea pi mat’awon en Somoel ni Yesus Kristus u daken ea yafos rok. Gube athapeag ni gadad bea tayfan ea re tawa’ath ney. Guba maybil ni thingar da bi’ech nag dad ngad ayuweged en Somoel nap’an ngad ngonliyed e gelngin nib thothup Rok. Ma gubin i gadad ma ra yog ea gelngin ea priesthood ngak.

Gube michmich nag ea pi thin ney ni priesthood ea ni fulweg nga daken ea fayleng ni fan ko fare Galasia ku Yesus Kristus ni Fan ko Gidii’en Got ko Tin Tomur e Rran. Guba be yog ni gumanang ni Thomas S. Monson ea ira bin tolang ea priest u bin tolang high priesthood ko fare Galasia (muguy ko D&C 107:9, 22, 65–66, 91–92) nge ka ir ea ma koel mat’awon fapi mithmith ko priesthood keys. Gubin ea pi riyul’ ney ea gubea yog nga daken fithngan nib thothup ko en Somoel ni Yesus Kristus, amen.