2010–2019
Kev Sib Tw Khiav hauv lub Neej No
April 2012


Kev Sib Tw Khiav hauv lub Neej No

Peb tuaj qhov twg tuaj? Vim li cas peb thiaj los nyob hauv no? Peb yuav mus nyob qhov twg tom qab peb tuag? Yeej muaj lus teb rau cov lus nug uas tib neeg sawv daws muaj no

Kuv cov kwv tij thiab cov muam, tag kis no kuv xav qhia nej txog tej kev tseeb uas kav mus ib txhis—tej kev tseeb uas yuav pab peb lub neej thiab coj peb rov qab mus dawb mus huv txog peb tsev.

Txhua qhov txhia chaw, tib neeg khiav mus ub mus no zom zaws. Muaj tej dav hlau uas xa tib neeg thoob plaws ntiaj teb no hla tej dej hiav txwv mus ua lag ua luam, ua hauj lwm, mus yos teb chaws, los sis xyuas kwv tij neej tsa. Muaj tej kev qhov txhia qhov chaw—tej kev loj thiab me uas tsheb taug, muaj neeg coob heev uas tsav tsheb tsis tu tsis tseg khiav lawv tej hauj lwm txhua txhua hnub.

Thaum muaj ib lub neej uas tsis khoom kiag li no peb puas siv sij hawm los nres thiab ntsuam xav txog ub no—puas nco qab xav txog tej kev tseeb uas yuav kav mus ib txhis?

Thaum muab tej kev tseeb uas kav mus ib txhis piv rau tej lus nug thiab tej yam uas yus niaj hnub ua, ua neej nyob no tsis tseem ceeb dab tsi li. Hmo no peb yuav noj dab tsi? Peb yuav tau thas xim dab tsi rau peb hoob nyob? Peb puas yuav cia Johnny koom pab ncaws pob ntawd? Tej lus nug zoo li no thiab lwm cov lus nug tsis tseem ceeb dab tsi thaum twg peb muaj teeb meem loj hauv peb lub neej, thaum ib tug neeg uas peb hlub raug mob, thaum ib tse neeg uas noj qab nyob zoo pib muaj mob muaj nkees, thaum lub neej no yuav xaus thiab yuav tso lub neej no tseg. Thaum ntawd peb haj yam txawj xav, thiab peb txawm muaj cuab kav txiav txim seb qhov twg thiaj tseem ceeb thiab yam dab tsi tsis tshua muaj nqi.

Tsis ntev tas los lawm kuv tau mus xyuas ib tug poj niam uas muaj mob loj heev tau ob xyoos no. Nws hais tias ua ntej nws pib mob, nws ua tej yam zoo li tu nws tsev kom zoo nkauj heev thiab teeb tej rooj tog zoo nkauj hauv nws tsev. Nws tau mus xyuas tus kws kho plaub hau ob zaug txhua lub lim piam thiab tau siv sij hawm thiab nyiaj txiag yuav khaub ncaws tshiab txhua txhua lub hlis. Nws tsis tshua caw nws cov xeeb leej xeeb ntxwv tuaj xyuas nws vim nws txhawj tsam lawv ua rau nws tej khoom tawg los sis puas tsuaj vim cov me nyuam yuav tsis ua tib zoo kov.

Ces nws txawm tau zaj xov hais tias tej zaum nws yuav tso lub neej no tseg thiab tias tej zaum nws yuav tsis ua neej nyob ntev mus. Nws hais tias thaum nws hnov tus kws kho mob qhia tias nws muaj mob li cas, nws txawm pom nws lub neej khav lawm, thiab nws txawm paub tias nws yuav siv tag nrho nws lub sij hawm uas nws tshuav no nrog nws tsev neeg thiab cov phooj ywg thiab yuav muab txoj moo zoo tso nruab plawv nws lub neej, rau qhov tej ntawd yog tej yam tseem ceeb tshaj plaws rau nws.

Peb sawv daws yeej muaj tej lub sij hawm thaum peb pom kev khav npaum li ntawd thiab, txawm tias peb tsis raug tej yam xwm txheej zoo li ntawd. Peb pom khav hais tias tej yam twg hauv peb lub neej thiaj tseem ceeb thiab peb yuav tsum ua neej nyob li cas.

Tus Cawj Seej hais tias:

”Nej tsis txhob khaws nyiaj txiag thiab qhov txhia chaw rau nej hauv ntiaj teb no, rau qhov hauv ntiaj teb no muaj ntsaum kab rwg thiab xeb noj, thiab muaj tub sab nyiag:

”Tiam sis nej cia li khaws nyiaj txiag thiab qhov txhia chaw cia rau nej saum ntuj ceeb tsheej, qhov ntawd tsis muaj ntsaum kab rwg thiab xeb noj, thiab tsis muaj tub sab nyiag:

“Vim nej tej nyiaj txiag nyob qhov twg, nej lub siab yeej yuav nyob qhov ntawd.”1

Thaum peb muab lub neej no xav mus xav los los sis muaj teeb meem ntau, tib neeg lub siab yuav tig mus rau saum ntuj, xav tau lub ntuj txoj kev pab teb cov lus nug tseem ceeb tshaj plaws uas hais tias: Peb tuaj qhov twg tuaj? Vim li cas peb thiaj los nyob hauv no? Peb yuav mus nyob qhov twg tom qab peb tuag?

Yus nrhiav tsis tau cov lus teb rau cov lus nug no hauv cov tsev kawm ntawv tej ntaub ntawv los sis xyuas hauv Internet. Cov lus nug no loj dua lub neej no. Tej no hais txog lub neej uas nyob mus ib txhis.

Peb tuaj qhov twg tuaj? Nov yog ib lo lus nug uas txhua tus neeg muaj, txawm tias nws tsis hais qhia tawm los xij.

Tus Thwj Tim Pov Lauj qhia cov neeg Athees saum lub roob hais tias “peb yog Vajtswv cov me nyuam.”2 Vim peb paub hais tias peb lub cev nqaij daim tawv los ntawm peb niam txiv hauv ntiaj teb no, peb yuav tsum kawm seb Pov Lauj cov lus no txhais tau li cas tiag. Tus Tswv qhia tias ”tus ntsuj plig thiab lub cev thiaj yog neeg.”3 Yog li ntawd tus ntsuj plig thiaj yog Vajtswv yug. Tus kws sau phau Hinplus hais tias Nws yog “Leej Txiv rau cov ntsuj plig.”4 Tag nrho tib neeg sawv daws thiaj yog Nws ”cov tub thiab cov ntxhais.”5

Peb pom tau hais tias cov kws sau paj huam uas tau kev tshoov siab tau sau tej xov rau peb xav txog qhov no. William Wordsworth sau qhov tseeb hais tias:

Peb txoj kev yug los tsuas yog kev tsaug zog thiab tsis nco qab qhov qub;

Tus Ntsuj Plig uas nyob hauv peb lub cev, zoo li ib lub Hnub Qub,

Tau muaj sia nyob puag ua ntej yug los,

Thiab tuaj deb deb tuaj mog:

Peb tsis hnov qab txhua nrho,

Peb tseem npaj siab tos,

Rau qhov peb los saum ntuj ceeb tsheej los

Los ntawm Vajtswv lub tsev los:

Ua me nyuam mos liab peb tseem paub txog lub ntuj ceeb tsheej!6

Niam txiv xav txog lawv txoj kev lav ris kom qhuab qhia, txhib, thiab coj qhia thiab ua yam ntxwv. Thiab thaum niam txiv ntsuam xav seb, cov me nyuam—feem ntau yog cov tub thiab ntxhais hluas—uas nug lo lus nug tob tob hais tias Vim li cas peb nyob no? Feem ntau, tsuas hais rau lawv tus kheej thiab hais tias, Vim li cas kuv nyob no?

Peb yuav tsum muaj kev ris txiaj npaum li cas vim tus uas Tsim peb tau npaj ib lub ntiaj teb thiab tso peb nyob no es tsis nco qab txog peb lub qub neej kom peb thiaj raug tau txoj kev sim siab, muaj cib fim qhia seb peb puas yuav ua zoo, xwv kom peb yuav tsim nyog tau txhua yam uas Vajtswv tau npaj tseg rau peb.

Tiag tiag mas, peb ib lub hom phiaj rau lub neej hauv ntiaj teb no yog kom peb yuav tau ib lub cev nqaij daim tawv thiab pob txha. Peb kuj tau txais lub txiaj ntsim uas yog kev ywj siab xaiv. Peb muaj hmoov vim peb muaj cai xaiv seb peb xav tau dab tsi. Nyob no peb kawm los ntawm tej yam uas peb ua yuam kev. Peb paub tau qhov zoo thiab qhov phem sib txawv li cas. Peb paub saj yam iab thiab yam qab. Peb kawm paub tias yus yuav raug tej yam xwm dab tsi thaum yus ua ib yam dab tsi lawm.

Thaum ua raws li Vajtswv cov lus txib, peb thiaj yuav tsim nyog tau ”tsev” uas Yexus hais txog thaum Nws hais tias: “Kuv Txiv lub tsev muaj chaw ntau rau sawv daws nyob. … kuv tu tau chaw rau nej lawm … kuv nyob qhov twg nej yeej yuav nrog kuv nyob qhov ntawd.”7

Txawm peb los ”saum ntuj ceeb tsheej los” rau hauv ntiaj teb no, lub neej no pheej mus lawm tom ntej. Cov me nyuam loj hlob ua tub thiab ntxhais hluas, thiab lawv maj mam tiav nkauj tiav nraug. Hauv peb lub neej peb kawm hais tias peb yuav tsum ncav tes rau saum ntuj ceeb tsheej thaum peb ua neej nyob.

Vajtswv, peb Leej Txiv, thiab Yexus Khetos, peb tus Tswv, tau pua kev rau peb taug kom ua neeg zoo tag nrho. Nkawd caw peb los ua raws li tej kev tseeb thiab ua neeg zoo tag nrho, ib yam li Nkawd yog neeg zoo tag nrho.8

Tus Thwj Tim Pov Lauj muab lub neej no piv rau txoj kev sib twv khiav. Nws yaum cov neeg Hinplus tias, “Peb cia li muab txhua yam … kev txhaum uas khi peb tso pov tseg, thiab peb cia li sib tw khiav ncaj nraim mus kom txog tus ciam tom kawg.”9

Thaum peb rau siab ua peb yuav tsum nco qab tej lus qhia uas hais tias: “Cov neeg uas khiav ceev tshaj los yuav khiav tsis yeej txhua zaus uas muaj kev sib tw khiav, thiab cov neeg uas siab tawv heev los yuav sib ntaus sib tua tsis yeej lawm.”10 Tus uas tau lub nqi zog yog tus uas thev mus txog thaum kawg.

Thaum xav txog txoj kev sib tw khiav hauv lub neej no, kuv nco txog lwm txoj kev sib xeem khiav, li thaum ua me nyuam yaus. Kuv thiab kuv cov phooj ywg peb yuav muab ib rab riam coj los tw ntoo txua cov me nyuam nkoj. Ces mam li kho ib daim ntaub rau lub nkoj, ces peb mam li tso cov nkoj rau hauv tus Dej Provo uas khiav ceev ceev. Ces peb mam li khiav raws ntug dej saib cov nkoj hauv tus dej uas ntws ceev ceev ntawd thiab tej thaum cov dej ntws qeeb qeeb hauv cov dej uas tob.

Muaj ib zaug thaum sib xeem nkoj li no, peb pom hais tias ib lub nkoj ua txhua lub nkoj ntej thaum yuav txog qhov kawg. Ces txawm muaj lub yis dej uas rub lub nkoj ntawd, es ua rau lub nkoj ntxeev hlo. Nws kiv mus kiv los, tsis rov qab los txog nruab nrab tus dej ntawd. Thaum kawg nws cia li los tsoo tej ntoo thiab khib nyiab ntawm ntug dej.

Cov nkoj me me uas peb txuas ntawd tsis yog nkoj khov kho, tsis muaj tus duav uas yus siv tsav lub nkoj, thiab tsis muaj lub cav. Tej no tsuas raws tus dej—raws txoj kev yooj yim uas tsis muaj dab tsi thaiv lawv kev.

Peb tsis zoo li cov nkoj me no, peb muaj tej cwj pwm uas los saum ntuj los uas yuav coj peb kev. Peb tsis yog yug los hauv ntiaj teb no kom ntab raws tej kev yooj yim hauv lub neej no tiam sis peb yuav tsum txawj xav, ntaus tswv yim, thiab ua tej yam zoo.

Peb Leej Txiv Saum Ntuj Ceeb tsheej tsis xa peb los nyob hauv ntiaj teb no tsis muaj ib txoj kev txais Nws kev coj qhia kom peb rov qab los dawb los huv txog tsev. Qhov uas kuv hais no yog kev thov Vajtswv. Kuv kuj hais txog qhov uas peb hnov tau tus Vaj Ntsuj Plig Dawb Huv lub suab yaus yaus, thiab kuv kuj hais txog cov vaj lug kub dawb huv, uas muaj tus Tswv thiab cov yaj saub tej lus qhia—txhua yam puav leej no pab peb khiav mus tau txog qhov kawg.

Nyob hauv peb lub neej mas, yeej muaj tej thaum uas peb poob siab, peb qaug zog, los sis muaj mob muaj nkees—thiab laus zuj zus mus, thaum yuav txog lub caij nplooj ntoo zeeg hauv peb lub neej ces laus heev ces mam li tso lub neej no tseg.

Txhua tus neeg uas txawj xav tau nug tus kheej ib yam li Yauj thaum ub hais tias: “Yog neeg tuag lawm, nws puas yuav rov muaj sia?”11 Txawm tias peb sim tso lo lus nug pov tseg tsis xav txog li, peb pheej xav txog. Tib neeg sawv daws yeej yuav tuag mus. Cov uas twb laus laus thiab qaug zog yeej yuav tuag. Tej thaum tib neeg uas tsis tau txog ib nrab lawv lub neej tseem yuav tso lub neej no tseg thiab tej thaum me nyuam yaus kuj tso lub neej no tseg thiab.

Tiam sis puas muaj ib lub neej tom qab kev tuag? Txoj kev tuag puas yog qhov kawg? Robert Blatchford, hauv nws phau ntawv God and My Neighbor, tsim txom cov neeg ntseeg Yexus tej kev ntseeg zoo li kev ntseeg Vajtswv, Khetos, kev thov Vajtswv, thiab qhov uas neeg tsis txawj tuag. Nws hais khav khav tias kev tuag yog qhov kawg tsis muaj lwm lub neej thiab tsis muaj leej twg uas hais tau tias qhov no muaj tseeb. Ces txawm muaj ib qho txawv. Nws tej kev tsis ntseeg tau pib ploj mus. Sawv daws pom nws tej lus tsis tseeb nws tsis muaj chaw khiav nkaum. Nws maj mam taug kev rov qab los ntseeg txoj kev teev ntuj uas nws tau luag thuam thiab tau tso pov tseg lawm. Vim li cas nws thiaj pauv siab li no? Yog vim nws tus poj niam tuag lawm. Nws tu siab nrho thaum nws mus pom nws tus poj niam lub cev. Nws rov qab ntsia lub ntsej muag uas nws hlub heev. Thaum tawm los, nws hais rau ib tug phooj ywg hais tias: ”Yog nws lub cev, tiam sis tsis yog kuv tus poj niam lawm. Txhua yam twb pauv lawm. Twb tshem ib yam dab tsi uas thaum i nyob hauv nws. Nws tsis zoo li qub. Dab tsi ploj lawm yog tias tsis yog nws tus ntsuj plig?”

Yav tom qab ntawd nws sau hais tias: ”Kev tuag tsis zoo li ib txhia xav. Nws zoo li yus mus nyob hauv lwm chav tsev. Nyob hauv lwm chav tsev ntawd peb yuav nrhiav pom … cov poj niam thiab txiv neej thiab cov me nyuam uas peb hlub uas twb tso lub neej no tseg lawm.”12

Kuv cov kwv tij thiab cov muam, peb paub lawm hais tias kev tuag tsis yog qhov kawg. Cov yaj saub uas muaj sia nyob twb qhia li no hauv txhua lub caij nyoog. Kuj nrhiav pom li no hauv peb cov vaj lug kub dawb huv. Hauv Phau Ntawv Maumoos peb nyeem tau cov lus nplij siab uas hais tias:

”Nim no, hais txog saib tej ntsuj plig yuav nyob li cas nruab nrab txoj kev tuag thiab txoj kev sawv hauv qhov tuag rov qab los--Saib seb, nws raug ua rau koj paub lawm los ntawm ib tug tim tswv, tias tag nrho tej tib neeg tej ntsuj plig, thaum uas lawv ncaim ntawm lub cev uas txawj ploj txawj tuag no, muaj tseeb tiag, tej tib neeg sawv daws tej ntsuj plig, txawm yog lawv zoo los phem, tau raug coj mus tsev mus cuag Vajtswv tus uas tau muab txoj sia rau lawv.

“Thiab lub sij hawm ntawd yuav tau muaj tias, tej ntsuj plig ntawm cov uas ncaj ncees tau raug txais mus nyob rau hauv ib qho chaw zoo siab, uas hu ua yeeb tsheej, ib qho chaw uas tau so, ib qho chaw uas muaj kev thaj yeeb, qhov uas lawv yuav tau so tseg tag nrho lawv tej teeb meem thiab tseg tag nrho tej kev txhawj, thiab tej kev tu siab.”13

Tom qab tus Cawm Seej tuag lawm thiab Nws lub cev nyob hauv lub ntxa peb hnub lawm, tus ntsuj plig rov qab nkag mus hauv nws lub cev. Tau dov daim lag zeb mus, thiab tus Txhiv Dim uas sawv rov los tau tawm los, muaj ib lub cev nqaij daim tawv uas tsis txawj tuag lawm.

Yog xav teb tau Yauj lo lus nug uas hais tias, “Yog tias ib tug neeg tuag, nws puas yuav rov qab muaj sia nyob?” xav txog thaum Maiv Liag thiab lwm cov neeg uas tuaj txog lub ntxa thiab pom ob tug neeg uas ci ntsa iab uas hais rau nkawd tias: “Ua li cas nej tuaj nrhiav tus neeg ciaj ntawm cov neeg tuag no? Nws tsis nyob ntawm no, tiam sis twb sawv lawm.”14

Vim Yexus tau kov yeej lub ntxa, peb sawv daws yuav sawv rov qab los thiab. Nov yog txoj kev txhiv tib neeg dim. Pov Lauj sau hais tias: “Cov neeg saum ntuj lub cev zoo tsis thooj cov neeg hauv ntiaj teb no lub cev; cov neeg saum ntuj thiab cov neeg hauv ntiaj teb no lub cev nyias zoo nyias lawm ib yam.”15

Peb yeej xav tau lub yeeb koob xilethi-aus. Peb xav mus nrog Vajtswv nyob tas mus ib txhis. Peb xav nyob hauv ib tse neeg uas yuav nyob ua ke tas mus li. Tau tej koob hmoov zoo li no thaum peb rau siab ntso ua, nrhiav, hloov siab lees txim, thiab thaum kawg ua zoo.

Peb tuaj qhov twg tuaj? Vim li cas peb thiaj los nyob hauv no? Peb yuav mus nyob qhov twg tom qab peb tuag? Yeej muaj lus teb rau cov lus nug uas tib neeg sawv daws muaj no. Kuv hais tag siab tag ntsws thiab txo hwj chim los, hais lus tim khawv tias tej yam uas kuv hais no muaj tseeb.

Peb Leej Txiv Saum Ntuj Ceeb Tsheej zoo siab rau cov uas ceev Nws cov lus txib. Nws kuj txhawj txog tus me nyuam uas poob zoo, tus tub los sis ntxhais hluas uas tsis mloog lus, tus uas ua loj leeb, tus niam los sis txiv uas tsis ua nws tej hauj lwm. Tus Xib Hwb zoo hais lus mos mos rau cov neeg no thiab rau sawv daws hais tias: ”Cia li rov qab los. Cia li los saum no. Cia li los tsev. Cia li rov qab los. Los cuag kuv.”

Ib lim piam tom ntej peb yuav ua koob tsheej nco txog hnub Easter. Peb yuav xav txog tus Cawm Seej lub neej, Nws txoj kev tuag, thiab Nws txoj Kev Sawv Rov Los. Ua ib tug neeg tim khawv tshwj xeeb txog Nws, kuv hais lus pov thawj rau nej tias Nws muaj sia nyob thiab Nws tos peb rov qab los. Kuv thov hauv Nws lub npe dawb huv kom peb yuav rov qab mus ntsib nws—es thov los ntawm Yexus Khetos, peb tus Cawm Seej thiab tus Txhiv Dim lub npe, amees.